1. Akin ya nikadkaduma so panaon ya pambibilayan tayo?

MANBIBILAY tayo lad panaon ya talagan nikadkaduma. Unong ya impasakbay na Biblia, titiponen nen Jehova so ‘baleg ya ulop a nanlapu ed amin a nasyon tan tribu tan rasa tan lenguahe.’ Singa ra “mabiskeg a nasyon” na masulok ya waloran milyon a totoon malikeliket, ya “agew-labi iran manlilingkor ed [Dios].” (Apo. 7:9, 15; Isa. 60:22) Natan labat ya panaon a walay onian karakel na totoon mangaaro ed Dios tan ed kapara dan too.

2. Anton lingon klase na panangaro so ipapatnag na totoon nisian ed Dios? (Nengnengen so litratod gapo na artikulo.)

² Balet impasakbay met na Biblia ya diad panaon tayo et walay lingon klase tan makasarilin panangaro ya ipatnag na totoon nisian ed Dios. Insulat nen apostol Pablo: “Diad kaunoran iran agew . . . , saray totoo et magmaliw a maaro ed sarili ra, maaro ed kuarta, . . . mas inaro ray panliliket nen say Dios.” (2 Tim. 3:1-4) Sayan makasarilin panangaro et duman maong ed panangaron ipapatnag na saray Kristiano. Saramay manpipirawat na para labat ed sarili ra et agda nalilikna so liket ya iilaloan da. Lapud ontan ya panangaro, ondarakel so makasarilin totoo a “mair-irap” ya piulopan.

3. Antoy aralen tayo ed sayan artikulo, tan akin?

 ³ Amta nen Pablo ya mapeligro ed saray Kristiano so idarakel na totoon mangipapatnag na makasarilin panangaro. Kanian impasakbay to ya “arawian” iray totoon mangipapatnag na lingon klase na panangaro. (2 Tim. 3:5) Balet siempre, agtayo ira sigpot ya naarawian. Kanian antoy gawaen tayo pian agtayo naalig iray makapuy ya ugali na totoon nakakaiba tayo tan napaliket si Jehova, say Dios na aro? Amtaen tayoy pandumaan na panangaro ed Dios tan say panangaro ya adeskribe ed 2 Timoteo 3:2-4. Ontulong iya pian nausisa so sarili tayo tan nipatnag so klase na panangaro ya panlapuan na tuan liket tan inkapnek.

4. Akin ya aliwan makapuy so balansin panangaro ed sarili?

⁴ “Saray totoo et magmaliw a maaro ed sarili ra,” so insulat nen Pablo. Kasin mauges ya aroen tayoy sarili tayo? Andi, normal labat tan kaukolan ni ingen so nawalaay dugan panangaro ed sarili. Ginawa itayo nen Jehova ya ontan so nalikna tayo. Inkuan nen Jesus: “Arom so kaparam a too a singa ed sikan dili.” (Mar. 12:31) No agtayo inaroy sarili tayo, agtayo naaro so kapara tayon too. Nabasa tayo met ed Biblia: “Nepeg ya aroen na saray asawan lalaki so kaasawaan da a singa ed dilin laman da. Say lakin mangaaro ed asawa to et mangaaro ed sarili to, ta anggapoy toon bubusolen toy dilin laman to, noag ingen papakanen tan papablien to itan.” (Efe. 5:28, 29) Kanian aliwan makapuy so balansin panangaro ed sarili.

5. Panon mon deskribien iray totoon sobray panangaro dad sarili ra?

⁵ Say panangaro ed sarili ya abitla ed 2 Timoteo 3:2 et aliwan normal tan aliwan dugan panangaro. Makasarili itan. Saray totoon sobray panangaro dad sarili ra et maniisip na alabas ed sarili da nen say manepeg dan isipen. (Basaen so Roma 12:3.) Sarili da labat so nononoten da. Anggapoy pibabali dad arum. No walay makapuy ya nagawa, tetetelen day arum imbes ya aminen dan walay lingo ra. Saray totoon maaro ed sarili ra et inyaliling na sakey ya Bible scholar ed melag ya ayep a “hedgehog ya . . . ilulukot toy laman to a singa bola, pian sarili to labat so napetangan ed anlemek ya bago to . . . tan . . . say akapaway et saray turok-turok ed beneg to.” Agmaliket iray ontan ya makasarilin totoo.

