1. Antoy gagawaen na totoo lapud makompetensia ira?

DIAD mundo natan, dakel so makasarili, makompetensia, tan anggapoy pibabali dad arum. Singa bilang, ompan say sakey ya negosyante et gawaen toy amin ya paraan pian napabagsak to iray kalaban to ed negosyo. Diad sports, ompan say sakey ya player et gagalaen ton itulak o patiren so player na kalaban pian say team da so manalo. Ompan say sakey ya estudyante et mansaol diad entrance exam pian makaloob ed sikat ya university. Amta tayo ran Kristiano ya aglabay na Dios irayan kagagawa tan kaiba iraya ed saray “gawa na laman.” (Gal. 5:19-21) Diad loob na kongregasyon balet ey, ompan agtayo nalilikas ya mangilalagyat tayo la manaya na kompetisyon? Importante ya pannonotan tayo iya, ta no walay kompetisyon diad loob na kongregasyon, naderal so pankakasakey tayo.

2. Antoy aralen tayo ed sayan artikulo?

² Diad sayan artikulo, pantongtongan tayo iray aliwliwan ugali ya nayarin panlapuan na kompetisyon diad kongregasyon. Pantongtongan tayo met so alimbawa na saray matoor ya lingkor nen Jehova diad panaon na Biblia ya agda ninonot so mikompetensia ed arum. Pantongtongan tayo ni balet ya unona no panon tayon nausisa so motibo tayo pian agtayo makapangilagyat na kompetisyon diad kongregasyon.

3. Anto ray nepeg tayon itepet ed sarili tayo?

³ Marakep no lanang tayon usisaen so motibo tayo. Tepetan tayoy sarili tayo: ‘Kasin say mamapaliket ed siak et no amay  naliliknak ya mas nayaryari ak nen say arum? Kasin mamapasya ak ed kongregasyon ta labay ko ya siak so naiimano na agagi? Odino say motibok et labay ko ya napaliket si Jehova?’ Akin et nepeg tayon itepet iratan ed sarili tayo?

4. Akin et agtayo dapat ikokomparay sarili tayo ed arum, ya singa ibabaga na Galacia 6:3, 4?

⁴ Ibabaga na Biblia ya agtayo dapat ikokomparay sarili tayo ed arum. (Basaen so Galacia 6:3, 4.) Akin ey? On ta no ikompara tayoy sarili tayo, ompan isipen tayo ya mas nayaryari tayo nen saray agagi, kanian magmaliw tayo laingen ya malastog. Odino ompan isipen tayo ya mas nayaryari ira nen say sikatayo, kanian nadismaya tayod sarili tayo. Parehas itan ya aliwa. (Roma 12:3) Oniay imbaga nen Sister Katerina * ya taga Greece: “Nensaman, lanang kon ikokomparay sarilik ed saray sister ya singa mas magana, mas maong ya manpulong, tan mas makaaro. Kanian pakaliknak et anggapoy silbik.” Tandaan tayo ya inyasingger itayo nen Jehova ed organisasyon to aliwan lapud magana o guapo tayo, maong tayon mansalita, odino labalabay itayo na totoo, noagta lapud amta to ya sikatoy ar-aroen tayo tan akaparaan tayon ondengel ed Anak to.—Juan 6:44; 1 Cor. 1:26-31.

5. Antoy naaralan mo ed eksperiensya nen Brother Hyun?

⁵ Maabig no itepet tayo met iyad sarili tayo: ‘Antoy reputasyon ko ed kongregasyon—kasin mareen ak ya too, odino amta na agagi ya lanang ya walay kakolkol ko?’ Imanoen so eksperiensya nen Brother Hyun ya taga South Korea. Nensaman, kalaban so pakanengneng to ed pigaran brother ya kapara ton walaan na pribilehyo. Imbaga to: “Lanang ko ran babalawen, tan kokontraen koy amin ya ibabaga ra.” Antoy resulta ey? Oniay inamin to: “Lapud ugalik, aderal so pankakasakey ed kongregasyon mi.” Si Hyun et binilin na saray kakaaro to pian natalosan to ya aliwliwa so gagawaen to. Dinmengel si Hyun tan anguman, kanian natan et manlilingkor la bilang maar-aron elder. No bilang ta nalilikas mod sarilim ya makompetensia ka tan apektado lay deen ed kongregasyon lapud gagawaen mo, uman mon tampol so ugalim.

