1. Akin et ag-itayo ikokompara nen Jehova ed arum?

LABALABAY nen Jehova ya walay pandurumaan. Sankapatnagan itan ed impanggawa to na nanduruman klase na tanaman tan ayayep. Anggan sikatayo pa ran totoo et nanduruma met. Kada sakey ed sikatayo et unique. Kanian agto kan balot ikompara nen Jehova ed arum ya too. Amta to no antoy walad pusom, say tuan inkatoom. (1 Sam. 16:7) Amta toy impanugaw mo, no iner ka marunong, tan no anto ni ray papaaligwasen mo. Amta to met so limitasyon mo, kanian agto ipagawad sika so agmo sarag. Labay nen Jehova ya say pakanengneng mod sarilim et mipara ed no antoy pakanengneng tod sika. Labay to ya ‘limpio so panagnonot’ tayo—amay balanse labat so pakanengneng tayod sarili tayo—aliwan atagtagey tan aliwa met ya abebbeba.—Roma 12:3.

2. Antoy aliwliwan epekto no ikompara tayoy sarili tayod arum?

² Siempre, makaaral tayo ed maong ya alimbawa na arum. (Heb. 13:7) Singa bilang, ompan walay kakongregasyon mo ya maong ya manpulong. Makaaral ka ed paraan na panagpulong to tan makatulong itan pian magmaliw kan mas epektibo ed ministeryo. (Fil. 3:17) Maabig no aligen moy maong ya alimbawa to, pero agmo dapat ikokompara so sarilim ed sikato. Ta no andi, ompan nainggit ka, nadismaya ka, odino isipen mo ya anggapoy nagagawaan mo ed kongregasyon. Odino kompetinsyaen mo laingen ya singa inaral ed imbeneg ya artikulo, tan makapuy so epekto to ’tan ed espiritualidad mo. Kanian oniay maaron bilin nen Jehova ed sikatayo: “Usisaen komon na kada sakey so gagawaen to, tan kayari na satan et sikatoy nawalaay rason a manliket nipaakar ed sarili to labat, aliwan  diad pangikokompara toy sarili to ed arum.”—Gal. 6:4.

3. Anto ray panliliketan mo ya inaligwasan mod espiritual?

³ Labay nen Jehova ya naliketan ka ed iyaaligwas mod espiritual. Singa bilang, seguradon malikeliket ka nen agawaan moy goal mo ya manpabautismo. Sarilim ya desisyon iman tan anggapoy nampilit ed sika. Ginawam iman lapud inar-arom si Jehova. Isip mo pay inyaligwas mo manlapu lad saman. Alimbawa, kasin mas regular la natan so panagbasa tan panag-aral moy Biblia? Kasin mas impapuso lay pikakasim? (Sal. 141:2) Kasin mas marunong ka la natan ya manpulong tan mas kabisadom lan usaren iray publikasyon tayo diad ministeryo? No pamilyado ka la, kasin nagmaliw kan mas maong ya asawa odino ateng diad tulong nen Jehova? No walay inaligwasan mo ed saraya, walay rason mon manliket.

4. Antoy aralen tayo ed sayan artikulo?

⁴ Walay nitulong tayo pian naliketan iray kapamilya tan kakongregasyon tayo ed saray nagagawaan da parad si Jehova. Diad sayan artikulo, aralen tayo no panon ya natulongan na atateng iray ananak da, no panon ya natulongan na sanasawa so sakey tan sakey, tan no panon ya natulongan na saray elder tan agagi iray kakongregasyon da. Insan tayo pantongtongan iray pigaran prinsipyo ed Biblia ya makatulong pian nagawaan tayo ray goal tayo base ed abilidad tan situasyon tayo.

5. Base ed Efeso 6:4, antoy agnepeg ya gawaen na saray atateng?

⁵ Atateng, agyo ikokompara so anak yo ed arum ya ugaw tan agyo ipapagawa ed sikato iray amta yon agto nayarian. Ta no ontan so gawaen yo, onsyodot so anak yo. (Basaen so Efeso 6:4.) Oniay nanonotan nen Sister Sachiko * nen sikatoy mani-eskuela ni: “Iray maestrak, labay da ya siak ya lanang so ‘top 1’ ed klase mi. Insan lanang ya ibabaga nen Mama’k ya manaral ak kunon maong ta pian saray maestrak tan si Papa’k ya aliwan Tasi et balibali impresyon da ed sikatayo ran Tasi. Labay ingen nen Mama’k ya perfect ya lanang so score kod exam, pero siempre imposible man! Abayag ak lan graduate pero walay epekto to man ed siak anggad natan. Anggano iiter ko lay sankaabigan ko diad panlilingkor ko, no maminsan et iisipen ko ya nakukulangan ni Aman Jehova ed gagawaen ko.”

