1-2. Base ed 1 Timoteo 6:20, antoy impaseseg nen Pablo ya gawaen nen Timoteo?

NO WALAY mablin kayarian tayo, kaslakan et ipaasikaso tayo itan ed panmamatalekan tayo. Singa bilang, ibabangko tayoy kuarta tayo ta matalek tayon agnatakew tan agnabalang no akabangko. Kanian amta tayoy liknaan na pangimatalek na mablin bengatla ed sakey ya too.

² Basaen so 1 Timoteo 6:20. Impanonot nen apostol Pablo ed si Timoteo ya walay mablin bengatla ya inmatalek ed sikato nen Jehova​—say suston kakabatan nipaakar ed gagala na Dios parad totoo. Inmatalek met ed si Timoteo so pribilehyon ‘ipulong so salita’ tan ‘gawaen so kimey na ebanghelisador.’ (2 Tim. 4:2, 5) Binilin nen Pablo si Timoteo ya alwaran to iratan ya pribilehyo to. Singa si Timoteo, wala met iray mablin bengatla ya inmatalek nen Jehova ed sikatayo. Anto iratan, tan panon tayon naalwaran?

3-4. Akin ya mabmabli iray katuaan ya walad Biblia?

³ Tinulongan itayo nen Jehova pian natalosan tayo ray katuaan ya walad Biblia. Mabmabli iratan ya katuaan ta lapud saratan et akapikaaro tayo ed si Jehova tan amta tayo no panon itayon magmaliw a maliket. No awaten tan iyaplika tayo iratan, nibulos itayo ed saray palson bangat tan malinis so kabibilay tayo.​—1 Cor. 6:9-11.

⁴ Say sakey nin rason no akin ya mabmabli iray katuaan ed Biblia et lapud ipapaamta labat itan nen Jehova ed saray mapaabeba ya “walaan na dugan kipapasen na puso.” (Gawa 13:48) No mapaabeba tayo, panisiaan tayon uusaren nen  Jehova so matoor tan makabat ya aripen ya mangipasabi na katuaan ed sikatayo. (Mat. 11:25; 24:45) No diad sarili tayo labat, agtayo natalosan so Biblia. Kanian misalsalamat tayo ta inmatalek nen Jehova ed sikatayo iray mabmablin katuaan ya wadtan!​—Pro. 3:13, 15.

5. Anto ni inmatalek nen Jehova ed sikatayo?

⁵ Inmatalek met nen Jehova ed sikatayo so pribilehyon ibangat ed arum so katuaan nipaakar ed sikato tan saray gagala to. (Mat. 24:14) Talagan mabmabli so mensahen ipupulong tayo ed saray totoo ta atan so paraan pian magmaliw iran kabiangan na pamilya nen Jehova tan walay ilalo dan manbilay na andi-anggaan. (1 Tim. 4:16) Baleg man o melag so nagagawaan tayo ed panagpulong tan panagbangat ya kimey, makakatulong tayo pian nasumpal iyan sankaimportantian ya kimey. (1 Tim. 2:3, 4) Talagan baleg a pribilehyo ya kakimeyan itayo na Dios!​—1 Cor. 3:9.

6. Antoy agawa ed saramay agda pinabli so pribilehyon mikimeyan ed Dios?

⁶ Wala ray Kristiano ed panaon nen Timoteo ya agda pinabli so pribilehyon mikimeyan ed Dios. Si Demas et mas inaro to so mundo kanian tinaynan toy pribilehyo ton manlingkor ya kaibay Pablo. (2 Tim. 4:10) Si Figelo tan Hermogenes et agda la labay so manpulong ta antakot day napairap ya singa si Pablo. (2 Tim. 1:15) Si Himeneo, Alejandro, tan Fileto et nan-apostata ra tan tinaynan day katuaan. (1 Tim. 1:19, 20; 2 Tim. 2:16-18) Dati pa et mabiskeg so espiritualidad da, balet naandi so apresasyon da ed mabmablin pribilehyo ya inmatalek ed sikara.

