1. Akin et singa hunter si Satanas?

SAY labay na sakey ya hunter et makarel odino makapatey na ayep. Nanduruman patit so uusaren to, ya singa ibabaga na Biblia. (Job 18:8-10) Antoy gagawaen na sakey ya hunter pian makarel na ayep? Aaralen toy kalareker na samay ayep ya labay ton patitan. Singa bilang, iner kasi lalaen to? Anto kasi labalabay ton gawaen? Anto kasi balibalin ipatit ed sikato ya agto nalikas? Ontan ya ontan so gagawaen nen Satanas. Aaralen toy kalareker tayo. Oobserbaan to tayo no iner so lalaen tayo tan no anto ray labalabay tayon gawaen. Insan manisip na patit ya agtayo nalikas pian naerel to tayo. Balet ibabaga na Biblia ya no bilang ta apatitan to tayo, makablos tayo nin siansia. Pero ibabaga met na Biblia no antoy gawaen tayo pian agtayo la napatitan.

2. Anto so duara ed saray sankaepektiboan ya patit nen Satanas?

² Say inkamapaatagey tan inkaagum * so duara ed saray sankaepektiboan ya patit nen Satanas. Nilibon taon to lan uusaren itan, tan dakel lay apatitan to. Ibabaga na Biblia ya singa “manag-erel na manok” si Satanas. (Sal. 91:3) Pero walay nagawaan tayo pian agto tayo naerel. Maong labat ta impaamta la nen Jehova ed sikatayo iray pakana nen Satanas.—2 Cor. 2:11.

3. Akin et impaisulat nen Jehova ed Biblia so agawad saray lingkor to ya nagmaliw ya mapaatagey tan maagum?

³ Impaisulat nen Jehova ed Biblia so agawa ed pigaran lingkor to ya nagmaliw ya mapaatagey tan maagum pian naibangat to tayo ya talagan mapeligro itan. Aralen tayo ed sayan  artikulo no panon ya apatitan nin siansia nen Satanas so pigaran lingkor nen Jehova anggano abayag la ran manlilingkor ed sikato. Aglabay nen Jehova ya naalig tayoy agawad sikara, kanian impaisulat to iratan ed Biblia “bilang pasakbay ed sikatayo.” (1 Cor. 10:11) No agtayo la uliten iray lingon ginawa ra, makablos tayod saray patit na Diablo tan naiwasan tayo ni ingen iratan.

4. Antoy nagawa ed toon mapaatagey?

⁴ Labay nen Satanas ya magmaliw tayon mapasirayew tan malastog ya singa sikato. Amta to ya no say sakey ya too et magmaliw a mapaatagey tan agla manguman, anggapo lay ilalo ton manbilay na andi-anggaan. (Pro. 16:18) Duga sirin imay imbaga nen apostol Pablo ya say toon mapaatagey et “naawat toy panangukom a singa samay inawat na Diablo.” (1 Tim. 3:6, 7) Posible iyan nagawa ed sikatayo, anggano abayag tayo lan manlilingkor ed si Jehova odino balo tayo ni labat ed katuaan.

5. Base ed Eclesiastes 7:16, 20, antoy pakapatnagan ya mapaatagey so sakey ya too?

⁵ Makasarili so toon mapaatagey. Labay nen Satanas ya sarili tayo labat so isipen tayo imbes ya manpokus tayod si Jehova, lalo la no walay dadalanen tayon problema. Singa bilang, kasin walay nan-agrabiado ed sika, odino in-tsismis da ka ya wala kunoy ginawam ya aliwa? Labay nen Satanas ya say tetelen mo et si Jehova odino saray agagi. Tan labalabay na Diablo ya manisip ka lay sarilim ya solusyon, imbes ya unoren mo ray bilin nen Jehova ya makatulong ed problemam.—Basaen so Eclesiastes 7:16, 20.

