Imbaga na Dios ed si Adan, “diad agew a pangan mo ed [bunga na kiew] et seguradon ompatey ka.” (Genesis 2:17) Anggapoy kana na satan ya ganggan no gagala na Dios ya ontatken tan ompatey lanlamang si Adan. Amta nen Adan ya sikatoy ag-ompatey no agmangan na bunga na satan a kiew.

Agkaukolan nen Adan tan Eva ya kanen so bunga na satan a kiew pian nabilay ira, ta amayamay so manbubungan kiew ed hardin. (Genesis 2:9) No ag-ira mangan ed bunga na satan a kiew, nipanengneng komon na unonan sanasawa ya uunoren da imay angiter na bilay da. Nipanengneng da met ya bibidbiren day kanepegan na Dios ya mangibaga ed sikara no antoy gawaen da.

Pian natalosan tayo no akin ya inatey si Adan tan Eva, kaukolan tayon aralen so sakey ya impantongtong ya walay epekto to ed sikatayon amin. Angusar si Satanas a Diablo na uleg pian makapantila. Oniay nabasa ed Biblia: “Natan, say uleg so sankaalwaran ed amin ya atap ya ayayep ed uma a ginawa nen Jehova a Dios. Kanian oniay inkuan na satan ed bii: ‘Talaga ta’n imbaga na Dios ya agkayo nepeg a mangay bunga na amin a kiew ed hardin?’”​—Genesis 3:1.

Oniay ebat nen Eva: “Nayarian mi mangay bunga na saray kiew ed hardin. Balet oniay inkuan na Dios nipaakar ed bunga na kiew a walad pegley na hardin: ‘Agkayo nepeg a mangan ed satan, andi, agyo nepeg a diwiten itan; ta no ontan so gawaen yo, ompatey kayo.’” Insan imbaga na uleg ed sikato: “Seguradon agkayo ompatey. Ta amta na Dios a diad mismon agew a pangan yo ed satan et nalukasan iray mata yo tan magmaliw kayon singa Dios, ya amta yoy maong tan mauges.” Diad satan ya imbaga nen Satanas et papapawayen ton matila si Jehova tan walay isisiblet ton maabig ed inmunan atateng tayo.​—Genesis 3:2-5.

Anisia si Eva ed nadngel to, kanian ninengneng toy kiew. Marakdakep tan makapasagyat itan! Sikatoy amurbor na bunga tan kinan to. Insan oniay nabasa ed Biblia: “Tan sanen kaiba to lay asawa to et inikdan to tan kinan to met.”​—Genesis 3:6.

Seguradon naermenan so Dios nen anengneng to ray inad-aro ton ananak ya ginagala day ag-onunor ed sikato. Antoy ginawa to? Oniay imbaga nen Jehova ed si Adan: “Ompawil ka ed dalin, ta ditan so angalaan ed sika. Lapud dabok ka, ompawil ka ed dabok.” (Genesis 3:17-19) Bilang resulta, “say impanbilay nen Adan et asabi toy 930 taon, insan sikatoy inatey.” (Genesis 5:5) Aglinma ed tawen si Adan odino tuloytuloy a nambilay bilang espiritu ed sananey a pasen. Nen antis ya palsaen nen Jehova manlapud dabok, anggapoy Adan. Kanian nen inatey, naandi  so bilay to tan nagmaliw a dabok ya singa samay nanlapuan to. Anggapo lay Adan. Talagan makapaermen!

Ginagala nen Adan tan Eva ya ag-unoren so Dios kanian abalang day inkaperpekto da tan say ilalo dan manbilay na andi-anggaan. Anguman so laman da; nagmaliw iran aliwan perpekto tan makasalanan. Balet aliwan sikara labat so naapektoan na satan ya ginawa ra. Nipatawir da itan ed amin ya ananak da. Ibabaga na Roma 5:12: “Diad panamegley na sakey a too [ya si Adan] et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo lapud nankasalanan iran amin.”

Say kasalanan tan patey et idedeskribe na Biblia bilang “abel a manasakbong ed amin a totoo, tan say sakbong a mamabalkot ed amin a nasyon.” (Isaias 25:7) Satan ya abel a manasakbong ed amin a totoo et singa makasamal ya asewek ya agtayo natakasan. Kanian “ompapatey so amin lapud si Adan.” (1 Corinto 15:22) Lapud satan, nayarin itepet tayo met imay tepet nen apostol Pablo: “Siopa so mangisalba ed siak ed laman a mamapawala ed sayan ipapatey?” Wala kasi?​—Roma 7:24.