Kasin natandaan mo ray abasam ed saray isyu na Say Panag-bantayan ed sayan taon? Nengneng mo pa sirin no naebatan mo irayan tepet:

Antoy ipapaseguro na samay nabasad Exodo 34:6 ya si Jehova et “abalbaleg ed matoor a panangaro” tan “mapangasi”?

Lapud mapangasi si Aman Jehova, peperdonaen to iray lingo tayo. Ipapaseguro na sayan teksto ya tulongan to tayo lapud ‘balbaleg so matoor a panangaro to.’ Aligen tayoy Jehova ya perdonaen tayo met so arum.—w21.01, p. 21.

Akin et inyuksoy nen Jehova so inkaulo?

Ginawa to itan ta inar-aro to tayo, tan labay ton mareen tan organisado so pamilya to. Lapud sayan uksoyan, amta tayo no siopay nepeg ya mandesisyon tan no siopay akanresponsabilidad pian seguroen ya nagagawaan itan ya desisyon.—w21.02, p. 3.

Akin et nepeg ya manalwar iray Kristiano diad pangusar day electronic messaging app?

No manguusar so sakey na messaging app, kailangan ya pilien ton maong no siopa ray nakaka-chat to. Mairap itan ya gawaen lalo la no dakdakel so membro ed sakey ya group chat. (1 Tim. 5:13) Wala met so peligro ed pangi-forward na saray balita ya aliwan kompirmado, tan agtayo dapat pankuakuartaan iray agagi ya walad contacts tayo ed messaging app.—w21.03, p. 31.

Anto ray pigaran rason akin et inabuloyan na Dios ya manirap tan ompatey si Jesus?

Unona, impasak si Jesus ed poste pian nibulos iray Judio ed “samba na Ganggan.” (Gal. 3:10, 13) Komadua, labay nen Jehova ya iparaan si Jesus parad pagmaliw ton Atagey a Saserdote. Komatlo, say impanmatoor nen Jesus anggad patey et prueba ya makapanmatoor so too anggano ondalan ed graben subok. (Job 1:9-11)—w21.04, p. 16-17.

Antoy gawaen yo no diad teritorya yo et ngalngali anggapoy nasasabi yon totoo?

Manpulong kayo diad oras ya posiblin walad abung iray totoo. Sarag yo met so manpulong ed lugar ya kawalaan na totoo. Tan sali yoy duman paraan na panagpulong, singa say pan-letter writing.—w21.05, p. 15-16.

Antoy labay ya ibaga nen apostol Pablo ed samay insulat ton: “Diad panamegley na ganggan et inatey ak ed ganggan”? (Gal. 2:19)

Lapud Mosaikon Ganggan, anengneng na saray Israelita ya talagan makasalanan ira, tan “nitonton [ira] ed Kristo.” (Gal. 3:19, 24) Akatulong itan pian panisiaan nen Pablo ya si Jesus so Kristo. Lapud agla sakop si Pablo na Mosaikon Ganggan, sikatoy “inatey . . . ed ganggan.”—w21.06, p. 31.

Akin et nibaga tayon si Jehova so sankaanosan ed amin?

Dakel so aanosan nen Jehova: Say impanderal ed ngaran to, say agpampapasakop na dakel ya totoo ed uley to, say impanrebelde na arum ya anak to, saray katilaan ya ikakayat nen Satanas, say paniirap na saray inar-aro ton lingkor, say pakakailiw to ed saray inatey lan kakaaro to, tan say panederal ed planetan Dalin.—w21.07, p. 9-12.

Panon ya impanengneng nen Jose so inkaanos?

Inanosan toy aliwliwan ginawa na saray kuya to. Inanosan to met so impakapriso to na pigaran taon ed Ehipto lapud palson akusasyon.—w21.08, p. 12.

Antoy epekto na simbolikon yegyeg ya impropesiya ed Aggeo 2:6-9, 20-22?

Maslak ya totoo et agda nagustoan so mensahe na Panarian, pero dakel nin siansia so mangaawat ed katuaan. Say sampot ya panyegyeg nen Jehova ed saray nasyon et no deralen to la ra.—w21.09, p. 15-19.

Akin et ag-itayo dapat ontutundan manpulong?

Amta nen Jehova so pansasagpot tayo, tan naliliketan ed satan. No ag-itayo ontundan manpulong, awaten tayoy bilay ya andi-anggaan.—w21.10, p. 25-26.

Panon ya makatulong so Levitico kapitulo 19 pian niyaplika tayo imay bilin ya: “Magmaliw kayon masanto diad amin a kagagawa yo”? (1 Ped. 1:15)

Satan ya bersikulo et posiblin inala nen apostol Pedro ed Levitico 19:2. Dakel so nabasa ed Levitico kapitulo 19 ya makatulong pian niyaplika tayo imay bilin ed 1 Pedro 1:15.—w21.12, p. 3-4.