6. Antoy naaralan na atateng ed Salmo 131:1, 2?

 ⁶ Walay importantin naaralan na saray atateng diad Salmo 131:1, 2. (Basaen.) Imbaga nen Arin David ya ‘agto pinirawat iray bengatlan masyadon balbaleg’ odino saray bengatlan atagtagey ya ‘agto naabot.’ Lapud mapaabebay David, “kontento” ed bilay to. Antoy naaralan na atateng ed sayan imbaga nen David? Maabig no mapaabeba met iray atateng tan aliwan atagtagey so iilaloan dad sarili da tan ed anak da. Natulongan na atateng so anak da ya agto ikomparay sarili to ed arum no ipaseguro dad sikato ya wala ray maong ya nagagawaan to, insan da ipanengneng no anto ni ray sarag ton paaligwasen depende ed abilidad to. Oniay nanonotan nen Sister Marina: “Agak balot inkompara nen Nanay ko ed taloran agagik odino diad arum ya ugaw. Imbangat dad sikami ya walay kanya-kanyan abilidad mi tan kada sakey et espisyal ed si Jehova. Maong labat ta ontan so impamabaleg ed siak nen Nanay, kanian agko ikokomparay sarilik ed arum.”

7-8. Panon ya napagalangan na asawan laki so asawa to?

⁷ Nepeg ya pagalangan na asawan laki so asawa to. (1 Ped. 3:7) Nibagan papagalangan mo so sakey ya too no iikdan moy espisyal ya atension tan rerespetoen mo. Kanian napagalangan na asawan laki so misis to no respetoen to tan espisyal so pantrato tod sikato. Aliwan atagtagey so iilaloan tod asawa to tan agto ikokompara ed arum ya bibii. Anto kasi nalikna na asawan bii no lanang ya ikokompara na mister to ed arum ya bibii? Naeksperiensya itan nen Sister Rosa, ya aliwan Tasi so mister to. Ansakisakit so panagsalita nen mister to tan lanang ton ikokomparad arum ya bibii. Abebbeba laingen so pakanengneng nen Rosa ed sarili to tan pakalikna to et anggapoy mangaaro ed sikato. Imbaga nen Sister Rosa: “Kaukolan kon lanang so panonot ya inaro ak nen Jehova.” Duma balet iray Kristianon asawan lalaki ta papagalangan day asawa ra. Amta na Kristianon asawan laki ya no ontan so gawaen to, lalon aroen nen misis to tan lalon onelet so relasyon tod si Jehova. *

⁸ Papagalangan na asawan laki so asawa to no irarayew to, pisasalamatan to, tan lanang ton papaseguroan ya inar-aro to. (Pro. 31:28) Ontan so gagawaen na asawa nen Sister Katerina ya abitla ed imbeneg ya artikulo. Akatulong itan pian agto ikomparay sarili to ed arum. Ta nen ugaw ni Katerina, lanang ya babalawen tan ikokompara nen ina to ed arum ya ugugaw pati diad saray kakaaro to. Kanian pakalikna nen Katerina et anggapoy kana to, tan awi-awit to itan anggan nen Tasi la. Pero maong labat ta maar-aro so akaasawa ed sikato. Tinulongan toy Katerina pian nalabanan to itan ya liknaan. Imbaga nen Katerina: “Sankamaaroan si asawak. Lanang to ak ya pisasalamatan ed saray gagawaen ko. Tan ipipikasi to ak. Ipapanonot to met ed siak iray balibalin kualidad nen Aman Jehova. Tan tutulongan to ak pian nipetek koy negatibon panagnonot ko.”

9-10. Panon ya tinulongan na saray maar-aron elder so sakey ya sister ya lanang ton ikokomparay sarili to ed arum?

⁹ Panon ya natulongan na saray elder iray agagi ya lanang dan ikokomparay sarili da ed arum? Nengnengen so eksperiensya nen Sister Hanuni, ya nen ugaw ni et ibabaliwala na atateng to iray maong ya nagagawaan to. Oniay nanonotan to: “Mabapbaing ak tan say pakaliknak et mas marunong iray arum ya ugugaw nen say siak. Manlapu lad intuboy kalakal ko, ikokomparak lay sarilik ed arum.” Anggano  naamtaan la nen Hanuni so katuaan, lanang to nin ikokompara so sarili to ed arum. Kanian say pakalikna to et anggapoy kana to ed kongregasyon. Pero natan et malikeliket la ed pampapayunir to. Antoy akatulong ed sikato?