7. Anto ray patit ya uusaren nen Satanas?

⁷ Antoy gagawaen nen Satanas pian natukso to tayon ikbanan so mabmablin kayamanan ya inmatalek ed sikatayo nen Jehova? Pigapigaray uusaren ton patit. Uusaren to ray palabas ed TV, pelikula, Internet, tan saray nanduruman babasaen pian impluensyaan so panagnonot tan ugali tayo ta labay to ya agtayo la aroen tan unoren si Jehova. Uusaren to met iray totoon mamabalaw tan onkokontra ed sikatayo pian ontunda tayo lan manpulong. Tan uusaren to iray apostata ya mangikayat na saray “palson ‘kakabatan’” ta labay to ya taynan tayo so katuaan.​—1 Tim. 6:20, 21.

8. Antoy naaralan mod eksperiensya nen Daniel?

⁸ No agtayo manalwar, ompan sandaraiset tayo la manayan naiikbanan so katuaan. Imanoen so eksperiensya nen Daniel, * brother ya mahilig ya man-video games. Imbaga to: “Ginmapo ak ya man-video games nen samplora so  taon ko. Nen unaan, aliwan mauges iray gagalawen ko. Balet ag-abayag et puro laban, pateyan, tan espiritismo la ray labalabay ko.” Sinmabi ed punto ya 15 oras la kada agew so nanaupot nen Daniel ed saray video games. “Amtak pa ya onaarawi ak lad si Jehova lapud saray gagalawen kon video games tan anggapo lay panaon kod sikato. Balet lapud inmawet lay pusok, inisip ko ya ayos labat anggano agko unoren iray prinsipyo na Biblia,” so kuan nen Daniel. Talagan agnaliklikas so epekto na panagligliwaan ya anggad agtayo la nabembenan ya malet so katuaan. No abuloyan tayon nagawa itan ed sikatayo, ompan naikbanan tayoy mabmablin inmatalek ed sikatayo nen Jehova.

9. Base ed 1 Timoteo 1:18, 19, antoy angikomparaan nen Pablo ed si Timoteo?

⁹ Basaen so 1 Timoteo 1:18, 19. Imbaga nen Pablo ya si Timoteo et singa sakey ya sundalo ta binilin to ya ‘itultuloy to so maabig ya pilalaban’ to. Aliwa itan ya literal ya panlalaban, noagta espiritual. Akin et singa sundalon migue-guerra iray Kristiano? Anto ray nepeg tayon gawaen bilang sundalo nen Kristo? Pantongtongan tayoy limaran punto ya naaralan tayo ed ilustrasyon nen Pablo. Makatulong iratan pian nabembenan tayon malet so katuaan.

10. Anto so debosyon ed Dios, tan akin ya importantin niwala itan ed sikatayo?

¹⁰ Pabiskeg moy debosyon mo ed Dios. No say sakey a sundalo et matoor, pasyaen toy milaban pian naprotektaan to ray inaro tod bilay odino saray bengatlan mabmabli ed sikato. Pinaseseg nen Pablo si Timoteo ya ipanengneng toy debosyon ed Dios​—say katooran tan aralem ya respeto ed Dios. (1 Tim. 4:7) No mabiskeg so panangaro tan debosyon tayo ed si Jehova, agtayo ikbanan so katuaan anggan antoy nagawa.​—1 Tim. 4:8-10; 6:6.

