1-2. Siopa si Zadok? (1 Awaran 12:22, 26-28)

 IMADYIN mo pa yan eksena: Masulok ya 340,000 ya lalaki so nantitipon diad mapalandey a pasen ya asingger ed Hebron ta labay dan gawaen ya ari ed Israel si David. Diad loob na taloy agew, saniiba ran mamangan, malikeliket iran maniistoryaan, tan sankarengel so kansion na panangirayew dad si Jehova. (1 Awa. 12:39) Say sakey ed sikara et si Zadok. Seguro no wadman ka, agmo masyadon napansin iyan kalangweran a laki. Pero, naimano nen Jehova si Zadok tan sinegurado To ya naamtaan tayo ya wadman si Zadok ed saman ya pantitipon. (Basaen so 1 Awaran 12:22, 26-28.) Siopa yay Zadok?

² Si Zadok et saserdote tan lanang ton kaiba so Atagey a Saserdote ya si Abiatar. Inikdan nen Jehova si Zadok na ekstraordinaryon karunongan tan abilidad ya ‘makatalos na pasingawey.’ (2 Sam. 15:27) Kanian mabetbet ya sikato so aasinggeran na saray Israelita no kaukolan day simbawa. Pero aliwan satan labat. Makmakpel met ya laki si Zadok. Atan ya ugali to so aralen tayo ed sayan artikulo.

3. (a) Akin et kaukolan ya manpakpel iray lingkor nen Jehova? (b) Antoy pantongtongan tayo ed sayan artikulo?

³ Diad sayan kaunoran iran agew, mamapasya si Satanas pian pakapuyen so pananisia na saray lingkor nen Jehova. (1 Ped. 5:8) Kanian kaukolan tayoy manpakpel legan tayon aalagaren so panderal nen Jehova ed si Satanas tan ed sayan mauges ya sistema to. (Sal. 31:24) Pantongtongan tayo sirin ed sayan artikulo so taloran paraan no panon tayon naalig so pakpel nen Zadok.

SUPORTAAN MO SO PANARIAN NA DIOS

4. Akin et kaukolan na saray lingkor nen Jehova so pakpel pian nasuportaan day Panarian na Dios? (Nengnengen met so litrato.)

⁴ Bilang Tasi nen Jehova, iyuuna tayod bilay tayo so Panarian tan atan labat ya gobierno so susuportaan tayo. (Mat.  6:33) Pero kaukolan so pakpel pian tuloytuloy tayon nagawaan itan. Singa bilang, kaukolan tayoy pakpel pian nipulong tayo so maong a balita na Panarian tan pian naunor tayo ray ganggan nen Jehova anggano wala ray mauges ya impluensya. (1 Tes. 2:2) Kaukolan tayo met so pakpel pian mansiansia tayon neutral lalo la ta magulogulo so politika ed sayan mundo. (Juan 18:36) Diad tua, dakel ya agagi tayo so inmirap so bilay da, minaltrato, odino impriso ni ingen ta agda labay so mansundalo tan mibabali ed politika.

5. Akin et kaukolan nen Zadok so pakpel pian nasuportaan toy David?

⁵ Say rason no akin ya linmad Hebron si Zadok et aliwa labat ya pian suportaan so inkaari nen David. Linma diman ya walay awit ton armas tan akaparaan parad guerra. (1 Awa. 12:38) Labay ton ibaga, mabulos si Zadok ya mila ed si David pian miguerra ed saray kalaban na Israel. Pero, saserdote si Zadok tan ompan ngalngali anggapoy amta tod guerra. Kaukolan to sirin so manpakpel pian nasuportaan to si David.

6. Akin et maong ya alimbawa si David ed si Zadok? (Salmo 138:3)

⁶ Akin et makmakpel si Zadok ya miguerra anta aliwan sipor ya sundalo? On ta dakel so kabat ton makmakpel ya Israelita tan akaaral ed maong ya alimbawa ra. Sakey lad tay David. Makmakpel ya ‘indaulo nen David so pilalaban na Israel’ kanian nala toy tiwala tan suporta na saray kapara ton Israelita. (1 Awa. 11:1, 2) Lanang ya mantitiwala si David ya sikatoy tulongan nen Jehova pian natalo to ray kalaban to. (Sal. 28:7; basaen so Salmo 138:3.) Akaaral met si Zadok ed arum nin makmakpel ya lalaki ya singa si Jehoiada tan say anak ton sundalo ya si Benaias, ontan met ed 22 ya arum nin pangulo na tribu ya sinmuporta ed si David. (1 Awa. 11:22-25; 12:26-28) Makpel dan sinuportaan so inkaari nen  David tan akaparaan iran milaban parad sikato.

