No Panon Itayon Natulongan nen Jesu-kristo

MAKAPAKELKELAW so impanulong nen Jesu-Kristo ed totoo nen sikatoy wadia ed dalin. Peteg a tua iya ta, kayari impangibinsabinsa ed saray dakel ya ebento ed bilay nen Jesus, onia so inkuan na sakey ya akaimaton: “Wala met niray amayamay a sananey a bengatlan ginawa nen Jesus, a no nisulat ya amin a sansakeyen, isipen kon anggan say mundo ed inkasikato agto naiyan so saray libro a nasulatan.” (Juan 21:25) Lapud dakerakel so ginawa nen Jesus diad dalin, nayarin itepet tayo: ‘Panon a sikatoy magmaliw a mananulong tayo anta walad tawen? Kasin nagunggunaan itayo la natan manlapud matamoy a panangabagey nen Jesus?’

Makapaligsa tan makapaseguro so ebat. Ibabaga ed sikatayo na Biblia a linmoob si Kristo “ed tawen a dili, pian ompatnag natan ed arap na Dios lapu ed sikatayo.” (Hebreos 9:24) Anto so ginawa to parad sikatayo? Insalaysay nen apostol Pablo: “Linmoob [si Kristo] aliwa met a diad panamegley na dala na saray kanding tan saray kilaw na baka, noag lapu ed talonggaring na dala to a dili, linmoob ya aminpinsan nipaakar ed andi-anggaan, ed masanto a pasen [“tawen a mismo”] ya agamoran to so maando ya inkarondon.”​—Hebreos 9:12; 1 Juan 2:2.

Agaylan maabig a balita itan! Imbes a mangangga lay makapakelkelaw a kimey nen Jesus ed biang na totoo, say intokotok to ed tawen so amasarag ed sikaton lalon dakel ni so nagawaan to parad katooan. Lapud ta diad abalbaleg ya agkanepegan a panangasi na Dios et tinuro toy Jesus a manlingkor bilang ‘katangbayan’​—atagey a saserdote​—“ed nikawanan a trono na Ari ed saray katawenan.”​—Hebreos 8:1, 2.

‘Katangbayan’

Kanian, diad tawen si Jesus so magmaliw a katangbayan parad katooan. Say kimey to et singa samay ginawa na atagey a saserdote na Israel ed biang na saray managdayew ed Dios nensaman. Tan anto itan a kimey? Impaliwawa nen Pablo: “Amin a sankatageyan a saserdote wala a niyan pian mangisaklang na saray langkap tan saray bagat; kanian nakaukolan a sayan sankatageyan a saserdote [say tinmokotok ya Jesu-Kristo] wala met so bengatlan isaklang to.”​—Hebreos 8:3.

Walay bengatlan niyapay nen Jesus a superyor a tuloy ed inyapay na atagey a saserdote nensaman. “No say dala na saray kanding tan saray baka” et makapangitarok na espiritual a kalinisan ed kadaanan ya Israel, “say dala nen Kristo . . . so lalo a manunaan a linisan to so saray konsiensia yo ed saray inatey a gawa pian manlingkor kayo ed Dios a mabilay?”​—Hebreos 9:13, 14.

Si Jesus so matalonggaring met a katangbayan, lapud sikatoy pinagamoran na ag-ipapatey. Diad kadaanan ya Israel, “amayamay iran saserdote, ta nisengeg ed ipapatey agda nayari mansiansia ed inkasaserdote.” Balet komusta si Jesus? Oniay insalaysay nen Pablo: “Wala so inkasaserdote to ya agnipatawir. Kanian nayarian to met ya ilaban angga ed kasumpalan so saray onasingger ed Dios dia ed panamegley to, ta mabilay  lawas a mangyesel ed sikara.” (Hebreos 7:23-25; Roma 6:9) On, diad nikawanan a lima na Dios ed tawen, walaan itayo na katangbayan a ‘mabilay lawas a mangyesel ed sikatayo.’ Isipen pa lambengat so kabaliksan na satan ed sikatayo natan!

Sanen wadiad dalin si Jesus, sikatoy dinomog na totoo pian patulongan, tan no maminsan et sikaray nambaroy na alay kaarawi pian nagamoran day tulong to. (Mateo 4:24, 25) Diad tawen, main-inomay lan natulongan nen Jesus iray totoo ed amin a bansa. Diad kawalaan to ed tawen, sikatoy lawas akaparaan bilang katangbayan.

Anton Klase na Atagey a Saserdote si Jesus?

