AMAYAMAY so single ya sister a makulikulin manlilingkor ed saray bansan mas baleg so pankaukolan parad saray managpulong na Panarian. Saray arum ed sikara et pigaran dekada lan manlilingkor ed arum a bansa. Antoy akatulong ed sikaran nandesisyon ya onalis? Antoy naaralan da diad impanlingkor dad arum a bansa? Antoy nansumpalan na bilay da? Ininterbyu mi so arum ed saray sister ya akaeksperiensya ed saya. No sakey kan single ya sister tan labalabay moy mibiang ed makapalikliket ya ministeryo, seguradon napaseseg ka ed saray imbaga ra. Diad tua, amin ya lingkor na Dios et napaseseg ed alimbawa ra.

Kasin iisipen mo no nasarag moy manpayunir diad sananey a bansa anggano single ka? Si Anita, ya manga 75 to la natan, et manduaruwa nensaman no kasin nasarag to. Sikatoy binmaleg ed England tan diman ginmapon nampayunir nen 18 to. Inkuan to: “Labalabay kon ibangat ed totoo so nipaakar ed si Jehova, balet agkon balot naimadyin ya makapanlingkor ak ed arum ya bansa. Agak nanaral na arum ya lenguahe tan kombinsido ak ya agak makaaral. Kanian nen naimbitaan ak ya manaral ed Gilead School, abigbigla ak. Agak makapanisian naimbitaan ak ta anggapoy abilidad ko. Balet naisip ko, ‘No parad si Jehova et sarag ko, salien ko sirin.’ Masulok lan 50 taon so apalabas. Manlapu lad saman, manlilingkor ak ed Japan bilang misionera.” Inyarum ni nen Anita: “No maminsan, malikeliket kon ibabaga ed saray kabataan ya sister, ‘Man-impake ki la tan mila kayod siak ed sankaliketan ya biahe!’ Malikeliket ak ya dakel so kinmiwas.”

Dakel ed saray sister ya manlilingkor natan ed arum ya bansa so natatakot nen unaan ya onalis ed sananey a lugar. Panon iran akapampakpel?

“Nen ugaw ak ni, pangarap koy makatulong ed arum,” so imbaga nen Maureen, ya manga 65 to la natan. Nen mantaon lay 20, inmalis ed Quebec, Canada, ya baleg so pankaukolan parad saray payunir. “Ag-abayag, naimbitaan ak ya manaral ed Gilead School, balet no anggapoy kaibak, natatakot ak ya onlad lugar ya agko kabisado.” Imbaga to ni: “Agko met labay ya taynanan so nanay ko ya mangaasikaso ed mansasakit ya tatay ko. Pigaran labi ya iyaakis ko iya ed si Jehova. Nen imbagak ed atateng ko so panaaburidok, pinaseseg da ak ya awaten so imbitasyon. Maar-aron sinuportaan met na kongregasyon  iray atateng ko. Anengneng koy panangasikaso nen Aman Jehova, kanian seguradon agto ak met paulyan. Diad saman et ready ak lan onla!” Manlapu nen 1979, masulok ya 30 taon ya nanlingkor a misionera ed West Africa si Maureen. Natan et aasikasoen toy ina to ed Canada, balet manlilingkor nin espisyal payunir. No iisipen toy pigay taon ya impanlingkor tod arum ya bansa, oniay ibabaga to: “Naynay ya iiter nen Aman Jehova so kaukolan ko diad dugan panaon.”

Si Wendy, ya manga 65 to la natan, et ginmapon nampayunir diad Australia nen tinedyer ni. Nanonotan to ni: “Mabaing ak ya maong tan agak sanay ya mitongtong ed agko kabat. Balet nen nampayunir ak, nipasal ak ya mitongtong ed amin a klase na totoo, kanian wala lay talek kod sarilik. Ag-abayag, nakal lay inkamabaing ko. Lapud impanpayunir ko et naaralan ko met so manmatalek ed si Jehova, tan labay ko lay manlingkor ed arum ya bansa. Sakey ni, inimbitaan ak na sakey ya single a sister ya masulok lan 30 taon ya misionera ed Japan ya mila ed sikaton manpulong ya taloy bulan. Mas lalon apaseseg ak ya manlingkor ed arum a bansa.” Nen manga 1985, inmalis si Wendy ed Vanuatu, sakey ya isla a manga 1,770 km so kaarawi tod bukig na Australia.

