1-2. Antoy kailangan ya gawaen na sakey antis ya nabautismoan?

 DIAD apalabas labat ya limaran taon, masulok ya sakey milyon so nampabautismo bilang Tasi nen Jehova. Maslak ed sikara et singa si Timoteo​—naamtaan day katuaan “manlapud inkaugaw” da. (2 Tim. 3:14, 15) Say arum balet et akabat day Jehova nen adulto la ra. Wala ra ingey nampa-Bible study nen masiken tan akulaw la ra. Diad tua, walay Bible study ya abautismoan nen 97 so taon to!

² No sakey kan Bible study odino binmaleg kad katuaan lapud Tasi iray ateng mo, kasin plaplanoen mo met lay manpabautismo? No on, marakep sirin ta ontan so goal mo. Pero antis kan nabautismoan, kailangan mo nin idedika so sarilim ed si Jehova. Pantongtongan tayod sayan artikulo no antoy labay ya ibaga na dedikasyon. Aralen tayo met no akin ya agka dapat manaalangan ya idedikay sarilim ed si Jehova tan manpabautismo no ready ka la.

ANTO SO DEDIKASYON?

3. Siopa ray abitla ed Biblia ya akadedika ed si Jehova?

³ Diad Biblia, no imbagan say sakey et akadedika ed si Jehova, sikatoy imbiig odino apili ta walay espisyal ya gawaen to parad si Jehova. Singa bilang, saray Israelita et akadedika ed si Jehova bilang sakey ya bansa. Pero wala met iray indibidual ya akadedika ed Dios diad espisyal ya paraan. Say sakey et si Aaron. Diad arap na samay turbante ya akasulong ed ulo to, walay akaiyan ya masileng a metal a balitok ya tinawag ya “masanton tanda na dedikasyon.” Atan so mangipanengneng ed amin ya sikatoy pinili nen Jehova ya manlingkor bilang Atagey ya Saserdote na Israel. (Lev. 8:9) Saray Nazareo et akadedika met ed si Jehova diad espisyal ya paraan. Say salitan “Nazareo” et inalad Hebreon salita ya nazirʹ ya say labay ton ibaga et  “Sakey a Nibiig” odino “Sakey ya Indedika.” Wala ray instruksion ed Mosaikon Ganggan ya kaukolan ya unoren na saray Nazareo ya ag-uunoren na arum ya Israelita.​—Num. 6:2-8.

4. (a) Akin et nibagan akabiig iray dedikadon lingkor nen Jehova? (b) Antoy labay ya ibaga na “iburi” o itakwil so sarili? (Nengnengen met so litrato.)

⁴ No idedikam lay sarilim ed si Jehova, labay ton ibaga et labay mo lay magmaliw ya disipulo nen Jesu-Kristo tan desidido ka la ya iyuna ed bilay mo so panlabayan na Dios. Oniay imbaga nen Jesus: “Siopaman a labay toy ontumbok ed siak, iburi toy sarili to.” (Mat. 16:24) Diad lenguahen Greek, amay “iburi toy sarili to” et nayari met ya i-translate ya “kailangan ton tanggian so sarili to.” No dedikado ka la ed si Jehova, tanggian mo la so antokaman ya kontra ed panlabayan to. (2 Cor. 5:14, 15) Kaibad satan iray “gawa na laman,” singa say seksual ya imoralidad. (Gal. 5:19-21; 1 Cor. 6:18) No unoren moy panlabayan nen Jehova, kasin singa sisibletan moy sarilim? Aliwan ontan so naliknam no inarom si Jehova tan no kombinsido ka ya parad pankaabigan mo iray ganggan to. (Sal. 119:97; Isa. 48:17, 18) Oniay imbaga na sakey ya brother ya si Nicholas: “Akadepende ed sika no say pakanengneng mo ed saray ganggan nen Jehova et singa rehas na prisoan ya anggapoy kalayaan mon gawaen so labay mo, odino singa rehas na kulongay leon ya manprotekta ed sika.”

5. (a) Panon mon idedika so sarilim ed si Jehova? (b) Antoy pandumaan na dedikasyon tan bautismo? (Nengnengen met so litrato.)

