Report na Saray Manangiyabawag ed Panarian

Aromog To so Gagala ed Bilay

KUAN nen Jesus a kabat to ’ray karnero to. (Juan 10:14) No say sakey a too et walaan na maong a puso tan panangaro para’d deen tan inkatunong, sikato so natangguyor a magmaliw a papatumbok nen Jesus. Say ontan ya indibidual so makaromog na gagala ed bilay, unong ya agawa ed sakey a bii ed Belgium. Nia so estorya to:

“Sanen tinmoktok iray Tasi nen Jehova ed puertak, siak so nagogonigon a tuloy tan manpaplanon panganggaen ko’y bilay ko. Agustoan ko so inkuan na saray Tasi nipaakar ed solusyon ed saray problema na sayan mansasakit a mundo balet agko agustoan so ideya a nalalanor so Dios. Tinmunda ak lan mimisa ed walora lan taon, ta kagulak so pansimpisimpitan ya anengneng ko ditan. Anggaman ontan, nipaakar ed saray Tasi, naimanok so katuaan ed inkuan da tan amoriak a, mairap so manbilay no anggapo so Dios.

“Makapaermen, kayari pigaran imbisita ra, say piaabet ed Tastasi so naandi. Makapasinagem so liknaan ko. Nansigarilyo ak na duaran kaha ed kada agew tan ginapoan ko ni ingen so angusar na saray druga. Diad pilalek kon mitalosan ed inatey lan lakik, akibabali ak ed espiritismo. Agaylay takot ko sano bokbokor ko ed labi ta naeksperiensiak so panangataki na demonyo bilang nansumpalan! Saya so nantultuloy ed loob na pigaran bulan. Kada labi et siak so mankigtot ed pakanonot a bokbokor ko.

“Insan, sakey ya agew siak so nanakar-akar, ed duman rota, angga’d insabik ed baleg a paalagey. Siak so asurpresan akanengneng ed baleg ya ulop diman. Diad panasingger, anengneng kon saramay Tasi nen Jehova a peles a mangipapaalagey na Kingdom Hall. Anonotan koray imbisita na Tastasi ed siak diad ayaman ko, tan naisip ko ya alay abig no say interon mundo so makapanbilay a singa nagagawa’d sarayan totoo.

“Talagan kaliktan kon ondalaw iray Tasi ed ayaman ko, kanian akitongtong ak ed pigara ed saramay mankikimey ed hall. Nampikasi ak ed Dios, tan kayari samploran agew say lakin inmunan akapiabet ed siak so walad puertak. Insuheri ton ituloy mi so panagaral na Biblia, tan sigagayagan inmabobon ak. Insan inimbitaan toak a tampol ed saray miting diad Kingdom Hall. Inawat ko. Agkon balot akanengneng na ontan a nenengnengen! Abayag lan aanapen koray totoon manaaroan ed balang sakey tan maliket. Tan diad kaunoran et nia wadia ra!

“Nanlapula’d saman siak so onaatendi’d amin a miting. Kayari na ngalngali taloran simba, intundak la’y mauges ya inkailuam ed panagsigarilyo. Imbantak ko laray librok ed astrolohiya tan saray rekord ko ed satanikon musika, tan naliknak a napapalukak na saray demonyo so pamebenben da ed siak. Inyuksoy ko so bilay ko unong ed saray estandarte nen Jehova ed Biblia, tan kayari na taloran bulan ginapoan ko la so manpulong na maong a balita. Kayari na anemiran bulan siak so abautismoan. Duaran agew kayari na bautismok, ginapoan ko so man-auxiliary payunir.

“Misalamat ak ed si Jehova ed amin a maong a bengatlan ginawa to para’d siak. Diad kaunoran et walaan la na gagala so bilay ko. On, say ngaran nen Jehova so sakey a mabiskeg ya ilang ya akaromogan ko na salimbeng tan proteksyon. (Uliran 18:10) Talagan aliknak so singa alikna na salmista sanen insulat to ed Salmo 84:10: ‘Ta say sanagew ed loob na saray saban mo magmaong ni nen say sanlibo. Lablabay ko ni ompasen a sakey a bantay-pinto ed abung na Dios ko, nen say manayam ed alolong ya abel na kabaglan.’”

Sayan maoyamon-impanpuson bii so akaromog na gagala ed bilay. Kanian ontan met ed siopaman a manaanap ed si Jehova a walaan na maong a puso.