1. Akin et maliket iray totoon mandadayew ed si Jehova? (Nengnengen so litratod gapo na artikulo.)

TALAGAN maliket ya totoo iray Tasi nen Jehova. Nanengneng ed saray aral, asamblea, tan arum nin pantitipon da ya maliket so ulopan da. Akin et malikeliket ira? Say manunan rason et lapud kabat da, panlilingkoran da, tan pansasagpotan da ya aligen si Jehova, say “maliket a Dios.” (1 Tim. 1:11; Sal. 16:11) Lapud say Dios so Lapuan na liket, labay ton maliket itayo, tan iikdan to tayo na dakel a rason pian manliket.​—Deu. 12:7; Ecl. 3:12, 13.

2, 3. (a) Anto so liket? (b) Akin et mairap so magmaliw ya maliket?

² Sika balet ey? Kasin maliket ka? Wala ni kasi nagawaan mo pian magmaliw kan mas maliket? Say liket et nayarin nadeskribe bilang “maabig a kipapasen na liknaan ya nayarin manbayag, ya resulta na inkakontento tan maliket a panagbilay, tan say panlabay ya mantultuloy itan.” Ipapanengneng na Biblia ya say tuan liket et ontutukoy ed liknaan na sakey a toon bebendisyonan nen Jehova. Balet natan, mairap so magmaliw ya maliket. Akin?

³ Nanaandi so liket tayo lapud saray makapa-stress ya nagagawa ​—no say sakey ya inad-aro et ompatey o nadispelo, odino lapud diborsyo o pakaandian na trabaho. No anggapoy pantatalosan ed loob na pamilya tan anggapoy maabig ya komunikasyon, nayarin naandi met so liket tayo. Say panagbalaw na katrabaho o kaklase, panamasegsegang, odino pakapriso et mangekal met na liket, pati say ikapuy na laman, graben sakit, odino depresyon. Anggaman ontan, si Jesu-Kristo, say “maliket tan alenleneg a Manuley,” et labalabay ton ligliwaen tan paliketen iray totoo. (1 Tim. 6:15; Mat. 11:28-30) Diad Sermon to ed Palandey, binitla nen Jesus iray pigaran kualidad ya makatulong pian magmaliw tayon maliket, anggano wala ray aarapen tayon mairap iran subok ed mundo nen Satanas.

4, 5. Panon itayon magmaliw a maliket tan napansiansia itan?

⁴ Say unonan nampokusan nen Jesus et importantin maong: “Maliket iray manonot ed espiritual a pankaukolan da, ta kayarian da so Panarian na tawen.” (Mat. 5:3) Panon tayon nipanengneng ya mapaga tayod satan ya pankaukolan? Nagawaan tayo itan no mamangan itayo na espiritual iran naakan, no pablien tayo ray bangat na Biblia, tan no iyuna tayod bilay tayo so pandayew ed maliket a Dios. No ontan so gawaen tayo, mantultuloy tayon maliket. Napabiskeg tayoy pananisia tayo ed saray sipan na Dios ya asingsingger lan nagawa. Tan napaseseg itayo ed “maliket ya ilalo” ya isisipan na Salita na Dios parad saray tuan mandadayew ed sikato.​—Tito 2:13.

⁵ Importantin walay maapit ya relasyon tayod si Jehova pian mansiansia so liket tayo. Pinuyanan si apostol Pablo ya isulat: “Manliket kayon naynay ed Katawan [a Jehova]. Uliten ko, Manliket kayo!” (Fil. 4:4) Pian naliketan tayo ed satan ya mabmablin relasyon, kaukolan ya niwalad sikatayo so karunongan na Dios. Oniay ibabaga na Salita na Dios: “Maliket so toon makakaromog na karunongan tan say toon makakagamor na pakatebek. Sikatoy kiew na bilay diad saramay ombebemben ed sikato, tan ipasen a maliket iramay akabemben a maong ed sikato.”​—Pro. 3:13, 18.

6. Antoy kaukolan tayon gawaen pian mansiansia so liket tayo?

⁶ Balet, pian mansiansia so liket tayo, agtayo labat basta babasaen so Salita na Dios, noagta importantin iyaplika tayo so nababasa tayo. Indanet nen Jesus so kaimportantian na pangiyaplika ed saray nanaaralan tayo nen imbaga to: “Lapud amta yo la iraya, maliket kayo no gawaen yo.” (Juan 13:17; basaen so Santiago 1:25.) Importante itan pian napenek so espiritual ya pankaukolan tayo tan pian mansiansia so liket tayo. Balet panon tayon magmaliw ya maliket no dakel so nayarin mangekal na liket tayo? Aralen tayo so sinmublay ya imbaga nen Jesus diad Sermon to ed Palandey.

