NIYANAK ak nen 1923 diad Hemsworth, sakey a baley ed Yorkshire, England. Walay sakey a kuyak, si Bob. Nen mantaon ak na siamera, si tatay ko, ya kabusol toy pansimpisimpitan na relihyon, et akala na pigaran libro ya mangiwawalwal ed palson relihyon. Agustoan ton maong iray abasa to. Kayari na pigaran taon, linmad abung mi si Bob Atkinson tan impatogtog tod ponograpo so sakey ed saray akarekord ya paliwawa nen Brother Rutherford. Naamtaan min nanlapu iya ed samay mismon grupo ya angi-publish ed saramay libro! Imbaga na saray ateng ko ed si Brother Atkinson ya kada labi et mangdem ed sikami pian naebatan toy dakel ya tepet mi ed Biblia. Inimbitaan to kamin onatendi ed aral diad abung na sakey ya brother ya pigaran kilometro so kaarawi to. Manlapud saman et regular kami lan mimiaral, tan walay abuon melag ya kongregasyon diad Hemsworth. Ag-abayag et papatuloyen mi ed abung mi iray zone servant (ya natan et tatawagen ya manangasikaso na sirkito) tan iimbitaan min mangan ed sikami iray payunir a walad asingger. Balibali epekto ed siak na pipiulop ed sikara.

Walay inggapo min negosyo, balet imbaga nen Tatay ed si kuyak, “No labay moy manpayunir, itunda tayo la ’ya.” Inmabobon si kuya Bob, tan inmalis ed abung mi pian manpayunir nen 21 so taon to. Kayari duay taon, nen 16 ko, nampayunir ak met. Puera labat no weekend, mabetbet ya bukbukor koy manpulong, ya manguusar ak na testimony card tan ponograpo. Balet tinulongan ak nen Jehova ya nawalaan na iyaaralan na Biblia ya inmaligwas. Dakel ya kapamilya to so angawat met ed katuaan. Diad tinmumbok a taon, aturo ak bilang espisyal payunir tan partner ko si Mary Henshall. Imbaki da kami ed teritoryan agni akimeyan diad Cheshire.

Kaplesan ed saman na World War II, tan saray bibii et igaganggan ya onsuporta ed guerra. Saray arum ya ministro na relihyon et ag-obligadon mibiang ed guerra, kanian ontan met so iilaloan mi bilang full-time ya ministro. Balet agpinmayag so korte, kanian asentensiaan ak na 31 ya agew ed prisoan. Diad tinmumbok ya taon, nen 19 ko la,  nampalista ak bilang sakey ed saray agmalabay ya onsuporta ed guerra lapud konsiensia. Amidua ak nin inmarap ed korte, pero inabsuelto da ak. Diad sayan naeksperiensyak, amtak ya tinulongan ak na masanton espiritu tan singa bebembenan nen Jehova so limak pian makapanpakpel tan ombiskeg ak.​—Isa. 41:10, 13.

Akabat koy Arthur Matthews nen 1946. Sikatoy taloy bulan ya apriso ta agto labay so mibiang ed guerra lapud konsiensia, tan kapaway to et inibaan toy agi ton si Dennis, ya espisyal payunir diad Hemsworth. Manlapud inkaugaw da et imbangat la ra nen tatay da nipaakar ed si Jehova tan abautismoan ira nen tinedyer ira. Ag-abayag et niyasain si Dennis diad Ireland, kanian anggapo lay partner nen Arthur. Agustoan na saray ateng ko so ugali na sayan makulikulin payunir, kanian inimbitaan dan manayam ed sikara. No onsesempet ak ed abung mi, sikami la nen Arthur so manboboluntaryon mansinop na anganan mi. Ag-abayag et mansusulatan kami lan dua. Nen 1948, asentensiaan lamet si Arthur na taloy bulan ed prisoan. Nankasal kami nen Enero 1949 tan say goal mi et mansiansia ed full-time anggad posible. Diad panamendisyon nen Jehova tan maalwar ya panagplano, uusaren mi ray agew na bakasyon mi pian miupan manburbor na saray prutas, kanian akapantultuloy kamin manpayunir.

