MEDYO matantan so iyaaligwas na kimey parad Panarian diad Brazil nen kagapoy dekada 1930. Balet nen 1935, sinmulat iray payunir ya si Nathaniel tan Maud Yuille ed si Joseph F. Rutherford, say mangidadaulo ed panagpulong a kimey diad saman a panaon. Namboluntaryo ra ya manpulong tan nansulat ira pian ibaga ya ‘maliket iran onla anggan iner.’

Si Nathaniel et sakey ya civil engineer a nanretiro la, tan diad saman et 62 años to la. Sikato so service director na sakey a kongregasyon na Saray Tasi nen Jehova diad San Francisco, California, U.S.A. Inorganisa toy panagpulong diman tan angusar na trumpa tan ponograpo pian ipulong so maong a balita. Saray eksperiensya to tan say inkamabulos to et bendisyon ed balon asainmin to bilang branch servant ed Brazil, sakey a bansan maawa-awang so teritorya tan nandurumay lenguahe.

Sinmabid Brazil si Nathaniel tan Maud nen 1936. Kaiba ra si Antonio P. Andrade, sakey met ya payunir tan managpatalos da. Wala ray mabmablin awit da​—35 ya ponograpo tan sakey a de-trumpan luluganan. Say Brazil ya komaliman sankabalegan ya bansa ed interon mundo et walaan labat na manga 60 ya manangipalapag na Panarian! Balet diad pigaran taon labat, sarayan balon kagawaan et akatulong ed sikara pian minilyon so napulongan.

Sakey bulan kayari na insabi na sanasawan Yuille, inyuksoy na sangan opisina so sankaunaan ya service convention ed Brazil, ya agawa ed syudad na São Paulo. Mapatnag ya si Maud so drayber, tan inusar so de-trumpan luluganan pian ipakabat so paliwawa parad publiko. Walay 110 ya inmatendi ed satan ya kombension! Apaseseg iray manangipalapag ed programa na kombension, tan apakiwas iran aruman so panaon  dan manpulong. Naaralan dan usaren iray literatura, testimony card, pati saray ponograpo ya walay aka-rekord ya paliwawa ed English, German, Hungarian, Polish, Spanish, tan sinmabi panaon et wala met lay Portuguese.

Pinmeles so panagpulong a kimey lapud saray taloran service convention ed São Paulo, Rio de Janeiro, tan Curitiba nen 1937. Inusar na saray akikombension so de-trumpan luluganan diad panagpulong ed kaabungan. Oniay insulat nen José Maglovsky, ya diad saman et kalangweran ni: “Idi-display mi ray publikasyon ed sakey ya kargaan, tan legan ya narerengelan so aka-rekord ya mensahe manlapud de-trumpan luluganan, kakatongtongen mi ray totoo ya ompapaway ed kaabungan da ya manuusisa no antoy nagagawa.”

Diad saray ilog so pambabautismoan tan wala ray totoon manlalangoy tan manpapaagew diad kaliberliber. Balibalin pankanawnawa iman ya ipulong so maong a balita panamegley na de-trumpan luluganan! Sankarengel so paliwawa nen Brother Rutherford parad bautismo. Pinaliberan na totoon mausisa so luluganan, tan dinengel day paliwawa ya ipapatalos ed Portuguese. Kayari na satan, arengel na saray abautismoan iray Kingdom song ya aka-rekord ed Polish. Binansagan itan ya kinansion na saray agagi diad nanduruman lenguahe. “Nanonotan ed satan ya eksena imay agawad Pentecostes ya kada sakey et atalosan toy sarilin lenguahe to,” so imbaga na 1938 Yearbook.

Kayari na kombension, onuran man odino onagew, kada Simba et narerengel na saray totoo ed parke, kaabungan, tan diad saray pabrika iray aka-rekord ya paliwawa ed Biblia manlapud de-trumpan luluganan diad sentro na São Paulo tan diad kaabay iran baley. Narengel met so binulan ya programa parad 3,000 a totoo ya walad kawalaan na saray akating ya 97 kilometro so kaarawi to ed northwest na São Paulo. Asabi panaon, walay aporman maaligwas ya kongregasyon. Anggaman makapaermen so sakit na saramay wadman, angalay permiso iray manangipalapag na Panarian pian inabang so makapaligliwan mensahe na Biblia diad sananey nin lugar a kawalaan na saray akating.

Diad bandad sampot na 1938, sinmabin siansia iray aka-rekord ya paliwawa nipaakar ed Panarian diad lenguahen Portuguese. Diad Piestay Inatey, ililiber so de-trumpan luluganan ed saray sementeryo pian iparengel iray paliwawa ya “Where Are the Dead?,” “Jehovah,” tan “Riches,” tan nadngel iratan na masulok ya 40,000 ya totoon maneermen!

Ag-agustoan na saray mamapasnok a pari so parungtalan ya panangipulong na saray katuaan ed Biblia, tan mabetbet ya dedesdesen da ray opisyal na gobierno pian patundaen so panguusar na de-trumpan luluganan. Nanonotan ni nen sister Yuille so sakey ya inkagawa ya indaulo na sakey a pari so sakey a grupo pian paliberan so de-trumpan luluganan. Balet sinmabi so mayor tan saray opisyal na pulis tan dinengel day interon programa. Inmalis so mayor ya walay awit ton literatura ya base ed Biblia. Anggapoy agawan gulo ed saman ya agew. Anggano wala ray isusumpa, imbaga na 1940 Yearbook ya diad Brazil, say taon 1939 et “sankaabigan ya panaon pian manlingkor ed Makapanyarin Dios tan ipakabat so ngaran to.”

Say insabi na “de-trumpan luluganan na Watch Tower” et talagan baleg so epekto to ed panagpulong a kimey diad Brazil. Akatulong iyan maong pian nipasabi ed minilyon a totoo so mensahe na Panarian. Anggano inlako la itan ya sikat a luluganan nen 1941, tuloytuloy ya iyaabawag na dakel ya Tasi nen Jehova so maong a balita ed saray mauyamon totoo diad maawa-awang a teritorya na Brazil.​—Inalad daan iran koleksion mi diad Brazil.