Siansia nin walad Vanuatu si Wendy, tan manlilingkor ed remote translation office. “Malikeliket ak no nanenengneng ko ray napoporman grupo tan kongregasyon diad ararawin pasen,” so kuan to. “Baleg ya pribilehyo so pakawalaay melag ya kontribusyon ed kimey nen Jehova diad sarayan isla.”

Si Kumiko, ya manga 65 to la, et regular payunir ed Japan sanen intagar na kapartner to ya onalis irad Nepal. “Aminpiga to ak ya kokombinsien balet agko labay,” so imbaga nen Kumiko. “Natatakot ak ya manaral na sananey a lenguahe tan man-adjust ed balon lugar. Problemak met so kuartan gastosen kod arum a bansa. Legan kon lalabanan irayan negatibon liknaan, naospital ak lapud aksidented motor. Lapud satan et naisip ko: ‘Agko amta no antoy nagawad siak. Ompan mansakit ak na grabe tan agak laingen makapanpayunir ed arum a bansa. Kasin agko sarag anggano sakey taon labat?’ Impikasik ed si Jehova ya tulongan to ak ya makapandesisyon.” Nen akapaway lad ospital si Kumiko, sikatoy binmisitad Nepal tan agnambayag et inmalis la ra diman na kapartner ton payunir.

No iisipen nen Kumiko so ngalngali samploy taon ya impanpayunir tod Nepal, oniay ibabaga to: “Saramay probleman pampapagaan ko et singa Ambalangan  Dayat ya apaldua. Malikeliket ak ta nanlingkor ak ed lugar ya mas baleg so pankaukolan. Mabetbet ya no inanabang koy mensahe na Biblia ed abung na sakey a pamilya, limara odino anemira ni ya kakaabay da so onaasingger pian ondengel. Anggan saray ugugaw et magalang ya onkekerew ed siak na tract nipaakar ed Biblia. Talagan makapaliket so manpulong ed lugar ya dakel so interesado.”

Walan walay subok ya inarap na saray makpel ya single a sister ya ininterbyu mi. Panon dan asarag iratan?

“Diad unaan et nairapan ak ta arawi ak ed pamilyak,” so imbaga nen Diane, ya taga Canada. Natan et masulok to lan 60, tan 20 taon lan manlilingkor a misionera diad Ivory Coast (natan et Côte d’Ivoire). “Kinerew kod si Jehova ya tulongan to ak ya naaro iray totoo ed asainmin ko. Impaliwawa na sakey ed saray instruktor mi ed Gilead ya si Brother Jack Redford, ya diad unaan et nayarin nabigla odino nataktakot kami ni ingen ed saray situasyon ed asainmin mi, lalo la no mair-irap so bilay ditan. Balet imbaga to: ‘Aliwan say kairapan so nengneng yo. Nengneng yo ray totoo, say lupa ra tan mata ra. Imano yoy reaksion da no narerengel day katuaan ed Biblia.’ Ontan so ginawak, tan talagan abendisyonan ak! No inanabang koy makaligliwan mensahe na Panarian, nanenengneng kon onliliket so lupa da!” Anto ni akatulong ed si Diane pian makapan-adjust ed arum a bansa? “Nagmaliw ya kaarok iray iyaaralan ko na Biblia tan malikeliket ak no nanenengneng ko ya kaiba la rad saray matoor ya manlilingkor ed si Jehova. Apasalan ko lay manayam ed sayan lugar. Awalaan ak na saray espiritual ya ina tan ama, agagin lalaki tan bibii, ya singa impromisa nen Jesus.”—Mar. 10:29, 30.

