No manba-Bible reading tayo, marakep no man-research tayo pian mas natalosan tayoy babasaen tayo. Pero tandaan ya say rason no akin ya gawaen tayo itan et aliwan pian naaruman labat so amta tayo ed Biblia. Say rason no akin ya labay tayoy makakotkot na espiritual iran kayamanan tungkol ed si Jehova et pian mas naar-aro tayo. Legan mon babasaen so sakey ya salaysay ed Biblia, tepetan moy sarilim, ‘Antoy naaralan ko dia tungkol ed si Jehova?’

Singa bilang, ompan nanengneng mod satan ya salaysay so panangaro, karunongan, hustisya, tan pakapanyari nen Jehova. Pero aliwan saratan labat so kualidad to, dakdakel ni! Iner mo naromog iray impormasyon tungkol ed saratan ya kualidad to?

Diad Watch Tower Publications Index, nanengneng moy listaan na masulok ya 50 ya arum nin kualidad nen Jehova. La kad heading ya “Jehovah,” insan ka onlad subheading ya “Qualities by Name.” I-research mo iray kualidad to ya anengneng mod Bible reading mo. (No say na-access mo labat et say Giya ed Pan-research na Saray Tasi nen Jehova, la kad heading ya “Jehova a Dios,” insan ka onla ed subheading ya “Saray Kualidad nen Jehova.”)