No labay moy onla ed lugar ya agmo nin balot nakar, antoy gawaen mo?

1. 1. Tumbok moy dalan ya parad sika et atan so duga.

2. 2. Tumbok moy arum, ompan amta day dugan dalan.

3. 3. Mangusar kay napantiwalaan ya giya, singa say GPS, mapa, odino tepetan moy kaarom ya kabisado toy dalan.

No pilien tayo so unona odino komadua, makasabi tayo met ed anggan iner, pero aliwan diad samay labay tayon laen. Balet no say pilien tayo et amay komatlo, seguradon makasabi tayod destinasyon tayo.

Say bilay tayo et singa panagbiahe, labay tayoy makasabid destinasyon tayo—amay magmaliw ya maliket so bilay tayo. Balet akadependin maong itan ed no iner tayo manpapaigiya no mandedesisyon tayo.

Maslak ya gagawaen tayon desisyon et simpli labat, say arum balet et seryoso. Nanengneng ed saratan ya desisyon tayo no antoy papanisiaan tayon duga tan aliwa. Saratan ya desisyon tayo et walay epekto to ed sikatayo tan ed saray totoon inaro tayo, balanglan maong odino mauges so epekto to. Kaiba ed saray kaukolan tayon desisyonan so tungkol ed:

• Sex tan panangasawa

• Inkamatua, trabaho, tan kuarta

• No panon ya pabalegen iray ananak

• No panon ya tratoen so arum

Panon kan makaseguro ya say desisyon mo ed saratan et mangiter na liket ed sika tan ed pamilyam?

Oniay nayarin itepet tayod sarili tayo: Antoy makatulong ed siak pian makagawa ak na maong ya desisyon no antoy duga tan aliwa?

Ipaliwawa na sayan magasin no akin ya say Biblia et napantiwalaan bilang giya tan no panon itan ya makatulong ed sikatayo.