Kayari labat na sakey taon, inyasain da kami ed Northern Ireland, unona diad Armagh insan diad Newry, ya maslak et Katoliko iray manaayam ed saratan ya baley. Mairap ditan so manpulong, tan kaukolan mi manalwar ya maong tan malikas no mitotongtong kami ed totoo. Saray aral et gagawaen diad abung na agagi ya 16 kilometro so kaarawi to ed panaayaman mi. Manga walora so onaatendi. No iimbitaan da kamin miugip ed sikara, diad datal so dudukolan mi, tan no kabuasan et makapesel so almusal mi. Makapaliket a naamtaan ya dakdakel la natan so Tasi ed satan ya lugar.

Si kuyak tan say asawa ton si Lottie et manlilingkor la bilang espisyal payunir diad Northern Ireland, tan nen 1952 et inmatendi kamin apat diad distriton kombension ed Belfast. Walay sakey a brother ya nampatuloy ed sikami diad abung to, tan kaiba mi ditan si Pryce Hughes, say branch servant ed saman diad Britain. Sakey a labi, pantotongtongan mi so impangi-release ed bokletan Say Dalan na Dios Aro, ya im-publish a manunan parad saray taga Ireland. Imbaga nen Brother Hughes ya mairap so manpulong ed saray Katoliko diad Irish Republic. Papaalisen iray agagi ed pampupundoan da tan aatakien ira na saray totoo diad sugsog na saray pari. “Kaukolan mi iray sanasawan walay kotse da,” so kuan nen Pryce, “ya mibiang ed espisyal a kampanya pian nibunog ed interon bansa so bokleta.” * Say ebat min tampol, “Sige, gawaen mi!” Atan imay imbagak diad gapo na sayan istorya.

Diad Dublin, say mabetbet ya tutuloyan na saray  payunir et diad abung nen Ma Rutland, ya abayag lan matoor ya sister. Kayari min tinmuloy ed abung da tan inlako so arum ya gamit mi, linmugan kamin apat ed motor nen Bob ya walay sidecar to tan nananap kami na kotse. Akasaliw kami na second hand ya kotse pero kondisyon ni, tan impai-deliver mi itan ed samay angilako ta anggapod sikami so maka-drive. Si Arthur et sanlabin akayurong ed kama, ya iimadyinen ton iyaalis-alis toy kambiyo. Diad kabuasan, nen sasalien la nen Arthur ya i-drive so kotse manlapud garahe, sinmabi so misionera ya si Mildred Willett (nagmaliw ya asawa nen John Barr). Amta toy man-drive! Impraktis to kamin agano tan kayari na satan et ready kami lan onla!

Say sinmublay ya kaukolan mi et say pampundoan. Binilin da kami ya agkami manaayam ed trailer ta nayarin poolan itan na saray sumpad Tasi, kanian nananap kami na abung, balet anggapoy aromog mi. Diad saman ya labi et naugip kamin apat ed loob na kotse. Diad tinmumbok ya agew, say aromog mi et melag a trailer ya tinuop labat tan walaan na duaran melag a dukolan. Atan so nagmaliw ya ayaman mi. Makapakelaw ta agmi namproblemaan so pangiparada na trailer mi diad lote na saray makaaron dumaralos. Manga 16 anggad 24 kilometro so kaarawi na teritoryan napupulongan mi manlapud trailer mi. Insan kaalis mid sananey ya lugar, ompapawil tan ombibisita kami ed saray manaayam ed lugar ya datin angiparadaan mi.

Nakar min amin so kaabungan diad southeast na Irish Republic tan anggapoy masyadon problema, tan akapangibunog kami na masulok ya 20,000 ya bokleta tan impawit mid branch office na Britain so kangaranan na saray interesado. Talagan bendisyon ya nilasus la natan so Tasi ed satan ya lugar!

Asabi panaon, inyalis da kami ed south London. Kayari na pigaran simba, tinmawag so branch office na Britain ed si Arthur tan imbaga ra ya sikatoy onggapo lad kimey ed sirkito diad ontumbok ya agew! Kayari na sakey simban training, nambiahe kami paonlad sirkito mi diad Scotland kanian anggapoy malaem ya panaon nen Arthur ya iparaan iray paliwawa to. Balet naynay ya mabulos ton gagawaen so antokaman ya asainmin ed panaglingkor ed si Jehova anggano aliwan mainomay itan. Makapaseseg ya maong itan ed siak. Talagan na-enjoy mi so asainmin mi ed sirkito. Pigay taon kamin akapanlingkor ed teritoryan agni akimeyan, tan natan et baleg ya bendisyon ya nakaiba so dakel ya agagi.