6. Anto ray maabig ya resulta na panangaro ed Dios?

⁶ Unong ed saray Bible scholar, say panangaro ed sarili so unonan binitla nen apostol Pablo ya makapuy ya ugali na dakel a totoo diad kaunoran iran agew lapud saray arum ya ugalin binitla to et resulta na satan. Balet duma iray totoon mangaaro ed Dios ta maabig ya ugali so ipapatnag da. Ibabaga na Biblia ya say aro ed Dios et mikonektaan ed liket, kareenan, anos, kaabigan, kamaongan, pananisia, inkaulimek, tan panangontrol ed sarili. (Gal. 5:22, 23) “Maliket so totoo a say Dios da et si Jehova!” so insulat na salmista. (Sal. 144:15) Si Jehova et maliket ya Dios, tan maliket met iray totoo to. Sakey ni, aliwan singa saray totoon maaro ed sarili ra tan interesado labat ed no antoy naawat da, saray lingkor nen Jehova et maliket ya mangiiter parad pankaabigan na arum.​—Gawa 20:35.

7. Anto ran tepet so ontulong ed sikatayon nausisa so panangaro tayod Dios?

⁷ Panon tayon naamtaan ya mas inaro tayo lay sarili tayo nen say Dios? Imanoen so bilin ed Filipos 2:3, 4: “Agkayo manggagaway antokaman lapud inkamakolkol odino inkamapaatagey, noagta magmaliw kayon mapaabeba, ya ipasen yon mas atagey so arum nen say  sikayo, legan yon aanapen so pankaabigan na arum, aliwan say pankaabigan yo labat.” Nayarin itepet tayod sarili tayo: ‘Kasin uunoren ko itan ya bilin? Kasin talagan labay kon gawaen so panlabayan na Dios? Kasin manggagawa ak na paraan pian natulongan koy arum diad kongregasyon tan diad ministeryo?’ Aliwan lanang ya mainomay so panggawa ed saratan. Kaukolan tayoy mansagpot tan mansakripisyo. Balet wala ta ni mas mamaliket ed sikatayo nen say naamtaan ya aabobonan itayo na Soberano ed uniberso?

8. Antoy ginawa na arum lapud panangaro dad Dios?

⁸ Say panangaro ed Dios so amakiwas ed arum ya taynan so balibalin karera dad bilay pian mas makapanlingkor irad si Jehova. Si Ericka, ya manaayam ed United States, et sakey a doktor. Balet imbes ya pirawaten toy nawalaan na atagey ya posisyon ed medisina, sikatoy nampayunir tan akapanlingkor ed nanduruman bansa kaibay asawa to. Oniay nanonotan to: “Lapud dakel iran naeksperiensya mi diad itutulong mid foreign-language field, ontan met ed saray akaaro mi, nagmaliw ya malikeliket so bilay mi. Uusaren ko nin siansia so inaral kod medisina, balet lapud mas dakel ya panaon tan biskeg so nanausar ko diad itutulong kod totoo ya onabig ed espiritual tan diad itutulong kod saray agagi ed kongregasyon, aliknak so tuan liket tan inkapnek.”

9. Akin ya say panangaro ed kuarta et agpanlapuan na liket?

⁹ Insulat nen Pablo ya saray totoo et magmaliw ya “maaro ed kuarta.” Pigaran taon lay apalabas, walay payunir ed Ireland ya akapitongtong ed sakey a laki nipaakar ed Dios. Inala na laki so pitaka to, angipaway na kuarta, tan impasirayew to, “Aya so dios ko!” Amta tayo ya dakdakel so totoo ya maaro ed kuarta tan ed saray nasaliw na satan, anggano agda aminen ya ontan ira. Balet papasakbayan itayo na Biblia: “Say mangaaro ed pilak et agbalot napenek ed pilak, tan say mangaaro ed kayamanan et agbalot napenek ed nanaalmo to.” (Ecl. 5:10) Saray ontan ya totoo et ag-ontutundan manpirawat na dakel ya kuarta, tan diad panggugunaet dan onyaman, “dakel a pakasakitan” so naeksperiensya ra.​—1 Tim. 6:9, 10.