6. Antoy naaralan mo ed eksperiensya na sakey ya sister ed Netherlands?

⁶ Imanoen so eksperiensya na sakey ya sister ed Netherlands, ya nasyosyodotan ya maong ed kakapuyan na saray kakongregasyon to. Sinmabid punto ya agto la ra labay ya nakaiba. “Singa anggapoy kaarok ed kongregasyon, tan agko la ra nitepel,” so kuan to. “Imbagak ed si asawak ya onalis kami lay kongregasyon.” Maong labat ta binantayan na  sayan sister imay Marso 2016 ya programa ed JW Broadcasting^®. Say topic ed satan ya bulan et no antoy dugan gawaen no nanenengneng tayoy kakapuyan na arum. Oniay a-realize to: “Imbes ya manpokus ak ed ugali na saray kakongregasyon ko, dapat aralen koy manpaabeba tan aminen ko ya wala met iray kaukolan kon umanen ed sarilik. Naaralan ko ed saman ya Broadcasting ya si Jehova dapat so pampokusan ko tan say soberanya to.” Antoy punto? No walay dadalanen mon problema, manpokus ka ed si Jehova tan ipikasim ya naalig mo komon. Amta nen Aman Jehova iray lingon nagagawaan na saray lingkor to, balet mabulos to ran peperdonaen tan labay ton ontan met so gawaen mo.—1 Juan 4:20.

7. Antoy nansumpalan nen Arin Uzias?

⁷ Say sakey ya nagmaliw ya mapaatagey et si Arin Uzias ya nanuley ed Juda. Agto dinmengel ed instruksion nen Jehova, tan walay ginawa to ya anggapoy karapatan ton gawaen. Dati et maong pan ari si Uzias. Dakel so impanalo ton guerra, angipaalagey na saray tori tan syudad, tan pinaaligwas toy agrikultura diad Juda. “Sikatoy benendisyonan na tuan Dios.” (2 Awa. 26:3-7, 10) “Balet sanen mabiskeg la, nagmaliw a mapaatagey so puso to,” so kuan na Biblia. Kanian aliwliway nansumpalan to. Amta nen Arin Uzias imay ganggan nen Jehova ya saray saserdote labat so nepeg ya mamool na insenso diad templo. Pero impilit to nin siansia so onloob ed templo pian mamool na insenso. Dinusa nen Aman Jehova si Uzias lapud saman ya ginawa to. Akating iyan mapaatagey ya ari anggad agew na impatey to.—2 Awa. 26:16-21.

8. Base ed 1 Corinto 4:6, 7, antoy agtayo lilingwanan pian ag-ombaleg so ulo tayo?

⁸ Posible kasi ya nagawa met ed sikatayo imay agawad si Uzias? Imanoen so agawad sakey ya agi ya si José. Mayaman ya negosyante si José tan nanlingkor ya elder ed kongregasyon. Sikatoy respetado ta manpapaliwawa ed saray asemblea tan kombension, tan anggan saray manangasikaso na sirkito et onkokonsulta ed sikato. Pero oniay inamin to: “Sinmabid punto ya imbes ya manmatalek ak ed si Jehova, nanmatalek ak lad sarilik tan ed abilidad ko. Inisip kon mabiskeg ak, kanian agak dinmengel ed saray pasakbay tan bilin nen Jehova.” Akagawa si José na ambelat ya kasalanan tan adispelo. Natan et akapawil la ed  kongregasyon tan oniay imbaga to: “Lapud impandisiplina nen Jehova ed siak, naaralan ko ya aliwan say pribilehyo so importante. Say sankaimportantian et no kasin gagawaen tayoy panlabayan to.” On, agtayo lilingwanan ya amin ya abilidad tayo tan pribilehyo tayo ed kongregasyon et nanlapud si Jehova. (Basaen so 1 Corinto 4:6, 7.) Agtayo komon aabuloyan ya ombaleg so ulo tayo, ta no andi, ag-itayo la usaren nen Jehova.

9. Antoy ginawa nen Satanas tan Eva lapud nagmaliw iran maagum?

⁹ No pantongtongan so inkaagum, seguro say manunan naisip tayo et si Satanas. Anta balibali so pribilehyo to bilang sakey ed saray anghel nen Jehova, agnin siansia akontento. Labay to ya sikatoy dayewen met, anggano amta to ya si Jehova labat so nepeg ya dayewen. Labay nen Satanas ya magmaliw tayon maagum ya singa sikato. Kanian sasalien ton ipaliknad sikatayo ya wala ni kulang ed bilay tayo. Atan so inusar ton patit ed si Eva. Inar-aro nen Jehova si Eva tan si Adan ya asawa to. Kanian sinegurado to ya amayamay so naakan da—“manlapud amin a kiew ed hardin et nayarian [day] mangan na bunga.” Saksakey labat so imbawal na Dios. (Gen. 2:16) Pero akombinse nen Satanas si Eva ya kaukolan ton kanen imay bunga ya imbawal nen Jehova. Ag-akontentoy Eva ed no antoy wala lad sikato. Antoy nansumpalan to ey? Nankasalanan si Eva, tan say dusa to et patey.—Gen. 3:6, 19.

