Saray napantiwalaan ya totoo et panmamatalekan na saray ateng, kakaaro, tan amo da. Ontutumbok irad saray totontonen, totooren da ray impromisa da, tan lanang dan ibabagay tua.

Diad amin lawarin situasyon, nayarin abuloyan da ka ya gawaen so labay mo no lanang mon ipapanengneng ya napantiwalaan ka.

“Say sankaabigan ya paraan pian naalam so tiwala na atateng mo et no ipanengneng mon makalakal tan responsable ka, aliwa labat ya no kaibam ira noagta anggano anggapo ira.”​—Sarahi.

PRINSIPYO ED BIBLIA: “Itultuloy yon paneknekan no anto kayo.”​—2 Corinto 13:5.

Balanglan labay mon naala so tiwala na arum odino labay mon ipawil so tiwala dad sika, makatulong iraya.

Magmaliw ya matua. Mainomay ya naandi so tiwala na totoo ed sika no mantitila ka. No matua ka tan agmo iyaamot iray lingom, mantiwala so arum ed sika.

“Mainomay ya ibagay tua no balibali situasyon. Pero no ibagam so tua anggano magmaliw ya aliwliwa so pakanengneng dad sika, mas naalam so tiwala da.”​—Caiman.

PRINSIPYO ED BIBLIA: “Labay mi manbilay a matua ed amin a bengatla.”​—Hebreo 13:18.

Dapat ya nailaloan ka. Diad sakey ya survey ed U.S., 78 porsiento ed saray propesyonal ya manpipili tan mangaasikaso ed saray empleyado et ibabaga ra ya “sakey ed saray taloran sankaimportantian ya aanapen da ed sakey ya empleyado” et sikatoy nailaloan. No ipapasal mo la natan so sarilim pian nailaloan ka, ontulong iyad sika no adulto ka la.

“Napapansin na saray atateng ko no responsable ak tan gagawaen ko ray kimey ed abung anggano agda ak igaganggan. No ontan so gagawaen ko, mas mantitiwala irad siak.”​—Sarah.

PRINSIPYO ED BIBLIA: “Matalek ak a gawaen mo ’ya, . . . ta amtak a mas nagkalalo ni so gawaen mo nen saray imbagak.”​—Filemon 21.

Magmaliw ya maanos. Sankanengneng so ibabaleg na saray kabataan, balet kaukolan so panaon pian naimano na arum no kasin sikaray makalakal tan responsable la. Kanian kaukolan day mananos.

“Agmo nailaloan ya pantiwalaan kan tampol na saray ateng mo no aminpinsan kan nagmaliw ya responsable. Kaukolan so panaon tan tuloytuloy ya pansagpot.”​—Brandon.

PRINSIPYO ED BIBLIA: “Isulong yo so . . . anos.”​—Colosas 3:12.