Manlapu la nen pinalsa na Dios so too, mitotongtong la so Amalsa ed saray totoo panamegley na saray anghel tan propeta. Sakey ni, impaisulat to so mensahe to tan saray balibalin promisa to. Ipropromisa na Dios ya magmaliw itayon maliket diad arapen. Kanian iner mo naamtaan iray promisa na Dios natan?

Say mensahe na Dios ed sikatayo et nabasa ed Masanton Kasulatan. (2 Timoteo 3:16) Panon ya inusar na Dios iray propeta pian isulat so mensahe to? (2 Pedro 1:21) Inyan na Dios ed nonot na saray managsulat so walad kanonotan to, insan da iratan insulat. Mipadpara itan ed panaon tayo natan, no say sakey ya negosyante et mangusar na sekretaryo pian isulat so mensahe to, siansian bidbiren tayo ya say nanlapuan na satan ya mensahe et samay negosyante. Ontan met, anggano angusar so Dios na saray lalaki ya mangisulat ed mensahe to, sikaton talaga so nanlapuan na saray Masanton Sulsulat.

Talagan importante so mensahe na Dios ta labay ton nabasa itan tan natalosan na amin ya totoo. Nipapaamta la natan so “andi-anggaan a maong a balita . . . diad kada nasyon tan tribu tan lenguahe tan rasa.” (Apocalipsis 14:6) Diad tulong na Dios, available la natan iray Masanton Sulsulat ed kompleton patalos odino kabiangan na satan ed masulok ya 3,000 a lenguahe, ya mas dakel ni nen say dinanman a libro ed interon mundo.