10. Antoy ibabaga na Biblia nipaakar ed iyaman tan panirap?

¹⁰ Siempre, kaukolan tayon amin so kuarta. Proteksion met itan. (Ecl. 7:12) Balet tua kasi ya maliket so too no say wala labat ed sikato et dugarugan pambilay to? On! (Basaen so Eclesiastes 5:12.) Insulat nen Agur ya anak nen Jakeh: “Agmo ak komon aabuloyan a manirap odino onyaman. Say kanen ko labat komon et samay betang ko.” Mainomay tayon natalosan no akin ya agto labay ya onirap so bilay to. Imbaga to ya agto labay so natukson mantakew ta napabanday so Dios no gawaen to itan. Balet akin et impikasi to met ya agto labay so onyaman? Insulat to: “Pian agak napesel tan iburi ta ka, ya ibagak, ‘Siopa ’tay Jehova?’” (Pro. 30:8, 9) Nayarin wala ray kabat mo ya manmamatalek ed kayamanan da imbes ya diad Dios.

11. Antoy imbilin nen Jesus nipaakar ed kuarta?

¹¹ Saray maaro ed kuarta et agda napaliket so Dios. Imbaga nen Jesus: “Anggapoy toon nayarian toy manpaaripen ed duaran katawan; ta balanglan busolen to imay sakey tan aroen to imay sananey, odino sikatoy mansiansia ed sakey tan balawen to imay sananey. Agyo nayarian so manpaaripen ed Dios tan ed Kayamanan.” Antis na satan imbaga to ni: “Agkayo la mantitipon na saray kayamanan diad dalin, a deralen na bigis tan lati, tan natakew. Imbes, mantipon kayo na saray  kayamanan ed tawen, ya agderalen na bigis tan lati, tan agnatakew.”​—Mat. 6:19, 20, 24.

12. Panon ya mas mainomay so manlingkor ed Dios no simpli so bilay? Mangiter na alimbawa.

¹² Parad dakel, say simplin bilay et aliwa labat ya makapaliket noagta mangiiter met ed sikara na mas dakel a panaon ya manlingkor ed si Jehova. Si Jack, ya manaayam ed United States, et inlako toy baleg ya abung to tan negosyo to pian makapanpayunir kaibay asawa to. Oniay imbaga to: “Aliwan mainomay parad sikami ya ilako so balibalin abung tan dalin mi. Balet, pigay taon ya kada no onsesempet ak ed abung et dismayado ak lapud problema ed trabaho. Say asawak ya regular payunir et lanang ya maliket. Ibabaga to, ‘Sankamaongan so boss ko!’ Natan ta payunir ak met la, saksakey lay Boss mi, si Jehova.”

13. Panon tayon nausisa so pangipapasen tayo ed kuarta?

¹³ Pian nausisa tayoy pangipapasen tayo ed kuarta, nayari tayon itepet ed sarili tayo: ‘Talaga kasin papanisiaan koy ibabaga na Biblia nipaakar ed kuarta tan uunoren ko itan? Kasin manunaan ed bilay ko so pananap na kuarta? Kasin mas importante ed siak iray materyal a bengatla nen say relasyon kod si Jehova tan ed arum? Talaga kasin manmamatalek ak ya itarya nen Jehova iray pankaukolan ko?’ Makaseguro itayo ya agton balot paulyanan iramay maniilalo ed sikato.​—Mat. 6:33.

14. Anto so balansin panangipasen ed panliliket?

¹⁴ Unong a nipasakbay, dakel so totoo natan ya ‘maaro ed panliliket.’ No panon ya aliwan mauges so duga tan balansin pangipasen ed sarili tan kuarta, aliwa met ya mauges so balansin pangipasen ed panliliket. Aglabay nen Jehova ya sibletan tayoy sarili tayo odino iwasan tayo iray maabig tan makapaliket ya aktibidad. Oniay ipapaseseg na Biblia ed saray matoor a manlilingkor: “Mangan ka a malikeliket tan inum moy alak mo a walaay magayagan puso.”​—Ecl. 9:7.

