Labay nen Jehova ya maliket so sanasawa tan legay bilay so paniba ra. (Mat. 19:4-6) No plaplanoen moy mangasawa o miasawa, panon kan makalmo na maong ya kapareha? Lapud si Jehova so Amalsa, amta to no antoy mamaliket ed sika no mandesisyon ka lan miinaroan tan mangasawa. Kanian no iyaplikam iray prinsipyo na Biblia, maong so pansumpalan na saray desisyon mo. Imanoen pa irayan pigaran prinsipyo.

Unona, kaukolan tayon aminen ed sarili tayo iyan katuaan: “Say puso et agnapanmatalkan nen say antokaman a bengatla tan desperado.” (Jer. 17:9) No say sakey et walay gugustoen to odino walay onggugusto ed sikato tan agto kontrolen so emosyon to, agla makapannonot na duga. No puro emosyon so ipakana to tan maganat lan miinaroan, ompan pagbabawian to lanlamang so desisyon to. (Pro. 28:26) Kanian no say sakey et walay gugustoen to tan amta ton labay da met, maabig no kabaten da ni sakey tan sakey, tan ag-ira maganat ya miinaroan.

Onia met so ibabaga na Proverbio 22:3: “Say marunong et ompapaliis no nanenengneng toy peligro, balet say andiay kakabatan et ondidiretso tan aanien to ray pansumpalan.” Akin et mapeligro so pangusar ed saray dating website? Makapaermen ta wala ray agagi ya akiinaroan ed too ya akabat da ed dating website pero aloko ira. Tan diad tua, wala ray manggagawa na saray fake account pian pankuartaan so arum ya too. Tan no maminsan et manpapanggap labat iran Tasi.

Nia ni sakey ya peligro. Sarayan dating website et manguusar na computer program ya sarag to kunon nengnengen no siopa ray bagay. Pero anggapoy ebidensya ya duga so ididikta na saratan ya computer program. Sakey ni, seryoson bengatla so pangasawa o piasawa. Kanian duga kasi ya ibasem so desisyon mo ed ibabaga na computer program ya ginawa labat na too? Andi! Say talagan napantiwalaan tayo et saray prinsipyo na Biblia.—Pro. 1:7; 3:5-7.

Onia met so prinsipyo ya nabasa ed Proverbio 14:15: “Say toon anggapoy amta to et manisia ed kada salita, balet samay makabat et dadalepdepen toy kada gawaen  to.” Kanian antis kan miinaroan, nepeg mo nin kabaten ya maong imay toon nagugustoan mo. Pero mairap itan ya gawaen no diad dating website kayo labat nankabat. Tua, ompan wala la ray antam ya impormasyon ed sikato tan lanang kayo lan mancha-chat, pero segurado ka ya kabkabat mo la? Say amta na arum, nalmo da lay “true love” da diad Internet, pero abigla ra nen akapannengneng irad personal tan naamtaan day tuan inkatoo to.

Oniay imbaga na sakey a salmista: “Agak miuulop ed saray mapalikdon totoo, tan papaliisan ko iramay iyaamot day inkatoo ra.” (Sal. 26:4) Diad saray dating website, kaslakan et aliwan tua so amin ya impormasyon ya iiyan na totoo ed profile da. Gagawaen da itan pian dakel so onggusto ed sikara. Ompan iyamot day tuan inkatoo ra. Tan agmon talaga nanengneng so tuan ugali na sakey a too no diad online mo labat kabaten. Ompan say sakey et ibaga ton Tasi met, pero kasin bautismado la? Kasin maespiritual tan matoor ed si Jehova? Kasin maong so reputasyon to ed kongregasyon da? Odino wala ray makapuy ya gagawaen to tan “mauges” ni ingen ya kaulop? (1 Cor. 15:33; 2 Tim. 2:20, 21) Sakey ni, kasin walay Makasulatan ya basiyan ya sikatoy bulos ya mangasawa o miasawa? Kaukolan mon amtaen iraya, pero mairap no diad online mo labat akabat ta kaukolan mo ni mantepet-tepet ed arum ya Tasi ya makapikabat ed sikato. (Pro. 15:22) Tan siempre, say sakey a matoor ya lingkor nen Jehova et agbalot miinaroan ed “agmananisia.”—2 Cor. 6:14; 1 Cor. 7:39.

On, talagan mapeligro so mangusar na dating website. Walay mas marakep ya paraan pian makaromog ka na kapareha ed bilay ya talagan nakabkabat mo. Panon ey? No aliwan bawal so pantitipon diad lugar yo, walay tsansam ya nakabat ya personal iray arum ya agagi diad saray aral, asemblea, kombension, tan arum ni ran gathering.

No bawal so ontan iran pantitipon, singa kaleganan na COVID-19 pandemic, saray aral tayo et diad videoconference tan ditan et walay tsansam ya nakabkabat iray single ya agagi. Nanengneng mo no panon dan ipresenta so parte ra diad aral, tan nalikas moy kabiskeg na pananisia ra diad saray komento ra. (1 Tim. 6:11, 12) Tan sarag yoy mantongtong diad breakout room kayari na aral. Wala met iray virtual gathering ya gagawaen na arum ya agagi, ya ditan et naobserbaan mo so agin nagugustoan mo. Nanengneng moy panagtrato tod arum tan no antoy ugali to. (1 Ped. 3:4) Diad ilabas na panaon, no mas kabaten mo nin maong, nanengneng mo no kasin parehas so goal yo tan no kasin compatible kayo.

No unoren na sakey a Kristiano so prinsipyo na Biblia diad pananap to na kapareha tod bilay, seguradon maliket tan agto pagbabawian so desisyon to. Napaneknekan to ya talagan tua iyan ibabaga na Biblia: “Samay akaromog na maong ya asawan bii [o asawan laki] et akaromog na maong a bengatla, tan makakaawat na pabor nen Jehova.”—Pro. 18:22.