Kasin Nirekomendam so Inkasika ed Arum?

‘Anggapoy pibabalik no antoy isipen na arum ed siak!’ Diad bektan insanok odino inkadismaya anganko et makpel mo lan inkuan so ontan. Balet bektan kinmepa lay petang na ulom, nayarin aburido ka met lanlamang. Akin? Lapud talagan importanti ed kaslakan ed sikatayo no antoy isipen na arum ed sikatayo.

ON, kaukolan ya ikonsidera tayoy liknaan na arum. Nagkalalo la ed sikatayon Kristianos ya ordinadon ministros nen Jehova a Dios so nepeg a walaan na matukoy a paga nipaakar ed panmoria na arum ed sikatayo. Lapud sikatayo so “iimatonan dia ed mundo.” (1 Corinto 4:9) Diad 2 Corinto 6:3, 4, naromog tayo so marakep a konseho nen apostol Pablo: “Agkami mangiter na bengatlan kagapolan pian say panangasikaso mi agnabalaw; et dia ed balang bengatla imamatalek [“irerekomenda,” NW] mi inkasikamin dili, a singa ministros na Dios.”

Balet, anto so kabaliksan na pangirekomenda tayo na inkasikatayo ed arum? Kasin kabaliksan ton iyatagey tayoy inkasikatayo odino ipabidbir tayo so inkasikatayo odino saray abilidad tayo? Aliwan ontan. Balet peteg a nakakaukolan so pangiyaplika’d saray salita na 1 Pedro 2:12: “Masimpit komon so tongtongan yo ed utel na saray bugkalot, pian . . . nitandoro ra so Dios . . . lapu ed saray maong a ginawgawa yo a naimatonan da.” Nirekomenda na Kristianos so inkasikara diad panamegley na mismon kondukta ra! Diad kaunoran et saya so mamagalang ed Dios, ya aliwan sikatayo. Anggaman kuan, walaray personal a gungguna na pangirekomenda tayo na inkasikatayo ed arum. Usisaen tayo pay taloran pamaakaran a nayarin tua met iya ed sika.

Bilang Magmaliw ya Asawa

Alaen pan alimbawa so pamaakaran na panangasawa. Satan so regalon manlalapud si Jehova  a Dios, “dia ed sikato so pangalaan na ngaran na amin a sankaamongan ed tawen tan dia ed dalin.” (Efeso 3:15) Anganko nasabi agew et pilalek mo lay mangasawa odino miasawa. No ontan, kaunongan kalaknab so pangirekomendam na inkasika bilang magmaliw ya asawa? On, antoy reputasyon mo bilang sakey a walad kasuloan a Kristianon balolaki odino marikit?

Diad pigaran daldalin et saya so pampapagaan a maong na saray pamilya. Alimbawa, diad Ghana, sano labay na duaran too so mankasal, kaugalian lan kaukolan ya ipaamta itan na saninaro ed atateng da. Insan, saraya so mangibaga ed arum a kapamilyaan. Insan la amtaen na lakian no antoy reputasyon na bii ed komunidad. Sano kombinsido lay atateng a manepeg la so bii, pakabatan da la so biian ed intension na anak da ya asawaey marikit da. Kayari to et say biian so maneguro ed reputasyon na laki sakbay iran onabuloy ed kasal. Kanian walay diparan ed Ghana a mankuan, “Ontupleg ed saramay makakabat ed asawaen mo sakbay kan onloob ed panamaley.”

Komusta balet iray daldalin ed Mamasagur, a saray taga ditan et kaslakan lan makapanpili na asawaen da? Anggan diad saratan a lugar, say sakey lan matakken ed espiritual a Kristianon laki odino bii so makabat no konsideraen toy asimbang a rekomendasyon na saramay mikabat a maong ed magmaliw a kapareha ra, a singa saray atateng odino matakken lan kakaaro. Unong ed libron Say Sekreto na Liket ed Pamilya, nayarin itepet na bii: “‘Anton klasen reputasyon so walad sayan laki? Sioparay kakaaro to? Kasin mangipapanengneng na dilin-dangka? Panoy pantratrato to ed saray matatken la? Anton klase na pamilya so nanlapuan to? Panoy pidedeneng to ed sikara? Antoy awawey to nipaakar ed kuarta? Manaabuso ta ed saray iinumen a makabuek? Kasin sikatoy pabigla-bigla, marawal ni ingen? Antoran responsabilidad ed kongregasyon so walad sikato, tan panon ton bebembenan iratan? Kasin sikatoy narespetok a maong?’​—Levitico 19:32; Uliran 22:29; 31:23; Efeso 5:3-5, 33; 1 Timoteo 5:8; 6:10; Tito 2:6, 7.” *

Nayarin amtaen met na balolaki so nipaakar ed siopaman a Kristianon bii a labay ton asawaen. Unong ed Biblia, interesadon maong si Booz ed si Rut, say biin inasawa to ed saginonor. Sanen sikatoy tinepetan nen Rut: “Akin et akaromog ak na pamalangkap dia ed pakanengneng mo, pian pakaimano moak anta sakey ak a sankaili?” Oniay inkuan nen Booz: “Sikato so nipatnag a nasnaspot ed siak, so amin a ginawam.” (Rut 2:10-12) On, aglambengat personal a naobserbaan nen Booz si Rut a sikatoy matoor, dedikado, tan makulin bii noagta akaawat met si Booz na marakep iran komento manlapud arum.

