1. Anto la ray naaralan mo tungkol ed Amalsa manlapud impanugaw mo?

NO Tasi nen Jehova iray atateng mo, seguro manlapud impanugaw mo et imbangat da ka la tungkol ed si Jehova. Kanian naamtaan mo ya sikato so Amalsa, ya balibali iray ugali to, tan gawaen ton paraiso so interon dalin.—Gen. 1:1; Gawa 17:24-27.

2. Antoy pakanengneng na arum ya totoo ed saramay manisia ed Amalsa?

² Dakel balet so totoo natan ya agmanisian walay Dios ya Amalsa ed amin a bengatla. Ibabaga ra ya basta labat linmesa so bilay. Diad gapo kuno et walay linmesan melmelag ya organismo tan kalnakalna itan ya nan-evolve, ya anggad nagmaliw ya nanduruman klase na ayayep tan tanaman. Maslak ya manisia ed satan et saray de-aral ya totoo. Ibabaga ra ya papaneknekan kuno na science ya aliwa so ibabangat na Biblia. Papapawayen da ya saray totoon manisia ed Amalsa et ag-akapanaral, ignorante, tan makapuy so ulo da.

3. Akin et importante ya tuloytuloy tayon pabiskegen so pananisia tayo?

³ Posible kasi ya onkapuy so pananisiam ed si Jehova lapud opinyon na saray de-aral a totoo? Say ebat ed satan et akadepende ed no akin ya manisia kan si Jehova so Amalsa. Kasin say rason no akin ya manisia ka et lapud atan so imbangat ed sika na atateng mo odino lapud inaral mon mismo iray ebidensya ya talagan walay Amalsa? (1 Cor. 3:12-15) Anggano abaybayag tayo lan Tasi nen Jehova, importante ya tuloytuloy tayon pabiskegen so pananisia tayo pian ag-itayo naimpluensyaan na pilosopiya tan ideya na saray totoon agmanisia ed Biblia. (Col. 2:8; Heb. 11:6) Pantongtongan tayo sirin ed sayan artikulo (1) no akin ya dakel so agmanisia ya walay Amalsa, (2) no panon mon napabiskeg so pananisiam ed si Jehova, tan (3) no antoy gawaen mo pian mansiansian mabiskeg so pananisiam.

4. Base ed Hebreo 11:1 tan paimanod leksab, antoy basiyan na tuan pananisia?

⁴ Iisipen na arum ya saramay manisian walay Dios et basta labat anisia anggano anggapoy basiyan da. Pero ibabaga na Biblia ya aliwan ontan so tuan pananisia. (Basaen so Hebreo 11:1 tan paimanod leksab.) Say tuan pananisia et akabase ed makakombinsin ebidensya. Singa bilang, manisia tayo ya tua si Jehova, si Jesus, tan say Panarian ed tawen anggano agtayo ra nanengneng lapud wala ray makakombinsin ebidensya. (Heb. 11:3) Oniay imbaga na sakey ya biochemist ya nagmaliw a Tasi: “Ag-ibabaliwala na Saray Tasi nen Jehova so ibabaga na science. Diad tua, walay basiyan na amin ya papanisiaan da.”

5. Antoy sakey ya rason no akin ya dakel so agmanisia ya walay Amalsa?

⁵ Ompan nitepet tayo, ‘Akin balet et dakel so agmanisia ya walay Amalsa anta dakel met so makakombinsin ebidensya ya walay Dios?’ On ta say arum ed sikara et ag-awalaan na tsansa ya aralen iratan ya ebidensya. Oniay imbaga nen Robert, ya natan et sakey lan Tasi nen Jehova: “Agdan balot imbangat ed eskuelaan mi ya walay Dios ya Amalsa, kanian say amtak anggapon talagay Dios. Naamtaan ko labat itan nen 22 ak la. Wala ray akatongtong kon Tasi nen Jehova tan impanengneng dad siak iray makakombinsin ebidensya ed Biblia ya talagan walay Amalsa.” *—Nengnengen so kahon ya “ Importantin Mensahe Parad Atateng.”

