1-2. Akin ya agonigon si Jesus?

DIAD sampot ya agew nen Jesus bilang too, sikatoy agonigon. Magano to lan naeksperiensya so maruksan ipapatey diad lima na saray makasalanan ya totoo. Balet aliwa labat ya say asingger lan ipatey to so pampapagaan to. Inar-aro toy Ama to tan labay ton paliketen. Amta nen Jesus ya no sikatoy mansiansian matoor diad mairap ya subok, sikatoy makatulong pian niyalangon so ngaran nen Jehova. Inar-aro met nen Jesus iray totoo, tan amta to ya say ilalo tayon manbilay na andi-anggaan et akadepende ed pansiansia ton matoor anggad patey.

² Anggano nagogonigon si Jesus, siansia nin alikna toy kareenan. “Itilak kod sikayo so kareenan ya iter ko,” so imbaga tod saray apostol to. (Juan 14:27) Walad sikatoy “kareenan na Dios,” say inkakalmado tan inkaligen ya nalikna na sakey lapud maapit ya relasyon to ed si Jehova. Satan ya kareenan so rason no akin ya nagmaliw ya maligen so nonot tan puso nen Jesus.​—Fil. 4:6, 7.

3. Antoy aralen tayo ed sayan artikulo?

³ Anggapod sikatayo so makaeksperiensya ed samay singa alikna nen Jesus ya gonigon, balet amin ya patumbok nen Jesus et ondalan ed saray subok. (Mat. 16:24, 25; Juan 15:20) Tan singa si Jesus, nagogonigon tayo met no maminsan. Anto ray sarag tayon gawaen pian agtayo masyadon mapagpaga tan mansiansia so deen na nonot tayo? Aralen tayo so talora ya ginawa nen Jesus legan na ministeryo to diad dalin tan nengnengen tayo no panon tayon naalig so alimbawa to no ondadalan tayod saray subok.

4. Mitunosan ed ibabaga na 1 Tesalonica 5:17, anto ray mangipapanengneng ya agtinmundan nampikasi si Jesus diad sampot ya agew na bilay to diad dalin?

⁴ Basaen so 1 Tesalonica 5:17. Diad samay sampot ya agew na bilay nen Jesus diad dalin, sikatoy agtinmundan nampikasi. Nen impanengneng tod saray disipulo to no panon so pannodnonot ed ipatey to, sikatoy nampikasi parad tinapay tan alak. (1 Cor. 11:23-25) Antis dan tinaynan so pasen ya nanselebraan day Paskua, sikatoy nampikasi kaiba iray disipulo to. (Juan 17:1-26) Diad saman a labi, nen sinmabi si Jesus tan saray disipulo to diad Palandey na Saray Olibo, sikatoy aminpigan nampikasi. (Mat. 26:36-39, 42, 44) Tan say unor ya imbalikas to antis ya ompatey et sakey a pikakasi. (Luc. 23:46) On, impikasi nen Jesus ed si Jehova so amin ya importantin agawa ed sikato ed saman ya agnalinglingwanan ya agew.

5. Akin ya kinmapuy so pakpel na saray apostol?

⁵ Say sakey a rason no akin ya asungdoan nen Jesus so subok et sikatoy nanmatalek ed Ama to tan impanengneng to itan diad maseet ya impanpikasi to. Balet saray apostol et ag-ira maseet ya nampikasi diad saman ya labi. Bilang resulta, kinmapuy so pakpel da nen sinmabi so oras na subok. (Mat. 26:40, 41, 43, 45, 56) No nipapaarap tayod saray subok, makapansiansia tayo labat ya matoor no aligen tayoy alimbawa nen Jesus tan ‘agtayo ontundan manpikasi.’ Anto ray sarag tayon ipikasi?

6. Panon ya ontulong ed sikatayo so pananisia pian mansiansiay deen na nonot tayo?

⁶ Sarag tayon ipikasi ed si Jehova ya ‘aruman toy pananisia tayo.’ (Luc. 17:5; Juan 14:1) Kaukolan tayoy pananisia lapud seguradon suboken nen Satanas so amin ya patumbok nen Jesus. (Luc. 22:31) Panon ya ontulong ed sikatayo so pananisia pian mansiansiay  deen na nonot tayo anggano mantutumbokan so subok? No ondadalan tayod subok tan ginawa tayo lay amin ya nayarian tayo pian arapen itan, say pananisia so mamakiwas ed sikatayon ipalima la ed si Jehova so situasyon. Lapud matalek tayo ya sikato so makaamta no antoy sankaabigan ya gawaen, ondeen so puso tan nonot tayo.​—1 Ped. 5:6, 7.

7. Antoy naaralan mod imbaga nen Robert?

⁷ Ontulong ed sikatayo so pikakasi pian mansiansiay deen na nonot tayo ed anggan anton subok ya arapen tayo. Imanoen so alimbawa nen Robert, sakey a matoor ya elder a masulok lan 80 so taon to natan. Imbaga to: “Akatulong ed siak so simbawan walad Filipos 4:6, 7 kanian asarag ko so dakel a subok a dinmalan ed bilay ko. Walay panaon ya aproblema ak ed pinansyal. Tan temporaryon nakal so pribilehyok bilang elder.” Antoy akatulong ed si Robert pian mansiansiay deen na nonot to? “No nalikas kon napapagaan ak la, manpikasi ak lan tampol,” so kuan to. “Apaneknekan ko ya no mas mabetbet tan mas impapuso so pikakasik, mas naliliknak so kareenan.”