10. Panon ya apatitan si Arin David?

¹⁰ Say sakey met ya apatitan nen Satanas et si Arin David. Dakdakel so bendisyon nen Jehova ed sikato—ginawa ton ari, impanalo to ed saray guerra, tan nagmaliw ya mayamyaman. Imbagan mismo nen David ya “agaylay karakel” na regalo na Dios ed sikato. (Sal. 40:5) Pero wala may inkagawa ya aminpinsan ton alingwanan iratan lapud ag-akontento ed no antoy wala lad sikato. Anta pigara lay asawa to, ginmusto ni ed asawa na arum! Agustoan toy Bat-sheba ya asawa nen Urias ya Heteo. Akirelasyon ed sayan bii tan alukonan to. Anta akagawa la lanti imoral, impapatey to ni Urias! (2 Sam. 11:2-15) Agayla yay David, anto kasi linmad nonot to? Say amta to amo, agnanenengneng nen Jehova so gagawaen to. Anggano abaybayag lan manmamatoor ed si Jehova, apatitan nin siansia. Inani  nen David so mauges ya resulta na saray kasalanan to. Pero maong labat ta impatua to iratan tan nagbabawi. Seguradon alemewan so liknaan nen David nen pinerdona nen Jehova.—2 Sam. 12:7-13.

11. Base ed Efeso 5:3, 4, antoy gawaen tayo pian ag-itayo onggawan maagum?

¹¹ Antoy gawaen tayo pian naiwasan tayo may agawad si David? Lanang tayon isipen iray bendisyon nen Jehova ed sikatayo tan pisalamatan tayo iratan pian ag-itayo onggawan maagum. (Basaen so Efeso 5:3, 4.) Importante ya kontento tayo ed no antoy wala lad sikatayo. Ipapaseseg tayod saray Bible study ya kada agew et manisip iray sakey ya bendisyon na Dios ed sikara, insan da pisalamatan si Jehova. No gawaen da itan, wala lay pitoran naipikasi da ed loob na sakey simba. (1 Tes. 5:18) Sikatayo balet ey, kasin gagawaen tayo met itan? No isipen moy amin ya kaabigan nen Jehova ed sika, magmaliw kan maapresya. No maapresya ka, kontento kad bilay mo. No kontento kad bilay mo, agka magmaliw ya maagum.

12. Antoy ginawa nen Judas Iscariote nen nagmaliw ya maagum?

¹² Say sakey met ya nagmaliw ya maagum et si Judas Iscariote, tan lapud satan et nagmaliw ya traidor. Pero amta tayo ya agto ontan dati. (Luc. 6:13, 16) Nen sikatoy pinili nen Jesus ya magmaliw ya apostol, amta nen Jesus ya napantiwalaan si Judas. Sikato ni ingen so aka-asain ya mamemben ed kahon na kuarta. Karga na satan ya kahon so pundo ya uusaren nen Jesus tan saray apostol diad panagpulong da. No diad panaon tayo, atan may donasyon parad sankamundoan a kimey. Pero sinmabi panaon ya tatakewen la nen Judas iray donasyon. Anta narerengel to met iray pasakbay nen Jesus tungkol ed inkaagum, imbaliwala to iratan.—Mar. 7:22, 23; Luc. 11:39; 12:15.

13. Kapigan pinmaway so inkaagum nen Judas?

¹³ Wala may inkagawa antis na impatey nen Jesus ya pinmaway so inkaagum nen Judas. Si Jesus tan saray disipulo to et walad abung nen Simon ya datin akating, kaiba ray Maria tan say atsi ton si Marta. Legan iran mamangan, angala si Maria na mabmabli tan ambalbalingit ya larak, insan to inkalbo ed ulo nen Jesus. Amasnok si Judas tan saray arum ya disipulon wadman. Inisip na arum ya disipulo ya mas maabig komon no inlako may larak, insan iter so nanlakoan ed saray mairap-bilay. Pero dumay motibo nen Judas ta “sakey a matakew.” Ontan so labay ton nagawa ta pian walay natakew to. Tan ag-abayag, lapud inkaagum to et trinaidor toy Jesus kasalat labat na presyo na sakey ya aripen.—Juan 12:2-6; Mat. 26:6-16; Luc. 22:3-6.

