1. Akin et kombinsido tayo ya manbibilay tayo la ed “kaunoran iran agew”?

KASIN niyanak ka kayari na taon 1914? No on, manlapud inkiyanak mo et manbibilay ka la ed “kaunoran iran agew” na sayan sistema na mundo. (2 Tim. 3:1) Amin tayo et nababalitaan tayo iramay impasakbay nen Jesus ya nagawa ed sayan panaon. Kaiba ed saratan so guerra, eras, yegyeg, salot odino sakit, idarakel na kaugsan, tan say panamasegsegang ed saray totoo nen Jehova. (Mat. 24:3, 7-9, 12; Luc. 21:10-12) Ontan met, saray ugali na totoo natan et pakapatnagan ya nasusumpal imay impasakbay nen apostol Pablo. (Nengnengen so kahon ya “ Saray Ugali na Totoo Natan.”) Sikatayo ran Tasi nen Jehova et kombinsido ya manbibilay tayo la ed “kasampotan a parte na saray agew.”​—Miq. 4:1.

2. Anto ran tepet so kaukolan tayon ebatan?

² Andukey lan panaon so linmabas manlapu lad 1914, kanian nibaga tayo ya manbibilay tayo lad kaunoran ya parte na “kaunoran iran agew.” Lapud asingsingger la so anggaan, kaukolan tayon amtaen so ebat ed sarayan importantin tepet: Anto ray nagawa diad sampot na “kaunoran iran agew”? Tan antoy iilaloan nen Jehova ya gawaen tayo legan tayon aalagaren so pakagawa na saratan?

3. Base ed propesiya ya nabasad 1 Tesalonica 5:1-3, antoy ideklara na saray lider ed mundo?

³ Basaen so 1 Tesalonica 5:1-3. Binitla dia nen Pablo so nipaakar ed “agew nen Jehova.” Diad sayan teksto, say “agew nen  Jehova” et ontutukoy ed panaon ya onggapo ed pangataki ed “Makapanyarin Babilonia” o say amin ya palson relihyon ed interon mundo, tan manampot ed Armagedon. (Apo. 16:14, 16; 17:5) Antis na satan ya “agew,” ideklara na saray lider ed mundo so “Kareenan tan kaligenan!” (Diad arum ya patalos: “Kareenan tan andi paga.”) No maminsan, satan ya balikas et uusaren na saray lider ed mundo sano tutukoyen da so iyaaligwas na relasyon na saray bansa. * Balet, duma so tutukoyen na Biblia ya pangideklara ed “kareenan tan kaligenan.” Akin? Sano nagawa la itan, nayarin isipen na totoo ya talagan wala lay kareenan tan kaligenan ed mundo lapud sagpot na saray lider da. Balet diad tua, tumbokan itan na “biglan kadederal” lapud onggapo la so “baleg a kairapan.”​—Mat. 24:21.

4. (a) Anto ray agtayo amta nipaakar ed pangideklara ed “kareenan tan kaligenan”? (b) Anto ray amta tayo nipaakar ed satan?

⁴ Wala ray amta tayo nipaakar ed pangideklara ed “kareenan tan kaligenan.” Balet wala met iray agtayo amta. Agtayo amta no anto ray ebento ya manresulta ed satan ya deklarasyon tan no panon itan ya ideklara na saray lider ed mundo. Agtayo met amta no kasin say pangideklara ed satan et maminpiga odino ompan maminsan labat. Antokaman so nagawa, nia so amta tayo: Agsarag ya iter na saray lider ed mundo so kareenan, kanian agtayo napalikdo ed satan ya deklarasyon. Imbes, satan imay ibabaga na Biblia ya kaukolan tayon talaranan. Satan so tanda ya onggapo la so “agew nen Jehova”!

5. Panon ya makatulong so 1 Tesalonica 5:4-6 pian magmaliw tayon akaparaan parad “agew nen Jehova”?

⁵ Basaen so 1 Tesalonica 5:4-6. Imbaga nen Pablo no antoy gawaen tayo pian naseguro tayo ya akaparaan tayo parad “agew nen Jehova.” Nepeg ya ‘ag-itayo nanaugip a singa gagawaen na arum.’ Nepeg ya “mansiansia itayon aliing” tan lanang ya alerto. Singa bilang, manalwar tayo pian agtayo nikompromiso so neutralidad tayo, tan agtayon balot mibabali ed saray isyu ed politika. No mibabali tayo, ompan magmaliw tayo lan “kabiangay mundo.” (Juan 15:19) Amta tayo ya say Panarian na Dios labat so makapangiter na kareenan ed mundo.

