PARAD ATATENG
6: Disiplina
NO ANTOY LABAY YA IBAGA NA SATAN
Say labay ya ibaga na salitan disiplina et pangigiya odino pambangat. No maminsan, kaiba met ed satan so pangipetek ed aliwliwan ugali na anak. Balet maslak ya ontutukoy itan ed pangipasal ed anak no antoy duga tan aliwa ya makatulong ed sikaton manggawa na dugan desisyon.
NO AKIN YA IMPORTANTE
Diad agano ni ran dekada, ngalngali anggapo lay ateng ya mandidisiplina ed ananak da, ta iisipen da ya ompan onabeba so pakanengneng na ananak da ed sarili da. Balet, saray marunong ya atateng et manggagawa na makatunongan iran totontonen tan ipapasal da ray ananak da ya unoren iratan.
“Kaukolan ya amta na ananak no anto ray nayari tan agda nayarin gawaen pian ombaleg iran makalakal. No anggapoy disiplina, saray ananak et singa barko ya anggapoy timon—nayarin nabalang ira odino anggapoy maong ya pansumpalan da.”—Pamela.
NO ANTOY NAYARIN GAWAEN MO
Agmanguuman-uman. No ag-unoren na anak mo iray totontonen, dapat anien toy resulta na ginawa to. Pero, nepeg mon komendaan so anak mo no inunor to iratan.
“Lanang kon kokomendaan iray ananak ko no maunor ira anggano dakel lay totoon agmaunor. No kokomendaan ira, mas mainomay dan awaten so panangipetek ya kaukolan da.”—Christine.
PRINSIPYO ED BIBLIA: “Antokaman so itatanem na sakey a too, saya met so anien to.”—Galacia 6:7.
Magmaliw ya makatunongan. No mangiter na disiplina, ikonsidera so edad, abilidad, tan kabelat na lingo na anak. Maslak et mas epektibo so disiplina no say anien ton resulta et mikonektaan ed samay lingo to—singa bilang, no aliway panguusar to ed cellphone to, nayarin bawien yo odino limitaan yoy pangusar to. Balet, agyo la pababalegen iray angkekelag ya lingo to lapu labat ta onsyosyodot kayo.
“Sisimbangen ko no kasin gagagalaen na anak ko ya agto ak unoren odino alingo labat ed desisyon to. Walay pandumaan na makapuy ya ugali a kaukolan ya ekalen tan say lingo ya kaukolan labat ya ipaimano.”—Wendell.
PRINSIPYO ED BIBLIA: “Kaamaan, agyo papasyodoten iray ananak yo, pian ag-ira nadismaya.”—Colosas 3:21.
Magmaliw ya maaro. Say disiplina et mas mainomay ya awaten tan iyaplika na ananak no amta da ya gagawaen itan na atateng da lapud inaro da ra.
“Nen alingo so anak mi, impaseguro mid sikato ya proud kamid amin ya maong ya desisyon tod apalabas. Impaliwawa mid sikato ya say lingo to et agmaneral ed reputasyon to basta ipetek to itan tan wadia kami labat ya ontulong ed sikato.”—Daniel.
PRINSIPYO ED BIBLIA: “Say aro et maanos tan maomaong.”—1 Corinto 13:4.
Ompan Nagustoan Mo Met
SAY PANAG-BANTAYAN
Panon so Nepeg Mon Pandisiplina ed Ananak Mo?
Dedeskribien na Biblia so taloran paraan na epektibon panagdisiplina.
ONLIING!
No Panon Mon Disiplinaen so Tinedyer Lan Anak Mo
Say gagala na disiplina et pian naibangat so anak. Makatulong iray prinsipyod Biblia pian naibangat moy tinedyer mo ya ontulok imbes ya manrebelde.