14. Panon ya inyaplika na sanasawan taga Romania so prinsipyo ed Lucas 16:13?

¹⁴ Imbangat nen Jesus iyan importantin katuaan: “Agyo nayarian so magmaliw ya aripen na Dios tan Kayamanan.” (Basaen so Lucas 16:13.) Tua itan. Imanoen so eksperiensya na sanasawa ed Romania ya inyaplika da itan ya prinsipyo. Walay job offer ed sikara diad mas maasenson bansa. “Walay baleg ya utang mid bangko, kanian inisip min bendisyon nen Jehova iyan trabaho,” so kuan da. Pero walay problema. No awaten da itan, ngalngali anggapo lay panaon dan manlingkor ed si Jehova. Antis iran nandesisyon, binasa da ni imay artikulon “Mansiansian Matoor Tekep na Naspot a Puso” ya walad Panag-bantayan ya Agosto 15, 2008. Oniay imbaga ra: “No onla kamid arum a bansa pian makalmoy mas dakel ya kuarta, agmi la niyuna si Jehova ed bilay mi. Seguradon napeligro so espiritualidad mi.” Kanian agda inawat imay trabaho. Anto lay agawad sikara ey? Akalmo lanlamang may asawan laki na trabaho diad bansa ra, tan dugaruga  labat so sueldo to ed pankaukolan da. Imbaga na asawan bii: “Apaneknekan mi ya talagan aliwan antikey so lima nen Jehova.” Malikeliket iyan sanasawa ta say pinili dan Katawan et si Jehova, aliwan say Kayamanan.

15. Akin et segurado tayo ya sarag tayoy makablos ed saray patit nen Satanas?

¹⁵ Panon to no alikas mon magmamaliw ka lan mapaatagey odino maagum? Makablos ka ni kasi ed saratan ya patit? On, ta imbaga nen Pablo ya ‘saramay narel na Diablo ya mabilay et sarag da ni makablos.’ (2 Tim. 2:26) Pawilen tayoy Arin David. Dinengel toy simbawa nen propeta Natan. Impapuson nagbabawi tan ginawa toy anggaay nayarian to pian naala to lamet so pabor nen Jehova. Tandaan, mas mabiskeg si Aman Jehova nen si Satanas. Kanian no manpatulong tayod si Jehova, makablos tayo ed antokaman ya patit na Diablo.

16. Antoy gawaen tayo pian naiwasan tayo ray patit nen Satanas?

¹⁶ Pero siempre, mas maabig no iwasan tayo la ray patit nen Satanas pian agto tayo la naerel. Pian nagawaan tayo itan, manpatulong tayo ed si Jehova. Agtayo mankakampante, ya isipen tayon ag-itayon balot nabiktima nen Satanas. Singa inaral tayo ed sayan artikulo, anggan saramay abayag lan lingkor nen Jehova et agda aliklikas ya nagmaliw iran mapaatagey odino maagum. Kanian inagew-agew mon ipikasi ed si Jehova ya tulongan to ka pian nanengneng mo no kasin onggagawa ka lan ontan. (Sal. 139:23, 24) Gawam so anggaay nayarian mo pian ag-ontubo ed pusom so inkamapaatagey tan inkaagum!

17. Antoy asingsingger lan nagawa ed Diablo?

¹⁷ Nilibon taon lan manha-hunting si Satanas tan manaanap na naerel to, pero asingsingger met la ya sikatoy erelen tan deralen nen Jesus. (Apo. 20:1-3, 10) Labalabay tayo lan nagawa itan. Anggad agni itan agawa, manalwar tayon maong ed saray patit nen Satanas. No nalilikas mon ontutubo lad pusom so inkamapaatagey odino inkaagum, bagot mon tampol! Gawam so anggaay nayarian mon ‘sumpaen so Diablo pian ibatikan to ka’!—Sant. 4:7.