Report na Saray Manangiyabawag ed Panarian

Panagrespeto ed Inkasagrado na Bilay

IPAPANENGNENG na Biblia a say dala et mabli ed imaton na Dios tan kokondenaen to so agsuston panangusar ed satan. (Levitico 17:14; Gawa 15:19, 20, 28, 29) Lapud sarayan totontonen ed Biblia, saray Tasi nen Jehova so agmangawat ed panangiyalis na dala.

Pian natulongan iray doktor tan empleado na ospital a natalosan so relihyoson talindeg na Tastasi nen Jehova ed sayan pamaakaran tan naapresya daray Tasi ed pangawat da na alternatibon panagtambal, say Watch Tower Society so angorganisa na Hospital Liaison Committees (HLC) ed nanduruman daldalin. Saray membro na sarayan komite so ombibisita ed saray ospital pian mitongtong ed saray personahe na medikal. Agano ni, diad 12 a syudades ed Polandia, masulok a 200 a miting so agawa, a sasaglawien to so masulok a 500 a doktor ed medisina, manuna et saray hepe na saray klinika odino ed hospital ward. Say onggendan so agawa legan na sakey ya imbisita:

“Sakey a miting ed Cardio-Surgical Clinic diad Zabrze so sankatalonaan ya agawaan. Nanlapulad 1986 say medical team ed klinika so mangoopera na saray agagi tayo ya anggapo so dala. Natan et wala la so 40 ed ontan ya agawan operasyon. Say klinika so akaparaan a mangadmiti na saray pasyente ed interon Polandia tan ontan met ed biek taew. Kayari 50-minuton diskusyon, sakey ya asistant manedyer na ospital so angiparungtal ed saray membro na HLC ed grupo na saray pasyente tan inkuanto: ‘Sarayan totoo so Tastasi nen Jehova. Sikaray mikokoopera ed klinika tayo, tan tutulongan da itayo. Aliwa lambengat ed saray kapananisiaan da noagta ontan met ed arum niran pasyente so nagunggunaan ed tulong da. Misalamat tayo ed saray Tasi nen Jehova, sikatayo so akumbinsi a say manunan operasyon ed puso so nagawa ya anggapo so dala.

“‘Alimbawa, sikami so angopera ed sayan bii [ituturo so sakey ed saray pasyente to] ya anggapo so dala, tan no Lunes et sikato la so nipaway manlapud ospital. Labay kon idanet a matalag tayon usaren so dala nen say nensaman lapud satan so mapeligro. Satan so nisisiglaot ed HIV, hepatitis, tan mabayag ya iyabig.

“‘Siak so sakey a Katoliko, balet diad abung mi, sikami so lawas masuyat ed saray panmoria na arum. Aminsan ya agew siak so manaakar ed Slaski Estadyum a kaibara’y ilalak ko. Dati et sayan estadyum so pinaulyanan, balet naimano mi a natan et anguman la a ngalngali agnabidbir. Tinepetan ko so sakey ed saray mantatrabaho no panon ya agawa so impanguman. Inkuanto a say management so ngalngali la naandian na ilalo ed pangapiger ed estadyum, balet satan so impaabangan ed saray Tasi nen Jehova, tan sikaray angapiger ed satan.

“‘Kanian diad sarayan totoo et dakel so naaralan tayo. Isipen ko a diad sayan ward et nepeg tayo so magmaliw a maabuloy ed saray panmoria na arum.’ Insan, ituturo so sakey a Tasi a naoperaan ed saginonor ya agew, inkuanto: ‘Sayan bii so sakey ed saray Tasi nen Jehova, tan sikato so naoperaan ya anggapo so dala.’”

Manwarin saray Tasi nen Jehova et agda ipapasoot so sisisiaen da ed arum, tutumboken dan mismo so alimbawa na saray apostol tan “tuloken da so Dios bilang manuley nen saray totoo.” (Gawa 5:29) Lalaktipen na saya so pakawalaan na respeto ed dala. Aapresyaen da sano saray arum so manrespeto ed relihyoson kumbiksyon da nipaakar ed sayan isyu.