Nanduruma so teorya nipaakar ed sayan sakit, balet anggapoy makaamta no antoy panlalapuan to. Anggan antoy gawaen da et agnababawasan so bilang na ompapatey. Ag-naekal ed nonot nen Semmelweis so dakerakel ya ina ya maniirap tan kalkalnan ompapatey, kanian determinado ya anapen so panlalapuan na satan ya sakit tan patundaen itan.

Diad ospital ya nantrabahoan nen Semmelweis et walay duaran clinic ya parad saray manaanak, tan makapakelaw ta mas dakdakel so ompapatey ed samay sakey ya clinic nen samay sakey. Say pandumaan labat na sayan duaran clinic, say ipapasal ed samay sakey et saray estudyante ed medisina tan diad samay sakey et saray midwife. Balet, akin et baleg so pandumaan na bilang na ompapatey ed saratan a clinic? Pian naamtaan so rason, in-research nen Semmelweis iray posiblin panlalapuan na sakit, balet agto nin siansia nalmo itan.

Diad gapo na 1847, walay anengneng nen Semmelweis ya posiblin rason. Say katrabaho tan kaaro to ya si Jakob Kolletschka et inatey lapud blood poisoning nen asugat legan ton eeksaminen so sakey a bangkay. Nen abasa nen Semmelweis so report na autopsy ed si Kolletschka, naamtaan to ya walay pamparehoan na saya ed saramay biktima na childbed fever. Kanian inisip nen Semmelweis ya posiblin  say tinawag ton “samal” manlapud saray bangkay so makaka-impeksion ed saray malukon a pasyente, ya panlalapuan na childbed fever. Saray doktor tan estudyante na medisina, ya mano-autopsy antis ya oonlad samay sakey ya clinic, et agda amtan niyaalis day sakit ed saray malukon ya pasyente legan na check-up odino panaanak da! Mas daiset so ompapatey ed samay sakey ya clinic ta agmano-autopsy iray manaaral na midwife.

Tampol ya inggapo nen Semmelweis so policy ya antis iran mancheck-up na malukon a pasyente et kaukolan dan urasan so lima ra, kaiba so panuras ed danum ya walay bleaching powder to. Say resulta et talagan dinmaiset so ompapatey. Say 18.27 porsiento nen Abril et nagmaliw ya 0.19 porsiento nen nansampot so taon.

Aliwan amin et maliket ed nagagawaan nen Semmelweis. Say resulta na research to et kontra ed saray teorya nipaakar ed childbed fever ya papanisiaan na propesor ya mas atagey so posisyon to nen sikato, ya nasyosyodotan met ed inkamapilit nen Semmelweis. Ag-abayag et nakal si Semmelweis ed posisyon tod trabaho diad Vienna tan pinmawil ed Hungary. Ditan et sikatoy nagmaliw ya head na obstetrics department ed St. Rochus Hospital diad Pest. Lapud policy to, nagmaliw a mas abeba nen say 1 porsiento so ompapatey ditan ed childbed fever.

Nen 1861, im-publish nen Semmelweis so The Cause, Concept, and Prophylaxis of Childbed Fever. Balet pigaran taon ni linmabas antis ya binidbir so kaimportantian na research to. Lapud saya, dakel laingen so inatey ya nisalba komon.

Sinmabi panaon ya binidbir lanlamang si Semmelweis bilang sakey ed saray akadiskobre na panagpatey na bakterya. Say research to so tinmulong pian naamtaan ya nayarin panlapuan na sakit iray mikrobyo. Importante so agawaan to nipaakar ed teorya ed bakterya, ya impasen bilang “sankaimportantian ya kontribusyon ed medisina.” Balet diad tua, masulok ya 3,000 taon lay apalabas, imbaga ed Mosaikon Ganggan, ya nagmaliw a kabiangan na Biblia, no antoy dugan gawaen no maniwit na bangkay.