Nen naimbitaan si Arthur ya manaral na samploran bulan diad Gilead School nen 1962, kaukolan mi manggaway baleg ya desisyon. Ninonot mi ya anggano natilak ak, duga labat ya awaten nen Arthur iyan pribilehyo. Lapud anggapoy partner ko, pinapawil da ak ed Hemsworth bilang espisyal payunir. Kapawil nen Arthur kayari sakey taon, niyasain kami ed kimey ed distrito tan say teritorya mi et diad Scotland, northern England, tan Northern Ireland.

Nen 1964, akaawat si Arthur na balon asainmin bilang branch servant ed Irish Republic. Nanliketan min maong so panagbiahen kimey, kanian diad gapo et napapagaan ak ed sayan pananguman. Natan no nononoten koy apalabas, malikeliket ak ta apribilehyoan ak ya manlingkor ed Bethel. Manisia ak ya no awaten moy sakey ya asainmin anggano singa agmo labay, lanang kan bendisyonan nen Jehova. Diad Bethel, asalik so nantrabaho ed opisina, manbalkot na literatura, manluto, tan manlinis. Wala met so panaon ya ibabaki da kamin mankimey ed distrito tan nakakabat mi iray agagi ed nanduruman lugar ed interon bansa. Saya tan say inyaligwas na saray iyaaralan mi na Biblia so amaelet na relasyon mi ed espiritual ya pamilya mi diad Ireland. Talagan bendisyon itan!

Say unonan internasyonal ya kombension ed Ireland et agawa ed Dublin nen 1965. * Anggano grabe so isusumpa, maaligwas ya asumpal so kombension. Walay 3,948 ya inmatendi, tan 65 so abautismoan. Akaawat na sulat na pisasalamat so amin ya nampundoan na 3,500 ya delegado a nanlapud arum a bansa. Tan inrayew met na saray akan-abung so maong ya ugali na saray delegado. Talagan importante iman ya agawa ed Ireland.

Nen 1966, say north tan south Ireland et parehon niiyan ed panangasikaso na Dublin branch office​—ya midumaan a maong ed nagagawa diad satan ya isla, ya saray totoo et naapag-apag lapud politika tan relihyon. Makapaliket ya nanengneng ya dakel a Katoliko so mangaawat na katuaan tan manlilingkor la ya kaiba na saray agagin datin Protestante.

Nen 2011, anguma-uman so bilay mi nen pinan-iba so Britain tan Ireland branch tan inyasain da kami ed London Bethel. Akabatan mi itan nen napapagaan ak la lapud walay sakit nen Arthur. Naamtaan mi ya walay Parkinson’s disease to. Nen Mayo 20, 2015, samay kaibak ed bilay ko diad 66 ya taon et inatey.

Nen imbebeneg ya taon, ansaki-sakit so naliliknak, nadi-depress ak, tan maer-ermen ak. Dati, lanang ya wadtan si Arthur parad siak. Talagan nami-miss ko la! Pero no ondadalan ka ed ontan iran situasyon, mas onapit ka ed si Jehova. Balibali met ya naamtaan ya dakel so mangaaro ed si Arthur. Akaawat ak na saray sulat manlapud saray agagi ed Ireland, Britain, tan anggan diad United States. Sarayan sulat, pati say panamaseseg na agi nen Arthur ya si Dennis tan say asawa ton si Mavis, tan saray kaanakan kon si Ruth tan Judy, so baleg ya ontutulong ed siak.

Say teksto ya mamapaseseg ya maong ed siak et say Isaias 30:18, ya oniay nabasa: “Si Jehova et maan-anos a manaalagar ed pangipatnag toy kaabigan ed sikayo, tan sikatoy onalagey pian kasian to kayo. Ta si Jehova et Dios na inkahustisya. Maliket so amin a mantultuloy a manilalo ed sikato.” Talagan naliligliwa ak ta amtak ya maan-anos a manaalagar si Jehova pian solusyonan toy amin a problema tan ikdan to tayo na makapaliket iran asainmin diad balon mundo.

No nonoten koy apalabas, anengneng ko no panon kamin inggiya nen Jehova tan benendisyonan toy kimey ed Ireland! Baleg ya pribilehyo a walay daiset ya nitulong mi ed satan ya inyaligwas ed espiritual. Talagan tua ya no sumpalen tayo iray pagagawa nen Jehova, naynay tayon nabendisyonan.