Talagan Eebatan na Dios Iray Pikakasi

Si Cornelio so sakey a toon nanggunaet a nawalaay pabor na Dios diad panamegley na mabetbet tan impapuso iran pikakasi. Sakey ni, maabig so impangusar to’d posisyon to bilang opisyal na armada. Unong ed Biblia, sikatoy “angiter na dakel a regalo na panangasi” ed saray mankaukolan.​—Gawa 10:1, 2.

DIAD saman, say Kristianon kongregasyon so tugyopen na mananisia iran Judio, proselita, tan Samaritano. Ag-agalsiman a Gentil si Cornelio tan agkabiangan na Kristianon kongregasyon. Kasin kabaliksan na saya ya agnaebatan iray pikakasi to? Andi. Inimano nen Jehova a Dios si Cornelio tan saray masimoon a kimey to.​—Gawa 10:4.

Akapitalosan si Cornelio ed Kristianon kongregasyon diad panamegley na panangiwanwan na anghel. (Gawa 10:30-33) Bilang resulta, sikato tan say sankaabungan to so apribilihyoan a magmaliw a sankaunaan ya ag-agalsiman iran Gentil a kabiangan na Kristianon kongregasyon. Minoria nen Jehova a Dios a manepeg a nirekord ed Biblia so personal ya eksperiensia nen Cornelio. Seguradon dakel so ginawa ton pananguman pian nagnap ton nitunos so bilay to ed saray estandarte na Dios. (Isaias 2:2-4; Juan 17:16) Say eksperiensia nen Cornelio so baleg a panamaseseg natan ed totoo ed amin a nasyon a manggugunaet a nawalaay pabor na Dios. Konsideraen iray pigaran alimbawa.

Modernon-Agew Iran Alimbawa

Sakey a bii ed India so mankaukolan a maong na ligliwa. Sikatoy akiasawa nen manedad na 21 tan awalaan na duaran anak. Balet ag-abayag sanen nianak to lay komaduan anak to, inatey so masiken to. Biglay inkabalo to diad edad ton 24, sikato so walaan na 2-bulan ya anak a bii tan 22-bulan ya anak a laki. Talagan kaukolan toy ligliwa! Siopay asinggeran to? Sakey a labi, lapud pakakagonigon a maong, sikatoy nampikasi, a kuanto, “Mangatatawen ya Ama, ipangasim a ligliwaen ak panamegley na Salitam.”

Kaimbuasan, walay bisita to. Sakey ed Tastasi nen Jehova. Diad saman ya agew, walay irap-irap na impanpulong na Tasi ed kabkaabungan lapud pigpigara so akatongtong to. Naksawan tan nadidismaya la, say Tasi so onsempet la komon, balet ta singa nadadagdag ya onla ed sakey nin abung. Ditan to asabi iyan ugaw nin balo. Pinaloob to tan angawat na publikasyon a mangipapaliwawa ed Biblia. Aligliwan maong so bii ed impanbasa to’d  saman a publikasyon tan ed impitongtong to’d Tasi. Naamtaan toy sipan na Dios a napaoli iray inaatey tan ed Panarian na Dios, a magano lan manggawa ed dalin a paraiso. Importanti ed amin, akabatan to tan naaro to so sakey a tuan Dios, si Jehova, ya angebat ed pikakasi to.

Si Nora, a manaayam ed syudad na George, Abalaten ya Aprika, so angigana na sakey bulan pian mibiang ed sigpot-panaon a panag-ebanghelyon kimey. Sakbay ya onggapo, sikatoy masimoon a nampikasi ed si Jehova pian sikatoy tulongan ton makaromog na sakey a talagan interesado ed panagaral na Biblia. Nasasakopan na teritoryan niasainan ton pampulongan so abung na toon pinabpabaingan toy Nora ed imbeneg iran imbisita to. Makpel a dinalaw lamet nen Nora iman ya abung. Diad inkasurprisa to, asabi toy balon manaayam ya inmalis diman, a manngaran na Noleen. Sakey ni, ipipikasi nen Noleen tan say ina to so tulong na Dios pian natalosan da so Biblia. “Pirmi liket da sanen inopresian ko ira na panagaral na Biblia,” insalaysay nen Nora. Maples so inyaligwas nen Noleen tan say ina to. Sinmabi panaon, akiulop met laran san-ina ed si Nora a mibiang ed espiritual a panamaabig a kimey.

