1. Anggaman si Jehova so Sankatagyan a Dios, antoy iyiimbita ton gawaen na arum?

SI Jehova so Sankatagyan a Dios, say Manamalsa ed amin a bengatla, tan anggapoy limitasyon na karunongan tan pakayari to. Tinulongan nen Jehova si Job a natalosan itan. Nen sikatoy tinepetan nen Jehova nipaakar ed saray pinalsa to, oniay inyebat nen Job: “Amtak la natan a sarag mon gawaen so amin a bengatla tan anggapo so nononoten mon gawaen ya agmo nagawaan.” (Job 42:2) Sarasarag nen Jehova a gawaen so amin ya gagala to anggano anggapoy ontulong ed sikato. Balet manlapu lad gapo et maaro ton iimbitaan so arum a mikimey ed sikato pian nasumpal so gagala to.

2. Anton importantin kimey so inyabuloy nen Jehova ya gawaen nen Jesus?

² Say sankaunaan a pinalsa na Dios et say bogbogtong ya espiritun Anak to. Inabuloyan nen Jehova so Anak to ya mikimey ed sikato diad impamalsa ed amin, balanglan walad tawen odino diad dalin. (Juan 1:1-3, 18) Nipaakar ed si Jesus, oniay insulat nen apostol Pablo: “Diad panamegley to et apalsa so amin ni ran  bengatlan walad tawen tan walad dalin, saray bengatlan nanengneng tan agnanengneng, balanglan saratan et trono odino pakauley odino gobierno odino autoridad. Apalsa so amin ni ran bengatla diad panamegley to tan parad sikato.” (Col. 1:15-17) Kanian, pinagalangan nen Jehova so Anak to diad impangiyabuloy ton mikimey ed sikato ed panamalsa tan diad impangibaga tod arum nipaakar ed importantin betang na Anak to.

3. Antoy inyimbita nen Jehova ed si Adan a gawaen to, tan akin?

³ Inimbitaan met nen Jehova iray totoo ya mikimey ed sikato. Singa bilang, inabuloyan toy Adan ya ngaranan iray ayayep. (Gen. 2:19, 20) Seguradon nanliketan nen Adan so pangobserba ed sarayan pinalsa, panaral ed itsura tan kakikiwas da, tan pampili no anton ngaran so matukoy ed saratan! Sarag nen Jehova ya ngaranan iray ayayep ta sikato so amalsa ed saratan. Balet, maaro ton inmatalek itan a kimey ed si Adan. Inter met na Dios ed si Adan so pankanawnawan palaknaben so hardin na Eden ya anggad magmaliw a Paraiso so interon dalin. (Gen. 1:27, 28) Makapaermen ta nandesisyon si Adan ya agla mikimey ed Dios, kanian mauges so agawad sikato tan ed amin ya ilalak to.​—Gen. 3:17-19, 23.

4. Panon ya akikimeyan ed Dios so arum a totoo pian nasumpal so gagala to?

⁴ Ag-abayag et inimbitaan na Dios so arum ya totoo a mikimey ed sikato pian nasumpal so gagala to. Nanggaway biong si Noe pian niliktar so sarili to tan say pamilya to ed sankamundoan a Delap. Inliktar nen Moises so nasyon na Israel manlapud Ehipto. Indaulo nen Josue so Israel ya onloob ed Insipan a Dalin. Angipaalagey si Solomon na templo diad Jerusalem. Si Maria et nagmaliw ya ina nen Jesus. Sarayan matoor a totoo tan dakel ni so akikimey ed si Jehova pian nasumpal so gagala to.

5. Anton kimey so sarag tayon pibiangan, tan agkasi nagawaan nen Jehova itan no anggapo tayo? (Nengnengen so litratod gapo na artikulo.)

⁵ Natan, iimbitaan itayo nen Jehova a sigpot a misuportaan ed Mesianikon Panarian. Dakel so paraan pian makapanlingkor tayo ed Dios. Tua, aliwan parepareho so nagawaan tayo ed panaglingkor, balet amin tayo et makapibiang ed pangipulong na maong a balita na Panarian. Siempre, sarasarag nen Jehova a gawaen itan. Anggaman sikatoy walad tawen, sarag to ya direktan mitongtong ed saray totoo diad dalin. Imbaga nen Jesus a nayarian ni ingen a paeyagen nen Jehova iray bato pian ibagad arum so nipaakar ed Mesianikon Ari. (Luc. 19:37-40) Balet, inikdan itayo nen Jehova na pribilehyon magmaliw ya “kakimeyan” to. (1 Cor. 3:9) Insulat nen apostol Pablo: “Lapud mankikimey kamin kaiba to, mikakasi kami met ya agyo aawaten so agnaparaan a kaabigan na Dios insan lingwanan so gagala na satan.” (2 Cor. 6:1) Say pikimeyan ed Dios et baleg a pribilehyo a panlapuay baleg a liket tayo. Aralen tayo so pigaran rason no akin.