Say deskripsion ed si Jesu-Kristo a nikurit diad saray salaysay na Ebanghelyo so mamapaseguro ed sikatayo nipaakar ed inkamatulong tan matamoy a panangabagey to. Agaylan sikatoy walaan na dilin-panagsakripisyo! Diad aminpigan inkagawa, agla nituloy so pambukbukor to sanen sikato tan saray babangatan to so manasalin makapanpainawa met komon. Imbes a liknaen ton agla makapanpainawan magano, “naabagey to” iray totoon manpilalek na tulong to. Anggan sanen naksawan, narasan, tan napgaan si Jesus, “inawa’tora” tan mabulos a manpalabas na panangan pian tulongan iray masimoon a managkasalanan.​—Marcos 6:31-34; Lucas 9:11-17; Juan 4:4-6, 31-34.

Apakiwas lapud panangabagey, ginawa nen Jesus so praktikal iran kundang pian peneken iray pankaukolan na totoo ed pisikal, emosyonal, tan espiritual. (Mateo 9:35-38; Marcos 6:35-44) Sakey ni, binangatan to iran naromog so magnayon a pakainawaan tan ligliwa. (Juan 4:7-30, 39-42) Alimbawa, agaylan makapasagyat so imbitasyon to: “Dago kayo’d siak, amin yon nasasagpotan tan nabebelatan, et ikdan ta kayoy pampainawa. Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo.”​—Mateo 11:28, 29.

Abalbaleg so panangaro nen Jesus ed totoo a diad kaunoran et inter toy bilay to parad makasalanan a katooan. (Roma 5:6-8) Lapud saya ya inkatunongan nen apostol Pablo: “Ag kinawanan [nen Jehova a Dios] so dili ya Anak to, noag ingen inyawat to lapud sikatayo ya amin, panon so agto pangiter ed sikatayo, ya anggapo so bayar, na ami ganagana a pati sikato? . . . Si Kristo Jesus ya inatey; on no, sikato met so binangon ed saray inatey, a wala ed kawanan na Dios, tan sikato met so manangyesel ed sikatayo.”​—Roma 8:32-34.

Atagey a Saserdote a Makaligliwa

Bilang too, asagmak nen Jesus so eras, pega, kesaw, irap, ot-ot, tan patey. Saray desdes tan pakadetdetan a sinungdoan to so anginlong ed sikato ed nikadkaduman dalan pian manlingkor bilang Atagey a Saserdote parad maniirap a katooan. Insulat nen Pablo: “Kanian [si Jesus so] manepeg ed amin a mipara ed saray agagi to, pian sikato komon so mapangasi tan matoor ya atagey a saserdote dia ed saray bengatla a nipaakar ed Dios, pian manggawa na makapapa a nipaakar ed saray kasalanan na baley. Ta lapud no sikaton dili et nantepel na pakatukso, nayarian to a tulongan so saray natukso.”​—Hebreos 2:17, 18; 13:8.

Pinaneknekan nen Jesus a sikatoy kualipikado tan mabulos ya ontulong ed totoon onapit ed Dios. Balet, kasin kabaliksan na saya a kaukolan ton tangguyoren so masebeg tan agmapangasin Dios a masuyat a mamerdona? Peteg ya andi, ta ipapaseguro ed sikatayo na Biblia a ‘si [Jehova et] maong tan maparaan a mamerdona.’ Inkuan met na satan: “No ikompesal tayo so saray kasalanan tayo, sikato matoor tan matunong a mamerdona na saray kasalanan tayo, tan linisan to itayo ed ganagana ya agnikatunongan.” (Salmo 86:5; 1 Juan 1:9) Diad tua, saray matamoy a salita  tan ginawgawa nen Jesus so pakapatnagay panangabagey, panangasi tan panangaron mismo na Ama to.​—Juan 5:19; 8:28; 14:9, 10.

Panon a nitatarok nen Jesus so inawa ed magbabawi iran managkasalanan? Diad panutulong to ed sikaran naromog so gayaga tan kapenek ed saray masimoon a sagpot da’d pamaliket ed Dios. Diad impansulat to’d saray kapara ton alanaan a Kristiano, sinegek nen Pablo so situasyon diad impangikuan ton: “Bangta wala so sakey a baleg ya atagey a saserdote tayo, a linmabas ed saray katawenan, si Jesus ya Anak na Dios, pagnayonen tayo komon sirin a malet so panagkompesal tayo. Ta anggapo so sakey ya atagey a saserdote tayo ya agmakayarin mangasi ed saray kakapuyan tayo; noag say sakey a tinukso ed amin a singa sikatayo, ingen anggapo so kasalanan to. Onsingger itayo sirin a mailalo ed trono na grasya pian makagamor itayo na panangasi, tan makalmo itayo na grasya, pian natulongan to itayo sano panaon a kinepeg to.”​—Hebreos 4:14-16.

