1. Manlapu la nensaman, antoy mabulos ya gagawaen na saray lingkor nen Jehova lapud panangaro dad sikato?

 KASIN inar-arom si Jehova? Seguradon “on” so ebat mo. Ontan met so alikna na dakel ya lingkor to manlapu la nensaman. (Sal. 104:33, 34) Diad tua, akaparaan iran mansakripisyo pian makapandayew irad si Jehova. Ontan so ginawa na saray Nazareo ed Israel nensaman. Siopa iratay Nazareo tan antoy naaralan tayo ed sikara?

2. (a) Siopa iratay Nazareo? (Numeros 6:1, 2) (b) Akin et wala ray Israelita ya nandesisyon ya man-Nazareo?

² Say salitan “Nazareo” et nanlapud Hebreon salita ya say labay ton ibaga et “Sakey a Pinili,” “Sakey ya Indedika,” o “Sakey a Nibiig.” Dugaruga itan ya deskripsion ed saray maseseg ya Israelita nensaman ya pinili day mansakripisyo pian makapanlingkor irad si Jehova diad espisyal ya paraan. Base ed Mosaikon Ganggan, say sakey ya laki o bii et nayarin “manggawa na nikabiig a sipan a manbilay bilang sakey a Nazareo.” a (Basaen so Numeros 6:1, 2.) Say kabayag na inka-Nazareo to et depende ed karukey na panaon ya insipan to. Legan na inka-Nazareo to, wala ray kailangan ton unoren ya ganggan ya ag-uunoren na arum ya Israelita. No ontan sirin, akin et mandesisyon so sakey ya Israelita ya man-Nazareo? Seguradon say manunan rason et lapud inar-aro toy Jehova tan labay toy ombales ed dakdakel ya bendisyon ya naaawat to.​—Deu. 6:5; 16:17.

3. Antoy pamparehoan na saray lingkor na Dios natan ed saray Nazareo?

 ³ Anggapo lay uksoyan na inka-Nazareo natan ta sinalatan la na “ganggan na Kristo” so Mosaikon Ganggan. (Gal. 6:2; Roma 10:4) Pero singa saray Nazareo nensaman, saray lingkor nen Jehova natan et determinadon manlingkor ed sikato diad interon puso, kamarerwa, nonot, tan biskeg da. (Mar. 12:30) Di ba, ontan so insipan tayod si Jehova nen indedika tayoy sarili tayod sikato? Pian natoor tayo itan ya sipan, dapat akaparaan tayon mansakripisyo tan gawaen tayoy panlabayan to. Ontan ya ontan so ginawa na saray Nazareo. Aralen tayo so alimbawa ra tan pantongtongan tayo no panon tayo met ya natoor so sipan tayo ed si Jehova. b​—Mat. 16:24.

MAGMALIW YA MASAKRIPISYO

4. Base ed Numeros 6:3, 4, antoy agnayari ed saray Nazareo, tan akin et subok itan?

⁴ Basaen so Numeros 6:3, 4. Saray Nazareo et agnayarin oninum na alak tan arum nin de-alkohol ya iinumen. Agmet ira nayarin mangan na ubas tan pasas. Labalabay na saray Israelita so oninum na alak tan mangan na ubas, tan anggapo pay uges to ’tan. Diad tua, ibabaga na Biblia ya say alak et regalon nanlapud Dios ya “mamapaliket ed puso na too.” (Sal. 104:14, 15) Makapaliket ya tuay oninum na alak tan mangan na ubas, pero akaparaan iray Nazareo ya paliisan iratan pian natoor da so sipan da ed Dios. c

5. Anto ray insakripisyo nen Madián tan Marcela, tan akin et ginawa da itan?

⁵ Singa saray Nazareo, dakel ya agagi tayo natan so akaparaan ya mansakripisyo pian mas napanlingkoran da ni si Jehova. Ontan so ginawa na sanasawa ya si Madián tan Marcela. d Mainaway bilay da. Baleg so sueldo nen Madián katon manaayam ira ed balibalin apartment. Balet a-realize da ya sarag da nin aruman so nagagawaan da parad si Jehova. Kanian nandesisyon ira ya pasimplien so bilay da. Pian nagawaan da itan, iniwasan da kunoy manggastos lan manggastos. Kuan da: “Inmalis kami ed mas melag ya apartment, inlako mi luluganan mi, tan angaliw kami motor.” Agpa obligado si Madián tan Marcela ya gawaen iratan ya amin. Pero ginawa da itan ta labay dan iter so ‘the best’ da ed si Jehova. Malikeliket ira ed sayan desisyon da tan anggapoy pagbabawian da.

