1. Diad organisasyon nen Jehova, anton balibalin ugali so nanengneng tayod saray lingkor to?

ABAYBAYAG lan akapropesiya ed Biblia ya saray lingkor nen Jehova et “mabulbulos dan iyapay so inkasikara” pian nasumpal day kimey ya ipapagawa to diad panangidaulo na Anak to. (Sal. 110:3) Nagagawa la iya natan. Kada taon, minilyon ya oras so uusaren na saray lingkor nen Jehova pian ipulong so maong a balita. Malikeliket dan gagawaen itan anggano anggapoy sueldo ra. Akaparaan met iran ontulong ed saray kaagian da, balanglan diad materyal, emosyonal, tan espiritual. Dakel met ya oras so uusaren na saray elder tan ministeryal a lingkor pian iparaan iray parte rad aral tan na-shepherding iray agagi. Akin et mabulbulos iyan gagawaen na saray lingkor na Dios? On ta inar-aro day Jehova tan say kapara dan too.—Mat. 22:37-39.

2. Base ed Roma 15:1-3, antoy ginawa nen Jesus ya balibalin aligen tayo?

² Lanang ya iyuuna nen Jesus so pankaabigan na arum nen say sarili to. Maabig no aligen tayoy alimbawa to. (Basaen so Roma 15:1-3.) Diad tua, sikatayo lanlamang so naliketan tan nagunggonaan no ontan so gawaen tayo. Oniay imbagan mismo nen Jesus: “Mas makapaliket so mangiter nen say mangawat.”—Gawa 20:35.

3. Antoy aralen tayo ed sayan artikulo?

³ Aralen tayo ed sayan artikulo iray ginawa nen Jesus pian napanlingkoran so arum, tan pantongtongan tayo no panon tayon naalig so alimbawa to. Aralen tayo met no anto ray gawaen tayo pian mas akaparaan tayon mansakripisyo parad arum.

4. Anto may sakey ya inkagawa ya inyuna nen Jesus so pankaabigan na arum nen say sarili to?

⁴Tinulongan nen Jesus so arum anggano naknaksawan. Isip mo pay reaksion nen Jesus nen anengneng toy dakel ya totoon manatalaran ed sikato diad gilig na palandey, ya posiblin asingger ed Capernaum. Antis to man, sanlabin nampikasi si Jesus kanian seguradon naknaksawan ni. Pero nen anengneng to ray totoo, akasian to ra ta dakel so mansasakit tan mairap-bilay. Pinaabig to ra, tan binangatan to ni ra ingen. Diad tua, dia agawa may kabkabat ya Sermon ed Palandey, ya sakey ed saray agnalinglingwanan ya paliwawa nen Jesus.—Luc. 6:12-20.

5. Panon ya naalig na saray ulo na pamilya so inkamasakripisyo nen Jesus?

⁵Panon ya naalig na saray ulo na pamilya si Jesus? Imadyin mo pa yan eksena: Sanagew ya nantrabaho so sakey ya tatay, kanian kasabi tod abung, naknaksawan la tan labay to lay manpainawa. Pero Family Worship da ed saman ya labi. Naisip to ya ayos labat seguro no i-cancel da ni. Balet nampikasi tan kinerew tod si Jehova ya ikdan To na biskeg pian nituloy day panaral da. Inebatan nen Jehova so pikakasi to kanian malikeliket iran nanaral ya pamilya. Lapud naobserbaan na ananak so impansakripisyo na ateng da, tinmatak ed isip da ya say sankaimportantian et say espiritualidad na pamilya ra.

6. Mangiter na alimbawa ya ag-insiblet nen Jesus so panaon to pian natulongan toy arum.

⁶Ag-insiblet nen Jesus so panaon to anggano kakkaukolan toy manbukbukor. Imadyin mo pay alikna nen Jesus nen abalitaan to ya impaputot nen Herodes Antipas so ulo na kaaro ton si Juan ya Managbautismo. Seguradon agaylay ermen nen Jesus ed impatey na kaaro to. Oniay ibabaga na Biblia: “Sanen nadngel iya nen Jesus, sikatoy inmalis a nambaloto tan linmad nisulinek a pasen pian makapanbukbukor.” (Mat. 14:10-13) Natural labat ya labay toy manbukbukor. Di ba no inateyan tayo, no maminsan, labay tayoy ondistansya nin magano ed totoo? Pero aga atuloy so plano nen Jesus ta wala la manayay dakdakel ya totoo ya manaalagar ed sikato diad pasen ya laen to. Antoy reaksion nen  Jesus nen anengneng to ra? “Akasian to ra” ta kakkaukolan day tulong tan ligliwa, kanian “imbangat to ira na dakel a bengatla.”—Mar. 6:31-34; Luc. 9:10, 11.