11. Akin ya kaukolan tayoy disiplina ed sarili?

¹¹ Importante so disiplina ed sarili. Say sakey ya sundalo et importantin walay disiplina tod sarili to pian lanang ya akaparaan. Alabanan nen Timoteo iray impluensya nen Satanas ta inunor to so bilin nen Pablo ya arawian iray mauges ya pilalek, seetan ton ipatnag iray balibalin kualidad, tan miulop ed saray kapananisiaan to. (2 Tim. 2:22) Pian nagawaan to iratan, kaukolan ya walay disiplina tod sarili to. Kaukolan tayo met so disiplina ed sarili pian ag-itayo nadaeg na saray pilalek na laman. (Roma 7:21-25) Sakey ni, kaukolan tayoy disiplina ed sarili pian naynay tayon pansagpotan ya lakseben so daan ya personalidad tan isulong tayo imay balo. (Efe. 4:22, 24) Tan no naksawan tayod saray kimey ed sanagew, ompan kaukolan tayo met ya piliten so sarili tayon miaral.​—Heb. 10:24, 25.

12. Antoy gawaen tayo pian nakabisado tayon usaren so Salita na Dios?

¹² Kaukolan ya manpraktis a lanang so sakey ya sundalo no panon ton usaren iray armas to pian nakabisado to itan. Ontan met ed sikatayo​—kaukolan tayon kabisadoen ya usaren so Salita na Dios. (2 Tim. 2:15) Baleg so nitutulong na saray aral pian nagawaan tayo itan. Pero wala ni kaukolan tayon gawaen. Pian natulongan tayoy arum ya pablien met so katuaan, dapat walan talagay personal ya panagaral tayo na Biblia. Importantin usaren tayoy Salita na Dios pian pabiskegen so pananisia tayo. Labay ton ibaga, agtayo labat basaen so Biblia​—nepeg tayon dalepdepen iray nababasa tayo tan man-research tayo ed saray publikasyon tayo pian duga so pakatalos tayo ed katuaan. (1 Tim. 4:13-15) No ontan so gawaen tayo, amta tayo no panon tayon ibangat ed arum so karga na Biblia. Agtayo labat basta ibasa so  sakey ya teksto, noagta manisip tayoy paraan pian natalosan itan na katongtong tayo tan no panon itan ya makatulong ed sikato. Kanian no walay regular ya eskedyul tayo parad personal a panagaral na Biblia, nakabisado tayon usaren so Salita na Dios tan nibangat tayo itan ed arum.​—2 Tim. 3:16, 17.

13. Base ed Hebreo 5:14, akin et kaukolan tayon usaren so pakatebek tayo?

¹³ Usaren so pakatebek. Kaukolan ya malikas so sundalo ed saray onsasabin peligro tan iwasan ton tampol iratan. Ontan met ed sikatayo, kaukolan ya malikas tayo ed saray mameligro ed espiritualidad tayo tan ompaliis tayon tampol. (Pro. 22:3; basaen so Hebreo 5:14.) Singa bilang, importante ya pilien tayon maong iray babantayan, babasaen, tan dedengelen tayo. Maslak ed saray palabas ed TV tan pelikula et walay laok ton imoral. Kabusol iratan nen Jehova tan seguradon pakapuyen na saratan so espiritualidad tayo. Nepeg tayo sirin ya paliisan so amin ya panagligliwaan ya kalnakalnan maneral na pikakaaro tayod Dios.​—Efe. 5:5, 6.

14. Antoy resulta nen inusar nen Daniel so pakatebek to?

¹⁴ Atebek lanlamang nen Daniel, ya abitla nen niman, ya makapuy so epekto na panggagalaw toy video games ya puro laban tan espiritismo. Kanian nan-research ed Watchtower Library no antoy gawaen to pian nitunda to itan. Antoy resulta? Tinundaan to lay manggalaw na mauges iran video games. Kinansela to met lay account to ed saray online games tan agla mitotongtong ed saray datin kagalaw to. Imbaga to: “Imbes ya man-video games ak, mas labay ko lay manggalaw diad paway odino miulop ed saray kakaarok diad kongregasyon.” Natan et payunir tan elder lay Daniel.