‘Tulong ed Panaon a Kinepeg to’

Balet, anto so gawaen tayo no nipaarap tayo’d saray problema a liknaen tayon agtayo la nayarian a resolbien​—graben sakit, pakabebelatan lapud impankasalanan, pirmin pakakadismaya, tan depresyon? Nayari tayon ikana met so mismon probisyon a maparanay a nandependian nen Jesus a mismo​—say mablin pribilihyo a pikakasi. Alimbawa, diad samay labi antis ton inter so bilay to parad sikatayo, “akikasi na lalo a marmarlang; et say linge’to singa angkakabaleg a tedter na dala a sinmaklayat angga ed dalin.” (Lucas 22:44) On, amta nen Jesus so liknaan na pirmin pampikasi ed Dios. Sikatoy “angibagat na pikakasi tan pikekerew, a tekep na mabiskeg a tagleey tan saray lua, ed saman so makapanyarin mangilaban ed sikato ed ipapatey, tan sikato so nadngel lapud masanton panaglikas to.”​—Hebreos 5:7.

Amta nen Jesus ya importantin tuloy ed totoo a sikaray ‘nadengel [a paborabli]’ tan napabiskeg. (Lucas 22:43) Sakey ni, insipan to: “No onkerew kayo na bengatla ed Ama, sikato so iter to ed sikayo ed ngaran ko. . . . Kerew kayo, et awaten yo, pian say gayaga yo nayadyari.” (Juan 16:23, 24) Kanian, nayarian tayoy oney-ey ed Dios tekep na kompiyansa ya abuloyan toy Anak ton mangusar ed autoridad to tan ed balor na dondon bagat to ed biang tayo.​—Mateo 28:18.

Makaseguro itayo a diad kipapasen to ed tawen, itarya nen Jesus so dugan klase na tulong diad manepeg a panaon. Alimbawa, no akapankasalanan itayo tan masimoon tayon magbabawi, naligliwa tayo ed panamaseguron “wala so apireng tayo ya onarap ed Ama, si Jesu-Kristo a matunong.” (1 Juan 2:1, 2) Iyapeloan itayo na Mananulong tan Managligliwa tayo a walad tawen pian naebatan iray pikakasi tayo unong ed  ngaran to tan mitunosan ed Kasulatan.​—Juan 14:13, 14; 1 Juan 5:14, 15.

Pangipanengneng na Apresasyon ed Tulong nen Kristo

Dakel niray nasasaglawi nen say eyey-ey ed Dios panamegley na Anak to. Lapud balor na dondon bagat to, “diad impanaliw nen Kristo” et nagmaliw, a singa panangibaga, “say akankien ya analiw” ed rasa na too. (Galacia 3:13; 4:5, NW; 2 Pedro 2:1, NW) Nipatnag tayoy pisasalamat tayo ed amin a gagawaen nen Kristo parad sikatayo diad pamidbir ed pankayarian to’d sikatayo tan diad maliket ya ikiwas ed imbitasyon to: “No siopaman a too, maliket ya ontumbok ed siak, iburi to so inkasikato, tan sakbaten to so krus to ya inagew-agew, tan tumboken toak.” (Lucas 9:23) Say ‘pangiburi ed dili’ et aliwa labat a balikas a sananey lay mankayarian ed sika. Ta si Kristo so “inatey lapud amin, pian saray manbilay ag-ira manbilay komon na andukdukey ed sikaran dili, noag dia ed saman so inatey lapu ed sikara.” (2 Corinto 5:14, 15) Sirin, say panangapresia ed dondon et walay baleg ya epekto to’d panmoria, ed saray kalat, tan istilo na panagbilay tayo. Say magnayon ya impakautang tayo ed “si Jesu-Kristo; ya initer to so inkasikato ya insalat ed sikatayo,” so nepeg a mamakiwas ed sikatayon manaral ni a nagkalalo nipaakar ed sikato tan ed maaron Ama to, si Jehova a Dios. Labay tayo met so ombulaslas ed pananisia, manbilay unong ed saray makagunggunan estandarte na Dios, tan magmaliw a “mapaga ed saray maabig a gawa.”​—Tito 2:13, 14; Juan 17:3.

