Impaseseg na United Nations ya amin a totoo et mikoopera ed sakey tan sakey, respetoen day kanepegan na arum, tan protektaan day kaliberliber da. Akin? Singa imbaga nen Maher Nasser diad UN Chronicle, “say panguuman na klima, krimen, idarakel na agpatas ya panagtrato, agmanundan guerra, pagmaliw ya refugee, terorismo ed interon mundo, makaalis iran sakit, tan arum ni so mangaapekta ed . . . amin ya totoo.”

Wala ni ingen iray angipaseseg ya kaukolan so saksakey a gobierno ed interon mundo. Kaibad sikara so sakey ya Italian philosopher, managsulat, tan politiko ya si Dante (1265-1321) tan say eksperto ed physics ya si Albert Einstein (1879-1955). Panisiaan nen Dante ya anggapoy kareenan no nandurumay gobierno ed mundo. Imbaga to imay imbaga nen Jesu-Kristo ya “no naapag so sakey a panarian, nageba itan.”​—Lucas 11:17.

Ag-abayag kayari na World War II, nen inusar so duaran atomic bomb, nansulat si Albert Einstein ed General Assembly na United Nations. Imbaga to: “Kaukolan ya onkiwas a tampol so United Nations ya manggaway paraan pian niwalay kaligenan ed amin a bansa tan mangiletneg na sakey a tuan gobierno ed interon mundo.”

Balet kasin makaseguro tayo ya sarag na saray manuley so mangiletneg na onian mabiskeg ya gobierno, tan ag-ira magmaliw ya kurakot tan maruksa? Odino magmaliw ira lanlamang ya singa saramay datin manuley? Nanonotan tayo laingen imay imbaga na British historian ya si Lord Acton. Oniay imbaga to: “No walay pakayarim, main-inomay moy manggaway mauges, tan no mas baleg so pakayarim, mas mauges so nagawaan mo.”

Anggaman ontan, pian magmaliw ya maliket tan nawalaan na tuan kareenan so totoo, kaukolan so pankakasakey. Balet panon itan ya nagawa? Realistiko kasi itan? Say ebat na Biblia et on. Sarag to tan talagan nagawa itan. Panon? Aliwan diad panamegley na gobierno ed mundo ya uuleyan na saray kurakot ya politiko. Imbes, nagawa itan panamegley na gobierno ya inletneg na Dios. Aliwan satan labat, ipanengneng na satan ya gobierno ya kanepegan ton uleyan iray pinalsa to. Anto itan ya gobierno? Tinawag itan ed Biblia ya “Panarian na Dios.”​—Lucas 4:43.

Say Panarian na Dios so sankanonot nen Jesu-Kristo sanen imbaga to iyan pangaligan a pikakasi: “Onsabi la komon so Panarian mo. Nagawa komon so linawam . . . diad dalin.” (Mateo 6:9, 10) On, seguroen na Panarian na Dios ya nagawan nagawa so linawa na Dios diad dalin, aliwan say linawa na saray maagum ed pakayari odino makasarilin totoo.

Say Panarian na Dios et tinawag met ya “Panarian na tawen.” (Mateo 5:3) Akin? Anggaman uleyan to so mundo, ag-itan manuley diad dalin noagta manlapud tawen. Antoy labay ya ibaga na satan ey? Agkaukolan na satan ya gobierno so materyal odino pinansyal a suporta. Talagan nainawaan la iray totoon uleyan to!

Ipapanengneng na salitan “panarian,” ya say Panarian na Dios et sakey ya gobiernon uleyan na sakey ya ari. Say Ari​—si Jesu-Kristo—​et inikdan na Dios na autoridad. Oniay ibabaga na Biblia nipaakar ed si Jesus:

• “Niiter naani ed sikato so pananguley. . . . Say ilaknab na pananguley to tan say kareenan et agmangangga.”​—Isaias 9:6, 7.

•   “Niiter ed sikato so panuley, kagalangan, tan panarian, pian manlingkor ed sikato iray totoo ed nanduruman nasyon tan lenguahe. Say uley to . . . et agnaderal.”​—Daniel 7:14.

• “Say panarian na mundo et nagmaliw a Panarian na Katawan [Dios] tayo tan say Kristo to.”​—Apocalipsis 11:15.

Bilang ebat ed samay pikakasi ya imbangat nen Jesus, sumpalen na Panarian na Dios so linawa na Dios diad dalin. No manuley la itan, naaralan na amin ya totoo ya asikasoen so planeta tayo pian magmaliw lamet ya mabuna tan napanoy nanduruman klase na pinalsa.

Nagkalalo la, bangatan na Panarian na Dios so amin ya sakop to. Amin et nabangatan na saksakey ya estandarte. Anggapo lay panlalaban odino inkaapag-apag. “Anggapo lay gawaen dan makapasakit odino makaderal . . . lapud say dalin et napano na kakabatan ed si Jehova a singa saray danum a mamapano ed dayat,” so ibabaga na Isaias 11:9.

Amin ya manaayam ed dalin et magmaliw ya singa samay labay na United Nations ya nagawa​—mankakasakey tan mareen la so amin. “Manliket iran maong ed agnaparaan a kareenan,” so ibabaga na Salmo 37:11. Onsabi panaon, anggapo la ray salitan “krimen,” “polusyon,” “kairapan,” tan “guerra.” Balet kapigan iya nagawa? On, kapigan manuley so Panarian na Dios? Panon ton gawaen itan? Tan panon kan nagunggonaan ed uley to? Amtaen tayo.