6. Antoy labay tayon naamtaan na totoo, tan akin?

⁶ Labay tayo met ya tulongan so arum ya naamtaan so impasakbay na Biblia ya nagawa ed mundo. Tandaan tayo ya no ginmapo la so baleg a kairapan, anggapo lay pankanawnawa na saray totoo ya onggapon mandayew ed si Jehova. Kanian talagan apuraan la so panagpulong tayo! *

7. Antoy iilaloan nen Jehova ya gawaen tayo natan?

⁷ Antiktikey lay nakekeran panaon antis ya onggapo so “agew” nen Jehova, kanian iilaloan to ya mansiansia tayon okupado ed panagpulong a kimey. Kaukolan tayon seguroen ya  “dakel so gagawaen [tayo] ed kimey na Katawan.” (1 Cor. 15:58) Impasakbay nen Jesus no antoy gawaen tayo ed sayan panaon. Nen imbaga to so amin ya importantin nagawa ed kaunoran iran agew, oniay inyarum to: “Ontan met, kaukolan a nipulong nin unona so maong a balita diad amin a nasyon.” (Mar. 13:4, 8, 10; Mat. 24:14) Isipen pa: Kada no manpupulong ka, makakatulong ka ed pakakasumpal na satan ya propesiya!

8. Panon tayon amta ya tuloytuloy ya onaaligwas so panagpulong a kimey?

⁸ Panon tayon amta ya tuloytuloy ya onaaligwas so panagpulong a kimey? Kada taon, ondadakel so onkikiwas ed maong a balita na Panarian. Singa bilang, isipen pa so indakel na saray managpulong na Panarian diad interon mundo ed sarayan kaunoran ya agew. Nen 1914, walay 5,155 ya manangipalapag ed 43 a bansa. Natan, wala lay manga 8.5 milyon ya manangipalapag ed 240 a bansa! Balet agni asumpal so kimey tayo. Itultuloy tayon ipulong ya say Panarian na Dios so alenleneg a solusyon ed amin ya problema na totoo.​—Sal. 145:11-13.

9. Akin et nepeg tayon itultuloy ya ipulong so mensahe na Panarian?

⁹ Ontunda tayo labat ya manpulong no ibaga nen Jehova ya asumpal la itan. Kaunongan nin panaon so nakekeraan pian naamtaan na totoo so nipaakar ed si Jehova a Dios tan si Jesu-Kristo? (Juan 17:3) Agtayo amta. Basta say amta tayo, anggad agni ginmapo so baleg a kairapan, siopaman ya “walaan na dugan kipapasen na puso parad bilay ya andi-anggaan” et sarag to nin awaten so maong a balita tan manlingkor ed si Jehova. (Gawa 13:48) Panon tayon tulongan irayan totoo legan ya wala ni panaon?

10. Anto ray iiter nen Jehova ed sikatayo pian nibangat tayoy katuaan ed totoo?

¹⁰ Iiter ed sikatayo nen Jehova so amin a nakaukolan tayo pian nibangat tayoy katuaan ed totoo. Gagawaen to itan panamegley na organisasyon to. Singa bilang, sinimba itayon nipapasal diad aral ed midweek. Makatulong iyan aral pian naamtaan tayo no antoy ibaga tayo ed unonan pitongtong tan ed panagpawil. Tan nanaaralan tayo met no panon so mangikondukta na panangiyaral na Biblia. Intarya met na organisasyon nen Jehova iray walad Uusaren ed Panagbangat o Teaching Toolbox. Makatulong iratan pian . . .

• makapangigapo tayoy tongtongan,

• makapainteres so pangibaga tayo ed mensahe tayo,

•   nasagyat tayo iray totoo ya aruman so amta ra ed Biblia,

• nibangat tayo so katuaan no mangiyaaral tayo na Biblia, tan

• naimbitaan tayo iray interesado ya onlad Kingdom Hall tayo tan nengnengen so website tayo.

Siempre, makatulong labat iraya no talagan uusaren tayo ed ministeryo. * Singa bilang, no inikdan mo na tract o magasin so sakey ya interesado kayari na balibalin impantongtong yo, walay nabasa to nipaakar ed Biblia anggad agmo ni nakatongtong lamet. Nepeg tayon gawaen so anggaay nayarian tayo ya mansiansian okupado ed panagpulong a kimey kada bulan.

