1-2. Antoy naaralan na sakey ya elder ed pangiter na simbawa?

PIGARAN taon lay apalabas, in-shepherding na duaran elder so sakey ya sister ta agla makakapiaral. Kasabi rad abung to, amay sakey ya elder et binasaan ton tampol imay sister na saray teksto tungkol ed kaimportantian na pipiaral. Say amta to may elder, apaseseg imay sister. Pero nen paalis la ra, oniay kuan to may sister: “Agyo natatalosan ya dua no antoy dadalanen ko.” Akin et onmay imbaga to? On ta sinimbawa da lan tampol, anta agda ni tinepetan no anton talagay situasyon o problema to. Kanian imbes ya napaseseg ed simbawa ra, asakitan laingen.

² Oniay nanonotan to may elder: “Nen onman so imbaga to may sister, inisip ko ya singa anggapoy respeto tod sikami. Pero a-realize ko lanlamang ya imbes ya binasaan kon tampol na dakdakel ya teksto, tinepetan ko ni komon, singa bilang, ‘Kumusta ka la ey?’ ‘Antoy nitulong mid sika?’” Akaaral iman ya elder ed saman ya agawa. Kanian natan et mas makonsidera tan mas maaro lan pastol ed kongregasyon.

3. Siopa ray nayarin mansimbawa ed loob na kongregasyon?

 ³ Saray elder so tinuro nen Jehova ya pastol ed kongregasyon, kanian responsabilidad dan bilinen iray agagi. Pero siempre, aliwan sikara labat so nayarin mansimbawa ed loob na kongregasyon. Singa bilang, sarag ya bilinen na sakey ya brother o sister so kaaro to, basta seguroen to ya base itan ed Biblia. (Sal. 141:5; Pro. 25:12) Saray mas matatken ya sister  et sarag dan bilinen iray mas ugaw ya sister—singa bilang, tungkol ed panangawes, inkakuli, tan arum ni ya abitlad Tito 2:3-5. Tan siempre, responsabilidad na saray atateng ya bilinen tan disiplinaen iray ananak da. Kanian anggano sayan artikulo et manunan parad saray elder, amin tayo et makaaral no panon so mangiter na epektibo tan makapaseseg ya simbawa ya “mamaliket ed puso.”—Pro. 27:9.

4. Anto ray pantongtongan tayo ed sayan artikulo?

⁴ Pantongtongan tayo ed sayan artikulo so apatiran tepet: (1) Antoy dugan motibo no mansimbawa ka? (2) Talaga kasin kaukolan moy mangiter na simbawa? (3) Siopa so dapat ya mansimbawa? (4) Antoy gawaen mo pian nasegurom ya epektibo so pansimbawam?

5. Akin et importante ya duga so motibo na sakey ya elder no mansisimbawa? (1 Corinto 13:4, 7)

⁵ Inar-aro na saray elder iray agagi ed kongregasyon. Kanian no walay agi ya aliwa lay aarapen to, simbawaen da ta inar-aro ra. (Gal. 6:1) Pero antis ya katongtongen na sakey ya elder imay agi, maabig no dalepdepen to ni may imbaga nen apostol Pablo tungkol ed panangaro. “Say aro et maanos tan maomaong. . . . Itetepel toy amin a bengatla, manisia ed amin a bengatla, maniilalo ed amin a bengatla, mansusungdo ed amin a bengatla.” (Basaen so 1 Corinto 13:4, 7.) No dalepdepen iya na sakey ya elder, nanengneng to no kasin duga so motibo to ed pangiter toy simbawa. Makatulong met itan pian agto pantamian imay agi no katongtongen to la. No nalikna na agi so malasakit na elder, seguradon mas mainomay ton awaten so simbawa.—Roma 12:10.