Sananey nin alimbawa a mangipapanengneng ed biskeg na pikakasi et diad samay sanasawan manaayam ed Abalaten ya Aprika diad syudad na Johannesburg. Diad sakey a Sabado na labi nen 1996, ngalngali la mansian so sanasawan Dennis tan Carol. Bilang ultimon polaing, denesidi ray manpikasi parad tulong, ya aminpigapiga ran ginawa anggad lablabi lan maong. Kaimbuasan, diad alas onse na kabuasan, duaran Tastasi nen Jehova so tinmoktok ed puerta ra. Inlukas nen Dennis so puerta tan inkuanto’d sikara a manalagar iran magano ta tawagen toy akulaw to. Pinasakbayan nen Dennis si Carol a no palooben to iray Tastasi, ompan mairap laran paalisen. Impanonot nen Carol ed si Dennis a sikaray nampikasi parad tulong tan inkuanton ompan saya so ebat na Dios ed saray pikakasi ra. Kanian pinaloob da iray Tastasi, tan nigapo so panagaral na Biblia ed libron Pikakabat a Mangitonton ed Andi-Anggaan a Bilay. Aliketan si Dennis tan si Carol ed naaralan da. Diad ngarem to iman et inmatendi ira ed Kingdom Hall na Tastasi nen Jehova diad lugar da ed unonan pankanawnawa. Diad impangiyaplika ra’d pikakabat a naaralan da manlapud Biblia, nalmoan di Dennis tan Carol iray solusyon parad saray problema ra ed panamaley. Sikara la natan so maliket, bautismadon managdayew nen Jehova tan regular a manginanabang ed saray nibase’d Biblia iran sisiaen da diad saray kakaabay da.

Anto no Liknaen Mon Agka Manepeg a Manpikasi?

Nayarin liknaen na arum a masimoon a totoo a sikaray agmanepeg a manpikasi lapud mauges a panagbilay da. Angisalaysay si Jesu-Kristo na istorya nipaakar ed ontan a too, sakey a kabkabusol a managsingil na buis. Diad iloloob na sayan too ed lolooban na templo, alikna ton agmakanepegan ya onasingger ed kaslakan a pasen na panagpikasian. “Manalalagey ed arawi . . . ingen nandugal ed pagew to, a kuanto, Dios, kasian mo ak a managkasalanan.” (Lucas 18:13) Unong ed si Jesus, apaboran iyan too. Papaneknekan na saya a talagan mapangasi si Jehova a Dios tan labay ton tulongan iray masimoon a magbabawin managkasalanan.

Konsideraen so kalangweran a lakin taga-Abalaten ya Aprika a manngaran na Paul. Nen ugaw ni si Paul, sikatoy onaatendi la’d saray Kristianon miting a kaibay ina to. Balet sanen sikatoy tin-edyer la, sikatoy akilimog ed saray kalangweran ya agmanutumbok ed  saray dalan na Dios. Kayari impan-eskuela to, sikatoy nansundalo ed datin walay panangibiig a gobierno na Abalaten ya Aprika. Insan, ag-inilaloan, akisian ed sikato so nobya to. Sengegan na pirmin impakagonigon nen Paul iyan agmakapenek a paraan na bilay. “Sakey a labi,” nanonotan to, “nampikasi ak ed si Jehova tan impatulongan ak ed sikato, anggaman agak ni masimoon ya inmasingger ed Dios ed loob na dakel lan taon.”

Ag-abayag kayari na impanpikasi to, sikatoy intagar nen ina to pian onatendi ed tinaon a Memoryal na impatey nen Kristo. (Lucas 22:19) Inderlaw nen Paul iyan ginawa nen ina to, unong ta sikatoy bangar tan anggapon balot so interes to ed Biblia. “Minoriak iyan impangitagar bilang ebat nen Jehova ed pikakasik tan liknaen kon kaukolan koy onkiwas unong ed saya.” Nanlapula’d saman a manpatuloy, onaatendi lay Paul ed amin a Kristianon miting. Kayari apat bulan na panagaral na Biblia, sikatoy kinmualipika ed bautismo. Sakey ni, intunda to lay panaaral toy engineering tan pinili toy kareran pibiang ed sigpot-panaon a panag-ebanghelyon kimey. Natan, maliket la si Paul, agla nagogonigon nipaakar ed apalabas a bilay to. Sikatoy manlilingkor diad sangan opisina na Watch Tower Society ed Abalaten Aprika ed loob la na 11 a taon.

On, mapalabon eebatan nen Jehova a Dios iray pikakasi tan “mananumang ed saray mananap ed sikato.” (Hebreos 11:6) Magano lan onsabi so baleg ya agew nen Jehova tan panganggaen to so amin a karelmengan. Kaleganan ni, eebatan nen Jehova iray pikakasi na totoo to parad biskeg tan panangiwanwan legan a maseseg iran mibibiang ed importantin kimey a panagpulong. Kanian, minilyon ya indibidual a manlalapud amin a nasyon so niwawanwan ed Kristianon kongregasyon tan nabebendisionan na pikakabat ed Biblia a mangitotonton ed andi-anggaan a bilay.​—Juan 17:3.

[Litrato ed pahina 5]

Say impapuson pikakasi nen Cornelio so angitonton ed imbisita nen apostol Pedro ed sikato

[Litrato ed pahina 6]

Akatulong so pikakasi ed dakel diad panaon na gonigon

[Saray litrato ed pahina 7]

Maabig so patulongan diad pikakasi pian natalosan so Biblia

Makapanpikasi iray sanasawa parad tulong pian onelet so panamaley da