1, 2. (a) Panoy pangipapasen na Saray Tasi nen Jehova ed Biblia? (b) Antoy paboritom ya parte na Biblia?

LABALABAY na Saray Tasi nen Jehova so Biblia. Mangitatarya itan na napanmatalkan iran instruksion, tan naligliwa itayo tan nawalaan tayoy ilalo. (Roma 15:4) Ipapasen tayoy Biblia “bilang salita na Dios,” aliwan koleksion na saray ideya na totoo.—1 Tes. 2:13.

² Seguradon wala ray paborito tayon parte na Biblia. Labalabay na arum so Ebanghelyo, ya ditan et napatnagan so personalidad nen Jehova panamegley na Anak to. (Juan 14:9) Saray arum et labalabay day nipaakar ed propesiya—a singa say Apocalipsis, ya mangipapanengneng ed saray “magano lan nagawa.” (Apo. 1:1) Tan seguradon amin tayo et naliligliwa ed Salmo odino makakaaral tayo ed saray praktikal ya leksion ed libro na Proverbio. Talagan say Biblia et libro parad amin ya totoo.

3, 4. (a) Antoy nibagam ed saray publikasyon tayo? (b) Anto ran publikasyon so naaawat tayo parad saray espisipikon grupo na totoo?

³ Lapud labalabay tayoy Biblia, labalabay tayo met ya basaen iray publikasyon tayo ya base ed Biblia. Singa bilang, aapresyaen tayo iray naaawat tayon espiritual ya probisyon a singa saray libro, brosyur, magasin, tan arum ni ran literatura. Amta  tayo ya sarayan probisyon manlapud si Jehova et ontulong pian makapansiansia tayon alerto, agnaerasan ed espiritual, tan ‘mabiskeg ed pananisia.’—Tito 2:2.

⁴ Likud ed saray publikasyon a parad amin ya Tasi nen Jehova, wala ra met iray base ed Biblia ya artikulo a parad espisipikon grupo. Wala ray artikulo ya espisipikon ginawa pian tulongan iray kabataan; say arum et pian tulongan iray atateng. Dakel met so artikulo ya niimprinta tan walad website tayo ya ginawa parad saray aliwan Tasi. Saratan a dakdakel ya espiritual a probisyon et mangipapanonot ed sikatayo ya tinoor nen Jehova so sipan to ya ‘mangiparaan parad amin a totoo na sakey a ponsia a sankananaman iray kakanen.’—Isa. 25:6.

5. Anto so seguradon aapresyaen nen Jehova?

⁵ Nayarin labay tayo ya mas dakel komon so panaon tayon manbasay Biblia tan saray publikasyon ya nibase ed Biblia. Makaseguro tayon aapresyaen nen Jehova so pansasagpot tayon ‘usaren ed sankaabigan so panaon tayo’ diad regular ya pambasa na Biblia tan personal ya panagaral. (Efe. 5:15, 16) Tua, aliwan naynay ya parepareho so karukey na panaon ya nausar tayo ed amin ya espiritual a probisyon. Balet, kaukolan tayoy manalwar ed agnaliklikas ya peligro. Anto itan?

6. Anto ray sengegan ya nayarin nasayang tayo ray arum ya probisyon nen Jehova?

⁶ Walay peligro ya ompan nasayang tayoy arum ed saray gunggona lapud isipen tayon ag-onaplika ed sikatayo so arum ya espiritual a probisyon. Singa bilang, panon to no say sakey a parte na Biblia et singa ag-onaplika ed situasyon tayo? Odino panon to no say sakey a publikasyon et aliwan sikatayo so manunan angigagalaan? Kasin paparlasan tayo labat iratan ya impormasyon odino lalabsanan tayo ni ingen? No ontan, nayarin nasayang tayo ray impormasyon ya makagunggona komon ed sikatayo. Panon tayon napaliisan itan ya patit? Manunad amin, kaukolan tayon tandaan ya say Dios so Lapuan na saray espiritual a probisyon tayo. Oniay imbaga to panamegley nen propeta Isaias: “Siak si Jehova a Dios mo, say mangibabangat ed sika pian nagunggonaan ka.” (Isa. 48:17) Makatulong so pangonsidera ed taloran suhestion pian nagunggonaan itayo ed amin ya parte na Biblia tan ed nanduruman klase na espiritual a probisyon ya itatarya parad sikatayo.