6. Akin et balibalin aligen so alimbawa nen apostol Pablo ed pangiter na simbawa?

⁶ Balibalin aligen na saray elder so alimbawa nen apostol Pablo. Nen naamtaan nen Pablo ya aliway gagawaen na arum ya agagi ed Tesalonica, sinimbawa to ra. Pero no nengnengen tayo may duaran sulat tod sikara, kinomendaan to ni ra lapud matoor ya pankikimey da, maaron pansasagpot da, tan pansusungdo ra. Imbaga to met ya proud ed sikara ta matoor ira anggano ondadalan ira ed panamasegsegang tan irap. (1 Tes. 1:3; 2 Tes. 1:4) Imbaga to ni ingen ya maong iran alimbawa ed arum ya kongregasyon. (1 Tes. 1:8, 9) Seguradon a-touch ira ed maar-aron komendasyon nen Pablo! On, aliklikna na saray agagi ed Tesalonica so panangaro to. Kanian nen abasa da iramay simbawa tod duaran sulat to, seguradon inyaplika ra.—1 Tes. 4:1, 3-5, 11; 2 Tes. 3:11, 12.

7. Akin ya no maminsan et wala ray ag-ondengel ed simbawa?

⁷ Antoy nagawa no agtayo apipigeren so paraan na pansimbawa tayo? Oniay imbaga na sakey ya eksperiensyadon elder: “Wala ray agagi ya agdinmengel ed simbawa tan nansinti ni ra ingen. Diad tua, duga met imay insimbawa ed sikara. Pero say agda agustoan et amay paraan na impansimbawa.” Antoy naaralan tayo ed saya? Mas mainomay ya awaten na agi so simbawa no nalikna to ya ginawam iman lapud imamalasakit mo tan inarom, aliwan lapud onsyosyodot kad sikato.

8. Anto ray itepet na elder ed sarili to antis ton simbawaen so sakey ya agi?

⁸ Agbasta-basta mangiiter na simbawa iray elder. Antis ya katongtongen na elder so sakey ya agi, maabig no itepet to ni iraya ed  sarili to: ‘Talaga kasin kaukolan kon bagaan? Kasin segurado ak ya walay aliwan ginawa to? Wala kasi gagawaen to ya kontra ed ibabaga na Biblia? Odino agko agustoan so imbaga to ta mandumaan kami labat na ugali o opinyon?’ Maabig no agbasta-basta mansisimbawa iray elder. (Pro. 29:20) No agsegurado so sakey ya elder no kasin samay agi et walay agto inunor ya prinsipyo na Biblia tan kaukolan ya ipetek, sarag toy mantepet ed kapara ton elder.—2 Tim. 3:16, 17.

9. Antoy naaralan tayo ed si Pablo ed paraan na impangiter toy simbawa tungkol ed panangawes tan panag-ayos? (1 Timoteo 2:9, 10)

⁹ Singa bilang, panon to no naimano na sakey ya elder ya singa walay aliwa ed panangawes o panag-ayos na sakey ya agi? Maabig no tepetan ni na elder so sarili to: ‘Kasin walay prinsipyo na Biblia ya agto uunoren kanian kaukolan kon bagaan?’ Sarag toy mantepet ed kapara ton elder odino ed maespiritual ya agi pian nasegurado to ya say iisipen to et aglabat akabase ed opinyon to. Maabig no rebyuen da imay bilin nen Pablo tungkol ed panangawes tan panag-ayos. (Basaen so 1 Timoteo 2:9, 10.) Saray binitla nen Pablo et prinsipyo. Imbaga to ya say panangawes na saray Kristiano et nepeg ya matukoy, masimpit, tan desente. Pero agla nambitla si Pablo na saray nayari tan agnayarin isulong. Amta to ya walay karapatan na kada Kristiano ya manpili no antoy labay ton isulong, basta aliwan kontra ed ibabaga na Biblia. Kanian antis ya mandesisyon so elder no kasin simbawaen to so sakey ya agi, isipen to nin maong no talaga kasin aliwan masimpit tan aliwan desente so panangawes o panag-ayos to iyan agi.

