TALAGAN makapabiskeg tan makaligliwa so pangipanengneng na kaabigan! Misalsalamat itayo no amta tayon walay mangiyaansakit ed sikatayo. Lapud labay tayon amin so natrato a walaan na kaabigan, panon itayon nawalaan na sayan balibalin kualidad?

Say kaabigan et pangipanengneng na tuan interes ed pankaabigan na arum, nipanengneng itan diad makapaseseg iran salita tan gawa. Sakey itan ya aktibon kualidad, aliwan kunkunwari ya pangipanengneng na kaabigan ed arum. Papakiwasen itayo na aralem ya panangaro tan panangasi ya ipatnag so tuan kaabigan. Lalo la ta say kaabigan et kabiangan na bunga na masanton espiritu na Dios a kaukolan ya pawalaen na saray Kristiano ed bilay da. (Gal. 5:22, 23) Nepeg tayon pankimeyan ya pawalaen itan ya kualidad, kanian aralen tayo no panon itan ya impanengneng nen Jehova tan na Anak to, tan no panon tayon naalig so alimbawa ra.

Si Jehova et maong tan makonsidera ed amin ya totoo, kaiba la ray “andiay utang na linawa tan mauges.” (Luc. 6:35) Singa bilang, “papasinagen [nen Jehova so] agew to ed saray mauges tan maong a totoo tan papepelagen toy uran ed saray matunong tan agmatunong.” (Mat. 5:45) Kanian anggan saramay agda bibidbiren ya si Jehova so Amalsa ed sikara et siansian minanabang ed saray maaron probisyon to pian nasustuni tan napanliketan so bilay.

Nanengneng tayo so balibalin alimbawa na kaabigan diad samay ginawa nen Jehova ed si Adan tan Eva. Ag-abayag kayari na impankasalanan da, “nandait iray bulobulong na igos tan nanggawa ray sakbong parad saray tapi ra.” Balet amta nen Jehova ya kaukolan day matukoy ya kawes diad pambilay da ed paway na Eden, ya no iner et say dalin et naayew na “sabisabit tan dikarika.” Kanian impatnag nen Jehova so kaabigan sanen inggawaan to ra na “andukey iran kawes a gawad katat.”—Gen. 3:7, 17, 18, 21.

Anggaman ipapatnag nen Jehova so kaabigan ed “saray mauges tan maong a totoo,” mas labalabay ton ipatnag itan ed saray matoor ya lingkor to. Singa bilang, diad panaon nen propeta Zacarias, naermenan so sakey ya anghel nen anengneng ton tinmunda la ray totoo ed pangipapaalagey day templo ed Jerusalem. Dinengel nen Jehova so pampapaga na saman ya anghel tan inebatan To panamegley na “maabig tan makaligliwa iran salita.” (Zac. 1:12, 13) Ontan met so ginawa nen Jehova ed si propetan Elias. Aminsan et agaylay ermen na sayan propeta kanian kinerew tod si Jehova ya paandien To lay bilay to. Natatalosan nen Jehova so liknaan nen Elias kanian angibaki na sakey ya anghel pian sikatoy pabiskegen To. Sakey ni, pinaseguroan na Dios so propeta ya agto bukbukor. Kayarin naawat nen Elias iratan ya makapabiskeg ya salita tan say kakkaukolan ton tulong, asarag toy mantultuloy ed asainmin to. (1 Ara. 19:1-18) Diad saray lingkor na Dios, siopa so sankaabigan ya angipatnag na makapadinayew a kualidad nen Jehova ya kaabigan?

Legan na ministeryo nen Jesus diad dalin, sikatoy akabkabat bilang maong tan makonsidera. Sikatoy agbalot nagmaliw ya maruksa odino mapaatagey. Oniay mapangasi ton imbaga: “Dago kayod siak, amin yon mansasagpot tan nabebelatan. . . . Ta say pakok et maabig.” (Mat. 11:28-30) Lapud kaabigan to, sikatoy tinumbok na totoo anggan iner so laen to. “Akasian” ira nen Jesus kanian pinakan to ra, pinaabig to ray mansasakit tan mabeblay, tan imbangat to ira na “dakel a bengatla” nipaakar ed Ama to.​—Mar. 6:34; Mat. 14:14; 15:32-38.