7. Akin et kaukolan ya lukas so nonot tayo no babasaen tayoy Biblia?

⁷ Kaukolan ya lukas so nonot no manbasa. Malinew ya ibabaga na Biblia ya say “interon Kasulatan et impuyan na Dios tan makagunggona.” (2 Tim. 3:16) Tua, wala ray parte na Biblia ya akadirekta ed sakey a too odino grupo. Kanian kaukolan ya lukas so nonot tayo no babasaen tayoy Biblia. “No manbabasa ak, nononoten ko ya posiblin walay pigaran naaralan ed sakey a parte na Biblia,” so imbaga na sakey a brother. Kuan to ni: “Lapud satan et napapakiwas ak ya dalepdepen no anto ni ray naaralan ko.” Antis tayon manbasay Salita na Dios, mas maabig no ipikasi tayon nalukasay nonot tayo tan naikdan itayoy karunongan pian natebek iray leksion ya labay nen Jehova ya naaralan tayo.—Esd. 7:10; basaen so Santiago 1:5.

8, 9. (a) No manbabasa tayoy Biblia, anto ray nayarin itepet tayod sarili tayo? (b) Diad saray kualipikasyon parad saray elder, antoy naaralan tayo nipaakar ed si Jehova?

⁸ Mantepet. Legan mon babasaen so sakey a parte na Biblia, tunda kan magano tan tepetan moy sarilim: ‘Antoy naaralan kod saya nipaakar ed si Jehova? Panon ko iyan iyaplika ed bilay ko? Panon kon usaren iya pian tulongan so arum?’ No dalepdepen tayo  iratan ya tepet, lalo itayon nagunggonaan ed panagbasa tayoy Biblia. Bilang alimbawa, nonoten pa iray Makasulatan ya kualipikasyon parad saray Kristianon elder. (Basaen so 1 Timoteo 3:2-7.) Lapud karaklan ed sikatayo et aliwan elder, nayarin isipen tayo ya ag-iya onaplika ed bilay tayo. Balet, no ikonsidera tayoy pigara ed saray posiblin ebat ed sarayay onsublay a tepet, nanengneng tayo ya saratan a kualipikasyon et makagunggona ed sikatayon amin diad nanduruman paraan.

⁹ Antoy naaralan kod saya nipaakar ed si Jehova? Panamegley na saratan a kualipikasyon, ipapaamta nen Jehova ya atagey so estandarte to parad saramay tinuro ton manlingkor bilang elder. Iilaloan ton magmaliw ira ya maabig ya alimbawa, tan mikuentaan irad sikato ed paraan na pangaasikaso dad kongregasyon “a sinaliw tod panamegley na dala na mismon Anak to.” (Gawa 20:28) Labay nen Jehova ya nalikna tayon protektado itayo ed panangasikaso na saray aturon katulongan a pastol. (Isa. 32:1, 2) No sankanonot tayo itan, saray Makasulatan ya kualipikasyon parad saray Kristianon elder so mangipanonot ed sikatayo ya talagan iyaansakit itayo nen Jehova.

10, 11. (a) No babasaen tayo ray kualipikasyon parad saray elder, panon tayon niyaplika iratan ed bilay tayo? (b) Panon tayon usaren iratan pian tulongan so arum?

¹⁰ Panon ko iyan iyaplika ed bilay ko? Panapanaon, nepeg ya usisaen na aturon elder so sarili to unong ed sarayan espiritual ya kualipikasyon, tan nengnengen to no antoy kaukolan ton paaligwasen. Say sakey a brother ya “dadampoten toy magmaliw a manangasikaso” et nepeg ton imanoen a maong iratan ya kualipikasyon, ta kaukolan ton panggunaetan ya nagawaan itan ed anggaay nayarian to. (1 Tim. 3:1) Diad tua, amin a Kristiano et makaaral ed saray kualipikasyon ya walad saratan ya bersikulo, lapud maslak ed saratan et kekerewen nen Jehova ed amin ya Kristiano. Singa bilang, amin tayo et nepeg ya makatunongan tan nawalaan na limpion kanonotan. (Fil. 4:5; 1 Ped. 4:7) Lapud saray elder et “alimbawa ed pulok,” makaaral tayod sikara tan ‘naalig tayoy pananisia ra.’—1 Ped. 5:3; Heb. 13:7.

