SAY clown fish et sakey ed saray sira ya labalabay tayon nengnengen. Seguro ta makolokolor, ya singa clown ed sirkus. Odino pankelawan tayo so pipilien ton ayaman—diad saray makaturok ya gamegamet na anemone ed dalem na dayat. Kampegan say arum ya tawag ed clown fish et anemonefish.

Saray clown fish et singa ra artista ta labalabay day manpalitrato. Mabetbet iran nalitratoan na saray diver tan mani-isnorkel ed dayat ta ag-ira masyadon onaarawi ed ayaman da tan ag-ira mabaing.

Balet say talagan nikadkaduma ed saray clown fish et singa da ipepeligroy bilay da, ta say panayam ed makasamal ya anemone et singa met panayam ed ubong na saray uleg. Balet agbalot nayarin pansianen so clown fish tan say pinili dan anemone. Akin et sarag na sayan duaran pinalsa so manulop anta mandumaan ira?

Walay pakinabang na clown fish tan anemone ed sakey tan sakey. Labalabay na clown fish so anemone—aliwan lapud balibali itan ya panayaman, noagta lapud  kakkaukolan to itan. Naamtaan na saray marine biologist ya agnabilay so clown fish no anggapoy panayaman ton anemone. Makapuy ya onlangoy iray clown fish, kanian no anggapoy anemone ya napanamotan da, matmainomay iran nabiktima na saray narasan ya angkakabaleg ya sira. Balet lapud walay anemone ya pinagka-abung da tan napanamotan da, makapambilay ira na anggad samploran taon.

Diad anemone met so paniiknolan na saray clown fish. Diad bandad leksab na anemone so pangiinan day iknol, tan babantayan iratan na sanasawan clown fish. Diad satan met lanlamang ya anemone so panayaman na ananak da.

Anto balet so pakinabang ya naala na anemone ed saray clown fish? Saray clown fish so mangua-guardia ed anemone. Aabolen da iray butterfly fish ya say paborito dan kanen et saray gamegamet na anemone. Walay sakey ya klase na anemone ya agnabilay no agpanayaman na clown fish. Nen sinalin ekalen na saray researcher so clown fish ya manaayam ed satan ya anemone, naupot itan diad loob labat na 24 ya oras. Mapatnag ya inakan itan na butterfly fish.

Nayarin makakaala ni ingen na enerhiya so anemone ed clown fish. Say ammonia ya ompapaway ed clown fish et ontutulong pian maples ya ombaleg so anemone. Tan legan ya onlalangoy so clown fish ed saray gamegamet na anemone, ondadaloy so danum ya napnoy oxygen ed paliber na anemone.

Saray siksik na clown fish so manproprotektad sikara. Walay mapalet ya akakulyapot ed laman da kanian ag-ira naturok na gamegamet na anemone. Lapud satan, say amta na anemone et kapara ton anemone so clown fish. Imbaga na sakey ya marine biologist ya say clown fish et “sira ya mankunkunwarin anemone.”

Naobserbaan na saray researcher ya no manpipili so clown fish na panayaman ton anemone, aralen to ni mibagay. Diad unonan iyasingger to ed anemone, pigay oras to nin sapsapigaren itan. Ontan so gagawaen to pian naamtaan to no panon ton naprotektaan ya maong so sarili to ed samal ya walad satan ya anemone. Nayarin natuturok met na daiset so clown fish legan ton gagawaen itan. Balet kayari to, napasal la ra ed sakey tan sakey.

Sayan pantutulongan na mandumaan ya pinalsa et balibalin pakaaralan na teamwork. No paniibaen na totoo so ideya o abilidad da anggano nandurumay kultura tan nanlapuan da, dakel so balibalin nagawaan da. Singa say clown fish, ompan kaukolan tayo nin aralen so mibagay ed arum, balet seguradon nabawbawi tayoy sagpot tayo.