6. Akin et mansasakripisyo iray Kristiano natan? (Nengnengen met so litrato.)

 ⁶ Mabulos ya mansasakripisyo iray Kristiano natan pian mas dakel ya panaon so nausar da diad panlilingkor da ed si Jehova. (1 Cor. 9:3-6) Ag-itayo oobligaen nen Jehova ya gawaen itan. Tan diad tua, agpa met mauges iray isasakripisyo tayo. Singa bilang, wala ray agagi ya inlako day abung da, nan-resign ira ed labalabay dan trabaho, tan say arum ni ingen et nandesisyon ya agla ra man-alaga na ayep anggano hilig da itan. Dakel met ya agagi so nandesisyon ya agni mangasawa o miasawa. Tan wala ray sanasawa ya pinili day agla manpamilya. Say arum et akaarawi ed pamilya tan kakaaro da ta namboluntaryo ira ed lugar ya daiset so Tasi. Amin iraya et mabulos tayon gagawaen ta labay tayon iter ed si Jehova so ‘the best’ tayo. Tandaan mo ya baleg man o melag so insakripisyom parad si Jehova, mabmabli iratan ed sikato.​—Heb. 6:10.

AGMO IBABAING YA DUMA KA ED ARUM

7. Antoy sakey ya rason akin et nayarin mairap ed saray Nazareo ya tooren so sipan da? (Numeros 6:5) (Nengnengen met so litrato.)

⁷ Basaen so Numeros 6:5. Kaibad sipan na saray Nazareo ya agda katlian so buek da ta atan so sakey ya pakanengnengan ya manpapasakop ira ed si Jehova. No say sakey ya Israelita et abaybayag lan Nazareo, seguradon sankaimano na arum ta andukey lay buek to. Ag-itan problema no masuporta iray nakakaiba ton Israelita. Makapaermen balet ta wala ray Israelitan anggapoy respeto da ed saray Nazareo. Nen panaon nen propetan Amos, wala ray apostatan Israelita ya tutuksoen dan oninum na alak iray Nazareo. Imbes ya suportaan da ra ed inka-Nazareo da, susugsogan da ra ya agtooren imay sipan da ya ag-oninum na alak. (Amos 2:12) Diad ontan iran situasyon, kailangan ya manpakpel so sakey ya Nazareo pian natoor toy sipan to tan agto ibaing ya sikatoy duma ed arum.

8. Antoy naaralan mo ed si Benjamin?

⁸ Anggano mabaing tayo, sarag tayoy manpakpel diad tulong nen Jehova tan agtayo ibaing ya duma tayod arum. Makaaral tayo ed alimbawa nen Benjamin, sakey ya agi ed Norway ya samploy taon to ni labat. Nen kakkagapo na guerra ed Ukraine, walay programa ed eskuelaan da bilang suporta ed saray taga Ukraine. Diad sayan programa, mangansion iray estudyante ya say kawes da et kakolor na bandila na Ukraine. Aglabay nen Benjamin so mila kanian inmarawi ed samay lugar ya pangganapan. Pero sikatoy anengneng na maestra to kanian tinawag to. Kuan to: “Gala Benjamin, sika labat lay aalagaren mi!” Inmasingger si Benjamin tan oniay makpel ton imbaga  ed maestra to: “Madam, anggapoy papanigan ko ya bansa kanian agak mimila ed onia ran programa. Diad tua, dakdakel ya Tasi nen Jehova so nakukulong ta agda gabay so miguerra.” Nirespeto na maestra nen Benjamin so paninindigan to katon agto la pinilit. Pero nen anengneng na saray kaklase to ya aga mila, tinepetan da met. Mannerbiyos si Benjamin tan makakaakis la, pero makpel ton inulit ed saray kaklase to imay imbaga to ed maestra to. Kasabi tod abung, inistorya nen Benjamin ed atateng to so agawa. Aliklikna to kuno ya tinulongan nen Jehova pian makpel ton na-explain so papanisiaan to.

