Say kabaliksan na empatya et “abilidad ya nalikna so nalilikna o naeeksperiensya na arum a too no ipasen tayoy sarili tayo ed situasyon to.” Imbaga na sakey ya eksperto ed mental-health ya si Dr. Rick Hanson ya say empatya et nisipor ed sikatayo.

ISIPEN PA: Akin et walay empatya tayo, kualidad ya anggapod arum ya pinalsa? Ibabaga na Biblia ya pinalsa na Dios so too unong ed indengan to. (Genesis 1:26) Lapud pinalsa itayo ed indengan na Dios, walay abilidad tayon ipanengneng so personalidad to tan ipatnag iray maabig ya kualidad to. Kanian, no saray maaron totoo et napapakiwas na empatya pian tulongan so arum, ipapanengneng da so empatya na maabagey ya Amalsa, si Jehova a Dios.—Proverbio 14:31.

Walay empatya na Dios ed sikatayo tan agto labay ya manirap tayo. Oniay ibabaga na Biblia nipaakar ed saray Israelita nensaman ya nanirap ed panangaripen na Ehipto tan 40 taon da ed kalawakan: “Kapagno nagogonigon ira, sikatoy nagogonigon met.” (Isaias 63:9) Imanoen ya aglabat amta na Dios ya nagogonigon ira. Nalilikna ton mismoy sakit ya nalilikna ra. “Amtak so paniirap da,” so imbaga to. (Exodo 3:7) Imbaga ni na Dios: “Siopaman a maniwit ed sikayo et manidiwit ed bukel na matak.” (Zacarias 2:8) No asakitan itayo na arum, nasasakitan met so puso to.

Ipapaseguro na Biblia ya anggano kokondenaen tayoy sarili tayo tan pakalikna tayo et agtayo makanepegan ed empatya na Dios, “say Dios et mas baleg nen say puso tayo tan amta to so amin a bengatla.” (1 Juan 3:19, 20) Mas kabat itayo na Dios nen say pakapikabat tayod sarili tayo. Amta ton amin so situasyon, iisipen, tan nalilikna tayo. Walay empatya to ed sikatayo.

 Ipapaseguro na Kasulatan

• “Ontawag ka, tan ebatan ka nen Jehova; onkerew kay tulong, tan ibaga ton, ‘Wadia ak!’”—ISAIAS 58:9.

• “‘Ta amtak iray bengatlan nononoten ko parad sikayo,’ so imbaga nen Jehova, ‘say kareenan, tan aliwan say kadederal, pian ikdan ta kayoy maong ya arapen tan ilalo. Tan ontawag tan onasingger tan manpikasi kayod siak, tan dengelen ta kayo.’”—JEREMIAS 29:11, 12.

• “Tipon mo pa ray luak ed katat a pananginan mo. Agta akasulat iratan ed librom?”—SALMO 56:8.

Kasin say pakaamta ya walay empatya na Dios ed sikatayo et ontulong pian nasarag tayoy irap? Imanoen so eksperiensya nen Maria:

“Pakaliknak et mairap tan aliwan patas so bilay kayarik ya alikna so sakit na naandiay 18 taon ya anak a laki a nanirap na duay taon lapud cancer. Sinmanok ak ed si Jehova lapud anggapoy ginawa to tan agto pinaabig so anak ko!

“Kayari anem taon, walay maaro tan mapangasin kaarok ed kongregasyon mi ya dinmengel ed siak legan kon ibabalikas so naliliknak ya agak inaro nen Jehova. Kayari to ak ya dinengel na pigaran oras, imbaga to so sakey a teksto ya sinmabid pusok. Amay 1 Juan 3:19, 20, ya mangibabagan: ‘Say Dios et mas baleg nen say puso tayo tan amta to so amin a bengatla.’ Imbaga to ya natatalosan nen Jehova so paniirap tayo.

“Balet siansia nin nairapan ak ya ekalen so pasnok ko! Insan ko binasay Salmo 94:19, ya kuan to: ‘Sanen nadadaeg ak na saray kapagaan, niligliwa tan pinakalma mo ak.’ Pakaliknak et insulat itan parad siak! Kayari na satan, nainawaan ak ta nibagak la ed si Jehova so paniirap ko, lapud amtak ya dedengelen tan natatalosan to ak.”

Makaligliwan naamtaan ya natatalosan itayo na Dios tan mililikna ed sikatayo! Balet akin et grabe so paniirap? Kasin lapud dudusaen itayo na Dios ed saray kasalanan tayo? Wala kasi gawaen na Dios pian patundaen so amin ya paniirap? Sarayan tepet et naebatan ed onsublay iran artikulo.