11. Akin et pinawala so Online Bible Study Lessons?

¹¹ Say sakey nin paraan ya tutulongan nen Jehova iray totoo ya naamtaan so katuaan et say Online Bible Study Lessons diad jw.org^®. (Nengnengen so BIBLE TEACHINGS > ONLINE LESSONS.) Akin et pinawala irayan leksion? Kada bulan, nilibon totoo ed interon mundo so manse-search ed Internet na saray leksion nipaakar ed Biblia. Makatulong ed sikara iray leksion ed website tayo pian naamtaan da iray arum a katuaan ed Salita na Dios. Ompan wala ray nakatongtong mo ya manaalangan ya awaten so panangiyaral na Biblia. Sarag mon ipanengneng ed sikara iyan seksion na website tayo odino iter mod sikara so link pian makaonla ra ed sarayan leksion. *

12. Anto ray naaralan na sakey a too ed Online Bible Study Lessons?

¹² Saraya so topic ed Online Bible Study Lessons: “The Bible and Its Author,” “The Bible’s Main Characters,” tan “The Bible’s Message of Hope.” Saray naaralan ed sarayan topic et:

• No panon ya makatulong so Biblia ed sakey a too

• No siopa si Jehova, Jesus, tan saray anghel

• No akin ya pinalsa na Dios iray totoo

• No akin ya walay kairapan tan kaugsan

Naaralan met ed saratan ya leksion so nipaakar ed gagala nen Jehova ya . . .

• ekalen so kairapan tan patey,

• bilayen lamet iray inatey, tan

• deralen iray gobierno na too tan isalat to so Panarian to.

13. Kasin saray online ya leksion et kasalat na programa na panangiyaral na Biblia? Ipaliwawa.

¹³ Saray online ya leksion et aliwan kasalat na programa ya panangiyaral na Biblia. Inter nen Jesus ed sikatayo so pribilehyo ya bangatan iray totoo pian magmaliw iran disipulo. Sarayan leksion et denesinyo pian nabasa na saray interesado, nagustoan da iray naamtaan da ditan, tan napakiwas iran manaral ni. Kanian ompan awaten da so panangiyaral na Biblia. Diad sampot na kada leksion, sarag na manbabasa so man-request ya walay onlad sikato ya mangiyaral na Biblia. Diad interon mundo, masulok ya 230 so manre-request na panangiyaral na Biblia kada agew panamegley na website tayo! Talagan importante ya walay personal ya mangiyaral ed sikara na Biblia!

14. Base ed Mateo 28:19, 20, antoy ingganggan nen Jesus ya nepeg tayon pansagpotan, tan akin?

¹⁴ Basaen so Mateo 28:19, 20. No mangiyaaral tayoy Biblia, nepeg tayon pansagpotan ya ‘ibangat iray totoo pian magmaliw iran disipulo’ nen Jesus tan ibangat tayo ran ‘unoren so amin ya ingganggan’ to. Kaukolan tayon tulongan iray totoo pian natalosan da ya importantin pilien da so manlingkor ed si Jehova tan suportaan so Panarian to. Pian nagawaan tayo itan, kaukolan tayon pakiwasen iray totoo ya iyaplika iray nanaaralan da, idedika so bilay da  ed si Jehova, tan manpabautismo. No agawaan da la iratan, insan labat ira makaliktar ed agew nen Jehova.​—1 Ped. 3:21.

15. Antoy agtayo nepeg ya pangusaran na panaon tayo, tan akin?

¹⁵ Singa abitla diad gapo, antiktikey lay nakekeran panaon antis ya onsabi so anggaan na sayan sistema na mundo. Kanian agtayo nayarin usaren so panaon tayo diad pangiyaral na Biblia ed saray totoo ya anggapoy intension dan magmaliw ya disipulo na Kristo. (1 Cor. 9:26) Apuraan so kimey tayo! Dakel ni totoo ya kaukolan a makarengel na mensahe na Panarian legan ya wala ni panaon.