7. Panon ya posiblin magmaliw ya maliket iramay maneermen?

⁷ “Maliket iray maneermen, ta naligliwa ira.” (Mat. 5:4) Nayarin nonoten na arum, ‘Panon ya magmaliw a maliket iramay maneermen?’ Say tutukoyen nen Jesus et aliwan amin ya maneermen ed anggan anto labat ya rason. Anggan saray mauges ya totoo et naeermenan met ed saray aliwliwan nagagawa diad sayan “mapeligro tan mair-irap a panaon.” (2 Tim. 3:1) Balet satan ya makasarilin paneermen da et agmangiyasingger ed sikara diad si Jehova; kanian ag-itan mangiter na liket ed sikara. Seguradon say tutukoyen nen Jesus  et saray totoon manonot ed espiritual ya pankaukolan da, ya naeermenan lapud pangibabaliwala na totoo ed Dios. Nayarin bidbiren da so makasalanan ya kipapasen da tan say makapaermen iran nansumpalan na ag-inkaperpekto na too. Iimanoen nen Jehova so paneermen na ontan iran totoo; liligliwaen tan bebendisyonan to ra panamegley na Salita to, tan iikdan to ray maliket ya bilay.​—Basaen so Ezequiel 5:11; 9:4.

8. Ipaliwawa no panon ya maliket itayo no mauyamo tayo.

⁸ “Maliket iray mauyamo, ta tawiren day dalin.” (Mat. 5:5) Panon ya maliket itayo no mauyamo tayo? Nen naamtaan na arum so suston kakabatan nipaakar ed katuaan, anguman ira. Ompan dati et masebeg, makolkol, tan misasanok ira. Balet natan et insulong da lay “balon personalidad” tan ipapatnag da lay “maaron panangabagey, kaabigan, inkamapaabeba, inkaulimek, tan anos.” (Col. 3:9-12) Bilang resulta, nalilikna da lay deen, aro, tan liket ed bilay da. Ontan met, isisipan na Salita na Dios ya “tawiren day dalin.”​—Sal. 37:8-10, 29.

9. (a) Panon ya saray ‘mauyamo et tawiren day dalin’? (b) Akin ya nibagan maliket “iray naeerasan tan napepegaan parad inkatunong”?

⁹ Panon ya saray mauyamo et “tawiren day dalin”? Saray disipulo nen Jesus ya nilanaan na espiritu et tawiren da so dalin no kaiba la ran manuley ed satan bilang arari tan saserdote. (Apo. 20:6) Saray minilyon balet ya aliwan diad tawen so ilalo da et nibagan tawiren da met so dalin lapud naabuloyan iran manayam dia ed andi-anggaan, ya walaan ira na perpekto, mareen, tan maliket a bilay. Saray alanaan tan say arum ya karnero et maliket lapud sikaray “naeerasan tan napepegaan parad inkatunong.” (Mat. 5:6) Say espiritual ya pakakaerasan tan pakakapgaan da parad inkatunong et napenek diad balon mundo. (2 Ped. 3:13) No paandien la na Dios so amin ya kaugsan, say liket na saray matunong et aglan balot ekalen na ag-inkahustisya tan ag-inkatunong.​—Sal. 37:17.

10. Antoy labay ya ibaga na pagmaliw a mapangasi?

¹⁰ “Maliket iray mapangasi, ta nakasian ira.” (Mat. 5:7) Say Hebreon verb ya ontutukoy ed panangasi et mankabaliksay “onligsa, makainawa lapud balibalin liknaan; . . . magmaliw a mapangasi.” Ontan met, say Griegon verb parad satan ya salita et mankabaliksan met na pililikna ed arum. Balet say panangasi et aliwa labat lan basta liknaan. Diad Biblia, kaibad satan so aktibon pangipanengneng na pililikna panamegley na sakey ya gawa na panangasi.