6. Base ed Galacia 5:26, anto ran aliwliwan ugali so mangilagyat na kompetisyon?

⁶ Basaen so Galacia 5:26. Anto ran aliwliwan ugali so mangilagyat na kompetisyon? Say sakey et inkamapaatagey. Say toon mapaatagey et ma-pride tan makasarili. Say sakey nin aliwliwan ugali et say ibeg. No say sakey a too et makakaibeg o naiinggit, labay to ya wala met ed sikato no antoy walad arum. Tan labay to ni ingen ya laen so gawa na arum. Kanian no agaylay pakaka-inggit mod sakey ya too, diad tua et kabusol mo. Iwasan tayo sirin irayan makasamal ya ugali!

7. Akin et aliwliway pansumpalan na toon mapaatagey tan naiinggit ed arum? Mangiter na ilustrasyon.

⁷ Say inkamapaatagey tan ibeg et singa ra dutak ya walad gasolina na eroplano. Ompan diad unaan et singa anggapoy problema ta makatekkiab met so eroplano, pero ompan natiptipon irayan angkekelag ya dutak ya anggad nabaraan so dadalanan na gasolina. No ontan so nagawa, ontunda so makina tan man-crash so eroplano. Ontan met so nagawa ed lingkor nen Jehova ya paulyanan to labat so inkamapaatagey tan ibeg ed puso to. Ompan diad unaan et singa anggapo met so problema ta makakapanlingkor met. Pero no agto ekalen ed puso to itan ya ugali, “mansumpal [itan] ed kadederal.” (Pro. 16:18) Sikatoy  ontunda lan manlingkor ed si Jehova kanian aliwliway pansumpalan to, tan ompan nadamay to ni arum. Anto sirin so gawaen tayo pian ag-itayo magmaliw ya mapaatagey tan ag-itayo nainggit ed arum?

8. Antoy gawaen tayo pian ag-itayo magmaliw ya mapaatagey?

⁸ Ag-itayo magmaliw ya mapaatagey no tandaan tayo iyan bilin nen apostol Pablo ed saray agagi ed Filipos: “Agkayo manggagaway antokaman lapud inkamakolkol odino inkamapaatagey, noagta magmaliw kayon mapaabeba, ya ipasen yon mas atagey so arum nen say sikayo.” (Fil. 2:3) No ipasen tayon mas atagey iray agagi nen say sikatayo, agtayo kompetinsyaen iramay walaan na talento tan abilidad ya anggapod sikatayo. Miliket tayo ingen ed sikara lalo la no uusaren da iratan diad panlilingkor dad si Jehova. No unoren met na saray maabilidad ya agagi imay bilin nen Pablo, ag-ira manlastog ta sankanonot da ya amin ya agagi et walaan na maong ya kualidad. No ontan so panagnonot tayon amin, mansiansia so deen tan pankakasakey ed kongregasyon.

9. Antoy makatulong pian ag-itayo makaibeg ed arum?

⁹ Ag-itayo makaibeg ed arum no birbiren tayo ya wala ray limitasyon tayo tan wala ran talagay mas marunong nen say sikatayo diad arum ya bengatla. No lanang tayon sankanonot itan, agtayo mikompetensia. Imbes, manpabangat tayo ni ingen ed saramay amta tayon mas marunong. Singa bilang, no walay brother ed kongregasyon yo ya maong a manpaliwawa, tepetan mo no panon so pampaparaan to. No maong ya manluto so sakey a sister, tepetan mo no antoy sekreto to. Tan no sakey kan kabataan ya naiirapan ya mikaaro, ompan maabig no onkerew kay advice ed makaaron agi. No oniay gawaen tayo, imbes ya makaibeg tayo ed arum, makaaral tayo ni ingen ed sikara.