6. Antoy alikna na panguloan ya Anak na Dios diad impikimey tod Ama to?

⁶ Manlapu lad gapo et panliliketan na saray lingkor nen Jehova so pikimey ed sikato. Antis ya onla diad dalin, oniay inkuan na panguloan ya espiritun Anak na Dios, a mangirerepresenta ed karunongan: “Si Jehova kinayarian to ak dia ed gapo na dalan to. . . . Wala ak ed abay to, singa uloen a komikimey; tan siak nensaman so inagew-agew a panggayagaan to, a malikeliket lawas ed arap to.” (Uli. 8:22, 30) Malikeliket si Jesus ya akikimeyan ed Ama to, maliket lapud saray agawaan to tan lapud amta ton sikatoy inaro nen Jehova. Kumusta tayo balet ey?

7. Akin a makapaliket so kimey ya panagpulong?

⁷ Imbaga nen Jesus ya makapaliket so mangiter tan mangawat. (Gawa 20:35)  Malikeliket tayo nen naaralan tayoy katuaan, tan maliket tayon inabang itan ed arum. No inanabang tayod arum so katuaan ya walad Biblia, nanengneng tayon naliliketan a maong iray narasan ed espiritual no natatalosan day ibabangat na Biblia tan onaapit so relasyon dad Dios. Naliliketan tayo no nanenengneng tayo ran manguuman, aliwa labat lan diad panagnonot da noagta diad paraan met na kabibilay da. Namoria tayo ya talagan importante so kimey ya pangipulong ed maong a balita. Lapud satan, posiblin makapambilay na andi-anggaan iramay mikareenan ed Dios. (2 Cor. 5:20) Wala ta ni mas makapaliket tan makapnek a kimey a napibiangan tayo nen say itulong ed saray totoon manbilay ed paraan a manresulta ed bilay ya andi-anggaan?

8. Antoy imbaga na arum nipaakar ed liket ed pikimey ed si Jehova?

⁸ Maliket tayo no wala ray interesado ed mensahe ya ipupulong tayo, pero malikeliket tayo met ta amta tayon napapaliket tayoy Jehova tan papablien to ray sagpot tayon manlingkor ed sikato. (Basaen so 1 Corinto 15:58.) Oniay imbaga nen Marco, a tagad Italy: “Agaylay liket ko ta amtak ya iiter koy sankaabigan ko ed si Jehova, aliwan diad sakey a toon nalingwanan to lanlamang so amin ya agawaan ko.” Ontan met so imbaga nen Franco, a manlilingkor ed Italy: “Panamegley na Salita to tan saray espiritual a probisyon to, inagew-agew ya ipapanonot nen Jehova ya inad-aro to tayo tan importante so amin ya gagawaen tayo parad sikato anggano nayarin iisipen tayon anggapoy kana na saray pansasagpot tayo. Lapud pikikimey kod Dios, malikeliket ak tan makabkabaliksan so bilay ko.”

9. Panon kaapit so relasyon nen Jehova tan si Jesus, tan akin?

⁹ No mikikimey tayod saray inaro tayo, onaapit tayod sikara tan naaamtaan tayoy personalidad tan saray kualidad da. Naamtaan tayo no anto ray kalat da tan no antoy gagawaen da pian nadampot iratan. Nayarin pigay bilyon a taon so impikimey nen Jesus ed si Jehova, kanian nagmaliw a malmalet so panangaro tan panamabli ra ed sakey tan sakey. Oniay imbaga nen Jesus nipaakar ed maapit ya relasyon da: “Siak tan say Ama et saksakey.” (Juan 10:30) Talagan mankakasakey ira, tan naynay iran mantutulongan ed amin a gagawaen da.

