No maminsan et singa ontan so ibabaga tayo. Nayarin mitukoyan itan ed samay nabasa ed Hebreo 12:16. Ibabaga na satan a bersikulo ya si Esau et ‘agto pinabli iray sagradon bengatla’ tan ‘insalat to ed si Jacob iray kanepegan to bilang panguloan ed sakey a naakan.’ Kanian ompatnag ya nen niiter ed si Jacob iray ‘kanepegan bilang panguloan,’ sikatoy nagmaliw met ya inmunan ateng na Mesias.​—Mat. 1:2, 16; Luc. 3:23, 34.

Balet diad impanaral lamet ed saray salaysay ed Biblia, naamtaan ya agmet kaukolan ya panguloan so sakey pian magmaliw ya inmunan ateng na Mesias. Imanoen so pigaran ebidensya:

Diad saray anak nen Jacob (Israel), si Ruben so panguloan ya anak to ed si Lea. Si Jose balet so panguloan to ed inad-aro ton asawa ya si Raquel. Nen si Ruben et akagawa na seryoson kasalanan, say kanepegan to bilang panguloan et niiter ed si Jose. (Gen. 29:31-35; 30:22-25; 35:22-26; 49:22-26; 1 Awa. 5:1, 2) Balet siansia ya say linya na kapolian na Mesias et agnanlapu ed si Ruben odino si Jose. Nanlapu itan ed  si Juda, say komapat ya anak nen Jacob ed si Lea.​—Gen. 49:10.

Nabasa ed Lucas 3:32 so limaran linya na kapolian ya nanlapuan na Mesias. Sarayan lima et panguloan. Kanian si Boaz so ama nen Obed, ya say anak to et si Jesse.​—Ruth 4:17, 20-22; 1 Awa. 2:10-12.

Balet say anak nen Jesse ya si David et aliwan panguloan. Sikato so bolirek ed waloran sanaagi. Pero say linya a nanlapuan na Mesias et diad si David. (1 Sam. 16:10, 11; 17:12; Mat. 1:5, 6) Say sinmublay ya linya et diad si Solomon, anggano aliwan sikato so panguloan ya anak nen David.​—2 Sam. 3:2-5.

Balet agto labay ya ibaga ya anggapoy kana na pagmaliw ya panguloan. Say panguloan ya anak et walaan na igagalang a betang tan mabetbet ya sikato so onsublay ya ulo na sankaabungan. Sikato met so manawir na doblin apag ed kayarian na pamilya.​—Gen. 43:33; Deu. 21:17; Jos. 17:1.

Balet say kanepegan na panguloan et nayarin niiter ed sananey. Si Ismael et pinataynan nen Abraham, tan say kanepegan to bilang panguloan et niiter ed si Isaac. (Gen. 21:14-21; 22:2) Tan singa nibaga la, say kanepegan nen Ruben bilang panguloan et niiter ed si Jose.

Nengnengen tayo pa lamet so Hebreo 12:16, ya oniay nabasa: “Manalwar kayo ya anggapod sikayo so manggagaway seksual ya imoralidad odino siopaman ya agmamapabli ed sagrado iran bengatla, a singa si Esau, ya insalat to ray kanepegan to bilang panguloan ed sakey a naakan.” Antoy labay ya ibaga na satan?

Agtutukoyen dia nen apostol Pablo so pagmaliw ya inmunan ateng na Mesias. Diad akadkaunan bersikulo et pinaseseg to iray Kristiano ya ‘gawaen dan maptek iray dadalanen na sali ra.’ Diad ontan et ‘makaawat ira na agnaparaan a kaabigan na Dios,’ balet agda itan naawat no manggawa ray seksual ya imoralidad. (Heb. 12:12-16) No gawaen da itan, magmaliw iran singa si Esau. Agto ‘pinabli iray sagradon bengatla,’ tan insalat to iratan ed bengatlan “makalaman.”

Nambilay si Esau ed panaon na saray patriarka, tan no maminsan et nayarin sikatoy mangiyapay na saray bagat. (Gen. 8:20, 21; 12:7, 8; Job 1:4, 5) Balet lapud makalaman so panagnonot nen Esau, insalat to iratan ya amin a pribilehyo ed sakey yaong labat a digo. Nayarin labay ton paliisan so irap ya nipasakbay a nagawad ilalak nen Abraham. (Gen. 15:13) Impanengneng met nen Esau ya makalaman so pilalek to, ya anggapoy panamabli to ed sagrado iran bengatla, diad impangasawa to na duaran paganon bibii, ya lapud satan et nanermen a maong so atateng to. (Gen. 26:34, 35) Sikatoy duman maong ed si Jacob, ya say pinili ton asawa et mandadayew ed tuan Dios!​—Gen. 28:6, 7; 29:10-12, 18.

Kanian antoy nibaga tayo ed linya na kapolian ya nanlapuan nen Jesus, say Mesias? No maminsan et nanlapu itan ed anak a panguloan, balet aliwan naynay. Binidbir tan anisiaan itan na saray Judio, a singa nen binidbir da ya say Kristo et anak nen David, say bolirek ya anak nen Jesse.​—Mat. 22:42.