15. Anton panliliket so tutukoyen na 2 Timoteo 3:4?

¹⁵ Say tutukoyen ed 2 Timoteo 3:4 et say  panangaro ed panliliket ya mangibabaliwala ed Dios. Oniay insulat na sakey ya scholar: “Aglabay ya ibaga na sayan [bersikulo] ya inaro da met so Dios anggan panon. Imbes, say labay ton ibaga et agdan balot inaro so Dios.” Talagan seryoso iyan pasakbay ed saramay alablabas so panangaro ra ed panliliket! Saray balikas ya “inaro ray panliliket” et dugarugan deskripsion ed saramay nigalet lad “likeliket ed sayan bilay.”​—Luc. 8:14.

16, 17. Anton alimbawa so impanengneng nen Jesus nipaakar ed panliliket?

¹⁶ Impanengneng nen Jesus so perpekton alimbawa na balansin panangipasen ed panliliket. Sikatoy inmatendi ed “bansal” tan “baleg a ponsia.” (Juan 2:1-10; Luc. 5:29) Diad bansal et sikatoy nanggawa na milagro, a pinagmaliw ton alak so danum pian naaruman so suplay na alak ya kinmulang. Diad sananey ya okasyon, kinondena to iramay mankunkunwarin matunong ya nambalaw ed sikato lapud sikatoy mamangan tan oniinum.​—Luc. 7:33-36.

¹⁷ Balet ag-inyuna nen Jesus ed bilay to so panliliket. Inyuna to si Jehova tan nansagpot ya maong pian tulongan so arum. Pian dakel so makaliktar, mabulos ton sinungdoan so ansakisakit ya ipapatey ed panamairapan a poste. Oniay imbaga nen Jesus ed saramay malabay ya ontumbok ed sikato: “Maliket kayo no balbalawen tan papasegsegangen kayo na totoo tan papalsaan da kayo na amin lan klase na mauges a bengatla nisengeg ed siak. Manliket kayon maong, ta baleg so tumang yo ed tawen, ta ontan met so impamasegsegang dad saray propeta ya akadkauna nen sikayo.”​—Mat. 5:11, 12.

18. Anto ran tepet so ontulong ed sikatayon nausisa no kasin sobra lay panangaro tayod panliliket?

¹⁸ Panon tayon nausisa no kasin sobra lay panangaro tayod panliliket? Tepetan tayoy sarili tayo: ‘Kasin iyuunak so panagligliwaan nen say aral tan panagpulong? Kasin mabulos kon isakripisyo so pamaliket ed sarilik lapud labay koy manlingkor ed Dios? No manpipili ak na saray panagligliwaan, kasin iisipen ko no antoy pangipasen nen Jehova ed saray pilien ko?’ No talagan inaro tayoy Dios, nepeg tayon paliisan iray amta tayon agmakapaliket ed sikato tan anggan saramay iisipen tayo ya nayarin agmamaliket ed sikato.​—Basaen so Mateo 22:37, 38.

19. Siopa ray agbalot makalikna na tuan liket?

¹⁹ Manga 6,000 a taon lan maniirap so too ed sayan mundo nen Satanas, balet magano la iyan manampot. Say mundo et napno na totoon alablabas so panangaro ra ed sarili da, kuarta, tan panliliket. Say pinonot da et no antoy naala da, tan say akasentroan na bilay da et saray personal a pirawat da. Saray ontan ya totoo et agdan balot nalikna so tuan liket. Balet oniay insulat na salmista: “Maliket so too a say Dios nen Jacob so mananulong to, a say ilalo to et walad si Jehova a Dios to.”​—Sal. 146:5.

20. Panon mon nalilikna so tuan liket lapud panangarom ed Dios?

²⁰ Saray totoo nen Jehova et tuloytuloy dan ipapatnag so panangaro ed Dios tan ondadakel so bilang da kada taon. Prueba iya a manuuley lay Panarian na Dios tan asingger lan nagawa diad dalin iray agnaparaan ya bendisyon. Nalilikna tayo la so tua tan permanentin liket diad panggagaway linawa nen Jehova, ta amta tayon napapaliket tayo so Sankatagyan a Dios. Tan saramay mangaaro ed si Jehova et seguradon manliket ya anggad angga! Diad onsublay ya artikulo, aralen tayo so pigaran kualidad ya resulta na makasarilin aro tan amtaen tayo no panon a midumaan iraya ed saray kualidad ya ipapatnag na totoo nen Jehova.