1, 2. (a) Antoy impaamta nen Jehova ed sikatayo? (b) Anton panamaseguro so nabasa ed Isaias 46:10, 11 tan 55:11?

NABASA ed sankaunaan ya bersikulo na Biblia iyan simpli balet importantin katuaan: “Diad gapo et pinalsa na Dios so tawen tan say dalin.” (Gen. 1:1) Tua ya dagdaiset so amta tayo nipaakar ed saray amayamay ya pinalsa na Dios, singa say liwang, liwawa, tan gravity, tan melmelag labat ya porsiento na uniberso so anengneng tayo. (Ecl. 3:11) Balet impaamta nen Jehova ed sikatayo so gagala to parad dalin tan totoo. Labay ton say dalin et panayaman na totoo ya pinalsa unong ed indengan to. (Gen. 1:26) Sikaray magmaliw ya ananak nen Jehova tan sikatoy magmaliw ya Ama ra.

² Base ed Genesis kapitulo 3, walay kinmontrad gagala nen Jehova. (Gen. 3:1-7) Balet walay solusyon na satan ta anggapoy makaamper ed gagala na Dios. (Isa. 46:10, 11; 55:11) Kanian segurado tayon nasumpal ed dugan panaon so gagala nen Jehova!

3. (a) Anto ran importantin katuaan so akatulong pian natalosan tayoy mensahe na Biblia? (b) Akin ya rebyuen tayo natan iratan ya bangat? (c) Anto ran tepet so pantongtongan tayo?

³ Kabisado tayo ray katuaan ed Biblia nipaakar ed gagala na Dios parad dalin tan totoo tan say importantin betang nen  Jesu-Kristo diad pakasumpal na gagala na Dios. Importante iratan, tan saratan so sankaunaan ya naamtaan tayo nen ginmapo tayon nanaral na Biblia. Kanian labay tayon tulongan iray interesado ya natalosan da iratan ya importantin bangat. Diad tua, legan tayon aaralen iyan artikulo diad kongregasyon, pansasagpotan tayon imbitaan so dakel a totoo ya onatendid Memoryal na impatey nen Kristo. (Luc. 22:19, 20) Seguradon dakel so naaralan na saray onatendi nipaakar ed gagala na Dios. Kanian diad sarayan nakekeran agew antis na Memoryal, maabig no manisip tayo na saray espisipikon tepet ya sarag tayon usaren pian naalay interes na saray iyaaralan tayoy Biblia tan arum nin interesado. Pantongtongan tayoy taloran tepet: Antoy gagala na Dios parad dalin tan totoo? Akin et agtampol agawa so gagala na Dios? Tan akin ya say dondon bagat nen Jesus so angilukas na dalan pian nasumpal so gagala na Dios?

4. Panon ya iyaabawag na saray pinalsa nen Jehova so gloria To?

⁴ Si Jehova so makapadinayew ya Manamalsa ed amin ya bengatla. Amin ya ginawa to et sankaabigan. (Gen. 1:31; Jer. 10:12) Antoy naaralan tayod inkarakep tan inkauksoy na saray pinalsa to? No obserbaan tayo iratan, pandinayewan tayoy amin ya ginawa nen Jehova ta walay gagala na saratan ya amin, angkelag man o angkabaleg. Siopay agmandinayew ed inkakomplikado na selula na too, say inkadelikado na kapangiyanak ya ugaw, odino say balibalin iseselek na agew? Naaapresya tayo iratan ya pinalsa na Dios ta nisipor ed sikatayon nabidbir iray marakep a bengatla.—Basaen so Salmo 19:1; 104:24.

5. Panon ya sineguro nen Jehova ya mantutunosan so amin ya pinalsa to?

⁵ Nanengneng ed saray pinalsa ya maaron angiter si Jehova na saray totontonen o limitasyon. Sikatoy nanggawa na saray ganggan parad pisikal ya uniberso tan ganggan parad moral pian mantutunosan so amin ya bengatla. (Sal. 19:7-9) Kanian saray amin ya bengatla ed uniberso et walay pasen tan usar da pian nasumpal so gagala na Dios. Angiter si Jehova na saray totontonen no panon ya makapantutulongan iray pinalsa to. Singa bilang, lapud gravity, mansiasiansia so atmospera ed asingger na dalin, nakokontrol iray daluyon tan dayat, tan makakatulong itan pian mansiansiay uksoy tan bilay diad dalin. Amin ya pinalsa, pati saray totoo et uunoren da irayan totontonen. Papaneknekan na inkauksoy na saray pinalsa ya walay gagala na Dios parad dalin tan saray totoo. Diad panagpulong, sarag tayo kasin ipaimano so Nanlapuan na sayan makapakelkelaw ya inkauksoy?—Apo. 4:11.