¹⁰ Imbaga nen Hanuni ya sikatoy tinulongan na saray maar-aron elder ed kongregasyon da. Imbaga rad sikato ya baleg so nitutulong tod kongregasyon tan kinomendaan da ed maong ya alimbawa to. Imbaga nen Hanuni: “Inyasain ak na saray elder ya mamaseseg ed pigaran sister ya mankaukolan na tulong. Lapud satan ya asainmin, aliknak ya walay nagagawaan ko. Nanonotan ko ni may nen akisalamat ed siak iray elder ed pamapaseseg kod saray kabataan ya sister ed kongregasyon mi. Imbasa dad siak so 1 Tesalonica 1:2, 3. A-touch ak! Maar-aro iraman ya elder. Misalsalamat ak ed sikara ta impalikna dad siak ya walay nitutulong ko ed organisasyon nen Jehova.”

11. Panon tayon natulongan iramay “niyabeba” ya adeskribe ed Isaias 57:15?

¹¹ Basaen so Isaias 57:15. Labalabay ya tulongan nen Jehova iramay “niyabeba”—iramay abebbeba so pakanengneng dad sarili da. Pero aliwan saray elder labat so uusaren to pian natulongan iray onian agagi. Walay nagawaan tayon amin pian napaseseg tayo ra. Say sakey ya paraan et no imalasakit tayo ra. Labay nen Jehova ya ipalikna tayoy panangaro to ed saray karnero to lapud pinabpabli to ra. (Pro. 19:17) Say sakey met ya paraan et no agtayo manlalastog. Ta no sikatayon lanang so kawalaan na atension, ompan makaibeg laingen so arum ya agagi. Kanian imbes ya ilastog tayoy abilidad tan kakabatan tayo, usaren tayo iratan pian pasesegen so sakey tan sakey.—1 Ped. 4:10, 11.

12. Akin et labalabay na ordinaryon totoo si Jesus? (Nengnengen so litrato ed apis.)

¹² Makaaral tayo ed impantrato nen Jesus ed saray papatumbok to. Perpekto si Jesus tan sikato so Anak na Sankatagyan, pero “mauyamo tan mapaabeba.” (Mat. 11:28-30) Agto impanengneng ya sikato so sankatalinoan. Diad tua, simpli labat iray salita tan ilustrasyon ya inusar to pian natalosan na saray ordinaryon totoo iray ibabangat to tan nasabi so puso ra. (Luc. 10:21) Duma si Jesus ed saray malastog ya lider na relihyon ed saman ya panaon ta agton balot impalikna ed saray totoo ya anggapoy kana ra ed Dios. (Juan 6:37) Diad tua, anggan saray ordinaryon totoo et nirespeto to.

13. Akin et nibaga tayon maomaong tan maar-aro si Jesus ed saray disipulo to?

¹³ Maomaong tan maar-aro si Jesus ed saray disipulo to. Amta to ya nandurumay abilidad tan situasyon da. Anggano aliwan pareparehoy nagagawaan da ed ministeryo tan responsabilidad da, papablien nen Jesus so amin ya sagpot da. Napatnagan ya ontan so nalilikna nen Jesus diad samay ilustrasyon to tungkol ed saray talento. Diad saman ya ilustrasyon, inikdan na katawan iray aripen to na talento “unong ed abilidad” na kada sakey ed sikara. Walay duaran aripen ya lapud kuli da et aparakel da iramay talento. Anggano mas baleg so atubo to may sakey, pareho so imbaga to may katawan nen kinomendaan to ra: “Maabig so agawaan mo, maong tan matoor ya aripen!”—Mat. 25:14-23.

14. Panon tayon naalig so panagtrato nen Jesus ed arum?

¹⁴ Maomaong tan maar-aro met si Jesus ed sikatayo natan. Amta to ya nanduruma so abilidad tan situasyon tayo. Kanian makaseguro ka ya sikatoy naliliketan kada no gagawaen moy sankaabigan mo. Aligen tayo sirin si Jesus. Agtayon balot ipapalikna ed saray agagi ya anggapoy nitutulong da odino kulang ni so nagagawaan da komparad arum. Mas maabig no lanang tayo ran komendaan ta gagawaen da  met so anggaay nayarian da ed panlilingkor dad si Jehova.

15-16. Antoy alikna nen Sister Midori nen wala la ray goal tod espiritual?

