NO PANON MON NASARAG SO STRESS
Posible so Bilay ya Anggapoy Stress
Makatulong ed sikatayo so karunongan ya walad Biblia pian napaliisan so stress. No diad sikatayon mismo labat, agtayo naekal iray bengatlan makapa-stress. Balet sarag itan na Manamalsa. Wala ingey tinuro to ya ontulong ed sikatayo—si Jesu-Kristo. Asingger lan manggawa na saray mas makapakelaw a bengatla nen saray ginawa to legan na impanbilay tod dalin bilang too. Singa bilang:
PAABIGEN NEN JESUS IRAY MANSASAKIT, A SINGA GINAWA TO NENSAMAN.
“Inyaakar dad sikato so amin a manlilikna na nanduruman sakit . . . , tan sikaray pinaabig to.”—MATEO 4:24.
MANGITARYA SI JESUS NA PANAYAMAN TAN NAAKAN PARAD AMIN.
“Mangipaalagey ira [saray uleyan na Kristo] na kaabungan tan manayam ira ditan, tan mantanem ira na kaubasan tan kanen day bunga to. Ag-ira mangipaalagey tan sananey so manayam, ag-ira mantanem tan sananey so mangan.”—ISAIAS 65:21, 22.
DIAD PANULEY NEN JESUS, NIWALAY KAREENAN TAN SEGURIDAD DIAD INTERON MUNDO.
“Diad saray agew to et ombulaslas so matunong, tan inerman a pasen et walay kareenan anggad kaandi na bulan. Saray magmaliw a sakop to et manlapud sakey a dayat ya anggad sananey a dayat tan manlapud Ilog anggad saray sampot na dalin. . . . Saray kakabusol to et dildilan day dabok.”—SALMO 72:7-9.
EKALEN NEN JESUS SO AG-INKAHUSTISYA.
“Kasian to so pobri tan say mairap-bilay, tan isalba toy bilay na saray maniirap. Iliktar to ra ed panagpairap tan karuksaan.”—SALMO 72:13, 14.
PAANDIEN NI INGEN NEN JESUS SO PANIIRAP TAN PATEY.
“Anggapo lay patey, anggapo met lay panermen tan panakis tan panotot.”—APOCALIPSIS 21:4.