10. Antoy tandaan tayo pian respetoen tayoy opinyon o personal ya panlabayan na arum?

¹⁰ No maminsan, mandumaan so opinyon o personal ya panlabayan na duaran maespiritual ya Kristiano. Pero agto labay ya ibagan duga may sakey tan aliwa may sakey. Agtayo dapat didiktaan iray agagi no antoy duga tan aliwa ya base labat ed opinyon o panlabayan tayo.—Roma 14:10.

11-12. No kailangan ya nasimbawa so sakey ya agi, anto ni ray itepet na elder ed sarili to, tan akin?

¹¹ No talagan kaukolan ya nasimbawa so sakey ya agi, say onsublay ya tepet et, Siopa so dapat ya mansimbawa? No say mankaukolan na simbawa et sister ya wala lay asawa to odino agi ya menor-de-edad, katongtongen ni na elder so ulo na pamilya ta ompan labay to ya sikato la so mansimbawa. * Pero no ibaga na ulo na pamilya ya elder lay mansimbawa, mas maabig balet no kaiba nin siansia no katongtongen da la imay kapamilya to. Tan singa  abitla ed  parapo 3, wala met iray pagkakataon ya maabig no mas matatken ya sister so mansimbawa ed mas ugaw ya sister.

¹² Pero, wala ni ikonsidera na sakey ya elder. Nia ni kaukolan ton itepet ed sarili to: ‘Kasin mas ondengel imay agi no aliwan siak so mansimbawa ed sikato?’ Singa bilang, no walay agi ya abebbeba so pakanengneng tod sarili to, ompan mas maabig no say mansimbawa ed sikato et elder ya ontan met so dinalan to. Akin ey? On ta mas natatalosan toy nalilikna to may agi kanian mas makapangiter na epektibon simbawa. Anggaman ontan, responsabilidad na amin ya elder ya pasesegen tan simbawaen so siopaman ya agi base ed Biblia, anggano agda ni naeksperiensya so dadalanen to. Say importante et nasimbawa itan ya agi ta kailangan to.

13-14. Akin et importantin ondengel nin maong so sakey ya elder antis ya mansimbawa?

¹³Dengel ka nin maong. No ipaparaan na elder so ibaga tod agi ya simbawaen to, maabig no tepetan toy sarili to: ‘Anto ray amtak ya impormasyon ed sayan agi? Anto ray nagagawa ed bilay to? Wala kasi dadalanen to ya agko amta? Antoy kakkaukolan to natan?’

¹⁴ Makatulong imay prinsipyo ed Santiago 1:19 no mangiter tayoy simbawa. Oniay insulat nen Santiago: “Balang sakey et nepeg ya aliston ondengel, agbengatbengat a mansalita, matantan a manpasnok.” Ompan isipen na sakey ya elder ya amta to lan amin so detalye. Pero kasin segurado ya say amta to et tua? Ibabaga na Proverbio 18:13: “No say sakey et oneebat la antis to nin narengel so tua, satan et kakulangkulangan tan kababaingan.” Pian naamtaan mo no anton talagay tua, say tepetan mo et amay mismon agi ya simbawaen mo. Dengel mon maong so ibaga to tan agka ni mansasalita. Nanonotan yo may elder ya abitla ed gapo na sayan artikulo? A-realize to ya agto ni komon binuntonan na teksto imay sister tan tinepetan to ni komon na, “Kumusta ka la ey?” “Antoy nitulong mid sika?” No amtaen na saray elder no anton talagay situasyon na sakey ya agi, mas amta ra no panon dan napaseseg tan natulongan.