¹⁵ No wala ray goal tayod espiritual, mas walay direksion na bilay tayo kanian maliket tayo. Tandaan mo balet ya agmo dapat ibabase iray goal mo ed nagagawaan na arum. Ibasem itan ed abilidad tan situasyon mo, ta no andi, ompan nadismaya ka labat. (Luc. 14:28) Imanoen so eksperiensya na payunir ya si Sister Midori.

¹⁶ Nen ugaw ni Midori, lanang ya papabaingan nen tatay to ya aliwan Tasi tan ikokompara tod saray kaklase tan agagi to. “Abebbebay pakanengneng kod sarilik,” so kuan nen Midori. Anggaman ontan, kalkalna met lan awalaan na kompiyansa si Midori legan ya ombabaleg. Imbaga to: “Inagew-agew ak ya manbabasa na Biblia. Atan so akatulong pian ondeen so nonot ko tan naliknak ya inar-aro ak nen Jehova.” Say sakey met ya akatulong ed si Midori et nen awalaan na saray goal ed espiritual. Lanang ton kekerewen so tulong nen Jehova pian nagawaan to iratan. Akatulong itan pian naliketan si Midori ed saray nagagawaan to parad si Jehova.

17. Panon tayon ‘nitultuloy ya pasimbaloen so paraan na panagnonot tayo,’ tan antoy resulta no ontan so gawaen tayo?

¹⁷ Diad tua, aliwan maminpinsan ya naekal iray negatibon nalilikna tan iisipen tayo. Kanian oniay bilin nen Aman Jehova ed sikatayo: “Nepeg yon itultuloy a pasimbaloen so paraan na panagnonot yo.” (Efe. 4:23, 24) Siempre pian nagawaan tayo itan, kaukolan tayoy manpikasi, man-personal study, tan mandalepdep. Itultuloy mon gawaen iratan tan kerew  mod si Jehova ya pabiskegen to ka. Tulongan ka na masanton espiritu to pian nalabanan moy negatibon liknaan mo tan agmo ikomparay sarilim ed arum. Tulongan ka met nen Jehova pian nanengneng mo no kasin wala lay inggit odino pride ya ontutubo ed pusom tan tulongan to ka pian nabagot mon tampol itan.

18. Akin et napapabiskeg ka ed samay nabasad 2 Awaran 6:29, 30?

¹⁸ Basaen so 2 Awaran 6:29, 30. Amta nen Aman Jehova no antoy walad puso tayo. Amta to met iray lalabanan tayo—say mauges ya impluensya na sayan mundo tan saray mismon kakapuyan tayo. Diad tua, no nanenengneng nen Jehova ya agtayo onsusuko anggano wala ray onian lalabanan tayo, diman to tayo met mas naaaro.

19. Antoy angikomparaan nen Jehova ed panangaro tod sikatayo?

¹⁹ Pian natalosan tayoy panangaro nen Jehova ed sikatayo, inkompara to itan ed nalilikna na sakey ya ina ed baby to. (Isa. 49:15) Imanoen iyan imbaga nen Sister Rachel tungkol ed anak to: “Premature so ana’kon si Stephanie nen inyanak ko. Melmelag ya maong tan pakaskasi itsura to. Sakey bulan ya aka-incubator. Pero kaleganan to man, pinmayag iray doktor ya kada agew et walay oras ya nakomisan tan nalakap koy Stephanie. Kanian inmapit so liknaan min sanina. Anem taon to la natan tan mas melag nen saray kaedaran to. Pero inar-arok si Stephanie ta agsinmuko, akilaban tan pinilit toy manbilay. Diad tua pa, nagmaliw ya mas maliket so bilay ko lapud sikato.” Ontan ya ontan so panangaron nalilikna nen Jehova ed sikatayo no nanenengneng to ya ag-itayo ontutundan milaban ed espiritual pian napanlingkoran tayo diad interon puso.

20. Antoy panliliketan na saray lingkor nen Jehova?

²⁰ Diad pakanengneng nen Aman Jehova, kada lingkor to et unique tan espisyal. Inyasingger to ka ed organisasyon to, aliwan lapud mas nayaryari ka nen say arum. Inyasingger to ka lapud anengneng toy walad pusom. On, anengneng to ya mapaabeba ka tan akaparaan kan paibangat. (Sal. 25:9) Papablien toy amin ya gagawaen mo parad sikato. Nanenengneng toy panaanos tan panmamatoor mo, tan prueba iratan ya walaan ka na “maong a puso.” (Luc. 8:15) Kanian itultuloy mo labat ya iter so sankaabigan mo parad si Jehova. No ontan so gawaen mo, panliketan mo iray nagagawaan mo parad sikato!