DAKEL ed saray mammal ya manaayam ed ambetel ya danum et makakapal so taba ed katat da pian ag-ira naketel. Pero walay nikadkaduma ya insulator na sea otter—say makapakapal ya bago to.

Nonot mo pa: Say bago na sea otter et mas aseksek nen say bago na arum nin mammal, ta say karakel na bago to et manga 1 milyon per square inch. No onlangoy so sea otter, say bago to et mantipon na dagem diad asingger ed katat to. Satan ya dagem et singa insulator, kanian mansiansiay petang na laman to ta ag-onsabi ed katat to so ambetel ya danum.

Manisia iray scientist ya walay naaralan dad bago na sea otter. Nan-eksperimento ira na pigaran sweater ya gawad artipisyal ya bago. Angusar iray bago ya nandurumay karukey tan kakapal to. Adiskobre da ya “no mas aseksek tan andurukey so bago, mas ag-onsepsep so danum.” Nibaga sirin ya talagan balibali so sweater na saray sea otter.

Papangarapen na saray researcher ya diad panaaral dad bago na sea otter et makapandesinyo tan makapanggawa ray balo tan espisyal ya abel ya agmangesep na danum. Iisipen laingen na arum ya mas maong no saramay manda-dive ed ambetel ya danum et mansulong iray mabago—ya singa samay bago na sea otter!

Antoy nibagam? Kasin say bago na sea otter et produkto na ebolusyon? Odino walay nandesinyo?