¹¹ Panon kon usaren iya pian tulongan so arum? Sarag tayon usaren irayan kualipikasyon ya parad saray elder pian tulongan iray interesado odino iyaaralan na Biblia ya  nanengneng so pidumaan na saray elder na Saray Tasi nen Jehova ed saray pari odino pastor na Kakristianoan. Ontan met, no babasaen tayo itan, nanonotan tayo ray pansasagpot na saray elder ed kongregasyon tayo parad pankaabigan tayo. No dalepdepen tayo iray pansasakripisyo ra, mas onaralem so ‘respeto tayo ed saramay mansasagpot’ ed limog tayo. (1 Tes. 5:12) Tan no ipanengneng tayoy masimoon ya respeto ed sarayan makulin manangasikaso, mas naaruman tayoy liket da.—Heb. 13:17.

12, 13. (a) Diad pangusar tayod saray reperensya ya walad sikatayo, panon tayon man-research? (b) Mangiter na alimbawa no panon ya makatulong iray kaaruman ya impormasyon pian naaralan tayo ray leksion ya agtayo nin tampol naimano.

¹² Man-research. Usaren tayo ray reperensya ya walad sikatayo tan anapen iray impormasyon a singa saraya:

• Siopay angisulat ed sayan parte na Kasulatan?

• Iner tan kapigan iya insulat?

• Anto ray importantin agawa nen insulat iyan libro na Biblia?

Nayarin wala ray naaralan tayo ed saray kaaruman ya impormasyon nipaakar ed saya ya agtayo nin tampol naimano.

¹³ Alimbawa, konsideraen pay nabasa tayod Ezequiel 14:13, 14: “No say sakey a dalin et mankasalanan ed siak diad agto panmatoor, iyunat koy limak ed satan tan deralen koy suplay ton kakanen, tan iyakar ko ditan so eras tan paandien ko ditan so too tan say ayep. ‘Anggano wadtan irayan taloran lalaki—si Noe, Daniel, tan Job—sarili da labat so niliktar da lapud inkatunong da,’ so imbaga na Soberanon Katawan a Jehova.” No man-research tayo ni, naaralan tayo ya insulat iyan parte na Ezequiel nen manga 612 B.C.E. Diad satan a panaon et pigaran siglo lan inatey si Noe tan Job, tan agnalingwanan na Dios so impanmatoor da. Balet mabilay nid saman si Daniel. Diad tua et ompan manga 20 años to ni labat sanen imbaga nen Jehova ya sikatoy matunong a singa si Noe tan Job. Antoy naaralan tayod satan? Iimanoen tan papablien nen Jehova so integridad na amin ya matoor a mandadayew ed sikato, kaiba la ray kabataan ni.—Sal. 148:12-14.

14. Panon ya natulongan iray kabataan ed saray artikulon parad sikara, tan panon met ya minabang ed satan so arum? (Nengnengen so litratod gapo na artikulo.)

¹⁴ No panon ya makagunggona so panaral ed amin a parte na Salita na Dios, minabang tayo met ed amin ya espiritual a naakan ya itatarya ed sikatayo. Imanoey pigaran alimbawa. Saray artikulo parad kabataan. Diad apalabas iran taon, dakel so literatura tayon nipalapag parad saray kabataan. ^[1] Arum ed sarayan artikulo et intarya pian tulongan ira ya nasarag da ray impluensya ed eskuelaan odino subok bilang tinedyer. Panon itayon nagunggonaan ya amin no basaen tayo iratan ya artikulo? No basaen tayo iratan, napanonotan itayo no anto ray pakakasubokan na saray matoor ya kabataan. Diad ontan et mas natulongan tan napaseseg tayo ra.

15. Akin et kaukolan ya basaen na saray wala lad edad ya Kristiano iray artikulo ya parad saray kabataan?

¹⁵ Dakel ed saray probleman ipapaliwawa ed saray artikulo ya parad kabataan et naeeksperiensya met na arum. Amin tayo et nepeg tayon idepensay pananisia tayo, kontroley emosyon tayo, resistiay mauges iran impluensya na saray kalimog, tan paliisan iray mauges ya kaulop tan panagligliwaan. Sarayan topic tan dakel ni et nipaliwawa ed saray artikulon parad saray tinedyer. Nepeg kasin isipen na saray wala lad edad ya Kristiano ya nipaabeba ira no basaen da ray publikasyon ya parad kabataan? Andin balot!  Anggaman say artikulo et ginawa ya makapasagyat parad saray kabataan, saray impormasyon ditan et base ed ag-ondadaan iran prinsipyo ed Biblia tan amin tayo et minabang ed sarayan espiritual a probisyon.