10. Anton problema so inarap nen Gideon?

¹⁰ Imanoen tayo pa so ginawa nen Gideon ya nanlapud tribu na Manases nen sikatoy kinompronta na saray lalaki ya nanlapud tribu na Efraim. Diad saman et kakkayari na impilaban nen Gideon tan say 300 ya bataan to ed  saray Midianita, tan analo ira diad tulong nen Jehova. Sinmabi iray Efraimita, aliwan pian miliket ed si Gideon, noagta pian ipalupa ed sikato ya aliway ginawa to ta agto ra kuno tinawag ya tampol ya milaban. Asakitan so pride da tan say sankanonot da labat et say reputasyon na tribu da. Alingwanan da balet ya lapud ginawa nen Gideon et apagalangan so ngaran nen Jehova tan aprotektaan so Israel ed saray kalaban.—Ukom 8:1.

11. Antoy ebat nen Gideon ed saramay Efraimita?

¹¹ Oniay mapaabeban ebat nen Gideon ed saramay Efraimita: “Anto ta so agawaan ko no ikompara ed sikayo?” Insan to impanonot ed sikara no panon ya benendisyonan tan tinulongan nen Jehova so tribu na Efraim. Lapud mapaabeban ebat to, “kinmepay sanok da.” (Ukom 8:2, 3) On, agnagmaliw ya ma-pride si Gideon anggano walay rason to komon ya manlastog. Say importante ed sikato et mansiansia so deen ed Israel.

12. Antoy naaralan tayo ed samay salaysay tungkol ed saray Efraimita tan si Gideon?

¹² Antoy naaralan tayo ed sayan salaysay? Agtayo aaligen iramay Efraimita. Aliwan say kagalangan tayo dapat so manunan sankanonot tayo, noagta say kagalangan nen Jehova. Makaaral met iray ama tan saray elder ed si Gideon. No walay ginawam ya ag-agustoan na arum, talosan mo ra tan isip mo no akin ya onman so nalilikna ra. Say nengneng mo et no antoy maong ya nagagawaan da tan atan so ipaimanom ed sikara. Aliwa itan ya mainomay ta kaukolan moy manpaabeba, lalo la no antam ya duga met so ginawam tan sikara so aliwa. Pero tandaan mo ya mas importante so kareenan nen say pride mo.

13. Antoy problema nen Hana tan panon ton inarap itan?

¹³ Makaaral tayo met ed alimbawa nen Hana. Say asawa to et si Elkana, sakey ya Levita tan inar-aro toy Hana. Pero wala ni sakey ya asawa nen Elkana, si Penina. Mas inaro nen Elkana si Hana nen say si Penina. Pero say problema, “anggapoy anak [da] nen Hana.” Dakdakel balet so anak tod si Penina, kanian lanang ya susutilen nen Penina si Hana “pian pasyodoten to.” Maer-ermen si Hana kanian “onakis tan agmangan.” (1 Sam. 1:2, 6, 7) Pero anggapoy nabasa ed Biblia ya binmawi si Hana ed si Penina. Imbes, imbaga toy amin ya nalilikna to ed si Jehova ta matalek ya tulongan To. Kasin anguman lanlamang so ugali nen Penina? Agtayo amta ta anggapoy ibabaga na Biblia. Pero say amta tayo, dinmeen so nonot nen Hana kayari ton nampikasi, tan “agla maermen.”—1 Sam. 1:10, 18.

14. Antoy naaralan tayod si Hana?

¹⁴ Antoy naaralan tayod alimbawa nen Hana? No walay mikokompetensia ed sika, tandaan mo ya sarag mon kontrolen so reaksion mo. Agmo kaukolan ya paneknekan ya mas nayaryari ka. Imbes ya mikompetensia  ka met, katongtong mo tan mikareenan ka. (Roma 12:17-21) Anggano agmanguman may too, mareen so nonot mo ta antam ya dugay gagawaen mo.

15. Anto ray pamparehoan nen Apolos tan Pablo?

¹⁵ Say sampot ya pantongtongan tayo et say alimbawa na disipulon si Apolos tan si apostol Pablo. Dakel so pamparehoan da. Kabisado dan dua so Kasulatan. Kabkabat ira na saray agagi tan pareho iran maong ya manbangat. Dakdakel met so atulongan dan nagmaliw ya Kristiano. Balet say marakep et anggapoy inggitan ed sikaran dua.

