1. Antoy imbaga nen David nipaakar ed inkamapaabeba nen Jehova?

KASIN duga ya ibaga tayon si Jehova et mapaabeba? On, ta oniay imbaga nen David: “Ilalaban mo ak diad panamegley na panagsamper mo, tan say inkamapaabebam so mangiyaatagey ed siak.” (2 Sam. 22:36; Sal. 18:35) Nayarin say sankanonot nen David ed satan ya imbaga to et nen linmad abung da si propetan Samuel pian lanaan so onsublay ya man-ari ed Israel. Si David so bolirek ed waloran lalaki ya sanaagi; balet sikato so pinili nen Jehova ya onsalat ed si Arin Saul.​—1 Sam. 16:1, 10-13.

2. Antoy aralen tayo ed sayan artikulo?

² Seguradon naisip met nen David iyan imbaga na sakey a salmista nipaakar ed si Jehova: “Sikatoy onuusdong pian nengnengen so tawen tan dalin, ipapaalagey to manlapud dabok imay pakaskasi. Ibabangon to . . . imay maniirap pian payurongen to ed abay na saray kagalgalang.” (Sal. 113:6-8) Diad sayan artikulo, amtaen tayo no panon ya ipapanengneng nen Jehova so inkamapaabeba tan no panon tayon naalig so alimbawa to. Insan tayo pantongtongan no antoy naaralan tayo ed si Arin Saul, si propetan Daniel, tan si Jesus nipaakar ed inkamapaabeba.

3. Panon so pantratrato nen Jehova ed sikatayo, tan antoy ipapanengneng na satan?

³ Nanengneng so inkamapaabeba nen Jehova diad panagtrato to ed sikatayo ran lingkor to. Anggano aliwa tayon perpekto, aawaten toy panagdayew tayo tan ipapasen to tayon  kakaaro to. (Sal. 25:14) Si Jehova so nanggaway paraan pian makapikaaro tayo ed sikato​—inter toy Anak to pian naperdona iray kasalanan tayo. Talagan mapangasi tan maabagey si Jehova!

4. Anton abilidad so inter nen Jehova ed sikatayo, tan akin?

⁴ Imanoen so sakey nin pakanengnengan na inkamapaabeba nen Jehova. Lapud sikato so Amalsa, sarag to komon ya say impanggawa to la ed sikatayo et singa robot ya unor-unor labat ed no antoy labay to. Balet aliwan ontan so ginawa to. Ginawa to itayo unong ed indengan to tan inikdan to tayo na abilidad ya mandesisyon parad sarili tayo. Anggano totoo tayo labat, importante ed si Jehova iray desisyon tayo. Labay ton manlingkor tayod sikato lapud sikatoy inar-aro tayo tan natatalosan tayo ya parad pankaabigan tayo no sikatoy unoren tayo. (Deu. 10:12; Isa. 48:17, 18) Talagan misalsalamat tayo ta mapaabeba so Dios tayo!

5. Panon itayon ibabangat nen Jehova ya magmaliw a mapaabeba? (Nengnengen so litrato ed apis.)

⁵ Ibabangat itayo nen Jehova ya magmaliw ya mapaabeba panamegley na mismon alimbawa to. Singa bilang, anggano sikato so sankarunongan ed interon uniberso, akaparaan ya ondengel ed suhestion na arum. Diad tua, nampaiba ed Anak to nen ginawa To so amin a bengatla. (Pro. 8:27-30; Col. 1:15, 16) Tan anggano si Jehova so makapanyari ed amin, inikdan to na autoridad so arum. Singa bilang, tinuro to si Jesus bilang Ari na Panarian, tan inikdan to met na autoridad so 144,000 ya nakaiba nen Jesus ya manuley. (Luc. 12:32) Siempre, impasal nen Jehova si Jesus ed responsabilidad to bilang Ari tan Atagey ya Saserdote. (Heb. 5:8, 9) Ipapasal to met iray nakaiba nen Jesus ya manuley, balet  agto kokontrolen no panon dan sumpalen so asainmin da. Imbes, walay talek nen Jehova ed sikara ya gawaen day linawa to.​—Apo. 5:10.

6-7. Antoy naaralan tayo ed si Aman Jehova diad pangiter na responsabilidad ed arum?

⁶ No si Aman Jehova ya agto kaukolan so tulong na siopaman et mangimamatalek na autoridad ed arum, di mas nagkalalo lad sikatayo! Singa bilang, kasin sakey kan ulo na pamilya odino elder ed kongregasyon? Maabig no aligen moy alimbawa nen Jehova diad pangiter na responsabilidad ed arum. Tan no inmatalek mo la itan ed sikara, agmo la kokontrolen no panon dan sumpalen itan. No aligen moy Jehova, aglabat nasumpal so kimey, noagta nipasal mo met so arum tan natulongan mo ran nawalaan na kompiyansa ed sarili da. (Isa. 41:10) Anto ni naaralan ed si Jehova na saramay inikdan to na autoridad?

