Ompan say labay mo et pambabansagen ya umanen iray apasalan mo. Say kuan mod sarilim, ‘Ayan simba itundak lay mansigarilyo, agak la manayew, agak la manpuyat, man-exercise ak la, agak la mangan na junk food, tan lanang ko lan tawagan si laki tan baik.’ Balet no salien mon pambabansagen so amin ya labay mon gawaen, anggapo laingen so nagawaan mo!

Say toon mapaabeba et gawaen to no anto labat so sarag to. Amta to ya walay limitasyon na panaon, biskeg, tan saray nausar to. Kanian imbes ya pambabansagen ton umanen so amin, sansakey ton gawaen iratan.

Sansakey mon gawaen iray labay mon napasalan. Nayarin makatulong iraya:

1. Manggawa kay duaran listaan na saray labay mon napasalan tan saray labay mon itunda. Ilistam labat so amin ya nanonotan mo.

2. Iyunam ed listaan iramay sankaimportantian.

3. Manpili kay sakey odino duara ed kada listaan mo, tan atan ni labat so gawam. Insan mo isublay so sakey odino duara ni ed listaan mo.

Pian maples mon nagawaan iratan, itundam so sakey a bisyo tan salatan mo na maong. Alimbawa, no kaibad listaan mo so sobran panagbantay na TV tan wala met ed listaan mo so pankumusta ed saray kapamilya o kakaarom, sarag mon ibagad sarilim: ‘Imbes ya i-switch kon tampol so TV kasempet ko manlapud trabaho, tawagan koy sakey a kapamilya o kaarok pian kumustaen ko.’