7-8. Diad anto ran paraan ya aaligen na saray maar-aron elder so alimbawa nen Jesus?

⁷Panon ya naalig na saray maar-aron elder si Jesus? Misalsalamat tayon maong ed saray masakripisyon elder. Dakdakel so kimey ya gagawaen da parad sikatayo tan maslak ed saratan et agtayo la nanenengneng. Singa bilang, no walay emergency, onreresponde ya tampol iray membro na Hospital Liaison Committee. Anggano pegley-labi, ombangon ira pian natulongan da iray agagi. Akaparaan iran mansakripisyo pati saray kapamilya da ta inar-aro da ray agagin mankaukolan.

⁸ Makulikuli met ya ontutulong iray elder ed panagpaalagey na saray Kingdom Hall tan arum nin pasilidad tayo. Tan ontutulong met ira no walay nagawan kalamidad. Tan diad tua, ompan agla nabilang so oras ya uusaren na saray elder pian ibangat tan pasesegen so interon kongregasyon. Komendaan tayo sirin irayan makukulin brother tan say pamilya ra. Komon ta bendisyonan nen Jehova so amin ya sakripisyo ra. Pero siempre, dapat balanse iray elder. Anggano dakdakel so responsabilidad da ed organisasyon, agda dapat papaulyanan so pamilya ra.

9. Base ed Filipos 2:4, 5, antoy dapat ya sankanonot tayon lanang?

⁹ Basaen so Filipos 2:4, 5. Anggano aliwa tayon elder, sarag tayon aligen so inkamasakripisyo nen Jesus. Ibabaga na Biblia ya “inawat  toy kipapasen na sakey ya aripen.” (Fil. 2:7) Antoy naaralan tayo ed satan? Say sakey ya aripen o lingkor et gawaen ton amin pian napaliket toy amo to. Lapud aripen itayo nen Jehova tan labay tayon panlingkoran iray agagi, gawaen tayo sirin so amin pian mas mausar tayo ed si Jehova tan mas makatulong tayo ed kongregasyon. Pantongtongan tayo ray pigaran suggestion pian nagawaan tayo itan.

10. Anto ray kailangan tayon itepet ed sarili tayo?

¹⁰Usisam so sarilim. Isip mo pa irayan tepet: ‘Kasin akaparaan ak ya ontulong ed arum? Singa bilang, antoy reaksion ko no iyasain da ak ya mangabet ed sakey ya maedad lan sister pian makapiaral, odino pasyaren kod abung so sakey ya maedad lan brother pian naamtaay situasyon to? Kasin alisto ak ya manboluntaryo ed panaglinis ed lugar na kombension odino diad panagmintina na Kingdom Hall?’ Nen indedika tayoy sarili tayo ed si Jehova, insipan tayo ya usaren tayoy amin ya walad sikatayo pian nagawaan tayoy panlabayan to. Labay nen Jehova ya mabulbulos tayon usaren so oras, biskeg, tan kuarta tayo pian natulongan tayoy arum. Malikeliket si Aman Jehova no ontan so gagawaen tayo. Kasin walay nanenengneng mo ya kailangan mon paaligwasen ed sarilim? No bilang ta wala, antoy gawaen mo?

11. Antoy nitulong na pikakasi pian magmaliw kan mas akaparaan ya mansakripisyo?

¹¹Impapuson manpikasi ed si Jehova. Panon to no anengneng mod sarilim ya agka ni masyadon masakripisyo? Antoy gawaen mo? Manpikasi ka tan kerew moy tulong nen Jehova. Ibagam ed si Jehova no anton talagay naliliknam tan kerew mod sikato ya ikdan to kay “panlabay tan pakayarin onkiwas.”—Fil. 2:13.

12. Akin et kakkaukolan iray bautismadon kabataan ya brother ed kongregasyon?

¹² No sakey kan bautismadon kabataan ya brother, kerew mod si Jehova ya pakiwasen to ka komon ya labayen moy ontulong ed kongregasyon. Diad arum ya bansa, mas dakel so elder nen say ministeryal a lingkor. Tan dakel ed sarayan ministeryal a lingkor et mantaon lay 40 odino onsulok ni. Ombabaleg so organisasyon tayo, kanian kakkaukolan iray ugaw nin brother ya ontulong ed saray elder pian naasikaso iray agagi. No gawaen moy anggaay nayarian mon ontulong ed kongregasyon, diman mo naliknay tuan liket. Akin ey? On ta antam ya napaliket moy Jehova tan saray agagi, tan seguradon ar-aroen ka na kongregasyon.

13-14. Anto ray gawaen tayo pian natulongan tayo ray agagi? (Nengnengen so litrato ed apis.)