⁵ Panon mon idedika so sarilim ed si Jehova? Manpikasi ka tan i-promise mod sikato ya sikato labat so dayewen mo tan lanang mon iyuna ed bilay mo so panlabayan to. Isipan mod sikato ya sikatoy aroen mo ed “interon pusom tan interon kamarerwam tan interon nonot mo tan interon biskeg mo.”  (Mar. 12:30) Espisyal so dedikasyon​—gawaen mo iya ya sikayon dua labat nen Jehova. Say bautismo balet et nanengneng na totoo. Atan so mangipaamta ed sikara ya indedikam lay sarilim ed si Jehova. Say dedikasyon et seryoso tan sagradon sipan. Gawam sirin so anggaay nayarian mo ya tooren so im-promise mo ta atan so eekspiken nen Jehova.​—Ecl. 5:4, 5.

AKIN ET IDEDIKAM SO SARILIM ED SI JEHOVA?

6. Antoy manpakilos ed sakey ya too ya idedikay sarili to ed si Jehova?

⁶ Say manunan rason no akin ya idedikam so sarilim ed si Jehova et lapud sikatoy inar-arom. Ayan panangaro et aglabat akabase ed emosyon, noagta akabase ed “suston kakabatan.” (Col. 1:9) Nen akabkabat moy Jehova tan naamtaan moy gagala to, sikatoy naar-arom. Lapud panaaral mo na Biblia, akombinse ka ya (1) tua si Jehova, (2) nanlapud sikato so Biblia, tan (3) walay organisasyon ya uusaren to pian nasumpal so gagala to.

7. Anto ray dapat mo nin gawaen antis mon idedika so sarilim ed si Jehova?

⁷ Antis ya idedika na sakey so sarili to ed si Jehova, dapat amta to la ray manunan bangat na Biblia tan uunoren to la ray ganggan na Dios. Ibabaga to met lad arum iray nanaaralan to. (Mat. 28:19, 20) Naar-aro to lay Jehova kanian sikato labat so labay ton dayewen. Kasin ontan met lay naliliknam ed si Jehova? No on, say rason sirin no akin ya idedikam so sarilim tan manpabautismo ka et lapud inar-arom si Jehova, aliwan lapud labay mo labat ya napaliket imay mangiyaaral ed sika o saray atateng mo, tan aliwan lapud nalalagyat ka labat ed saray kakaarom ed kongregasyon.

8. Panon ya mankonektaan so pisasalamat tayod si Jehova tan say dedikasyon tayo? (Salmo 116:12-14)

 ⁸ No isipen moy amin ya ginawa tan regalo nen Jehova ed sika, seguradon napakilos kan idedika so sarilim ed sikato ta labay moy ombales ed kaabigan to. (Basaen so Salmo 116:12-14.) Diad tua, ibabaga na Biblia ya no si Jehova so manregalo, “maong tan sankaabigan” so iiter to. (Sant. 1:17) Diad ami-amin ya inregalo tod sikatayo, say sankamablian et say bilay na Anak to, si Jesus. Ginawa to itan pian nadondon itayo. No anggapoy dondon, ag-itayo makapikaaro ed si Jehova tan agtayo met makapanbilay na andi-anggaan. (1 Juan 4:9, 10, 19) No idedikam so sarilim ed si Jehova, nipanengneng mo ya misatsalamat kad dondon tan ed arum ni ran bendisyon tod sika. (Deu. 16:17; 2 Cor. 5:15) Atalakay iya ed leksion 46 punto 4 ed libron Panliketan so Bilay ya Anggapoy Anggaan! ya ditan et nabantayan met so video ya Pangiter Moy Regalo ed Dios.

KASIN READY KA LAN IDEDIKA SO SARILIM TAN MANPABAUTISMO?