Lapud baleg ya kaabigan nen Jesus, impatnag toy pakatalos tan pakatebek diad pidedeneng tod arum. Diad tua, anggano aliwan kombeniente parad si Jesus, siansian “maliket” ton inawat iramay maseet ya nananap ed sikato. (Luc. 9:10, 11) Singa bilang, agnampasnokan nen Jesus imay biin natatakot ya aniwit ed saloy na kawes to lapud labay toy onabig ed pampaparala to, anggaman sikatoy agmalinis unong ed ganggan. (Lev. 15:25-28) Lapud panangasi to ed saman a bii ya 12 taon lan maniirap ed sakit to, oniay imbaga nen Jesus ed sikato: “Ana’ko, pinaabig ka na pananisiam. La ka, niwala komon ed sikay kareenan, tan onabig ka lad makapairap a sakit mo.” (Mar. 5:25-34) Talagan makapadinayew itan ya gawa na kaabigan!

Singa naimano tayod saray abitlan alimbawa, anengneng tayo ya say tuan kaabigan et nipanengneng ed gawa. Nanengneng ed samay parabolo nen Jesus nipaakar ed maong a Samaritano ya kaukolan tayon ipanengneng ed gawa so kaabigan. Anggano walay busolan ed baetan na saray Samaritano tan Judio, akasian nin siansia na Samaritano imay lakin sinabat na saray matakew, ya pinepekpek da, tan intilak dan patey-pateyan. Lapud kaabigan et apakiwas so Samaritano. Tinambal toy sugat na samay laki tan inyakar tod panagpundoan. Binayaran na Samaritano so akankayarian na panagpundoan pian asikasoen so pakaskasin laki tan imbaga ton bayaran toy arum nin nagastos to.​—Luc. 10:29-37.

Anggaman say kaabigan et mabetbet ya nipanengneng ed gawa, nipanengneng met itan diad maaro tan makapaseseg iran salita. Kanian anggano say “kapagaan ed puso na too so mamapabelat ed satan,” ibabaga na Biblia ya say “maabig a salita so mamaliket ed satan.” (Pro. 12:25) Napaseseg tayo so arum no pakiwasen itayo na kaabigan tan kamaongan ya inabang so makapabiskeg iran bengatla ed sikara. * Say maabig iran salita tayo so mangipanengneng ya iyaansakit tayo ra. Lapud apaseseg ira, mas sarag dan arapen iray subok ed bilay.​—Pro. 16:24.

Lapud pinalsa itayo “unong ed indengan [na Dios],” amin tayo et sarag tayon ipanengneng so kualidad ya kaabigan. (Gen. 1:27) Say sakey ya alimbawa ed satan et si Julio, sakey a Romanon opisyal na saray sundalo ya angiyawatan ed si apostol Pablo diad impanbiahe tod Roma. “Maomaong so impitoo nen Julio ed si Pablo tan inabuloyan ton onlad saray kakaaro to pian naasikaso ra” diad syudad na Sidon. (Gawa 27:3) Ag-abayag, impanengneng na saray manaayam ed Malta so “nikadkaduman pitotoo” ed si Pablo tan ed arum nen aderal so barkon niluganan da. Namparlang ni ingen na apoy iray taga isla pian walay pandangdangan da. (Gawa 28:1, 2) Balet anggaman nakomendaan irad ginawa ra, say pangipanengneng na tuan kaabigan et aliwan sagpaminsan labat ya gawaen.

Pian talagan napaliket tayoy Dios, kaukolan tayon gawaen ya permanentin kabiangan na personalidad tan panagbilay tayo so pangipanengneng na kaabigan. Atan so rason no akin ya ibabaga nen Jehova ed sikatayo ya “isulong” tayo so kaabigan. (Col. 3:12) Balet aminen tayo, aliwan naynay ya mainomay so  pangipanengneng ed sayan makadios ya kualidad. Akin? Nayarin nairapan tayon ipanengneng iya lapud mabaing tayo, anggapoy kompiyansa tayod sarili tayo, napapasegsegang itayo, odino ompan lapud wala ni tendensia tayon magmaliw ya makasarili. Balet sarag tayon nalabanan iratan no kerewen tayoy masanton espiritu tan no aligen tayoy paraan na pangipapatnag nen Jehova na kaabigan.—1 Cor. 2:12.