7. (a) No pakpel so pantongtongan, siopa ray pakaaralan tayo diad panaon tayo? (b) Diad video ya abitlad paimanod leksab, antoy naaralan mod alimbawa nen Brother Nsilu?

⁷ Singa si Zadok, makaaral tayo met ed alimbawa na saramay makpel ya sinmuporta ed si Jehova tan ed Panarian to. Say manunan alimbawa tayo et say mismon Ari tayo, si Kristo-Jesus. Nen wadiad dalin, nanengneng ed saray desisyon to ya agton talaga labay so mibabali ed politika na sayan mundo. (Mat. 4:8-11; Juan 6:14, 15) Si Jehova so lanang ton pantitiwalaan kanian akapampakpel. Diad panaon tayo, makaaral tayo met ed pakpel na saray kabataan ya brother ya minaltrato odino apriso lapud agda labay so mansundalo odino mibabali ed politika. Marakep no basaen mo ed jw.org so istorya da no panon iran akapampakpel. a

TULONGAN MO IRAY AGAGIM

8. Akin et kakkaukolan na saray elder so pakpel pian natulongan da ray agagi?

⁸ Inar-aro tayo ray agagi kanian labalabay tayo ran tulongan. (2 Cor. 8:4) Pero no maminsan, kaukolan tayoy pakpel pian nagawaan tayo itan. Singa bilang no walay guerra, kakkaukolan na agagi so panamaseseg, ontan met ed suplay na naakan, kawes, napanayaman, tan anggan saray publikasyon tayo. Inar-aro na saray elder iray agagi kanian akaparaan iran ontulong anggano niiyan ed peligro so bilay da. (Juan 15:12, 13) Makmakpel ira ya singa si Zadok.

9. Base ed 2 Samuel 15:27-29, antoy ingganggan nen David ya gawaen nen Zadok? (Nengnengen met so litrato.)

⁹ Nen nanrebelde so anak nen David ya si Absalom tan labay ton samsamen so inkaari, akaparaan si Zadok ya tulongan iray agagi to anggano niiyan nid peligro so bilay to. (2 Sam. 15:12, 13) Kakkaukolan nen David so ontakas, ta no andi, seguradon ipapatey nen Absalom. Kanian tinawag to ray lingkor to tan nanapura  ran tinmakas. (2 Sam. 15:14) Nen ontatakas la ra, naisip nen David ya kaukolan ya walay natilak ed Jerusalem ya mangitimbre ed sikato no anto ray plaplanoen nen Absalom. Kanian ingganggan toy Zadok tan arum nin saserdote ya ompawil irad syudad pian sikara so pinagka-espiya to. (Basaen so 2 Samuel 15:27-29.) Kaukolan day manalwar ta delikado yay ipapagawa nen David. Agaylay uges nen Absalom tan makasarili. Anggan say mismon ama to et labay ton ipapatey! Kanian no naamtaan to ya si Zadok tan saray kakaiba to et espiya manaya nen David, seguradon agto ra kasian!

10. Antoy ginawa nen Zadok tan saray kakaiba to pian naprotektaan day David?

¹⁰ Walay implano nen David ya gawaen nen Zadok tan sakey nin kaaro to, si Husai. (2 Sam. 15:32-37) Tinumbok nen Husai so instruksion nen David. Nampanggap si Husai ya say susuportaan to et si Absalom. Kanian dinengel nen Absalom so simbawa to no panon dan lusoben so grupo nen David. Pero diad tua, lapud samay insimbawa nen Husai, awalaan na panaon si David tan saray kakaiba to ya manparaan ed ilusob di Absalom. Imbalitan tampol nen Husai ed si Zadok tan Abiatar so plano nen Absalom. (2 Sam. 17:8-16) Insan ira angibaki na mensahero ya mangibagad si David. (2 Sam. 17:17) Benendisyonan nen Jehova so sagpot nen Zadok tan saray kakaiba ton saserdote kanian aprotektaan so bilay nen David.​—2 Sam. 17:21, 22.