11. Antoy naaralan tayo ed ilustrasyon ed maong a Samaritano nipaakar ed inkamapangasi?

¹¹ Basaen so Lucas 10:30-37. Malinew ya nanengneng ed ilustrasyon nen Jesus nipaakar ed maong a Samaritano no antoy labay ya ibaga na pagmaliw a mapangasi. Lapud impapuson pililikna tan panangasi, apakiwas so Samaritano ya manggawa na maabig pian tulongan so pakaskasin biktima. Kayari ton insalaysay iya, oniay imbaga nen Jesus: “La ka tan ontan met so gawam.” Kanian tepetan tayoy sarili tayo: ‘Kasin ontan met so gagawaen ko? Kasin aaligen koy ginawa na mapangasin Samaritano? Wala ni kasi nagawaan ko pian mas nipanengneng koy panangasi tan makapanggawa na maabig ed saramay maniirap? Singa bilang, wala kasi praktikal a nitulong kod saray maedad lan Kristiano, balo, tan ed saramay ugugaw ya ulila ed espiritual? Kasin siak lay unonan onaasingger pian ‘ligliwaen iramay maer-ermen’?’​—1 Tes. 5:14; Sant. 1:27.

12. Panon itayon magmaliw a maliket no mapangasi tayo?

¹² Balet panon ya magmaliw itayon maliket no mapangasi tayo? No ipanengneng tayoy panangasi ed arum, naliliketan tayo  lapud mangiiter tayo. Sakey ni, amta tayon napapaliket tayoy Jehova. (Gawa 20:35; basaen so Hebreo 13:16.) Oniay imbaga nen Arin David nipaakar ed samay mangipapanengneng na konsiderasyon: “Sikatoy bantayan nen Jehova tan pansiansiaen ton mabilay. Sikatoy nibagan maliket diad dalin.” (Sal. 41:1, 2) No ipapanengneng tayoy panangasi ed arum, sakey itayo met ed saramay makaawat na panangasi nen Jehova, tan manresulta itan ed andi-anggaan a liket.​—Sant. 2:13.

13, 14. Akin ya maliket iramay “malinis so puso ra”?

¹³ “Maliket iray malinis so puso ra,” so imbaga nen Jesus, “ta nanengneng da so Dios.” (Mat. 5:8) Pian mansiansian malinis so puso tayo, nepeg ya malinis so panagnonot, liknaan, tan pilalek tayo. Importante iya pian awaten nen Jehova so panagdayew tayo.​—Basaen so 2 Corinto 4:2; 1 Tim. 1:5.

¹⁴ Maliket iramay malinis so puso ra lapud walaan ira na malinis tan maapit ya relasyon ed si Jehova, ya angibagan: “Maliket iramay nilinisan da ray kawes da.” (Apo. 22:14) Antoy labay ya ibaga na “nilinisan da ray kawes da”? Saramay alanaan a Kristiano ya “nilinisan da ray kawes da” et malinis ed pakanengneng nen Jehova tan naikdan ira na imortal ya bilay, tan panliketan da so agmanganggan liket diad tawen. Balet say baleg ya ulop a walaan na ilalon manbilay diad dalin et panliketan da so matunong a kipapasen bilang kakaaro na Dios. Natan ni labat et ‘lilinisan da la ray kawes da tan papuputien da iratan ed dala na Kordero.’​—Apo. 7:9, 13, 14.

15, 16. Panon ya say sakey a walaay malinis a puso et “nanengneng to so Dios”?

¹⁵ Balet panon ya say sakey a walaay malinis a puso et “nanengneng to so Dios” anta “anggapoy toon makanengneng ed [Dios] tan manbilay”? (Exo. 33:20) Say Griegon salita ya impatalos a “nanengneng” et mankabaliksan met na “nanengneng diad nonot, natebek, naamtaan.” Saramay makanengneng ed Dios panamegley na “mata na puso” et saramay talagan makankabat ed sikato tan mangaapresya ed saray kualidad to. (Efe. 1:18) Perpekton impatnag nen Jesus so personalidad na Dios kanian imbaga to: “Siopaman ya akanengneng ed siak et anengneng to met lay Ama.”​—Juan 14:7-9.

¹⁶ Nilikud ed pangamta ed saray kualidad nen Jehova, saray tuan mandadayew et “nanengneng day Dios” no iimanoen da iray gagawaen to parad sikara. (Job 42:5) Ipopokus da met so ‘mata na puso ra’ ed saray makapadinayew iran bendisyon na Dios ya iiter to ed saramay mansasagpot pian mansiansian malinis, tan matoor a manlilingkor ed sikato. Siempre, saray alanaan et literal ya nanengneng day Jehova no naawat da lay tumang dan manbilay ed tawen.​—1 Juan 3:2.