Kasin wala ni ray kaukolan tayon gawaen pian mas nipanengneng tayoy kaabigan ed arum? Tepetan tayoy sarili tayo: ‘Kasin walaan ak na empatya no ondedengel ak ed arum? Kasin maimano ak ed pankaukolan na arum? Kapigan so sampot ya impanengneng koy kaabigan ed sakey ya aliwan kapamilyak odino aliwan maapit ya kaarok?’ Makatulong iratan ya tepet pian amta tayo no antoy kaukolan tayon gawaen, singa bilang, mas kabaten tayo iray totoon nakakaulop tayo, lalo la ray agagi ed kongregasyon. Diad satan et naamtaan tayo ray situasyon tan pankaukolan da. Insan tayo ipanengneng so kaabigan ed sikara diad paraan ya labay tayon gawaen da met ed sikatayo. (Mat. 7:12) Bilang resulta, bendisyonan nen Jehova so pansasagpot tayon ipanengneng so kaabigan no kerewen tayoy tulong to.—Luc. 11:13.

Sanen insulat nen apostol Pablo iray pakabidbiran ed sikato bilang ministro na Dios, impila to so “kaabigan.” (2 Cor. 6:3-6) Maasingger iray totoo ed si Pablo lapud walay personal ya interes tod sikara, tan impanengneng to itan panamegley na maabig iran gawa tan salita. (Gawa 28:30, 31) Mipadpara, niyasingger tayo met iray totoo ed katuaan no maabig so ugali tayo. No ipanengneng tayoy kaabigan ed amin ya totoo, pati ed saray onsusumpa ed sikatayo, nayarin onlemek so puso ra tan naekal so pambusol dad sikatayo. (Roma 12:20) Ompan nasabi panaon et onkiwas ni ira ingen ed mensahe na Biblia.

No magmaliw lan Paraiso so dalin, seguradon naliketan ya maong iray dakdakel a napaoli lapud naeksperiensya da so tuan kaabigan ya nayarin diad satan da ni labat nalikna. Lapud pisalsalamat da, napakiwas met iran mangipanengneng na kaabigan ed arum. Kanian siopaman ya agto labay so mangipanengneng na kaabigan tan tulongan so arum et agnawalaan na pasen ed Panarian na Dios. Balet saramay inabobonan na Dios ya manbilay na andi-anggaan et tratoen day balang sakey diad maaro tan maabig ya paraan. (Sal. 37:9-11) Talagan maligen tan mareen lay mundo ed satan! Balet, antis ya nagawa itan ya balibalin panaon, panon ya natan ni labat et nagunggonaan tayo lad pangipanengneng na kaabigan?

“Say lakin mangipapatnag na kaabigan et nagugunggonaan,” so ibabaga na Biblia. (Pro. 11:17) Labalabay na totoo so maong ya too, tan napakiwas met iran manggawa na maabig ed sikato. Oniay imbaga nen Jesus: “Sikayoy sukaten unong ed sukat a panusukat yo.” (Luc. 6:38) Kanian say maong ya too et mainomay toy nawalaan na tuan kakaaro tan napansiansia ira.

Oniay impaseseg nen apostol Pablo ed saray agagi diad kongregasyon na Efeso: “Ipanengneng yoy kaabigan ed sakey tan sakey, magmaliw kayon maabagey, a mabulos kayon manpeperdonaan.” (Efe. 4:32) Nagunggonaan ya maong so kongregasyon no amin et mangipapatnag na kaabigan tan tutulongan day sakey tan sakey. Ag-iran balot mangibabalikas na makapasakit, makritiko, odino sarkastiko iran salita. Imbes ya mangikayat ira na makaderal ya tsismis, pansasagpotan day mansalita na makapabiskeg ed arum. (Pro. 12:18) Bilang resulta, ombibiskeg so kongregasyon.

On, say kaabigan et kualidad ya nipanengneng ed salita tan gawa. No walaan tayoy kaabigan, ipapatnag tayoy maaro tan maiter ya personalidad na Dios tayo, si Jehova. (Efe. 5:1) Diad satan et napabiskeg tayo ray agagi tan niyasingger tayoy arum diad dugan panagdayew. Komon ta nakabkabat itayo bilang totoon mangipapanengneng na kaabigan!