16. Base ed Apocalipsis 18:2, 4, 5, 8, antoy nepeg ya gawaen na amin a Kristiano? (Nengnengen so paimanod leksab.)

¹⁶ Basaen so Apocalipsis 18:2, 4, 5, 8. Nabasa ed sarayan bersikulo no anto ni iilaloan nen Jehova ya gawaen na saray mandadayew ed sikato. Nepeg ya paliisan na amin a Kristiano so antokaman ya mikonektaan ed Makapanyarin Babilonia. Nayarin say sakey ya iyaaralan na Biblia et membro na palson relihyon antis ton naamtaan so katuaan. Nayarin sikatoy onaatendi tan mibibiang ed saray relihyoson aktibidad. Odino sikatoy mandodonasyon na kuarta ed satan ya organisasyon. Antis ya naaprobaan ya magmaliw ya agbautismadon manangipalapag so sakey ya iyaaralan na Biblia, nepeg ton pultoten so amin ya koneksion to ed palson relihyon. Kaukolan ya sikatoy sigpot lan inmekal ed relihyon to odino ed anggan anton palson relihyoson organisasyon ya datin akimembroan to o mangiter na sulat pian ipaamta ya sikatoy onekal la bilang membro. *

17. Anto ran klase na trabaho so nepeg ya paliisan na sakey ya Kristiano, tan akin?

¹⁷ Nepeg ya seguroen na sakey a tuan Kristiano ya say trabaho to et anggapoy pikonektaan to ed Makapanyarin Babilonia. (2 Cor. 6:14-17) Singa bilang, sikatoy agnepeg ya magmaliw ya empleyado na sakey ya simbaan. Ontan met, no say sakey ya Kristiano et empleyado na sakey ya kompanya, agto labayen so mantrabaho na mabayag ed sakey ya pasilidad ya uusaren ed palson panagdayew. Tan no walay sarili ton negosyo, agto mangawat na trabaho odino mankontrata na sakey ya kimey ed anggan dinan ya organisasyon ya kabiangan na Makapanyarin Babilonia. Akin et importante iya? Lapud agtayo labay so napilanor ed saray kimey tan kasalanan na saray relihyoson organisasyon ya marutak ed pakanengneng nen Jehova.​—Isa. 52:11. *

18. Panon ya inyaplika na sakey ya elder iray prinsipyo na Biblia nipaakar ed sekular ya trabaho?

 ¹⁸ Pigaran taon lay apalabas, sakey ya elder a say trabaho to et karpentero so inopresian na sakey a kontraktor ya mantrabaho ed sakey a simbaan diad baley ya panaayaman na elder. Amta na kontraktor ya naynay ya ibabaga na samay elder ya agto mangawat na trabaho ed anggan anton simbaan. Balet diad saman, talagan nanairapan imay kontraktor ya mananap na arum. Anggaman ontan, siansia nin inyaplika na samay elder iray prinsipyo na Biblia tan agto inawat iman ya trabaho. Diad tinmumbok ya simba, pinmaway ed sakey a dyaryo so litrato na sananey a karpentero ya mangipepeket na krus ed samay simbaan. No bilang ta inawat na samay elder imay trabaho, sikato so wadman ed litrato. Isipen pay epekto na satan ed reputasyon to ed saray agagi! Isipen met no antoy nalikna nen Jehova.

19-20. (a) Anto ray naaralan tayo la? (b) Anto ni ray kaukolan tayon aralen?

¹⁹ Base ed propesiya ed Biblia, say onsublay ya importantin ebento ya magano lan nagawa et say pangideklara na saray lider ed mundo na “kareenan tan kaligenan.” Maong labat ta impaamta la nen Jehova ed sikatayo ya agsarag na saray lider ed mundo ya iter so tua tan agmangangga ya kareenan. Antoy nepeg tayon gawaen antis ya nagawa itan ya ebento ya tumbokan na biglan kadederal? Iilaloan nen Jehova ya mansiansia tayon okupado ed pangipulong ed mensahe na Panarian tan tuloytuloy tayon manbangat pian mas dakel nin totoo so magmaliw a disipulo. Tan nepeg tayo met ya paliisan so antokaman ya mikonektaan ed palson relihyon. Kaiba ed satan so iyekal ed anggan dinan ya palson relihyoson organisasyon tan agpangawat ed trabaho ya walay koneksion to ed Makapanyarin Babilonia.

²⁰ Wala ni ray arum ya nagawa legan na kaunoran a parte na “kaunoran iran agew.” Tan wala ni ray arum ya iilaloan nen Jehova ya gawaen tayo. Anto iratan, tan panon tayon niparaan so sarili tayo ed amin ya asingger lan nagawa? Aralen tayo iratan diad onsublay ya artikulo.