6, 7. Antoy pigara ed saray regalo nen Jehova ed si Adan tan Eva?

⁶ Say gagala nen Jehova et manbilay ya anggapoy anggaan iray totoo diad dalin. (Gen. 1:28; Sal. 37:29) Inikdan toy Adan tan Eva na nanduruman mabmablin regalo pian na-enjoy day bilay. (Basaen so Santiago 1:17.) Inikdan ira nen Jehova na kawayangan a mandesisyon, pakasarag ya mankatunongan, tan abilidad ya mangaro tan mikaaro. Kinatongtong na Amalsa si Adan tan binilin to no panon ton ipanengneng so katutulok. Naaralan met nen Adan no panon ton asikasoen iray pankaukolan to pati saray ayayep tan say dalin. (Gen. 2:15-17, 19, 20) Pinalsa met nen Jehova si Adan tan Eva ya walaan na pakataway, pakalikna, pakanengneng,  pakadngel, tan pakaangob. Kanian seguradon na-enjoy day marakdakep tan mainawan bilay diad Paraiso. Dakdakel komoy nagawaan tan nadiskobre na sankaunaan ya sanasawa.

⁷ Anto ni ray kaibad gagala na Dios? Pinalsa nen Jehova si Adan tan Eva ya makapananak na perpekton totoo. Labay na Dios ya saray anak da et mananak met, anggad napano so interon dalin. Labay ton si Adan tan Eva pati saray amin ya atateng et aroen da ray ananak da ya singa ed impangaro nen Jehova ed sikara. Magmaliw ya permanentin ayaman da so dalin ya wadtan so amin ya kaukolan da.—Sal. 115:16.

8. Antoy gagala na samay ganggan ya nabasad Genesis 2:16, 17?

⁸ Agtampol asumpal so gagala na Dios. Akin ey? Inikdan nen Jehova si Adan tan Eva na simplin ganggan pian nasubok no kasin bidbiren dan walay limitasyon na kawayangan da. Inkuan to: “Manlapud amin a kiew ed hardin et nayarian moy mangan na bunga anggad napesel ka. Balet agka nepeg a mangay bunga na kiew na pikakabat ed maong tan mauges, ta diad agew a pangan mo ed satan et seguradon ompatey ka.” (Gen. 2:16, 17) Aliwan mairap parad si Adan tan Eva ya talosan itan ya ganggan, tan agmet ira nairapan ya mangunor ed satan. Diad tua, dakdakel so naakan ya walad hardin.

9, 10. (a) Antoy akusasyon nen Satanas ed si Jehova? (b) Antoy desisyon di Adan tan Eva? (Nengnengen so litratod gapo na artikulo.)

⁹ Angusar si Satanas a Diablo na uleg pian palikdoen si Eva ya ag-unoren si Aman Jehova. (Basaen so Genesis 3:1-5; Apo. 12:9) Pinapaway nen Satanas ya isisiblet na Dios ed totoo so pangan “manlapud amin a kiew ed hardin.” Singa to ibabagan: ‘Labay mon ibaga, agmo nagawaay labay mo?’ Insan to tinilaan si Eva: “Seguradon agkayo ompatey.” Kayari na satan et kinombinse toy Eva ya agto dapat dengelen so Dios. Inkuan to: “Amta na Dios a diad mismon agew a pangan yo ed satan et nalukasan iray mata yo.” Papapawayen nen Satanas ya isesebel nen Jehova so bunga na kiew ta no kanen da itan et nalukasay isip da. Aliwan satan labat, oniay palson impromisa to: “Magmaliw kayon singa Dios, ya amta yoy maong tan mauges.”