9. Akin et agka dapat napre-pressure ya idedika so sarilim ed si Jehova?

⁹ Ompan nalikas mod sarilim ya agka ni ready parad dedikasyon tan bautismo. Ompan wala ni ray kailangan mon umanen ed bilay mo pian naunor moy estandarte nen Jehova odino ompan kailangan mo ni panaon pian napabiskeg moy pananisiam. (Col. 2:6, 7) Tandaan ya aliwan parepareho so peles na iyaligwas na saray Bible study, anggan saray anak na Tasi. Kanian no uusisaen mo no kasin ready ka la parad dedikasyon tan bautismo, agmo komon ikokomparay sarilim ed arum. Mas marakep no manpokus kad iyaaligwas mon mismo tan saray kailangan mo nin umanen.​—Gal. 6:4, 5.

10. Antoy gawaen mo no a-realize mo ya agka nin talaga ready parad dedikasyon tan bautismo? (Nengnengen met so kahon ya “ Parad Saray Kabataan ya Tasi so Ateng Da.”)

¹⁰ Panon to no a-realize mo ya agka nin talaga ready ya idedika so sarilim ed si Jehova? Agka komon nadidismaya. Say importante et i-goal mo nin siansia itan. Ipikasim ed si Jehova ya tulongan to kad saray kailangan mo nin paaligwasen tan umanen ed sarilim. (Fil. 2:13; 3:16) Seguradon dengelen tan ebatan nen Jehova iray ontan ya pikakasi.​—1 Juan 5:14.

AKIN ET WALA RAY MANAALANGAN?

11. Panon kan tulongan nen Jehova pian makapanmatoor ka ed sikato?

¹¹ Wala ray Bible study ya manaalangan ya idedika so sarili da tan manpabautismo anggano ready la ra. Seguro iisipen da, ‘Panon to no makagawa ak na seryoson kasalanan tan nadispelo ak?’ No ontay naliliknam, tandaan mo ya si Jehova lanlamang so ontulong pian nagawaan moy “manbilay . . . a manepeg ed [sikato],” diad ontan et “napaliket [mon] maong.” (Col. 1:10) Tulongan to ka met pian makpel mon gawaen so duga. Amayamay lan eksperiensya so manpatunay ya tutulongan nen Jehova iray lingkor to pian nalabanan day tukso. (1 Cor. 10:13) Atan so rason no akin ya pigpigara labat so naeekal ed kongregasyon. Makaseguro ka ya wadtan si Jehova ya onalalay ed sika pian makapanmatoor ka.

12. Anto ray gawaen tayo pian naiwasan tayoy makagawa na seryoson kasalanan?

¹² Amin tayo et aliwan perpekto, kanian anggapo tay toon aga natutukson manggaway aliwa. (Sant. 1:14) Pero akadepende ed sika no kasin manpadaeg ka ed tukso odino labanan mo. Sika so mandesisyon parad sarilim. Sarag mon kontrolen so isip tan liknaan mo.  Aliwan tua may ibabaga na arum ya agda kayan pigilan so sarili da no natutukso la ra. Tua, ompan no maminsan et makalikna ka met na pilalek na laman, pero sarag mon labanan itan. Kanian inagew-agew kan manpikasi. Marakep no walay regular ya eskedyul mon man-personal study. Lanang kan miaral tan i-share mod arum iray nanaaralan mod Biblia. No gawaen mo irayan amin, seguradon nalabanan moy tukso. Tan agmo lilingwanan ya tulongan ka nen Jehova pian natoor moy dedikasyon mo.​—Gal. 5:16.

13. Akin et maong ya alimbawa si Jose?

¹³ Mas mainomay mon nagawaan so dedikasyon mo no antis nin onsabi so tukso et imparaan mo lay sarilim tan buo lay desisyon mo ya manmatoor. Wala ray alimbawa ed Biblia ya ontan so ginawa ra. Say sakey et si Jose. Sikatoy paulit-ulit ya tinukso na asawa nen Potifar, pero aga nampatalo ed tukso. Agla nanduaran isip si Jose ta desidido ya gawaen no antoy duga. Ibabaga na Biblia ya “agton balot inmabuloy” ed labay ya nagawa na samay bii. Onia ingen so imbaga nen Jose: “Panon kon nagawaan iyan baleg a kaugsan tan makapankasalanan ak ed Dios?” (Gen. 39:8-10) Tua, aliwan perpekto si Jose ya singa sikatayo, pero imparaan to lay sarili to antis nin natukso. Kanian nen wala lad arapan to so tukso, amta to lay gawaen to.