⁷ Nabasa tayo ed Biblia ya labalabay nen Jehova ya dengelen so opinyon na saray anghel. (1 Ara. 22:19-22) Atateng, panon yon naalig si Jehova? No matukoy, sarag yon tepetan iray ananak yo no panon ya gawaen so sakey ya kimey. Tan no marakep so suhestion da, awat yo itan.

8. Panon ya nanengneng so inkaanos nen Jehova diad samay impantrato tod si Abraham tan Sara?

⁸ Nanengneng met so inkamapaabeba nen Jehova diad inkaanos to. Anggano akapandesisyon lay Aman Jehova, maanos ya ondedengel no walay lingkor ton mantepet nipaakar ed desisyon to. Alimbawa, dinengel toy Abraham nen sikatoy nantepet nipaakar ed desisyon ton deralen so Sodoma tan Gomorra. (Gen. 18:22-33) Isipen pa met so reaksion nen Jehova nen akalek si Sara ya asawa nen Abraham ed samay imbaga To ya manlukon si Sara anggano akulaw la. (Gen. 18:10-14) Agnampasnokan nen Aman Jehova si Sara, noagta pinaseguroan to ya ontua so imbaga to.

9. Antoy naaralan na saray atateng tan elder ed alimbawa nen Aman Jehova?

⁹ Antoy naaralan na saray atateng tan elder ed alimbawa nen Aman Jehova? Antoy reaksion yo no wala ray mankuestion ed desisyon yo? Kasin idepensa yon tampol so desisyon yo? Odino talosan yo no akin ya onman so ibabaga ra? Seguradon maliket iray kapamilya tan kakongregasyon yo no aaligen yoy Aman Jehova. Apantongtongan tayo la no anto ray naaralan tayo ed inkamapaabeba nen Jehova. Pantongtongan tayo natan no antoy naaralan tayo ed pigaran karakter ed Biblia nipaakar ed inkamapaabeba.

10. Antoy ginawa nen Jehova pian makaaral tayo ed alimbawa na arum?

¹⁰ Lapud si Jehova so “Makapadinayew a Managbangat,” impaisulat to ed Biblia iray alimbawa ya pakaaralan tayo. (Isa. 30:20, 21) Makaaral tayo no dalepdepen tayoy alimbawa na saramay angipanengneng na maong iran kualidad, kaiba lay inkamapaabeba. Makaaral tayo met no amtaen tayoy nansumpalan na saramay ag-angipanengneng ed saratan ya kualidad.​—Sal. 37:37; 1 Cor. 10:11.

11. Antoy naaralan tayo ed agawad si Saul?

¹¹ Say unonan pantongtongan tayo et si Arin Saul. Nen kabataan ni et mapaabeba. Aliwan atagtagey so pakanengneng to ed sarili to tan ngalngali agto ni ingen awaten so responsabilidad ya iiter nen Jehova. (1 Sam. 9:21; 10:20-22) Diad inlabas balet na panaon, nagmaliw ya mapaatagey si Saul tan wala ray ginawa ton agto kanepegan ya gawaen. Pinmaway itan ya aliwliwan ugali to nen nagmaliw lan ari. Aminsan, agto la naalagar si propetan Samuel.  Kanian imbes ya mapaabeban manmatalek ed si Jehova, sikato la so nambagat anggano agto itan kanepegan ya gawaen. Lapud satan, aderal so relasyon nen Saul ed si Jehova tan nakal bilang ari. (1 Sam. 13:8-14) Komon ta makaaral tayo ed agawad si Saul. Agtayo gagawaen iray bengatlan agtayo kanepegan ya gawaen.

12. Panon ya impanengneng nen Daniel so inkamapaabeba?

¹² Duma balet si propetan Daniel. Manlapud inkaugaw ya anggad intatken to et sikatoy mapaabeba tan lanang ton kekerewen so panangigiya nen Jehova ed amin ya gagawaen to. Singa bilang, nen sikatoy inusar nen Jehova pian ipatalos so kugip nen Nabucodonosor, agto imbaga ya sikaton mismo so angipatalos ed kugip. Noagta impaamta to ed amin ya wadman ya si Jehova so angibaga ed kabaliksan na kugip tan Sikato so nepeg ya idayew. (Dan. 2:26-28) Antoy naaralan tayod satan? No pandinayewan na agagi so panagpaliwawam odino amayamay so nagagawaan mo ed ministeryo, kasin ipapaarap mo ed si Jehova so dayew? Tandaan ya anggapoy nagawaan tayo no anggapoy tulong nen Jehova. (Fil. 4:13) No lanang tayon sankanonot itan, naalig tayo met so inkamapaabeba nen Jesus. Akin?

13. Antoy naaralan tayo ed samay imbaga nen Jesus diad Juan 5:19, 30 nipaakar ed inkamapaabeba?

¹³ Anggano si Jesus so perpekton Anak na Dios, sikatoy lanang ya manpapasakop ed si Jehova. (Basaen so Juan 5:19, 30.) Agton balot sinali ya alaen so autoridad nen Ama to. Ibabaga na Filipos 2:6 ya ‘agto ninonot so manamsam pian naparaan toy Dios.’ Lapud mapaabeban Anak si Jesus, amta to ya walay limitasyon to tan rerespetoen toy autoridad nen Ama to.