15. Panon ya niyaplika na saray elder imay prinsipyo ed Proverbio 27:23?

¹⁵Kabaten a maong so pulok. Agto labay ya ibaga ya no nambasa kay pigaran teksto o angibaga kay pigaran suggestion et napaseseg mo la so sakey ya agi. Singa abitla ed gapo, kaukolan ya nalikna na agagi ya imamalasakit tayo ra, natatalosan tayoy dadalanen da, tan labalabay tayo ran tulongan. (Basaen so Proverbio 27:23.) Importante sirin ya kaaroen na saray elder iray agagi ed kongregasyon.

16. Antoy maabig ya gawaen na saray elder pian mainomay ya awaten na agagi so simbawa ra?

¹⁶ Agkomon nalikna na saray agagi ya  kakatongtongen labat ira na saray elder no simbawaen da ra. Kanian maabig no lanang ya miistoryaan iray elder ed saray agagi tan amtaen da no anto ray dadalanen dan problema pian nalikna na agagi ya imamalasakit da ra. “No ontay gawaen mo, ituring da kan kaaro tan asingger so liknaan dad sika. Kanian agka nairapan no kaukolan mo ran simbawaen,” so imbaga na sakey ya eksperiensyadon elder. Sakey ni, no kaaro so turing na agagi ed saray elder, mas mainomay dan awaten so simbawa ra.

17. Diad anton situasyon ya kakkaukolan na elder so magmaliw ya makonsidera tan maanos?

¹⁷Magmaliw ya makonsidera tan maanos. Kaukolan mon ipanengneng itan lalo la no say agin katongtong mo et agto labay so ondengel ed simbawa ya nanlapud Biblia o agton tampol iyaplika so simbawa. No ontay nagawa, agkomon mainomay ya onsyodot so sakey ya elder. Oniay ibabaga na Biblia tungkol ed si Jesus: “Agto puteren so abalbal a tanubong, tan agto erepen so makuykuyep a pabilo.” (Mat. 12:20) Kanian diad personal ya pikakasi na elder, kerewen tod si Jehova ya tulongan To komon imay agi pian natalosan to no akin ya asimbawa, tan komon et iyaplika to itan. Ompan kaukolan toy panaon pian na-realize to ya parad pankaabigan to lanlamang so impansimbawa na elder ed sikato. No makonsidera tan maanos so impitongtong na elder, mas mainomay ya awaten na agi so simbawa. Siempre, kaukolan ton seguroen ya say simbawa to et akabase ed Biblia.

18. (a) Antoy nepeg tayon tandaan diad pangiiter tayoy simbawa? (b) Antoy pantotongtongan na atateng ya walad litrato ya kaiba na kahon?

¹⁸Makaaral kad lingom. Lapud agtayo perpekto, ompan agtayo niyaplika so amin ya suggestion ed sayan artikulo. (Sant. 3:2) No bilang ta nalingo tayo ed pansimbawa ed saray agagi, pakaaralan tayo itan. Anggano walay imbaga o agawaan tayon aliwa, seguradon palabasen itan na agagi no nalikna dan inar-aro tayo ra.—Nengnengen met so kahon ya “ Mensahe Parad Atateng.”

19. Panon tayon naseguro ya say simbawa tayo et makapaliket ed puso na agagi?

¹⁹ On, aliwan mainomay so mangiter na epektibo tan makapaseseg ya simbawa. Agtayo perpekto tan agmet perpekto iray sisimbawaen tayo. Aglilingwanan iray prinsipyon apantongtongan tayo ed sayan artikulo. Seguroen ya duga so motibom. Seguroen met ya talagan kaukolan na agi so nasimbawa. Isipen no kasin sika so dapat ya mansimbawa. Antis kan mansimbawa, tepetan mo ni may agi tan dengel kan maong pian natalosan mo no anton talagay problema to. Iyan moy sarilim ed situasyon to. Kaaroen iray agagi tan ipaliknam ya imamalasakit mo ra. Aya so tandaan tayo: No mangiter tayoy simbawa, agtayo labat seseguroen ya epektibo itan, noagta seguroen tayo met ya makapaseseg tan ‘makapaliket itan ed puso.’—Pro. 27:9.