Kaukolan Tayo so Organisasyon nen Jehova

KASIN wala lay arengel mon angikuan na, “Manisia ak ed Dios balet aliwan diad sakey ya organisadon relihyon”? Mipadpara iran panmoria so mabetbet a nibabalikas na saray sinansakey a datin panatikon mimimisa balet ta natan et aderya la lapud insaew na relihyon dan mamenek ed saray pankaukolan da ed espiritual. Anggaman diad inkalapagan et nadidismaya ed saray relihyoson organisasyon, siansian ipipilit na dakel a labay day mandayew ed Dios. Balet liknaen dan magmaong no sikatoy dayewen da ed dilin paraan da nen say dayewen da diad pimembro ra ed sakey a relihyon odino ed arum nin organisasyon.

Antoy ibabaga na Biblia? Kaliktan ta na Dios a saray Kristiano et mimembro ed sakey ya organisasyon?

Agunggunaan Iray Inmunan Kristiano Diad Impagmaliw ya Organisado

Nen Pentecostes 33 K.P., inkalbo nen Jehova so masanton espiritu to, aliwan diad pigaran nansasananeyan iran mananisia, noagta ed sakey a grupo na lalaki tan bibii a nantitipon ed “saksakey a pasen,” salanti, diad tagey a kuarto ed syudad na Jerusalem. (Gawa 2:1) Diad saman a panaon et atibukel so Kristianon kongregasyon, a nagmaliw ya internasyonal ya organisasyon. Talagan peteg a bendision iya parad saramay inmuunan babangatan. Akin? Manuna’d amin et sikaray naikdan na importantin asainmin​—say kipulong na maong a balita na Panarian na Dios angga “ed sankamundoan.” (Mateo 24:14) Diad loob na kongregasyon et makaaral iray balon komberti manlapud saray atalitali lan kapananisiaan no panon a gawaey panagpulong.

Ag-abayag et say mensahe na Panarian so nikayat ed labas na saray bakor na Jerusalem. Diad baetan na 62 tan 64 K.P., insulat nen apostol Pedro so inmunan sulat to ed saray Kristiano a “nikayat ed Ponto, Galacia, Capadocia, Asia tan Bitinia,” ya amin et walad modernon Turkey. (1 Pedro 1:1) Wala met iray mananisia diad Palestina, Lebanon, Sirya, Chipre, Gresya, Creta, tan Italya. Singa insulat nen Pablo ed saray taga-Colosas nen 60-61 K.P., say maong a balita so “nipulong [la] ed amin a pinalsa ed leksab na tawen.”​—Colosas 1:23.

Say komaduan gungguna ed pimembro ed sakey ya organisasyon et say panamaseseg a niiter na saray Kristiano ed balang sakey. Diad pilimog ed kongregasyon, narengel na saray Kristiano iray makapasagyat a paliwawa, naaral dan nankakasakey so Sagradon Kasulatan, makapanginabang na makapabiskeg ed pananisia iran eksperiensia, tan makapikasakey iray kapananisiaan ed pikakasi. (1 Corinto, kapitulo 14) Tan ‘makapanpastol ed pulok na Dios’ iray matatken la’d espiritual a lalaki.–1 Pedro 5:2.

Bilang membro na kongregasyon, makapankakabatan met iray Kristiano tan makapan-aaroan. Agda  aliknan sikaray nabebelatan lapud pililimog da ed kongregasyon. Kanian saray inmuunan Kristiano so kinmasil tan apabiskeg nisengeg ed satan.​—Gawa 2:42; 14:27; 1 Corinto 14:26; Colosas 4:15, 16.

Sakey nin rason a nakaukolan so nankakasakey a sankamundoan a kongregasyon, odino organisasyon et parad kiyalibansa na pankakasakey. Naaralan na saray Kristiano so “pansalita a mantutunosan.” (1 Corinto 1:10, NW) Makanakana iya ta saray membro na kongregasyon so nanlalapud nanduruman abenegan ed edukasyon tan sosyal. Nandurumay pansasalita ra, tan walay mapatnag a pandurumaan da ed personalidad. (Gawa 2:1-11) No maminsan et walaray matuan pandurumaan ed opinyon. Balet, atulongan iray Kristiano a resolbien iratan a pandurumaan ed limog na kongregasyon.​—Gawa 15:1, 2; Filipos 4:2, 3.

