Natan et dakel lay naaralan tayo ya akatulong pian naromog so ebat ed tepet ya, Siopa so Dios? Diad gapo et anengneng tayo ed Biblia ya say ngaran to et Jehova tan say manunan kualidad to et aro. Naamtaan tayo met no anto la ray agawaan to tan anto ni ray gawaen to parad saray totoon pinalsa to. Anggaman dakel ni naaralan tayo nipaakar ed Dios, seguro iisipen mo no antoy epekto ed sika no itultuloy mon kabaten so Dios.

Impromisa nen Jehova ya “no sikatoy anapen mo, abuloyan to kan naromog mo.” (1 Awaran 28:9) Imadyin mo pay mabmablin regalo ya naawat mo no anapen tan kabaten moy Dios—say “maapit a pikakaaro ed si Jehova”! (Salmo 25:14) Antoy epekto ed sika na pikaarom ed sikato?

Tuan liket. Si Jehova et adeskribe ya “maliket a Dios.” (1 Timoteo 1:11) No maapit kad sikato tan aaligen mo ray kualidad to, naliknam so tuan liket, tan maabig so epekto na satan ed emosyon, isip, tan laman mo. (Salmo 33:12) Magmaliw met ya maliket so bilay mo—diad ipaliis mod saray bisyo, pangipasal ed saray maabig ya kagagawa, tan pakawalaan na maong a relasyon ed arum. Napaneknekan mo ya tua iyan imbaga na salmista: “Say iyasingger ed Dios et pankaabigan ko.”—Salmo 73:28.

Imanoen tan asikasoen ka na Dios. Impromisa nen Jehova ed saray lingkor to: “Bilinen ta ka legan ya akanengneng ak ed sika.” (Salmo 32:8) Say labay ya ibaga na satan et iimanoen nen Jehova so kada lingkor to tan aasikasoen to ra base ed indibidual ya situasyon da. (Salmo 139:1, 2) No awalaan ka la na maapit a relasyon ed si Jehova, naliknam ya sikatoy lanang ya wadtan parad sika.

Balibalin bilay ed arapen. Agka labat natulongan nen Jehova a Dios ya nawalaan na maliket tan makabaliksan ya bilay natan, noagta tulongan to ka met ya nawalaan na balibalin bilay ed arapen. (Isaias 48:17, 18) Ibabaga na Biblia: “Saya so mankabaliksay bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.” (Juan 17:3) Diad sayan mair-irap ya panaon, satan ya ilalo ya iiter na Dios et singa angkla tayo ya “segurado tan malet.”—Hebreo 6:19.

Pigara labat iraya ed dakel tan importantin rason pian mas kabaten tayoy Dios tan mikaaro ed sikato. Sarag moy mitongtong ed anggan siopan Tasi nen Jehova odino onlad jw.org parad arum nin makatulong ya impormasyon.