6. Anto ni ray rason no akin ya agmanisia so arum ya walay Amalsa?

⁶ Say arum et agmanisia ya walay Amalsa ta  ibabaga ran, ‘to see is to believe.’ Pero diad tua, manisia met ira ed saray bengatlan agnanengneng, singa say gravity. Panisiaan dan walay gravity ta walay ebidensya ya tua itan. Ontan ya ontan imay pananisia ya ibabaga na Biblia—manisia tayo ed saray “agnanengneng” ta walay malinew ya ebidensya ya “tua” iratan. (Heb. 11:1) Siempre, kaukolan so panaon tan sagpot pian aralen iratan ya ebidensya, pero say arum et agda la labay ya aralen iratan. No say sakey et agto aralen iratan ya ebidensya, ompan isipen ton tampol ya anggapoy Dios.

7. Kasin amin ya edukadon totoo et agmanisia ya walay Dios? Ipaliwawa.

⁷ Wala ray scientist ya nen inaral da iray ebidensya, akombinse iran walay Dios ya Amalsa ed interon uniberso. * Singa si Robert ya abitla nen niman, inisip met na arum ya  anggapoy Amalsa ta ag-itan balot ibabangat ed saray university. Pero dakel ya scientist so awalaan na tsansa ya nakabat si Jehova kanian naar-aro da. Sarayan scientist et inaral dan maong iray ebidensya. Ontan met so gawaen tayo. Atagey man so inaral tayo o andi, importante ya pabiskegen tayoy pananisia tayo ed Dios. Sikatayon mismo so manggawa ed satan.

8-9. (a) Anton tepet so pantongtongan tayo? (b) Antoy epektod sika no aralen mo ray nanduruman pinalsa?

⁸ Anto ray gawaen mo pian napabiskeg moy pananisiam ed Amalsa? Pantongtongan tayoy apatiran paraan.

⁹Aral mo ray pinalsa. Napabiskeg moy pananisiam ed Amalsa no obserbaan mo ray ayayep, tanaman, tan saray bitewen. (Sal. 19:1; Isa. 40:26) No talagan aralen mo iratan, mas nakombinse ka ya walay Amalsa. Diad saray publikasyon tayo, wala ray artikulo tungkol ed nanduruman pinalsa. Anggano singa mairap mon talosan iratan, basam labat ta seguradon walan walay natalosan mo. Tan marakep no bantayan mo lamet diad jw.org iray balibalin video tungkol ed nanduruman pinalsa ya abantayan tayo ed imbebeneg ya regional a kombension.

10. Mangiter na sakey ya alimbawa ya prueba ya walay Amalsa. (Roma 1:20)

¹⁰ No aaralen mo so sakey a pinalsa, isip mon maong no antoy naaralan mo ed satan tungkol ed si Jehova. (Basaen so Roma 1:20.) Singa bilang, aaralen mo so tungkol ed agew ya mangiiter na petang tan liwawa diad planetan Dalin. Naamtaan mo ya wala manayay ibubuga to ya ultraviolet rays ya makapuy so epekto tod sikatayo. Panon itayon naproprotektaan ey? Maong labat ta walay pinagka-payong na planetan Dalin—say ozone layer. Say makapabilib, no mas dakel so ultraviolet rays ya ibubuga na agew, mas onkapal met so ozone layer. Isip mo pa: Basta labat kasin linmesa so ozone layer? Odino walay maaro tan matalinon Amalsa ed satan?

11. Iner so pakalmoan mo na saray impormasyon ya mamabiskeg na pananisiam? (Nengnengen so kahon ya “ Saray Pakalmoan Mo na Impormasyon ya Mamabiskeg ed Pananisiam.”)

¹¹ Makalmo ka na dakel ya impormasyon ya mamabiskeg ed pananisiam no man-research ka ed Watch Tower Publications Index tan diad jw.org. Ompan labay moy manbasa na saray artikulo tan manbantay na saray video ed seryen “Wala Kasi Nandesinyo?” Antirikey labat iratan, pero pakaaralan mo na saray makapabilib ya impormasyon tungkol ed nanduruman tanaman tan ayayep. Nanengneng mo met ditan ya aaligen manaya na saray scientist so desinyo na saray tanaman tan ayayep diad saray imbension da.