Saray seryoson problema ya agnaareglo na lokal a mamatatken so intupleg ed saray matakken lan managbiahen manangasikaso, a singa si Pablo. Saray importantin pamaakaran nipaakar ed doktrina so intupleg ed say manunan mananguley ya ulop a walad Jerusalem. Diad tua et say mananguley ya ulop so inmunan tugyopen na saray apostol nen Jesu-Kristo balet diad saginonor et ninatnat met ed saray mamasiken na kongregasyon diad Jerusalem. Binidbir na balang kongregasyon so inter na Dios ya autoridad na mananguley ya ulop tan saray manangilaman to pian mangorganisa ed ministeryo, manuro na lalaki parad saray posisyon ed serbisyo, tan mandesisyon ed saray pamaakaran nipaakar ed doktrina. Sanen aresolbi na mananguley ya ulop so sakey ya isyu, inawat na saray kongregasyon so desisyon tan “akaliket ira lapu ed saray inpamaligliwa.”​—Gawa 15:1, 2, 28, 30, 31.

On, angusar si Jehova na sakey ya organisasyon nen inmunan siglo. Komusta balet natan ey?

Kaukolan Tayoy Sakey ya Organisasyon Natan

Singa saray piparaan da nen inmunan-siglo, sisisimoon iray Tastasi nen Jehova natan ed kimey dan pangipulong ed maong a balita na Panarian. Sakey a paraan dan susumpalen iyan kimey et diad pangibunog na saray Biblia tan katulongan ed panagaral na Biblia, a mankakaukolan na kaorganisa.

Nepeg a maalwar ya iparaan iray Kristianon palapagan, nasuri so inkasusto, niimprinta, tan ipawit ed saray kongregasyon. Insan, saray indibidual a Kristiano so nepeg a manboluntaryo ed kibunog na literatura ed saramay malabay a manbasa ed satan. Say mensahe na Panarian so nipasabi la ed minilyon diad onian dalan. Pambabanikelan na saray manangipalapag na maong a balita a sumpalen so panagpulong da diad organisadon paraan, a seseguroen ya anggapoy kabiangan na teritoryan natatayek bangta say arum a parti so napapaulyanan. Amin na saya et mankakaukolan na kaorganisa.

Lapud “say Dios anggapo so pangiduma to,” nepeg a nipatalos iray Biblia tan literaturay Biblia. (Gawa 10:34) Diad kaplesan et sayan magasin so wala la ed 132 a lenguahe, tan say kaiba to ya Awake!, so nipapalapag la ed 83 a lenguahe. Kakaukolanen toy organisadon tuloy iran grupo na managpatalos ed intiron mundo.

Napapaseseg iray membro na kongregasyon sano sikaray onatendi ed saray Kristianon miting tan asamblea. Narengel daray makapaseseg a paliwawa nipaakar ed Biblia, panaral na Kasulatan a saniiba, panginabang na makapabiskeg iran eksperiensia, tan pikasakey ed saray managdayew diad pikakasi. Tan singa saray agagi ra ed inmunan siglo, panggagayagaan daray ibibisita na saray managbiahen manangasikaso. Kanian, saray Kristiano natan so tugyopen na ‘sakey a pulok, sakey a pastol.’–Juan 10:16.

Siempre, ag-ayadyari iray Tastasi nen Jehova, a singa met ed inmuunan piparaan da. Siansia, sikaray mankikimey a nankakasakey. Bilang resulta, say kipupulong nipaakar ed Panarian so nagagawa la ed intiron dalin.​—Gawa 15:36-40; Efeso 4:13.

[Litrato ed pahina 31]

Saray Kristiano natan so tugyopen na ‘sakey a pulok, sakey a pastol’