SAY melmelag ya bunga na tanaman a Pollia condensata, ya walad Africa, so sankasilengan ya asul ed saray tanaman. Pero diad tua et anggapoy kolor ya asul ed cell walls na ubak to. Akin balet et masileng ya asul so kolor to?

Nonot mo pa: Say cell walls ed ubak na sayan berry et walaan na singa angkekelag ya tinebey ya say inkaalasir to et singa nan-aabay ya gurabis. Sarayan nan-aabay ya tinebey et akaayos ya singa sakey a layer, tan kada layer et agnampepetekan so inkasalansan da noagta spiral so pattern na impantatapewan da. Aratan ya tinebey et aliwan kolor asul. Balet say nanenengneng tayon kolor et asul lapud inkasalansan na saray tinebey. Kanian say rason no akin ya masileng ya asul so kolor na sayan berry et aliwan lapud kolor na cell walls na ubak to, noagta diad inkasalansan na saray tinebey ya wadtan. Say pakanengneng tayod kaslakan ya cells to et asul. Pero no nengnengen ed arum ya anggulo, say kolor na arum ya cell et berde, pink, odino duyaw depende ed posisyon na saray layer. Tan no nengnengen mon mas asingger, aliwan pino so kolor to tan malabo, singa kolor na monitor na computer.

Lapud say kolor na Pollia berry et ag-akadepende ed kolor na cell walls to, anggano napattak la iratan et agmanguman so kolor da. Diad tua, wala ray nalmon ontan ya berry ya masulok lan 100 so taon da pero masilesileng ni kolor da! Anggano say bukel labat na satan a berry so naakan, ibabaga na saray researcher ya lapud kolor to et labalabay itan ya asinggeran tan toktoken na saray siwit.

Manisia iray scientist ya say inkagaway cell walls na ubak na Pollia berry et nayarin aligen ed panggawa na saray ag-ompuraw ya panagkolor tan papel ya agnapeke o naalig.

Antoy nibagam? Kasin say masileng ya kolor-asul na Pollia berry et produkto na ebolusyon? Odino walay nandesinyo?