11. Panon tayon makapanpakpel ya singa si Zadok no tutulongan tayo ray agagi?

¹¹ No bilang ta sikatayo so inyasain ya ontulong ed saray agagi diad mapeligro ran panaon, panon tayon makapanpakpel ya singa si Zadok? (1) Tumbok moy instruksion. Importante itan pian agnaderal so pankakasakey tayo. Unoren tayo ray instruksion ya nanlapud branch office. (Heb. 13:17) Nepeg ya kabisadoen na saray elder iray instruksion no anto ray gawaen antis tan legan na kalamidad. (1 Cor. 14:33, 40) (2) Magmaliw ya makpel pero maalwar. (Pro. 22:3) Nonoten tayon maong iray desisyon tayo. Agtayo ipapalaran so  bilay tayo. (3) Mantiwala kad si Jehova. Tandaan mo ya importante ed si Jehova so safety na kada lingkor to. Kanian no sika so niyasain ya man-monitor ed safety na agagi, seguradon tulongan ka nen Jehova ed satan ya asainmin mo.

12-13. Antoy naaralan mod si Viktor tan Vitalii? (Nengnengen met so litrato.)

¹² Ontan so asainmin nen Brother Viktor tan Brother Vitalii diad Ukraine. Niyasain ira ya mangiyakar na naakan tan danum ed saray agagi. Oniay imbaga nen Viktor: “Nila mi amin ya sukong pian makalmo kami naakan ya naideliber mi ed saray agagi. Anggan iner so laen mi, walay paltogan. Maong labat ta walay sakey ya brother ya nandonasyon na naakan ya tinipon tod bodega to. Malikeliket kami ta walay naideliber mi ed saray agagi ya abastoen da diad pigaran agew. Legan min ikakarga iratan ed trak, walay bomba ya tinmama diad asingger ed kulaan mi, pero maong labat ta aga sinmabog. Manga 20 metros labat so kaarawi to. Diad sanagew, agmanunday pikakasik ed si Jehova ya ikdan to ak komoy pakpel pian natulongan ko ray agagi.”

¹³ Onia met so imbaga nen Vitalii: “Talagan kakkaukolan so pakpel. Nen first time koy nambunog na naakan tan danum ed saray agagi, labinduan oras ak ya nan-drive. Legan na biahe, pikasi ak lan pikasi ed si Jehova.” Makmakpel si Vitalii, pero maalwar met. Kuan to: “Impikasik ed si Jehova ya ikdan to ak na karunongan tan kapaabebaan. Agak ondadalan ed saray karsada ya aga inaprobaan na gobierno. Diad tua, binmiskeg so pananisiak nen anengneng koy pantutulongan na agagi. Inekal da ray makasarasara ed dalan, nantipon iray naakan, kawes, tan arum ni ran gamit, inibaan da kamin mangikarga diad trak, tan sinegurado da ya walay naakan tan napampainawaan mi nen Viktor legan na pambiabiahe mi.”

MANMATOOR KA ED SI JEHOVA

14. Antoy epektod sikatayo no walay kapamilya o kaaro tayo ya tinaynan toy Jehova?

¹⁴ Say sakey ed saray sankasakitan ya nagawad bilay tayo et no walay kapamilya o kaaro tayo ya tinaynan toy Aman Jehova. (Sal. 78:40; Pro. 24:10) Ompan agtayo itan natanggap lalo la no inar-aro tayo itan ya too. No asalim la itan, seguradon makaaral ka ed si Zadok ta asali to met itan.