Si Anne, ya natan et manga 45 to la, et manlilingkor ed Asia, diad sakey a bansan sebel so kimey tayo. Imbaga to: “Diad saray taon ya manlilingkor ak ed nanduruman lugar ed arum a bansa, kaibak ed abung iray sister ya nandurumay nanlapuan tan personalidad da. No maminsan, atan so sengegan na agmi pantatalosan tan sakit na linawa. No nagawa itan, sasalien kon mas nakaaro ira pian mas natalosan koy kultura da. Gagawaen ko met so anggaay nayarian kon magmaliw ya mas maaro tan makatunongan ed sikara. Maliket ak ta maabig so resulta na pansasagpot ko, mas inmaralem tan inmelet so pankakaaro mi, tan akatulong itan pian naanosan koy asainmin ko.”

 Nen 1993, si Ute a taga Germany ya masulok to lan 50 et niasain ya misionera diad Madagascar. Inistorya to: “Diad unaan, talagan nairapan ak ya manaral na lenguahe da, man-adjust ed ampetang ya klima, tan manalwar ed malaria, amoeba, tan bigibigis. Balet dakel so tinmulong ed siak. Maanos ak ya tinulongan na saray sister, pati ananak da, tan saray iyaaralan koy Biblia pian nakabisadok so lenguahe da. Aasikasoen ak ya maong na misioneran kapartner ko no mansasakit ak. Balet si Jehova so manunan tinmulong ed siak. Regular ak ya manpipikasi ed sikato tan ibabagak iray kapagaan ko. Insan maanos kon aalagaren so ebat tod saray pikakasik, no maminsan et pigay agew o pigaran bulan. Walay solusyon nen Jehova ed amin ya problema.” Natan et 23 taon lan manlilingkor si Ute ed Madagascar.

Singa saray arum ni ya manlilingkor ed lugar ya baleg so pankaukolan, ibabaga na saray single a sister ya talagan abendisyonan ira ed impanlingkor dad arum a bansa. Antoy pigaran bendisyon ed sikara?

Si Heidi, ya taga Germany tan masulok to lan 70 natan et manlilingkor a misionera diad Ivory Coast (natan et Côte d’Ivoire) manlapu la nen 1968. Imbaga to: “Say manunan panliliketan ko et say pakakanengneng kod saray espiritual ya ananak ko ya ‘manaakar ed katuaan.’ Saray arum ya inyaralan ko na Biblia et payunir la natan tan say arum et elder lad kongregasyon. Say tawag dad siak et Mama odino Bai. Inturing ak ya kapamilya na sakey ed sarayan elder pati say asawa to tan ananak da. Inikdan ak nen Jehova na anak, manugang, tan taloran apo.”—3 Juan 4.

Si Karen ya taga Canada tan masulok to lan 70 natan et 20 taon lan manlilingkor diad West Africa. Imbaga to: “Diad impanmisionerak et naaralan koy magmaliw ya masakripisyo, maaro, tan mapasensya. Tan lapud nanduruman bansa so nanlapuan na saray nakakaulop ko, mas linmaknab so panmoriak. Naaralan ko ya nayarin nandurumay paraan na panggawa ed sakey a kimey. Tan bendisyon ed siak iray maapit ya kakaaro ed nanduruman bansa! Anggano wala ray pananguman ed bilay tan asainmin mi, sankakaaro kami nin siansia.”

Si Margaret a taga England ya mantaon na ngalngali 80 et misionera ed Laos. Inistorya to: “Lapud impanlingkor kod sananey a bansa, anengneng kon mismo no panon ya pankakasakeyen nen Jehova ed organisasyon to iray totoo ya nandurumay lahi tan nanlapuan. Apabiskeg na satan so pananisiak. Kombinsido ak ya si Jehova so mangigigiya ed organisasyon to tan nasumpal so panlabayan to.”

On, saray single a sister ya manlilingkor ed arum a bansa et balibali agawaan dan panaglingkor. Talagan manepeg labat ya komendaan ira. (Ukom 11:40) Natan et ondadakel ni ray manboboluntaryo ed lugar ya mas baleg so pankaukolan. (Sal. 68:11) Sarag mo kasin i-adjust so sirkumstansyam pian aligen irayan makukulin sister ya nainterbyu? No on, seguradon ‘natawayan tan nanengneng mo a si Jehova et maong.’—Sal. 34:8.