¹⁰ Kaukolan nen Adan tan Eva so mandesisyon. Kasin unoren day Jehova, odino say uleg? Pinili dan ag-unoren so Dios. Kanian kinmampi rad impanrebelde nen Satanas. Impulisay day Jehova bilang Ama ra tan agla ra nampasakop ed pananguley to kanian naandi so proteksion tod sikara.—Gen. 3:6-13.

11. Akin ya agkinonsenti nen Jehova so rebelyon?

¹¹ Lapud impanrebelde nen Adan tan Eva ed si Jehova, naandi inkaperpekto ra. Niarum ni, sikaray nisian ed si Jehova lapud ‘malinlinis iray mata to pian onnengneng ed mauges.’ Kanian, ‘agto abuloyan so kaugsan.’ (Hab. 1:13) No inabuloyan o kinonsenti to itan, napeligro so amin ya mabilay a pinalsa diad tawen tan dalin. Manuna ed amin, no pinaulyanan labat na Dios so impankasalanan ed Eden, nakuestion so inkanapanmatalkan to. Balet matoor si Jehova ed saray mismon estandarte to; agto iratan susumlangen. (Sal. 119:142) Kanian anggano walay kawayangan di Adan tan Eva ya mandesisyon, agda nepeg ya ibaliwala so ganggan na Dios. Lapud nanrebelde rad si Jehova, inatey ira tan pinmawil irad dabok ya angalaan ed sikara.—Gen. 3:19.

12. Antoy agawad saray ananak nen Adan?

 ¹² Nen inakan di Adan tan Eva so prutas, agla ra nayarin awaten nen Jehova bilang kabiangan na pamilya to. Sikaray pinapaway na Dios ed Eden, tan agla ra nayarin ompawil. (Gen. 3:23, 24) Patas si Jehova tan tinoor toy imbaga ton pansumpalan na desisyon da. (Basaen so Deuteronomio 32:4, 5.) Lapud agla perpekto so too, agto la nipatnag iray kualidad na Dios diad perpekton paraan. Aliwan si Adan labat so naandian na balibalin arapen, noagta impatawir to met ed ananak to so ag-inkaperpekto, kasalanan, tan patey. (Roma 5:12) Insiblet tod ananak to so ilalon manbilay ya anggapoy anggaan. Niarum ni, agla ra makapananak na perpekton too; anggan saray ananak da et agmet la makapananak na perpekton too. Manlapud samay impanukso nen Satanas a Diablo ed si Adan tan Eva, siansia nin papalikdoen to ray totoo anggad natan.—Juan 8:44.

13. Antoy labay nen Jehova parad totoo?

¹³ Balet, siansian inaro nen Jehova iray totoo. Anggano nanrebelde si Adan tan Eva, labay nen Jehova ya nawalaay maong ya relasyon ed sikato iray totoo. Agto labay a walay siopaman ya ompatey. (2 Ped. 3:9) Kanian kayari na rebelyon, nanggawa so Dios na paraan pian makapikaaro lamet ed sikato iray totoo balet ta diad paraan ya agto nikompromisoy matunong iran estandarte to. Panon itan ya ginawa nen Jehova?

14. (a) Base ed Juan 3:16, antoy intarya na Dios pian makapikaaro lamet ed sikato iray totoo? (b) Anton tepet so ipaimano tayod saray interesado?

¹⁴ Basaen so Juan 3:16. Dakel ed saray imbitaan tayod Memoryal so makaamta ed sayan teksto. Balet say tepet et, Panon ya nagmaliw a posible so pambilay ya anggapoy anggaan diad impangibagat nen Jesus ed bilay to? Legan na kampanya parad Memoryal, diad mismon Memoryal, tan no pawilen tayo iramay inmatendi, pankanawnawa tayo ran tulongan ya naamtaay katuaan tan natalosan so ebat ed satan ya importantin tepet. Nayarin nasabi so puso ra no mas natalosan day kaaralem na panangaro tan karunongan nen Jehova diad impangitarya toy dondon. Anto ray espisipikon ibangat tayo nipaakar ed dondon?