15. Akin et kaukolan nen Zadok so pakpel pian makapanmatoor ed si Jehova? (1 Arari 1:5-8)

¹⁵ Nanmatoor si Zadok ed si Jehova anggano nanrebelde so malet ya kaaro ton si Abiatar. Agawa iya nen masikesiken lay David tan asingger to lan ipasa so inkaari to. Makapkapuy lay David ed saman tan wala labat ed dukolan. Kanian sinambot na anak ton si Adonias ya samsamen so trono anta si Solomon so pinili nen Jehova ya onsublay ya ari. (1 Awa. 22:9, 10) Say ansakit, mas pinili nen Abiatar ya suportaan si Adonias. (Basaen so 1 Arari 1:5-8.) Nen ginawa to ’tan, aliwan si David labat so agto nanmatooran, noagta pati si Jehova. Anto kasi alikna nen Zadok nen ontan so ginawa na kaaro to? Seguradon maer-ermen tan asakisakitan ta malet iran sankaaro. Masulok ya 40 taon ya saniba ra nen Abiatar ya nanlingkor bilang saserdote. (2 Sam. 8:17) Saniba dan inasikaso so “Kaban na tuan Dios.” (2 Sam. 15:29) Tan pareho dan sinuportaan si David nen kakkagapo to ni labat ya ari.​—2 Sam. 19:11-14.

16. Antoy sakey ya akatulong pian makapanmatoor si Zadok?

¹⁶ Anggano onman so ginawa nen Abiatar, nanmatoor si Zadok ed si Jehova. Diad tua, baleg so tiwala nen David ya agtraidoren nen Zadok. Nen naamtaan nen David so plano nen Adonias, impatawag ton tampol si Zadok, Natan, tan Benaias pian lanaan si Solomon bilang  ari ed Israel. (1 Ara. 1:32-34) Seguradon apaseseg si Zadok ya lalon manmatoor ed si Jehova tan ed si David lapud alimbawa na arum nin matoor ya Israelita ya singa si Natan. (1 Ara. 1:38, 39) Nen ari lay Solomon, tinuro toy Zadok bilang atagey ya saserdote ya kasalat nen Abiatar.—1 Ara. 2:35.

17. Panon mon naalig si Zadok no walay kapamilyam o kaarom ya tinaynan toy Jehova?

¹⁷ Panon mon naalig si Zadok? No bilang ta walay kapamilyam o kaarom ya tinaynan toy Jehova, ipanengneng mo ya si Jehova so panmamatooran mo. (Jos. 24:15) Agka mapaga ta tulongan ka nen Jehova pian makpel mon nagawaan so duga. Lanang kan manpikasi ed sikato tan naynay kan miulop ed saray matoor ya agagi. Nanenengneng nen Jehova so panmamatoor mo tan papablien to itan. Bendisyonan to ka tan ikdan to ka na premyo lapud matoor ka.​—2 Sam. 22:26.

18. Antoy naaralan mod si Marco tan Sidse?

¹⁸ Asali itan nen Marco tan say asawa to ya si Sidse. Walay duaran ananak dan bibii, pero makapaermen ta sinmabi panaon ya tinaynan da so katuaan. Oniay imbaga nen Marco: “Inar-arok iray ana’ko. Manlapud inkaugaw da, ginawak so amin pian naprotektaan ko ra. Kanian nen tinaynan day Jehova, singa bebetagen so pusok. Pero maong labat ta agto kami tinaynan nen Jehova. Seseguradoen to ya no makapuy ak, mabiskeg si asawak. Tan no si asawak so makapuy, mabiskeg ak.” Oniay imbaga met nen si Sidse: “No anggapoy tulong nen Jehova, agmi ’ya nasarag. Diad tua, tetetelen koy sarilik no akin ya onmay agawa. Kanian imbagak ed si Jehova iyan naliliknak. Kayari pigaran agew, nen wala kamid Kingdom Hall, inmasingger ed siak so sakey ya sister ya abayag ko lan aga anengneng. Pinuyok to ak ed takeb tan maar-aro ton imbaga: ‘Sidse, agmo teteteley sarilim ah. Agmo kasalanan.’ Diad tulong nen Jehova, maliket ak nin siansia ya manlilingkor anggano onmay agawa.”

19. No ondadalan kad subok o problema, antoy desididom ya gawaen?

¹⁹ Labay nen Jehova ya amin ya lingkor to et magmaliw ya makpel ya singa si Zadok. (2 Tim. 1:7) Pero siempre, agto labay ya mantiwala tayo ed sarili tayo. Labay nen Jehova ya mantiwala tayo ed sikato. Kanian no walay dadalanen mon subok o problema tan kakkaukolan moy pakpel, kerew moy tulong nen Jehova. Seguradon gawaen to kan makpel ya singa si Zadok!​—1 Ped. 5:10.