12. Anto ran detalye so imanoen mo ed Biblia pian ombiskeg so pananisiam?

¹²Aral moy Biblia. Amay biochemist ya abitla ed parapo 4 et agmet tampol anisia ya walay Amalsa. Pero diad inlabas na panaon, akombinse lanlamang. Akin ey? Oniay imbaga to: “Say pananisiak et aglabat akabase ed saray inaral kod science. Say sakey nin rason no akin ya akombinse ak et lapud inaral kon maong so Biblia.” Sika ey? Ompan dakel met lay antam ed Biblia. Pero kaukolan mon itultuloy ya aralen itan pian lalon ombiskeg so pananisiam ed Amalsa. (Jos. 1:8; Sal. 119:97) Singa bilang, aral mo iray detalye ya ibabaga na Biblia tungkol ed history. Amtaen mo met no anto ran propesiya na Biblia so tinmua la. Imanom met no panon ya mankokonektaan iray impormasyon ya inrekord na nanduruman nansulat na Biblia. No aralen mo iratan, mas magmaliw kan kombinsido ya walay maaro tan matalinon  Amalsa ya nanggawa ed sikatayo tan nanlapud sikato so Biblia. *—2 Tim. 3:14; 2 Ped. 1:21.

13. Antoy sakey ya prinsipyo ed Biblia ya prueban karga na satan so karunongan na Amalsa?

¹³ No aaralen moy Biblia, nengneng mo no panon kapraktikal iray bilin ya wadtan. Singa bilang, abayag lan imbaga na Biblia ya no say sakey et maaro ed kuarta, singa to sasaksaken so sarili to na “dakel a pakasakitan.” (1 Tim. 6:9, 10; Pro. 28:20; Mat. 6:24) Tua kasi itan? Oniay imbaga na libron The Narcissism Epidemic: “[Mabetbet ya] agtanton maliket tan mainomay ya na-depress iray materyalistikon totoo. Anggan saray manaambisyon ni labat ya onyaman et makakaeksperiensyay problemad isip; mas mabetbet [met] ya onsakit so beklew, beneg, tan ulo ra.” Talagan duga sirin so bilin na Biblia ya agtayo dapat magmaliw ya maaro ed kuarta! Wala ray nanonotan mon bilin na Biblia ya akatulong ed sika? No nanenengneng tayo ya makakatulong ed sikatayo iray bilin na Biblia, diman tayo napruebaan ya inar-aro itayo na Amalsa tan amta to no antoy maabig parad sikatayo, kanian lalo tayon mantiwala ed karunongan to. (Sant. 1:5) No ontan so gawaen tayo, mas maliket so bilay tayo.—Isa. 48:17, 18.

14. Anto ray naamtaan mo tungkol ed si Jehova no aralen moy Biblia?

¹⁴Tandaan mo ya say rason no akin ya aralen moy Biblia et labay mo nin mas nakabat si Jehova. (Juan 17:3) Diad panaaral mo, seguradon nanengneng mo iray balibalin ugali tan kualidad to ya parehon-pareho ed saramay ugali tan kualidad ya anengneng mo ed saray pinalsa to. Kanian no mas aralen mo iray kualidad nen Jehova, lalo kan nakombinse ya talagan tua si Jehova. (Exo. 34:6, 7; Sal. 145:8, 9) Legan mon mas nakakabat si Jehova, sikatoy mas naar-arom, lalon ombiskeg so pananisiam, tan lalon onasingger so liknaan mo ed sikato.

15. Antoy epekto ed sika no ipaamtam met ed arum no akin ya manisia kan walay Dios?

¹⁵Ipaamtam ed arum no akin ya manisia kan walay Dios. Lalon ombiskeg so pananisiam no gawaen mo itan. Panon to balet no walay nakatongtong mon agmanisia ed Dios tan agmo amtay iyebat mo? Man-research ka ed saray publikasyon tayo tan ipaliwawam ed sikato iray a-research mon impormasyon ya base ed Biblia. (1 Ped. 3:15) Sarag mo met so mangitagar na eksperiensyadon agi ya ontulong ed sikan mangebat ed saray tepet to. Anggano agnin siansia manisia imay too ed ibabaga na Biblia, ayos labat. Diad tua, ag-asayang so impan-research mo ta apabiskeg mon mismoy pananisiam. Kanian anggano ibaga na saray edukado tan matalinon totoo ya anggapoy Amalsa, agda ka bastabasta naimpluensyaan.

