MAINOMAY parad saray bubuyog so ondapo ed anggan anton anggulo. Panon dan gagawaen itan?

Nonot mo pa: Pian dugay i-landing na bubuyog, kaukolan ton bawasay peles to ya anggad ngalngali la ontunda. Sakey ya paraan pian nagawaan to itan et kaukolan to ya sukaten so peles to tan say distansia na dapoan to, insan to la patantanen o papelesen so tikyab to. Mairap iyan gawaen na dakel ya insekto ta sanabay so mata ra tan aliwan saksakey so akapokusan na mata ra, kanian agda nasukat so distansia.

Say pakanengneng na bubuyog et duma ed totoo ta amta tayo no arawi o asingger so sakey a bengatla. Say bubuyog balet et nanengneng da ya baleg so sakey a bengatla no asinggeran da. No diman ira onaasingger, diman met ombabaleg so nanenengneng da. Base ed ginawan eksperimento diad Australian National University, babawasan na bubuyog so peles na tikyab to pian mansiansia so kabaleg na nanenengneng to. Kanian no akasabi lay bubuyog ed dapoan to, say peles to et abawasan la, ya anggad ngalngali la ontunda pian dugarugay idapo to.

Imbaga na journal ya Proceedings of the National Academy of Sciences: “Say inkasimpli na teknik na bubuyog no ondapo . . . et makatulong diad panggawa na makatikyab iran robot.”

Antoy nibagam? Kasin say teknik na bubuyog no ondapo et lapud ebolusyon? Odino walay nandesinyo?