9. Panon tayon napaliket so puso nen Jehova?

⁹ Lapud uunoren tayoy Jehova, sankaimano na arum ya duma tayo. Diad trabaho odino eskuelaan, no maminsan et aliwa pan mainomay ya ibagan sakey tayon Tasi nen Jehova. Kailangan tayoy manpakpel pian naibaga tayod arum ya Tasi tayo. Sakey ni, pauges lan pauges so ugali tan kagagawa na saray totoo ed sayan mundo. Kanian ompan subok ed sikatayo ya ipulong so maong a balita tan nairapan tayon unoren iray prinsipyo na Biblia. (2 Tim. 1:8; 3:13) Pero agtayo komon lilingwanan ya ‘napapaliket tayo so puso’ nen Aman Jehova no agtayo ibaing ya duma tayo ed saray agmanlilingkor ed sikato.​—Pro. 27:11; Mal. 3:18.

IYUNAM SI JEHOVA ED BILAY MO

10. Akin et subok ed saray Nazareo ya unoren imay ganggan ed Numeros 6:​6, 7?

¹⁰ Basaen so Numeros 6:6, 7. Ingganggan nen Jehova iray Nazareo ya ag-ira nayarin onasingger ed inatey ya too. Ompan naisip mo, ‘Singa mainomay met labat itan ya unoren.’ Pero subok itan ed sakey ya Nazareo, lalo la no say ompatey et kapamilya to. Wala ray kustombre ed Israel nensaman ya agmon talaga naiwasan ya asinggeran o bembenan so bangkay na inatey ya kapamilyam o kaarom. (Juan 19:39, 40; Gawa 9:36-40) Siempre, no say sakey ya Nazareo et matoor, agto itan gawaen. Anggano agaylay ermen to, tooren to so insipan to ed si Jehova. Seguradon pinabiskeg nen Jehova iray matoor ya Nazareo pian nasarag da iray ontan ya mairap ya situasyon.

11. No manggawa na desisyon so sakey ya Kristiano ya naapektoan so pamilya to, anto dapat so manunan sankanonot to? (Nengnengen met so litrato.)

¹¹ Bilang Tasi, seseryosoen tayo imay sipan tayo ed si Jehova nen indedika tayoy sarili tayo ed sikato. Atan so manunan sankanonot tayo no manggagawa tayoy desisyon ya  naapektoan so pamilya tayo. Tua, inar-aro tayo ray kapamilya tayo tan agtayo papaulyanan so responsabilidad tayod sikara. Pero duga kasi ya iyuna tayo so panlabayan da nen say panlabayan nen Jehova? Andi. (Mat. 10:35-37; 1 Tim. 5:8) No maminsan balet, ompan wala ray kapamilya tayo ya agnaliketan no iyuuna tayoy Aman Jehova ed bilay tayo.

12. Antoy ginawa nen Alexandru nen kontra so asawa to ed panaaral to na Biblia, tan antoy agto ginawa?

¹² Imanoen so eksperiensya nen Alexandru tan say asawa ton si Dorina. Bansag iran nampa-Bible study. Pero kayari sakey taon, tinmunda si Dorina tan labay to ya ontunda met lay Alexandru. Pero marespeton imbaga nen Alexandru ya ituloy toy panaaral to. Mansyodot ya maong si Dorina tan nambabangil so ginawa to pian ontunda lay Alexandru. Tatalosan la kuno nen Alexandru no akin ya ontan so reaksion na asawa to, pero aliwa kunon mainomay. No maminsan, ansakit kunoy panagsalita nen Dorina tan aliwliway kakaebat to, kanian sinmabid punto ya labay la nen Alexandru so ontunda. Pero maong labat ta tuloytuloy ton inyuna si Jehova tan agto met sinukoan si misis to. Pinanengnengan to nin siansia na aralem ya panangaro tan respeto. Lapud maong ya alimbawa nen Alexandru, nanaral lamet na Biblia si Dorina ya anggad abautismoan.—Bantayan ed jw.org so video ya Alexandru tan Dorina Văcar: “Say Aro et Maanos tan Maomaong” diad seryen “Uumanen na Katuaan so Bilay.”