8. Singa nabasa ed Juan 8:29, anto ni sakey a rason no akin ya nansiansia so deen na nonot nen Jesus?

⁸ Basaen so Juan 8:29. Anggan sanen napapasegsegang si Jesus, nansiansia so deen na nonot to lapud amta to ya napapaliket toy Ama to. Sikatoy nansiansian matulok, anggan sanen aliwan mainomay itan parad sikato. Inaro toy Ama to tan inyuna tod bilay to so panaglingkor ed si Jehova. Antis ya linmad dalin, sikato so “marundunong a komikimey” na Dios. (Pro. 8:30) Tan sanen wadiad dalin, maseseg  ton imbangat ed arum so nipaakar ed Ama to. (Mat. 6:9; Juan 5:17) Satan ya kimey so angiter ed si Jesus na baleg a liket.​—Juan 4:34-36.

9. No dakel so uusaren tayon panaon parad panagpulong, panon itan ya makatulong pian mansiansiay deen na nonot tayo?

⁹ Naalig tayoy Jesus no uunoren tayoy Jehova tan “naynay a dakel so gagawaen [tayo] ed kimey na Katawan.” (1 Cor. 15:58) No dakel so uusaren tayon panaon parad panagpulong a kimey, mas positibo so pangipasen tayo ed saray problema tayo. (Gawa 18:5) Singa bilang, saray nakakatongtong tayo ed ministeryo et ompan mas grabe ni problema da nen say sikatayo. Balet no naaralan dan aroen si Jehova tan iyaplika da iray simbawa to, magmaliw ya mas maliket so bilay da. Kada no nanengneng tayon nagawa itan, mas matalek tayo ya asikasoen itayo nen Jehova. Tan satan ya talek so ontulong pian mansiansiay deen na nonot tayo. Sakey a sister ya abayag to lan lalabanan so depresyon tan say liknaan ya anggapoy kana to et apaneknekan ton tua itan. “No busy ak ed ministeryo,” so kuan to, “mas nakontrol koy liknaan ko tan mas maliket ak. Ta no manpupulong ak, naliliknak ya maap-apit ak ed si Jehova.”

10. Antoy naaralan mod imbaga nen Brenda?

¹⁰ Imanoen met so alimbawa na sister ya manngaray Brenda. Sikato tan say anak ton bii et walaan na graben sakit ya tatawagey multiple sclerosis. Aka-wheelchair si Brenda tan makapuy so laman to. Sikatoy manpupulong diad kaabungan no sarag to, balet maslak et diad panamegley na sulat. Imbaga to: “Nen atalosan ko tan naawat ko la ya agak la onabig ed sayan sistema na mundo, mas akapampokus ak ed ministeryok. Diad tua, no manpupulong ak, agko masyadon naiisip iray kapagaan ko. Imbes, say sankanonot ko et say itulong ed saray napupulongan ko ed teritorya na kongregasyon mi. Tan satan so lanang ya mangipapanonot ed siak ed ilalok diad arapen.”

11-13. (a) Panon ya impanengneng na saray apostol tan arum ni ya tua iran kakaaro ed si Jesus? (b) Antoy alikna nen Jesus lapud saray kakaaro to?

¹¹ Legan na ministeryo nen Jesus, impanengneng na saray matoor ya apostol ya tua iran kakaaro. Sikara imay klase na kaaro ya ibabaga na Biblia: “Walay kaaro a mas mansiansia ed abay mo nen say sakey ya agi.” (Pro. 18:24) Papablien nen Jesus iray ontan ya kakaaro. Legan na ministeryo to, anggapo ed saray agagi tod laman so anisia ed sikato. (Juan 7:3-5) Aminsan et inisip ni ingen na kakanayon to ya aderal lay ulo to. (Mar. 3:21) Duma balet iray matoor ya apostol nen Jesus, ta oniay imbaga to nipaakar ed sikara antis na impatey to: “Sikayo ray nansiansiad siak diad saray subsubok ed siak.”​—Luc. 22:28.

¹² Wala ray panaon ya adismayay Jesus ed saray apostol, balet imbes ya manpokus ed saray lingo da, say ninengneng to et say pananisia ra. (Mat. 26:40; Mar. 10:13, 14; Juan 6:66-69) Diad samay sampot ya labi antis ya sikatoy pateyen, imbaga tod sarayan matoor ya lalaki: “Tinawag ta kayon kakaarok, lapud impaamtak lad sikayo so amin a nadngel kod Amak.” (Juan 15:15) Seguradon apaseseg ya maong si Jesus ed saray kakaaro to. Sikatoy aliketan ya maong ed intulong dad sikato diad ministeryo to.​—Luc. 10:17, 21.