14. Antoy gawaen tayo pian nalabanan tayoy tukso?

¹⁴ Panon mon naalig so katooran nen Jose? Natan ni labat et isip mo la no antoy gawaen mo no bilang ta walay tukso. Tan dapat desidido ka lan gawaen no antoy duga. Ipasal moy sarilim ya ontanggi ya tampol ed saray bengatlan kabusol nen Jehova. Tan no walay onsagi ed isip mo ya aliwa, ekal mon tampol itan. (Sal. 97:10; 119:165) No napasal ka ya ontay gawaen mo, agka la manduaran isip no wala lad arapan mo so tukso ta buo lay desisyon mo ya manmatoor.

15. Panon mon nipanengneng ya ‘masimoon mon aanapen’ si Jehova? (Hebreo 11:6)

¹⁵ Panon to no kombinsido ka met la ya nalmom lay katuaan tan labay mo lan panlingkoran si Jehova diad interon pusom pero manaalangan ka nin siansia ya idedika so sarilim tan manpabautismo? Antoy gawaen mo? Alig mo may ginawa nen Arin David. Abuloyan moy Aman Jehova ya usisaen toy pusom. Oniay ipikasim ed sikato: “Komon ta usisaen  mo ak, O Dios, tan amtaen moy pusok. Komon ta surien mo ak, tan amtaen moy nanaaburidon kanonotan ko. Nengneng mo no kasin walaan ak na makapasakit a tendensia, tan itonton mo ak ed dalan na andi-anggaan.” (Sal. 139:23, 24) No ontan so pikakasim, ipapanengneng mo ya manpapatulong kad si Jehova tan labay mon tuloytuloy ya i-goal so dedikasyon tan bautismo. Seguradon bendisyonan nen Jehova iramay “masimoon a manaanap ed sikato.”​—Basaen so Hebreo 11:6.

ITULTULOY MOY ONAPIT ED SI JEHOVA

16-17. Anggano say sakey et binmaleg ed katuaan, akin et nibaga nin siansia ya sikatoy inyasingger nen Jehova? (Juan 6:44)

¹⁶ Imbaga nen Jesus ya kada disipulo to et inyasingger nen Jehova. (Basaen so Juan 6:44.) Isip mo pa itan ya katuaan. No walay nanengneng nen Jehova ya kamaongan ed sakey ya too, iyasingger tod sarili to. Diad pakanengneng nen Jehova, atan ya too et “espisyal” o “pinabpablin kayarian” to. (Deu. 7:6, paimanod leksab) Ontan so pakanengneng nen Jehova ed sika!

¹⁷ Pero panon to no Tasi iray atateng mo tan abangonan mo lay katuaan? Ompan say pakaliknam et agka inyasingger nen Jehova ta adamay ka labat ed saray atateng mo. Andi, inyasingger ka nin siansia nen Jehova. Ta oniay ibabaga na Biblia: “Onapit kayo ed Dios, tan sikatoy onapit ed sikayo.” (Sant. 4:8; 1 Awa. 28:9) No say sakey ya too et man-effort ya onapit ed si Jehova, onapit met so Dios ed sikato. Sansasakey itayon iyaasingger nen Jehova. Kanian anggano binmaleg ka ed katuaan, agmo komon iisipen ya aguyor ka labat na saray kapamilyam. Andi, aliwan ontan. Inyasingger ka nen Jehova! Anengneng to ya nan-effort ka ya onapit ed sikato, kanian sikatoy inmapit met ed sika.​—Ikompara so 2 Tesalonica 2:13.

18. Antoy pantongtongan tayo ed ontumbok ya artikulo? (Salmo 40:8)

¹⁸ No idedikam so sarilim ed si Jehova tan manpabautismo ka, aaligen moy Jesus. Mabulos ton ginawa so amin ya ipapagawa nen Ama to. (Basaen so Salmo 40:8; Heb. 10:7) Pantongtongan tayod ontumbok ya artikulo no antoy makatulong pian matoor mon napanlingkoran si Jehova kayari na bautismom.