¹³Magmaliw ya maobserba tan isipen no siopa ray mankaukolan na tulong. Oniay impaseseg nen apostol Pablo ed saray Hebreon Kristiano: “Agyo lilingwanan so panggawa na maabig tan say panginabang ed arum no antoy walad sikayo, ta naliliketan a maong so Dios ed saratan a bagat.” (Heb. 13:16) Dugaruga tan nipanpanaon itan ya bilin to ta kayari labat na pigaran taon, kaukolan ya ‘ombatik ed kapalandeyan’ irayan Kristiano. (Mat. 24:16) Tinaynan day abung tan negosyo ra, pati saray kakanayon dan aliwan Kristiano. Seguradon kakkaukolan day mantutulongan ed saman ya panaon. No antis na satan et iyaaplika da la imay bilin nen Pablo tan niyugali da lan inabang ed arum no antoy walad sikara, seguradon agla ra nairapan nen anguman so situasyon na bilay da.

¹⁴ No maminsan, anggano mankaukolan so sakey ya agi, agto ibaga ed arum ta nababaingan. Singa bilang, imadyin mo pay sakey ya  brother ya kakkapatey na asawa to. Anto ra kasi kaukolan to? Ompan naiirapan ed pititindaan, panagluto, tan arum nin kimey ed abung. Seguro, nababaingan ya onkerew na tulong ta ompan say pakalikna to et magmaliw ya pabelat ed arum. Pero seguradon misalsalamat no walay mankusa ya ontulong ed sikato. Agtayo la komon aalagaren ya mangibaga ni so sakey ya agi antis tayon tulongan. Tan agtayo iisipen ya ompan wala met lay ontutulong ed sikato. Mas maabig no iyan tayoy sarili tayo ed situasyon to pian makaisip tayoy nitulong tayo.

15. No labay tayon tulongan iray agagi, antoy dapat ya ipalikna tayo ed sikara?

¹⁵Mainomay ka komon ya asinggeran. Diad kongregasyon, wala ray agagin katatawag no walay mankaukolan na tulong. Mabulbulos da itan ya gagawaen kanian agtayo nalilikna ya pabelat tayo ed sikara. Amta tayo ya nailaloan tayo ra. Labay tayo ran aligen. Si Alan et sakey ya elder ya mantaon na 45. Labay to ya ipaliknad agagi ya sikatoy mainomay ya asinggeran. Kanian dinalepdep toy alimbawa nen Jesus. Oniay imbaga to: “Anggano busy si Jesus, agnababaingan ya onasingger ed sikato iray totoo—ugaw man o matatken—pian onkerew na tulong. Anlemew so liknaan dad sikato ta amta ran walay malasakit to ed sikara. Labay kon aligey Jesus. Labay kon nalikna na agagi ya inar-arok ira tan naasinggeran da ak anggan anton oras.”

16. Base ed Salmo 119:59, 60, antoy gawaen tayo pian maapit tayon naalig so alimbawa nen Jesus?

¹⁶ Agtayo komon nadidismaya ed sarili tayo no agtayo perpekton naalig si Jesus. (Sant. 3:2) Di ba, say sakey ya estudyante ya manaaral ya man-paint, agto perpekton naalig so inkarunong na teacher to? Pero anggano wala ray sablay to, basta desididon makaaral ed  teacher to, diad ilabas na panaon et magmaliw met lanlamang ya maong ya painter. Ontan tayo met iran Kristiano. Anggano wala ray lingo tayo, basta desidido tayon iyaplika iray nanaaralan tayo ed personal study tayo tan pansagpotan tayoy onaligwas, maapit tayon naalig so alimbawa nen Jesus.—Basaen so Salmo 119:59, 60.

17-18. Anto ray maabig ya resulta no aligen tayoy inkamasakripisyo nen Jesus?

¹⁷ No nanengneng na arum ya masakripisyo tayo, aligen day alimbawa tayo. Oniay imbaga nen Tim ya sakey ya elder. “Wala ray kabataan ya brother ed kongregasyon mi ya inmaligwas ed espiritual tan nagmaliw ya ministeryal a lingkor anggano uga-ugaw ni ra. Anengneng day pansasakripisyo na arum diad kongregasyon mi kanian inalig da ra. Baleg so nitutulong da ed kongregasyon tan ed sikami ran elder.”

¹⁸ Maslak ya totoo ed sayan mundo et sarili da labat so iisipen da. Pero duman maong iray lingkor nen Jehova. Nen naaralan tayoy inkamasakripisyo nen Jesus, apakiwas tayon aligey alimbawa to. Siempre agtayo perpekton naalig itan, pero sarag tayon “maapit [ya] tumboken iray bakat to.” (1 Ped. 2:21) No gawaen tayoy anggaay nayarian tayo ya aligen so inkamasakripisyo nen Jesus, nalikna tayoy tuan liket ta amta tayon walad sikatayoy pabor nen Jehova.