Inyanak ak ed Ciudad Mante, sakey ya balibalin lugar diad probinsya na Tamaulipas, Mexico. Karaklan a manaayam ed satan ya syudad et maiter tan maomaong. Balet say makapaermen, delikado ditan ta dakel so nagagawan krimen.

Apatira kamin sanaagi ya puro lalaki tan siak so komadua. Impabinyagan ak na atateng ko ed Katoliko, tan nagmaliw ak ya membro na choir ed simbaan. Labay kon napaliket so Dios ta antakot koy naukom tan napoolan ed impiernon apoy anggad angga.

Nen limay taon ko, tinaynan kami na tatay mi. Maer-ermen ak tan miserable bilay ko lapud satan. Akin et tinaynan to kami anta inad-aro mi? Si nanay et anggapon lanang ed abung ta kaukolan toy mantrabaho pian nabilay to kamin apat ya sanaagi.

Lapud onian situasyon, nagawaan koy labay ko. Imbes ya onloob ak ed klase, mimila ak ed saray barkadak ya mas matatken nen siak. Lapud sikara, akaaral ak ya man-ayew, mansigarilyo, mantakew, tan miponitian. Labay kon takotan ak na arum, kanian nanaral ak na boksing, wrestling, karate, tan no panoy mamemben na armas. Bayolenti ak ya tinedyer. Lanang ak ya mipapaltogan, tan aminpiga ya naames ak ed mismon dalak tan tinaynan da ak ed karsada ya ngalngali ak la ompatey. Agaylay ermen nen nanay ko kada nanengneng to ak ya ontan tan ibatik to ak ed ospital!

Nen 16 ko la, linmad abung mi so kaugawan ko ya si Jorge. Imbaga tod sikami ya sikatoy Tasi nen Jehova tan walay importantin mensahe ya labay ton ipaamtad sikami. Inusar toy Biblia pian ipaliwawa iray papanisiaan to. Agko ni asali nambasa na Biblia, kanian malikeliket ak nen naamtaan koy ngaran na Dios tan no anto ray gawaen tod arapen. Imbaga nen Jorge ya labay to kamin bangatan na Biblia. Pinmayag kami.

Nakal so takot ko nen naaralan ko ya agmanaya ibabangat na Biblia so impiernon apoy. (Salmo 146:4; Eclesiastes 9:5) Manlapud  saman et agko la naliliknan makapataktakot so Dios. Imbes, aliknak ya sikatoy maar-aron Ama ya sankanonot toy pankaabigan na ananak to.

Nen ondadakel lay nanaaralan ko ed Biblia, atalosan ko ya wala ray ugalik ya kaukolan kon umanen. Kaukolan kon aralen so manpaabeba tan tundaan ko lay pilalaban. Akatulong ed siak imay bilin diad 1 Corinto 15:33. Kuan tod man: “Say piulop ed mauges et maneral ed maong iran ugali,” odino diad paimanod leksab, “maneral ed maabig iran prinsipyo.” Atalosan ko dia ya no labay kon nauman so ugalik, kaukolan ya tundaan ko lay miulop ed saramay mauges so impluensya da. Kanian say kaulop ko la et saray membro na kongregasyon na tuan Kristiano. Sarayan totoo et aaregloen day agda pantatalosan diad panguunor dad saray prinsipyo na Biblia, aliwan diad panlalaban.

Say sakey nin abasak ed Biblia ya baleg so epekto tod siak et amay walad Roma 12:17-19. Say kuan to: “Agyo babalesen na mauges so siopaman a nanggaway mauges ed sikayo. . . . No posible, diad anggaay nayarian yo, mikareenan kayod amin a totoo. Agkayo ombabales parad inkasikayo, . . . ta nisulat: ‘“Kien ko so panangibales; siak so ombawi,” kuan nen Jehova.’” Inisip ko la ya si Jehova so makaamta no panon tan kapigan to iter so hustisya. Kanian kalkalna ya nakal koy bayolentin ugalik.

Agkon balot nalingwanan imay agawa ed sakey ya labi nen pasempet ak. Wala ray kabataan ya datin kalaban na grupo mi ya inambon da ak, tan dinapmeg to ak may lider da, tan inyeyag to, “Laban ka!” Nampikasi ak ya tampol ed si Jehova ya tulongan to ak pian nasarag koy pamoponiti dad siak. Anggano labalabay koy onlaban, say ginawak et binmatik ak la. Kaimbuasan to, asabat ko may lider da ya bukbukor to. Singa labay koy ombawi, balet nampikasi ak lamet ed si Jehova ya tulongan to ak ya kontroley sarilik. Abigla ak ta inasinggeran to ak tan imbaga ton: “Pasensia lad samay agawa kalabian. Diad tua, labay ta kan aligen. Labay koy manaral na Biblia.” Maong labat ta akontrol koy sanok ko! Lapud satan, nanaral met la na Biblia.

Makapaermen ta diad saman et tinmundan manaral na Biblia iray kapamilyak. Balet siak, desidido ak ya ituloy so panaaral ko tan anggapon balot so makapatunda ed siak. Amtak ya say lanang ya piulop kod saray totoo na Dios so mangekal ed sakit na linawak tan ditan ko naromog so pamilya ya aanapen ko. Tuloytuloy kon inunor iray nanaaralan ko, tan nen 1991, abautismoan ak ya Tasi nen Jehova.

Dati et agak maliket, tatakotan ak na arum, tan bayolenti ak. Balet inuman na Biblia so interon bilay ko. Natan et ibabagak so mensahe na kareenan ya walad Biblia ed anggan siopa ya ondengel. Tan 23 taon ko lan panliliketan so panlilingkor kon full-time ya ministro.

Asalik met so namboluntaryo ed branch office na Saray Tasi nen Jehova ed Mexico. Diman ko akabat so makulikulin Kristianon bii ya si Claudia, tan nankasal kami nen 1999. Misalsalamat ak ed si Jehova ta niregaloan to ak na matoor ya kaibad bilay!

Saniba kamin tinmulong ed Mexican Sign Language ya kongregasyon, ya mangibabangat ed saray emel ya nakabat si Jehova. Insan kami imbaki ed Belize pian manbangat na Biblia ed saray totoo ed sayan bansa. Anggano sipsimpli so bilay mi dia, malikeliket kami. Agmi yan balot isalat!

Intuloy lanlamang nen nanay ko so panaaral toy Biblia tan abautismoan. Tasi met la natan si kuyak, say asawa to, tan saray ananak da. Pigarad saray datin barkadak ya apulongan ko et manlilingkor met la natan ed si Jehova.

Say makapaermen labat, arum ed saray kapamilyak et inatey la lapud agda inuman so bayolentin ugali da. No agak met anguman, ompan inatey ak met la natan. Misalsalamat ak ta inyasingger ak nen Jehova ed sikato tan ed saray totoo to, ya maan-anos tan maar-aron angibangat ed siak ya unoren iray prinsipyo na Biblia.