Say Kristianon kongregasyon so paraan a pakagamoran tayo na nipanpanaon ya espiritual a tagano, panamaseseg, tan panangigiya. (Mateo 24:45-47; Hebreos 10:21-25) Singa bilang, no walay mansasakit ed espiritual a paraan, nayarian dan ‘patawag so saray mamasiken [aturon mamatatken] na iglesia.’ Inyarum nen Santiago so panamaseguro: “Et say pikakasi pananisia ilaban to so agmakayari, tan say Katawan bangonen to; tan no nankasalanan napaandi’ra ed sikato.’​—Santiago 5:13-15.

Pian iyilustra: Sakey a lakin apriso ed Abalaten na Aprika so nansulat ed sakey a matatken ed kongregasyon ya ibabalikas toy apresasyon to parad “amin na Tastasi nen Jehova a manusumpal  ed maong a kimey ya inggapo nen Jesu-Kristo diad panutulong ed totoon pambanikelan day Panarian na Dios.” Insan insulat to: “Malikeliket ak a tuloy ed impakaawat koy sulat yo. Say panagpaga yo ed espiritual a karondon ko so anenyeg a maong ed siak. Lalon apakiwas ak pian igapon talinengen so imbitasyon nen Jehova a Dios parad panagbabawi. Diad loob na 27 taon et nigalet ak tan abalang ak ed kabilungetan na kasalanan, panamalikdo, sebel iran pirerelasyonan, imoral ya agagamil, tan pan-inapan iran relihyon. Kayari impakapikabat ko ed saray Tastasi nen Jehova, liknaen kon aromog kon siansia so dalan​—say dugan dalan! Say kaukolan kon gawaen et tumboken itan.”

Dakel nin Tulong ed Asingger lan Arapen

Saray onuuges a kipapasen na mundo so mabitar ya ebidensia a manbibilay itayo la ed importantin panaon a tumbokan na ibetag na “baleg ya irap.” Natan la, sakey a baleg ya ulop a pinmaway ed amin a nasyon, tribu, tan totoo tan pansasalita et ‘uurasan day kawekawes da, tan papuputien da ed dala na Kordero.’ (Apocalipsis 7:9, 13, 14; 2 Timoteo 3:1-5) Diad pangaagamil na pananisia ed dondon bagat nen Jesus, sikaray makakagamor na panamerdona ed saray kasalanan da tan natutulongan ira a makarateng ed maapit a relasyon ed Dios​—diad tua, magmamaliw iran kakaaro to.​—Santiago 2:23.

Say Kordero, si Jesu-Kristo, “so mangipastol [ed saray makaliktar ed baleg a kairapan], tan iwanwan to ira ed saray subol na danum na bilay. Tan say Dios punasen to so amin a lua ed saray kamataan da.” (Apocalipsis 7:17, NW) Nagnap lan sumpalen ed satan nen Kristo iray kimey to bilang Atagey a Saserdote. Tulongan ton amin so kakaaro na Dios pian sigpot a nagunggunaan manlapud “saray subol na danum na bilay”​—diad espiritual, pisikal, mental, tan emosyonal a paraan. Say inggapo nen Jesus nen 33 K.P. tan say intultuloy to diad tawen nanlapu la’d nensaman so nagnap lan nagawa ed satan.

Sirin, agbalot ontutundan mangipanengneng na aralem ya apresasyon parad amin a ginawa la tan gagawaen ni na Dios tan si Kristo parad sikatayo. Impaseseg nen apostol Pablo: “Manggayaga kayo ed Katawan lawas. . . . Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.”​—Filipos 4:4, 6, 7.

Walay makabaliksan a paraan a nipanengneng moy apresasyon mo parad si Jesu-Kristo, say Mananulong tayo a walad tawen. Kaselek na agew no Mierkoles, Abril 19, 2000, saray Tastasi nen Jehova ed sankamundoan so mantitipon pian selebraan so Memoryal ya impatey nen Kristo. (Lucas 22:19) Saya so sakey a pankanawnawa pian napaaralem moy apresasyon mo parad dondon bagat nen Kristo. Sika so ampetapetang ya iimbitaan ya onatendi tan ondengel no panon kan magnayon a nagunggunaan ed makapakelkelaw ya uksoyan na Dios parad kilalaban panamegley nen Kristo. Ipangasin amtaen ed Tastasi nen Jehova ed lugar yo so eksakton oras tan pasen parad sayan espisyal a miting.

[Litrato ed pahina 7]

Amta nen Jesus so liknaan na pirmin pampikasi ed Dios

[Saray litrato ed pahina 8]

Tulongan itayo nen Kristo a manalona ed saray problema a babaleg nen say nayarian tayon bukor

[Litrato ed pahina 9]

Tutulongan itayo nen Kristo diad panamegley na maaron mamatatken