16. Antoy nagawa no agtayo itultuloy ya pabiskegen so pananisia tayo?

¹⁶ Anggano abayag tayo lan manlilingkor ed si Jehova, importante ya tuloytuloy tayon pabiskegen so pananisia tayo ed sikato. Akin ey? On ta no agtayo manalwar, ompan onkapuy so pananisia tayo. Tandaan, manisia tayo ed saray bengatlan agnanengneng ta wala ray makakombinsin ebidensya ya tua iratan. Pero di ba, mainomay tayon nalingwanan tan ibaliwala so bengatlan agtayo nanenengneng? Atan so rason no akin ya imbaga nen apostol Pablo ya say ikapuy na pananisia et “kasalanan a mainomay a makaamper ed sikatayo.” (Heb. 12:1) Anto sirin so gawaen tayo pian ag-onkapuy so pananisia tayo?—2 Tes. 1:3.

17. Antoy makatulong pian mansiansian mabiskeg so pananisia tayo?

 ¹⁷ Unona, lanang mon ipikasi ed si Jehova ya ikdan to kay masanton espiritu to. Akin ey? On ta say pananisia et kaiba ed bunga na masanton espiritu. (Gal. 5:22, 23) Agtayo napabiskeg so pananisia tayo ed Amalsa no anggapoy tulong na masanton espiritu to. No lanang tayon kerewen itan ed si Jehova, seguradon ikdan to tayo. (Luc. 11:13) Espisipiko tayon ipikasi ed sikato ya: “Aruman moy pananisia mi.”—Luc. 17:5.

18. Base ed Salmo 1:2, 3, anton regalo so inter nen Jehova ed sikatayo?

¹⁸ Ontan met, importante ya regular so personal study’m. (Basaen so Salmo 1:2, 3.) Nen insulat itan ya salmo, pigpigara labat ya Israelita so walaan na kompleton kopya na Ganggan na Dios, singa say ari tan saray saserdote. Kanian say gagawaen dad Israel nensaman, maminsan ed kada pitoran taon et mantitipon iray Israelitan “lalaki, bibii, ugugaw,” tan saray dayo pian ondengel ed pambasa ed Ganggan na Dios. (Deu. 31:10-12) Nen wadiad dalin si Jesus, pigpigara met labat ya totoo so walaan na kopya na Kasulatan tan say arum ed saratan et walad sinagoga. Pero natan, amin lawarin totoo et walay Biblia to. Regalo itan nen Jehova ed sikatayo. Panon tayo sirin ya nipanengneng ya misalsalamat tayod satan ya regalo?

19. Antoy nepeg tayon gawaen pian mansiansian mabiskeg so pananisia tayo?

¹⁹ Nipanengneng tayo ya misalsalamat tayod Dios no regular tayon basaen tan aralen so Biblia. Agtayo labat itan gagawaen no naisip tayo labat. Dapat talagan walay eskedyul tayo parad satan. No tumboken tayoy eskedyul tayo parad personal study, mansiansian mabiskeg so pananisia tayo.

20. Antoy itultuloy tayon gawaen?

²⁰ Anggano dakel so “marunong tan mautek” ed sayan mundo, agda amta balet no akin ya onuuges lan onuuges so situasyon diad dalin tan no antoy gawaen nen Jehova diad arapen. (Mat. 11:25, 26) Duma tayo balet ta amta tayo iratan lapud akabase so pananisia tayo ed Salita na Dios tan inaral tayon maong itan ya sagradon libro. Kanian itultuloy tayo komon ya pabiskegen so pananisia tayo, tan tulongan tayo so dakel ya totoo anggad posible pian ombiskeg met so pananisia ra ed Amalsa. (1 Tim. 2:3, 4) Tan itultuloy tayon talaranan so panaon sano amin ya mabilay diad dalin et idayew day Jehova tan ibaga da imay walad Apocalipsis 4:11: “Sika so makanepegan, Jehova a Dios mi, a mangawat na gloria . . . lapud pinalsam so amin a bengatla.”