16. Anton klase na too si Apolos?

¹⁶ Si Apolos et “niyanak ed Alejandria,” sakey iyan syudad ya sentro na edukasyon nensaman. Sikatoy “maong a mansalita tan kabkabisado toy Kasulatan.” (Gawa 18:24) Nen nanlingkor si Apolos diad kongregasyon ed Corinto, agusgustoan na saray agagi. Pero wala ray angibaga ya mas labay day Apolos nen say arum ya agagin mangidadaulo, kaiba lay Pablo. (1 Cor. 1:12, 13) Kasin si Apolos so nanggawa-gawa no akin ya walay mas papaboran na saray agagi? Andi. Ta diad tua, nen anggapo lay Apolos ed Corinto, sikatoy kinombinse ni ingen nen Pablo ya ompawil diman. (1 Cor. 16:12) Seguradon agla papawilen nen Pablo si Apolos diman no alikas to ya sikatoy angigapo na inkaapag-apag diad kongregasyon. Mapatpatnag sirin ya inusar nen Apolos so abilidad to diad dugan paraan—pian nipulong so maong ya balita tan pian napaseseg iray agagi. Say sakey nin pakapatnagan ya mapaabeban too si Apolos et anggapoy nabasa tayo ed Biblia ya minelmelag toy sanasawan Aquila tan Priscila nen “tinulongan dan nawalaay mas suston pakatalos ed dalan na Dios.”—Gawa 18:24-28.

17. Antoy ginawa nen Pablo pian agnaderal so kareenan ed kongregasyon?

 ¹⁷ Binidbir nen apostol Pablo iray balibalin agawaan nen Apolos. Tan agbalot alikna nen Pablo ya sikatoy asapawan. Nanengneng so inkamapaabeba tan balansin panagnonot nen Pablo ed samay bilin tod saray agagi ed Corinto. Agto agustoan imay ibabaga dan, “Dia ak ed si Pablo.” Imbes, impetek toy panagnonot da tan impaarap toy atension ed si Aman Jehova tan ed si Jesu-Kristo.—1 Cor. 3:3-6.

18. Base ed 1 Corinto 4:6, 7, anto ray naaralan tayo ed alimbawa nen Apolos tan Pablo?

¹⁸ Antoy naaralan tayo ed si Apolos tan Pablo? Ompan dakel so natutulongan tayon onaligwas anggad nabautismoan ira tan maseseg tayon manlilingkor ed si Jehova. Pero tandaan tayo ya nagagawaan tayo iratan lapud tulong nen Jehova. Wala ni sakey ya naaralan tayod sikara—no walay pribilehyo tayo, sikatayo dapat so lalon mangipaseseg na kareenan ed kongregasyon. Misalsalamat tayo ed saray elder tan ministeryal a lingkor ta bibilinen da tayo base ed Biblia tan agda ipapaarap so atension ed sarili da noagta diad si Kristo Jesus. Lapud saray bilin tan alimbawa ra, makakaaral tayo ya mitulongan met pian mansiansia so deen tan pankakasakey ed kongregasyon!—Basaen so 1 Corinto 4:6, 7.

19. Antoy nagawaan na kada sakey ed sikatayo? (Nengnengen met so kahon ya “ Agka Mangilalagyat na Kompetisyon.”)

¹⁹ Amin tayo et inikdan na Dios na kanya-kanyan abilidad o talento. Usaren tayo sirin itan diad “panlingkor ed sakey tan sakey.” (1 Ped. 4:10) Ompan isipen tayo ya melmelag so nitutulong tayo pian mansiansia so deen ed kongregasyon. Pero anggan panon itan kamelag, singa iratan angkekelag ya dait ya kaukolan pian makagawa na balibali tan matibay ya kawes. Kanian komon ta determinado tayon agmangilagyat na kompetisyon. Imbes, gawaen tayoy anggaay nayarian tayon mitulongan pian mansiansia so deen tan pankakasakey ed kongregasyon.—Efe. 4:3.