Akin et Anggapo Lay Respeto na Totoo ed Kapamilya Ra?
NO AKIN YA IMPORTANTIN RESPETOEN SO KAPAMILYA
Walay deen na pamilya no igagalang na asawan laki, asawan bii, tan ananak so sakey tan sakey.
-
Ibabaga na libron The Seven Principles for Making Marriage Work ya no rerespetoen na sanasawa so sakey tan sakey, nipanengneng da itan ed “inagew-agew ya gagawaen da, melag man itan o baleg.”
-
Ipapanengneng na research ya no naaralan na ananak ya respetoen so arum, mas nawalaan iray kompiyansa ed sarili da, maong so relasyon dad atateng da, tan naiwasan day mankaproblema ed isip tan emosyon.
NO ANTOY SARAG MON GAWAEN
Manplano bilang pamilya. Unona, no sakey kan ulo na pamilya, linew mo ed kapamilyam no kasin pareho kayoy pakatalos ed labay ya ibaga na “respeto.” Komadua, isulat mo no anto ray ugali o kagagawa ya nepeg tan agnepeg ed loob na pamilya. Komatlo, pantongtongan yon sankapamilya so plano yo pian amta yo no panon yon ipanengneng so respeto ed sakey tan sakey.
Mangipanengneng na maong ya alimbawa. Kasin babalawen mo ray kapamilyam no nalilingo ra, iismolen moy opinyon da, ibabaliwalam odino babaraen mo ra no mansasalita ira?
Tip: Imbes ya panirapan ni na asawam tan ananak mo ya naalay respetom, ipasen mon karapatan da itan.
Mansiansian magalang anggano walay agmo agustoan. No mitotongtong kad kapamilyam, paliisan moy mangibaga na “lanang ka lan” odino “agkan balot.” Kasi no ontan so ibagam, singam aatakien so inkatoo da, kanian nasakitan ira tan ombaleg laingen so agpantatalosan.
NO ANTOY GAGAWAEN MI
Tutulongan na Saray Tasi nen Jehova iray pamilya ya respetoen day sakey tan sakey. Kanian mabetbet ya atan so topic ed saray artikulo, libro, brosyur, tan video ya ipa-publish mi, tan anggapoy bayar na saratan.
PARAD SANASAWA: Saray serye na artikulo ya Tulong Parad Pamilya et makatulong ed asawan laki tan bii pian . . .
-
amta day ondengel
-
tundaan day aliwliwan kagagawa ya agmaneselan tan agmantongtong
-
ag-ira mankolkol
(I-search so “Tulong Parad Pamilya” diad jw.org/pag)
PARAD ATATENG: Saray serye na artikulo ya Tulong Parad Pamilya et makatulong ed atateng pian nibangat da ray ananak da ya . . .
-
onunor
-
ontulong ed saray kimey ed abung
-
mangibagay “please” tan “salamat”
(I-search so “Pamabaleg na Ananak” tan “Pamabaleg na Tinedyer” diad jw.org/pag)
Nengnengen met so apendise ya, “Tanong ng mga Magulang,” diad libron Ang mga Tanong ng mga Kabataan—Mga Sagot na Lumulutas, Tomo 1. (I-search so “Tanong ng mga Magulang” diad jw.org/tl)
PARAD SARAY KABATAAN: Diad seksion ya Saray Kabataan diad jw.org/pag et wala ray artikulo, video, tan worksheet ya makatulong ed saray kabataan pian . . .
-
nakasundo da ray atateng tan agagi da
-
marespeto iran mitongtong ed atateng da nipaakar ed patakaran ed abung
-
naala day tiwala na atateng da
(I-search so “Saray Kabataan” diad jw.org/pag)
Libre so pangusar ed website ya jw.org. Anggapoy kaukolan ya bayaran, subscription, odino pampa-membro, tan agmet alaen so personal ya impormasyon mo.