16. Anto ni nitutulong na saray publikasyon tayo ed saray kabataan?

¹⁶ Likud ed panangigiya na saray publikasyon ed saray kabataan pian nasarag da ray problema, ontutulong met iratan pian ontatken irad espiritual tan onapit irad si Jehova. (Basaen so Eclesiastes 12:1, 13.) Nagunggonaan met ed saya iray wala lad edad ya Kristiano. Singa bilang, say Abril 2009 ya isyu na magasin ya Awake! et walaay artikulon “Young People Ask . . . How Can I Make Bible Reading Enjoyable?” Wala ray pigaran suhestion ed satan ya artikulo tan sakey a kahon ya nayarin katlien tan isigpit ed Biblia bilang reperensya. Kasin agunggonaan met ed satan ya artikulo iray aliwa lan kabataan? “Naiirapan ak ed panagbasak na Biblia,” so insulat na 24 años ya ina. “Inyaplikak iray suhestion ed satan ya artikulo, tan talagan uusaren ko iray impormasyon ya walad samay kinatlik. Natan et labalabay ko lay manbasay Biblia. Naaralan ko no panon ya mantutunosan tan mankokonektaan iray libro na Biblia ya singa marakdakep ya desinyo na abel. Nai-enjoy ko la natan so manbasay Biblia.”

17, 18. Panon tayon nagunggonaan no basaen tayo ray artikulon parad publiko? Mangiter na alimbawa.

¹⁷ Artikulo parad publiko. Manlapu la nen 2008, panliliketan tayo lay panaralan ya edisyon na Say Panag-bantayan, ya itatarya parad Saray Tasi nen Jehova. Balet panon to iray magasin ya parad publiko? Kasin nagunggonaan itayo met no basaen tayo iratan? Imanoen so sakey ya ilustrasyon. Isipen pa ya diad sakey ya aral antis ya onggapoy publikon paliwawa, naimanom ya inmatendi ed Kingdom Hall so sakey ya inimbitaan mo. Seguradon malikeliket ka. Legan ya manpapaliwawa so espiker, ompan sankanonot mo imay bisitam. Kanian dedengelen mo may paliwawa a singa sika imay bisita. Lapud satan, kayari na paliwawa et mas lalon naapresyam imay tema.

¹⁸ Nayarin ontan met so nalikna tayo no babasaen tayo ray artikulon parad publiko. Singa bilang, ipapaliwawa na publikon edisyon na Say Panag-bantayan iray topic ed Kasulatan diad paraan ya natalosan na saray manbabasa ya aliwan Tasi. Ontan met, dakel ni ran artikulo so walad jw.org, a singa saramay walad seksion ya “Ebat ed Saray Tepet ed Biblia” tan “Mabetbet ya Itetepet.” No basaen tayo irayan impormasyon, mas onaralem so apresasyon tayo ed sarayan katuaan ya amta ti la. Sakey ni, makaaral tayo na saray balon paraan ya nausar tayod ministeryo pian ipaliwawa iray papanisiaan tayo. Ontan met, panamegley na Onliing! et napapabiskeg so pananisia tayo ya wala so tuan Dios, tan tutulongan itayo na satan a magasin ya idepensay pananisia tayo.—Basaen so 1 Pedro 3:15.

19. Panon tayon nipanengneng so pisasalamat tayo ed si Jehova lapud saray probisyon to?

¹⁹ Malinew, tataryaan itayo nen Jehova na dakdakel ya probisyon pian napenek so “espiritual a pankaukolan” tayo. (Mat. 5:3) Komon ta tuloytuloy tayon anamoten so amin ya espiritual a probisyon ya itatarya ed sikatayo. No ontan, nipanengneng tayoy pisasalamat tayod Dios ya mangibabangat ed sikatayo pian nagunggonaan itayo.—Isa. 48:17.