¹³ Likud ed saray apostol, wala ni ray arum ya kakaaro nen Jesus a lalaki tan bibii ya tinmulong ed sikato diad panagpulong tan ed arum nin praktikal ya paraan. Wala ray anangkaili ed sikato diad abung da tan imparaanan day kanen to. (Luc. 10:38-42; Juan 12:1, 2) Say arum et angiba ed sikato diad saray nila to tan inusar day kayamanan da pian nasuportaan da. (Luc.  8:3) Walaan na maong ya kakaaro si Jesus lapud sikaton mismo et maong ya kaaro. Sikatoy nanggawa na kamaongan ed sikara tan makatunongan ed saray iilaloan tod sikara. Perpekto si Jesus, balet inapresya toy tulong na saray kakaaro to ya aliwan perpekto. Tan seguradon akatulong ira pian mansiansia so deen na nonot to.

14-15. Panon itayon nawalaan na saray maong ya kakaaro, tan panon da tayon natulongan?

¹⁴ Natulongan itayo na saray maong a kakaaro pian makapansiansia tayon matoor ed si Jehova. Tan say sankaabigan a paraan pian nawalaan ka na saray maong a kakaaro et no sikan mismo et maong a kaaro. (Mat. 7:12) Singa bilang, papasesegen itayo na Biblia ya usaren tayoy panaon tan biskeg tayo pian tulongan so arum, lalo la iray “mankaukolan.” (Efe. 4:28) Wala kasi nanonotan mon kakongregasyon mo ya sarag mon tulongan? Kasin sarag moy mitindaan parad agi ya agla makaalis ed abung lapud maedad la odino walay sakit to? Kasin sarag mon imbitaan ya mangan so sakey ya pamilya ya mairap so bilay da? No antam ya usaren so website ya jw.org^® tan say app ya JW Library^®, kasin sarag mon tulongan so arum ed kongregasyon yo no panon iratan ya usaren? No lanang tayon ontutulong ed arum, seguradon magmaliw tayon maliket.​—Gawa 20:35.

¹⁵ Tulongan itayo na saray kakaaro tayo no ondadalan tayod saray subok, tan makatulong ira pian mansiansiay deen na nonot tayo. No panon ya dinmengel si Elihu nen ibabaga nen Job iray subok ya dadalanen to, natulongan itayo na saray kakaaro tayo diad maanos dan idengel legan tayon ibabalikas iray nalilikna  tayo. (Job 32:4) Agtayo ilaloan ya idesisyonan itayo na saray kakaaro tayo, balet maabig no dengelen tayo ray simbawa ra ya nibase ed Biblia. (Pro. 15:22) Tan no panon ya mapaabeban inawat nen Arin David so tulong na saray kakaaro to, nepeg ya mapaabeba tayo met ya awaten so iyoopresin tulong na saray kakaaro tayo no mankaukolan tayo. (2 Sam. 17:27-29) Diad tua, say ontan iran maong a kakaaro et regalo nen Jehova.​—Sant. 1:17.

16. Base ed Filipos 4:6, 7, panon ya niwalad sikatayo so kareenan? Ipaliwawa.

¹⁶ Basaen so Filipos 4:6, 7. Akin ya ibabaga ed sikatayo nen Jehova ya naawat tayoy kareenan ya iter to “diad panamegley nen Kristo Jesus”? Lapud niwala labat ed sikatayo so permanentin deen na nonot tan liknaan no natatalosan tayoy betang nen Jesus ed gagala nen Jehova tan walay pananisia tayod si Jesus. Singa bilang, diad panamegley na dondon bagat nen Jesus et naperdona so amin ya kasalanan tayo. (1 Juan 2:12) Talagan makaligliwa itan ya nodnonoten! Bilang Ari ed Panarian na Dios, ekalen to so amin ya mauges ya epekto na ginawa nen Satanas tan say mundo to. (Isa. 65:17; 1 Juan 3:8; Apo. 21:3, 4) Talagan balibali itan ya ilalo! Tan anggano mairap so asainmin ya inter nen Jesus ed sikatayo, sikatoy walad sikatayo tan tutulongan to tayo legan na kaunoran iran agew na sayan sistema na mundo. (Mat. 28:19, 20) Talagan pabiskegen na satan so pakpel tayo! Ligliwa, ilalo, tan pakpel​—importantin maong iratan pian mansiansia so deen na nonot tayo.

17. (a) Panon ya napansiansia na sakey a Kristiano so deen na nonot to? (b) Singa impaseguro ed Juan 16:33, antoy sarag tayon gawaen?

¹⁷ Panon mo sirin ya napansiansia so deen na nonot mo no ondadalan kad grabe iran subok? Nagawaan mo itan no aligen mo iray ginawa nen Jesus. Unona, manpikasi ka tan agka ontutundan manpikasi. Komadua, unor moy Jehova tan maseseg kan manpulong anggano aliwan mainomay itan parad sika. Tan komatlo, awat moy tulong na saray kakaarom. Diad ontan, say kareenan na Dios so manbantay ed nonot mo tan ed pusom. Tan singa si Jesus, nasarag mo so anggan anton subok.​—Basaen so Juan 16:33.