15. Antoy pidumaan nen Jesus ed si Adan?

¹⁵ Angitarya si Jehova na perpekton too ya manondon. Satan a perpekton too et kaukolan ya matoor ed si Jehova tan mabulos ton iter so bilay to parad makasalanan a totoo. (Roma 5:17-19) Manlapud tawen, inyalis nen Jehova ed dalin so bilay na sayan sankaunaan ya pinalsa to. (Juan 1:14) Kanian si Jesus et nagmaliw ya perpekton too, ya singa si Adan. Balet duma si Jesus ed si Adan ta nansiansian matoor ed saray estandarte nen Jehova parad perpekton too. Anggano diad sankagrabian iran subok, agnankasalanan si Jesus tan agto sinumlang iray ganggan na Dios.

16. Akin ya mabmablin regalo so dondon?

¹⁶ Bilang perpekton too, sarag nen Jesus ya iliktar so totoo ed kasalanan tan patey diad pangibagat tod bilay to. Sikato so eksakton angipanengneng ed amin ya iilaloan ed si Adan—perpekton too, talagan matoor tan matulok ed Dios. (1 Tim. 2:6) Si Jesus so nagmaliw ya dondon bagat ya angilukas na dalan ed bilay ya anggapoy anggaan parad “amayamay”—lalaki, bibii, tan ugugaw. (Mat. 20:28) On, say dondon so angilukas ed dalan pian nasumpal so gagala na Dios. (2 Cor. 1:19, 20) Say dondon so angiter na ilalon bilay ya anggapoy anggaan ed amin ya matoor a totoo.

17. Antoy nagmaliw a posible lapud dondon?

¹⁷ Baleg so insakripisyo nen Jehova pian nitarya so dondon. (1 Ped. 1:19) Pinabpabli to tayo kanian mabulos ton inyabuloy ya ompatey so Anak to parad sikatayo. (1 Juan 4:9, 10) Nibagan singa inako nen Jesus so responsabilidad nen Adan ya ama tayo. (1 Cor. 15:45) Bilang resulta, aliwa labat ya bilay tayo so impawil nen Jesus; inikdan to tayo met na pankanawnawan makapawil lanlamang bilang membroy pamilya na Dios. On, lapud bagat nen Jesus, sarag la nen Jehova ya awaten iray totoo pian magmaliw lamet a kabiangan na pamilya to, balet ta diad paraan ya agnikompromiso iray matunong ya estandarte to. Agta makapalikliket ya nonoten so panaon sano perpekto lay amin ya matoor a totoo? Diad satan et magmaliw lan perpekto so pankakasakey na amin ya membro na pamilyay Dios diad tawen tan dalin. Amin tayo et magmaliw lan ananak na Dios.—Roma 8:21.

18. Kapigan “magmaliw ya alenleneg a Manuley na amin” si Jehova?

¹⁸ Ag-apatunda na impanrebelde nen Satanas so panangaro nen Jehova ed totoo. Anggan saray imperpekton totoo et agto met naamper ya manmatoor ed si Jehova. Panamegley na intarya nen Jehova ya dondon, tulongan toy amin ya ananak to pian magmaliw iran sigpot a matunong. Isip mo pay bilay no amin ya “mamidbir ed Anak tan mangipatnag na pananisia” et nawalaan lay bilay ya andi-anggaan. (Juan 6:40) Lapud kaaralem na panangaro tan karunongan nen Jehova, pagmaliwen ton perpekto iray totoo base ed samay gagala to. Diad satan, si Jehova ya Ama tayo et “magmaliw ya alenleneg a Manuley na amin.”—1 Cor. 15:28.

19. (a) Bilang pisasalamat tayod dondon, antoy nepeg tayon gawaen? (Nengnengen so kahon ya “ Itultuloy Tayon Anapen Iray Makanepegan.”) (b) Anton aspekto na dondon so pantongtongan ed onsublay ya artikulo?

¹⁹ Lapud pisasalamat tayod dondon, napapakiwas itayon gawaen so anggaay nayarian tayon ipaamta ed arum ya nayarin minabang irad sayan mabmablin regalo. Kaukolan a natalosan na totoo ya say dondon et maaron iyoopresi nen Jehova ed amin ya totoo pian nawalaan iray ilalon bilay ya anggapoy anggaan. Balet aliwan satan labat so agawaan na dondon. Pantongtongan tayod onsublay ya artikulo no panon ya naebatan na bagat nen Jesus imay akusasyon nen Satanas diad hardin na Eden.