15. Akin et mapeligro iray is-istorya ya ikakayat na saray apostata?

¹⁵ Singa si Timoteo, kaukolan tayo met ya usaren so pakatebek tayo pian naiwasan tayo iray palson impormasyon ya ikakayat na saray apostata. (1 Tim. 4:1, 7; 2 Tim. 2:16) Singa bilang, ompan manggawa ray is-istorya pian naekal so talek mo ed saray agagi odino pan-isipen da ka na negatibo nipaakar ed organisasyon nen Jehova. Pakapuyen na saratan so pananisia tayo kanian agtayo nepeg ya basaen tan panisiaan iratan. Tandaan, say mangikakayat na ontan iran istorya et “totoon aderal lay kanonotan da tan agda la amtay katuaan.” Labay da labat so mangigapo na  ‘suppiatan tan debati.’ (1 Tim. 6:4, 5) Tan labay dan panisiaan tayoy panagpauges da pian pansuspetsaan tayo ray agagi.

16. Anto ran pakaabalaan so paliisan tayo?

¹⁶ Paliisan iray pakaabalaan. Pian si Timoteo et mansiansian “maong a sundalo nen Kristo Jesus,” kaukolan toy mansiansian akapokus ed ministeryo to imbes ya manpayaman tan iyuna iray ambisyon tod bilay. (2 Tim. 2:3, 4) Singa si Timoteo, agtayo labay ya iyuna ed bilay tayo so pantipon na materyal iran kaykayarian. Diad tua et mapeligro so nawalaan na dakel a kayamanan ta posiblin pakapuyen na satan so panangaro tayod si Jehova, naekal so apresasyon tayod Salita na Dios, tan ompan nangirasan tayo lan ipulong so katuaan. (Mat. 13:22) Kanian pansiansiaen tayon simpli so bilay tayo pian nausar tayoy panaon tan biskeg tayo parad Panarian.​—Mat. 6:22-25, 33.

17-18. Antoy gawaen tayo pian agnipeligro so espiritualidad tayo?

¹⁷ Manparaan pian alisto kan onkiwas. Kaukolan ya manplano so sundalo no antoy gawaen to no walay onsabin kalaban. Ontan met ed sikatayo. Pian naalwaran tayo iray inmatalek ed sikatayo nen Jehova, kaukolan ya alisto tayon onkiwas no walay peligro. Panon tayon nagawaan itan? Importante ya isipen tayo la natan no antoy gawaen tayo no walay peligro.

¹⁸ Singa bilang, diad baleg iran pantitipon, antis ya onggapo so programa et iyaanunsio no iner so sankaasinggeran ya emergency exit. Akin? Pian amta na saray wadman no iner so batikan da no biglan walay emergency. Ontan met ed sikatayo ran Kristiano. Panon to no legan tayon mani-Internet odino manti-TV et biglan walay ompaway ya imoral ya litrato o eksena, pateyan o paltogan, odino impormasyon ya nanlapud saray apostata? Dapat akaplano tayo la no antoy gawaen tayo. No isipen tayo lan patiuna no anto ray posiblin nagawa, alisto tayon onkiwas pian agnipeligro so espiritualidad tayo tan mansiansia tayon malinis ed pakanengneng nen Jehova.​—Sal. 101:3; 1 Tim. 4:12.

19. Anto ray bendisyon no alwaran tayo ray mabmablin kayamanan ya inmatalek ed sikatayo nen Jehova?

¹⁹ Kaukolan tayon alwaran a maong iray mabmablin kayamanan ya inter nen Jehova​—saray katuaan ed Biblia tan say pribilehyo tayon ibangat iratan ed arum. No bembenan tayon malet iratan, malinis so konsiensia tayo, maliket so bilay tayo, tan balibali liknaan tayo ta natutulongan tayoy arum ya kabaten si Jehova. Diad tulong nen Aman Jehova, seguradon naalwaran tayo iray inmatalek to ed sikatayo.​—1 Tim. 6:12, 19.