10. Akin ya mas onapit itayod Dios tan ed arum no manpupulong tayo?

¹⁰ Impikasi nen Jesus ed si Jehova a bantayan to ray disipulo to. Akin ey? Impikasi to: “Pian magmaliw iran saksakey a singa sikata.” (Juan 17:11) No tutumboken tayo ray estandarte na Dios tan mibibiang itayo ed kimey a panagpulong, natalosan tayo so alay abig iran kualidad to. Naaralan tayo no akin ya makabat so panmatalek ed sikato tan itumbok ed panangigiya to. No onapit tayod Dios, sikatoy onapit met ed sikatayo. (Basaen so Santiago 4:8.) Onapit tayo met ed saray agagi tayo lapud pareho iray subok tan liket a naeeksperiensya tayo, tan  pareho met iray kalat tayo. On, sankakaiba itayon mankikimey, manliliket, tan mansusungdo. Inkuan nen Octavia ya tagad Britain: “Mas inmapit ak ed arum lapud pikikimey kod si Jehova, tan say pikakaarok tan relasyon kod arum et aliwa lan based ataptapew iran bengatla noagta ed parehon kalat tan direksion na bilay.” Ontan met kasi so naliliknam? Mas onaapit ka kasid arum no nanenengneng moy pansasagpot dan napaliket si Jehova?

11. Akin a mas lalon onapit tayod si Jehova tan ed saray agagi tayo diad balon mundo?

¹¹ Malet so panangaro tayod Dios tan ed saray agagi tayo natan, balet mas lalon onelet itan diad matunong a balon mundo. Nonoten tayo pa ray gawaen ed arapen! Abeten tayo iray napaoli tan ibangat ira nipaakar ed si Jehova. Kaukolan tayon gawaen a paraiso so interon dalin. Aliwan simplin kimey iratan, balet seguradon makapalikliket so pankimey tayon saniiba, anggad magmaliw itayon perpekto diad Mesianikon Panarian! Mas lalon onapit so amin a totoo ed balang sakey tan ed Dios, tan seguradon ‘peneken to so pilalek na amin a bengatlan mabilay.’​—Sal. 145:16.

12. Panon itayon naprotektaan na panagpulong?

¹² Kaukolan tayon protektaan so relasyon tayod si Jehova. Lapud manbibilay tayod mundo a kokontrolen nen Satanas a Diablo tan ag-itayo perpekto, magmainomay tayon naalig so mauges a panagnonot tan kondukta na mundo. Nayarin nikompara so espiritu na mundo ed maples ya agus na ilog a mangiyanor ed sikatayo diad direksion ya agtayo labay a laen. Pian ag-itayo niagus, kaukolan tayon usaren so amin a biskeg tayo ya onlangoy pian subaen so agus. Ontan met, kaukolay pansagpot pian ag-itayo iyanor na impluensya na mundo nen Satanas. Sano pupulongan tayoy arum, makapampokus tayo ed importante tan makagunggona iran espiritual a bengatla, aliwan ed saray kanonotan ya mamakapuy ed pananisia tayo. (Fil. 4:8) No manpupulong tayo, ombibiskeg so pananisia tayo, tan nipapanonot ed sikatayo iray sipan tan maaron estandarte na Dios. Ontulong met itan pian napansiansia tayon kompleto so espiritual ya armas tayo.​—Basaen so Efeso 6:14-17.

13. Antoy liknaan na sakey ya agi ed Australia nipaakar ed panagpulong?

¹³ No naynay itayon manpupulong tan mibibiang ed arum ni ran espiritual a kimey, anggapo lay panaon tayon manpagan maong ed saray personal a problema tayo, tan naprotektaan itayo lapud satan. Oniay inkuan nen Joel, a tagad Australia: “Lapud panagpulong, natatalosan ko no anto ray tuan nagagawa. Nipapanonot ed siak iray probleman aarapen na totoo tan no panon ak ya nagugunggonaan ed pangiyaaplikak ed saray prinsipyo na Biblia. Ontutulong ed siak so panagpulong pian mansiansian mapaabeba, tan pankanawnawak itan pian manmatalek ed si Jehova tan ed saray agagik.”