17. Akin ya maliket itayo no mikakareenan tayo?

¹⁷ Oniay sinmublay ya imbaga nen Jesus: “Maliket iray mikakareenan.” (Mat. 5:9) Saramay manggagaway paraan pian mikareenan ed arum et walay rason dan magmaliw ya maliket. Oniay imbaga nen disipulon si Santiago: “Say bunga na inkatunong et intanem diad mareen iran kipapasen parad saramay mikakareenan.” (Sant. 3:18) No aderal so relasyon tayo ed sakey ya agi odino kapamilya, sarag tayon kerewen so tulong na Dios pian magmaliw itayon mikakareenan. Kanian pakiwasen itayo na masanton espiritu nen Jehova, matunong a kondukta, tan say liket. Indanet nen Jesus ya importantin sikatayo la so unonan mikareenan sanen imbaga to: “Kanian no mangiyaapay kad altar tan anonotan mon say agim et walay babarongan tod sika, itilak moy apay mo ed arap na altar tan anap mo so agim. Mikareenan ka nid sikato, insan kapawil mo, iter mo so apay mo.”​—Mat. 5:23, 24.

18, 19. Akin et maliket iray Kristiano anggano napapasegsegang ira?

¹⁸ “Maliket kayo no balbalawen tan papasegsegangen kayo na totoo tan papalsaan da kayo na amin lan klase na mauges a bengatla nisengeg ed siak.” Antoy labay ya ibaga nen Jesus? Intuloy ton imbaga: “Manliket kayon maong, ta baleg so tumang yo ed tawen, ta ontan met so impamasegsegang dad saray propeta ya akadkauna nen sikayo.” (Mat. 5:11, 12) Nen sinisiplatan iray apostol tan ingganggan iran ontunda lan manpulong, “tinmaynan irad arapan na Sanhedrin, a malikeliket.” Siempre, agda nanliketan so sakit ya alikna da ed impakasiplatan da. Balet malikeliket ira “lapud awalaan iray pribilehyo a napabanday nisengeg ed ngaran [nen Jesus].”​—Gawa 5:41.

¹⁹ Natan, maliket met ya mansusungdo iray totoo nen Jehova no napapasegsegang ira nisengeg ed ngaran nen Jesus, odino no onaarap irad mairap ya subok. (Basaen so Santiago 1:2-4.) Singa saray apostol, agtayo panliketan so anggan anton klase na panamairap. Balet no mansiansia tayon matoor ed Dios anggano wala ray subok, tulongan itayo nen Jehova pian makpel tayon makapansungdo. Singa bilang, nen Agosto 1944, si Henryk Dornik tan say agi ton laki et inyakar na saray diktador na gobierno diad panamairapan a kampo. Balet, inamin na saray onsusumpa: “Imposible ya nakombinse iran manggawa na antokaman. Panliliketan day inkamartir da.” Impaliwawa nen Brother Dornik: “Anggano agko labay so magmaliw ya martir, say panirap ya walaay pakpel tan dignidad lapud katooran kod si Jehova so mamapaliket ed siak. . . . Mas inmapit ak ed si Jehova lapud saray masimoon ya pikakasik, tan pinaneknekan ton sikatoy napanmatalkan ya Mananulong.”

20. Akin et maliket tayon panlingkoran so “maliket a Dios”?

²⁰ No walad sikatayo so pabor na “maliket a Dios,” siansian maliket itayo anggano wala ray panamasegsegang lapud relihyon, isusumpa na kapamilya, sakit, odino itatatken. (1 Tim. 1:11.) Naliliketan tayo met lapud saray balibalin sipan na Dios tayo, ya “agto nayarian so mantila.” (Tito 1:2) Makapadinayew so kasumpalan na saray sipan nen Jehova, tan lapud satan et baliwala so amin ya kairapan tan subok ed sayan panaon tayo. Diad Paraiso, saray bendisyon nen Jehova et mas ni nen say iisipen tayo. Tan seguradon agnaparaan so liket ya nalikna tayo. On, ‘manliket tayon maong ed agnaparaan a kareenan.’​—Sal. 37:11.