13. Panon tayon nipanengneng ya inar-aro tayo si Jehova tan say pamilya tayo?

¹³ Si Jehova so nanlapuan na uksoyan na pamilya tan labay ton maliket so pamilya tayo. (Efe. 3:14, 15) Kanian no labay mo ya nalikna na pamilyam so tuan liket, gawam so panlabayan nen Jehova. Labay to ya panengnengan moy panangaro tan respeto iray kapamilyam. Legan mon susumpalen so obligasyon mod sikara, tandaan mo ya papablien nen Jehova so amin ya pansasakripisyom pian niyunam so panagdayew mod sikato.​—Roma 12:10.

PASESEGEN SO ARUM YA ALIGEN DA IRAY NAZAREO

14. Siopa ray mankaukolan na panamaseseg tayo?

¹⁴ Nen nandesisyon tayo ya manlingkor ed si Jehova, amta tayo ya walan-walay isakripisyo tayo. Pero mabulbulos tayon gagawaen itan ta inar-aro tayoy Dios. No maminsan balet, aliwa itan ya mainomay. Antoy makatulong pian ag-itayo onsawan mansakripisyo parad si Jehova? Kailangan tayon pasesegen so sakey tan sakey. (Job 16:5) Kasin wala ray kakongregasyon mo ya pinasimpli day bilay da pian mas dakel ni nagawaan da parad si Jehova? Kasin  wala ray kabat mon ugugaw tan kabataan ya nasusubok ed eskuelaan pero agda ibabaing ya duma ira? Kasin walay Bible study o agi ya manmamatoor anggano kontra so pamilya to ed pandadayew tod si Jehova? Papablien tayo irayan kapara tayon lingkor na Dios. Komon ta sambot moy kada pagkakataon pian napaseseg mo ira. Ibagam ed sikara ya napapabiskeg ka ed pampapakpel da tan ed pansasakripisyo da parad si Jehova.​—Filem. 4, 5, 7.

15. Antoy gagawaen na arum pian nasuportaan iray manlilingkor ya full-time?

¹⁵ No maminsan, ompan sarag tayoy mangiter na praktikal ya tulong ed saray agagi tayo ya manlilingkor ya full-time. (Pro. 19:17; Heb. 13:16) Ontan so ginawa na matottoor ya akulaw lan sister diad Sri Lanka. Walay kakongregasyon to ya duaran kabataan ya sister ya payunir. Mairap so bilay na sarayan sister kanian labay to ran tulongan pian ag-ira makatunda ed pampapayunir da. Nen naaruman so pension to, nandesisyon ya walay iderew tod sikara ya binulan pian anggan panon et onarum ed budget da. Maar-aro tan matuttulong iyan sister!

16. Antoy naaralan tayo ed uksoyan na inka-Nazareo?

¹⁶ Dakdakel so naaralan tayo ed maabig ya alimbawa na saray Nazareo. Pero wala met so naaralan tayo ed sayan uksoyan tungkol ed si Aman Jehova. Baleg so tiwala to ya labalabay tayon paliketen so puso to tan akaparaan tayon mansakripisyo pian natoor tayoy dedikasyon tayo. Inikdan to tayo na kalayaan ya manpili no panon tayon ipanengneng so kaaralem na panangaro tayod sikato. (Pro. 23:15, 16; Mar. 10:28-30; 1 Juan 4:19) Say uksoyan na inka-Nazareo et sakey ya patunay ya iimanoen tan papablien nen Jehova iray sakripisyo tayo parad sikato. Itultuloy tayo sirin so makulin panlilingkor tayo ed si Jehova tan iter tayo so ‘the best’ tayo ed sikato.