14. Akin a say pantutultuloy tayon pampulong et ebidensya a tutulongan itayo na espiritu na Dios?

¹⁴ Lapud panagpulong, ombiskeg met so talek tayo ya tutulongan itayo na espiritu na Dios. Isipen pa: Naikdan kay trabahon mangibunog na masustansian tinapay ed saray totoo diad lugar yo. Anggapoy sueldom tan agda ipawil iray gastosen mo. Insan naamtaan mo ya maslak ed saray totoo et agda labay manaya may tinapay, tan busolen ka ni na arum lapud pangibubunog mo. Makapanbayag ka kasi ed satan a trabaho? Seguradon nadismaya kan tampol ed negatibon reaksion na totoo, tan ompan agmo la labay ya ituloy. Balet diad kimey tayon panagpulong, dakel ed sikatayo so ag-ontutundan manpupulong diad ilalabas na taon tan diad  sarili tayon gastos, anggano pampapasnokan tan babalawen itayo na saray totoon agmangaapresya ed gagawaen tayo. Agta ebidensya itan a tutulongan itayo na espiritu na Dios?

15. Antoy koneksion na panangipulong na maong a balita tan say gagala nen Jehova ed katooan?

¹⁵ Antoy koneksion na panangipulong na maong a balita tan say maaron gagala nen Jehova ed katooan? Gagala to ya manayam ed dalin iray totoo, tan ag-ira ompatey. Tan anggano nankasalanan si Adan et ag-anguman so nonot nen Jehova. (Isa. 55:11) Imbes, inyuksoy toy pangisalba ed totoo manlapud kasalanan tan ipapatey. Lapud satan a gagala, linma diad dalin si Jesus tan imbagat toy bilay to parad saray matulok a totoo. Balet, pian magmaliw iran matulok, kaukolan dan natalosan no antoy kakaukolanen na Dios ed sikara. Kanian imbangat met nen Jesus iray totoo no anto ray kakaukolanen na Dios, tan ingganggan to ray disipulo to ya ontan met so gawaen da. Diad panutulong tayo ed arum pian makapikareenan irad Dios, direkta tayon mibibiang ed maaron uksoyan to ya iliktar iray totoo manlapud kasalanan tan ipapatey.

16. Antoy koneksion na panagpulong tayo tan say sankaimportantian iran ganggan na Dios?

¹⁶ Diad itutulong tayod arum ya naromog so dalan ya ompugtad bilay ya andi-anggaan, nipapanengneng tayoy panangaro tayod kapara tayon totoo tan ed si Jehova, “a say linawa to et niliktar so amin a klase na totoo tan nawalaan ira na suston kakabatan ed katuaan.” (1 Tim. 2:4) Nen tinepetan na sakey a Fariseo si Jesus no dinan so sankaimportantian ed amin a ganggan a niiter ed nasyon na Israel, oniay inyebat to: “‘Arom si Jehova a Dios mo ed interon pusom tan interon kamarerwam tan interon nonot mo.’ Saya so sankaimportantian tan unonan ganggan. Say komadua a mipadpara ed saya: ‘Arom so kaparam a too a singa ed sikan dili.’” (Mat. 22:37-39) Diad pibibiang tayo ed panagpulong a kimey, nipapanengneng tayo so katutulok ed saratan a ganggan.​—Basaen so Gawa 10:42.

17. Antoy nibagam ed pribilehyon pangipulong ed maong a balita?

¹⁷ Talagan abendisyonan itayo! Inikdan itayo nen Jehova na sakey a kimey a panlapuay liket, ontulong ed sikatayon mas onapit ed sikato tan ed arum, tan manprotekta ed relasyon tayod sikato. Pankanawnawa met itan pian nipanengneng tayoy panangaro ed Dios tan ed kaparan too. Diad interon mundo et nandurumay kipapasen na saray lingkor na Dios, balet ugaw man odino matatken, mayaman odino pobri, mabiskeg odino makapuy, minilyon so manaanap tan makakaromog na paraan pian ninabang dad arum so pananisia ra. Nayarin miabobon kayod si Chantel ya tagad France. Inkuan to: “Ibabagad siak na makapanyarin-amin a Persona ed uniberso, say Amalsa ed amin a bengatla, say maliket a Dios: ‘La ka! Mansalita ka! Mansalita ka parad siak, mansalita ka manlapud pusom. Ikdan ta kay biskeg, iter kod sikay Salitak, say Biblia, say tulong na saray anghel, saray agagim, tuloytuloy a panangipasal, tan saray malinew ya instruksion diad dugan panaon.’ Talagan balbaleg a pribilehyo so panumpal ed saray pagagawa nen Jehova ed sikatayo tan say pikimey ed Dios tayo!”