14. Antoy reaksion nen Jesus nen walay kinmerew ed sikato na pabor ya agto kanepegan ya desisyonan?

¹⁴ Imanoen tayoy reaksion nen Jesus nen inmasingger ed sikato iray disipulo ton si Santiago tan Juan kaiba day ina ra. Inmasingger irad sikato pian onkerew na pabor ya agkanepegan nen Jesus ya desisyonan. Tampol ya imbaga nen Jesus ed sikara ya say Ama to labat so nayarin mandesisyon no siopay onyurong ed nikawanan to tan nikawigi to diad Panarian. (Mat. 20:20-23) Binidbir nen Jesus ya wala ray agto kanepegan ya gawaen.  Sikatoy mapaabeba​—say ginawa to labat et no antoy ipapagawa nen Jehova ed sikato. (Juan 12:49) Panon tayon naalig so alimbawa nen Jesus?

15-16. Panon tayon niyaplika so bilin na Biblia ya walad 1 Corinto 4:6?

¹⁵ Naalig tayoy inkamapaabeba nen Jesus no iyaplika tayoy bilin na Biblia diad 1 Corinto 4:6. Nabasa tayo ditan: “Agkayo onlalampas ed saray bengatlan nisulat.” Kanian no walay mantepet ed sikatayo no antoy nepeg dan gawaen, agtayo basta mangibabaga na sarili tayon opinyon odino no anto lad tay anonotan tayo. Imbes, ipaimano tayo iray prinsipyon nabasa ed Biblia tan saray bilin ya walad saray publikasyon tayo. No ontan so gawaen tayo, ipapanengneng tayo ya agtayo amta so amin ya bengatla. Tan bibirbiren tayo ya mas maong so bilin nen Jehova nen say opinyon tayo.​—Apo. 15:3, 4.

¹⁶ No mapaabeba tayo, agtayo labat napapagalangan si Jehova. Magmaliw tayo met ya maliket tan maong so relasyon tayo ed arum. Atan so onsublay ya pantongtongan tayo.

17. Akin ya mas maliket iray mapaabeba?

¹⁷ No mapaabeba tayo, mas maliket so bilay tayo. Akin? On ta no birbiren tayon wala ray agtayo sarag ya gawaen, misalsalamat tayo no tulongan itayo na arum. Say sakey ya alimbawa ed saya et nen pinaabig nen Jesus so samploran akating. Saksakey labat ed sikara so pinmawil tan akisalamat ed si Jesus. Amta na sayan laki ya grabe so sakit to tan agto sarag ya paabigen so sarili to. Lapud mapaabeba iman ya laki, inapresya toy tulong nen Jesus tan inggloria toy Dios.​—Luc. 17:11-19.

18. Akin ya balibalin kaulop iray mapaabeba? (Roma 12:10)

 ¹⁸ Saray mapaabeba et balibalin kaulop tan mainomay day mikaaro. Akin? On ta aapresyaen day maong ya ugali na arum tan ipapanengneng da ya walay tiwala da ed arum ya too. Maliket ira no walay balibalin nagagawaan na arum tan alisto ran mangiter na komendasyon.​—Basaen so Roma 12:10.

19. Akin et agtayo labay so magmaliw ya mapaatagey?

¹⁹ Saray mapaatagey balet et mairap day mangiter na komendasyon ta labay da ya sikara so nirayew. Ikokompara da met so sarili da ed arum tan labalabay dan ipanengneng ya mas maong ira. Agda labay ya ipasal tan ikdan na responsabilidad so arum ta iisipen dan, “Mas maong no siak lay manggawa ta seguradon duga.” Maambisyon tan maibeg met iray mapaatagey ya totoo. (Gal. 5:26) Anggapoy ombabayag ya kakaaro da. Kanian no nalikas tayon walay ontutubon inkamapaatagey ed puso tayo, manpikasi tayon tampol ed si Jehova tan kerewen tayoy tulong to pian ‘nauman so panagnonot tayo’ tan agla onlamot itan ed puso tayo.​—Roma 12:2.

20. Akin ya importantin mapaabeba tayo?

²⁰ Misalsalamat tayo ta si Jehova ya mismo so angipanengneng na alimbawa na inkamapaabeba! Sankanengneng tayo itan diad pantratrato tod saray lingkor to, tan labay tayon aligen so alimbawa to. Sakey ni, labay tayo met ya aligen so alimbawa na saray karakter ed Biblia ya mapaabeban nanakar kaibay Dios. Komon ta lanang tayon iter ed si Jehova so galang tan dayew ya kanepegan to. (Apo. 4:11) No ontan so gawaen tayo, tuloytuloy tayon makapanakar ya kaiba nen Aman Jehova, say Dios ya inar-aro to iray mapaabeba.