Mipadpara, walay epekto na konduktam ed panmoria na arum ed sika no kasin sika so manepeg ya asawa. Balet panon mon nirerekomenda so inkasika ed arum no nipaakar ed saya?

Bilang Sakey ya Empleado

Say panagtrabahoan so sakey nin pasen a say panmantini na maong a kondukta et pakagunggunaan mo. Nayarin pirmi so kompetensiaan ed saray trabaho. Saray empleadon kabkabat ya ag-ontulok, lanang ya atrasado, tan agmatua so mabetbet ya eekalen ed trabaho. Wadtan met iray kompanya a mangekal na saray eksperiensiadon  empleado ta pian nabawasay gastos. Sano mananap na balo iran trabaho iray anggapoy trabaho, nayarin naromog dan saray kompanya so ontupleg ed saray datin amo ra pian naseguro ray ugali, awawey, tan eksperiensia ra ed trabaho. Dakel so Kristianon matalonan nirekomenda ray inkasikara ed saray amo ra diad mapagalang a walna ra, masimpit a panangawes, maabig ya ugali, tan matalonggaring iran Kristianon kualidad.

Say inkamatua so ontanlan kualidad, bengatlan iimanoen a maong na dakel ya amo. Singa si apostol Pablo, labay tayon “manbilay a sigagalang [“simamatua,” NW] dia ed saray amin a bengatla.” (Hebreos 13:18) Diad sakey a kompanya na minas diad Ghana, nireport a walaray manisikot. Say superbaysor ed saman a planta, sakey a Tasi so nansiansia ed trabaho bangta say arum et nakal. Akin? Naimano na say management so inkamatua to ed loob na dakel lan taon. Say inkakuli tan respeto to ed autoridad so kabkabat met. On, lapud maptek a kondukta to et sikatoy nansiansia ed trabaho to!

Antoy arum niran bengatla a nirekomenda na sakey a Kristiano so inkasikato diad panag-anap na trabaho? Kaukolan a magmaliw a marunong ed antokaman a trabahon niiter ed sika. (Uliran 22:29) Mankuli tan manpeleng ed trabaho. (Uliran 10:4; 13:4) Respetoen moy amom tan say superbaysor mo ed trabahom. (Efeso 6:5) Say inkasusto’d oras, inkamatua, inka-epektibo, tan inkakuli so kualidades a papablien na saray amo, tan saratan a kualidad so ontulong ed sikan makaromog na trabaho anggano dagdaiset so walan trabaho.

Saray Pribilihyo ed Kongregasyon

Natan nagkalalo la ed kapiganman, nakakaukolan iray matakken ed espiritual a lalaki a mangidaulo ed Kristianon kongregasyon. Akin? Lapud impropesiya nen Isaias: “Pabalegen mo so pasen na kobongkobong mo, tan pabuskag mo ed sikara so saray sakbong na saray panayaman mo.” (Isaias 54:2) Bilang kasumpalan na sayan propesiya, tuloytuloy so ibubulaslas na sankamundoan a kongregasyon nen Jehova.

Kanian no sakey kan Kristianon laki, panon mon nirekomenda so inkasika bilang kualipikadon manserbi ed sakey ya aturon kapasidad? Konsideraen pay alimbawa na kalangweran a Timoteo. Irereport nen Lucas a si Timoteo so “walaan [na] maong a dengel na inkasikato a nanlapu ed saray agawa a wala ed Listra tan Iconio.” On, lapud maabig a kondukta to, nirekomenda na sayan kalangweran so inkasikato ed arum diad duaran syudades. Kanian inimbitaan nen Pablo si Timoteo a miulop ed sikato ed panagbaroy a ministeryo.​—Gawa 16:1-4.

Panon a say sakey a laki et ‘makadampot ed betang na panangasikaso’ diad sakey a matukoy tan maridios a dalan? Maseguron aliwan diad pangampanya na pakaturo noagta diad pamayubo na saray espiritual a kualidad a nakakaukolan ed ontan iran responsabilidad. (1 Timoteo 3:1-10, 12, 13, NW; Tito 1:5-9) Nipanengneng to met a “maong a gawa so pirawa’to” diad sigpot a pibiang ed panagpulong tan panaggaway babangatan a kimey. (Mateo 24:14; 28:19, 20) Saramay irekomenda ray inkasikara bilang responsablin Kristianon lalaki so masimoon ya interesado ed pankaabiganan na agagi ra’d espiritual. Tutumboken da so simbawa nen apostol Pablo: “Panangiutob ed saray nakaukolan na saray santos; tumboken so panagparawes.” (Roma 12:13) Diad panggawa ed saratan a bengatla, say sakey a Kristianon laki et talagan ‘nirekomenda toy inkasikato bilang ministro na Dios.’

Diad Amin a Panaon

Say pangirekomenda tayoy inkasikatayo ed arum et agto labay ya ibagan sikatayoy mankuankuanan odino “managpaliket ed saray totoo.” (Efeso 6:6) Diad tua et kabaliksan toy pangirekomenda tayoy inkasikatayo ed Manamalsa tayo, si Jehova a Dios, diad sinononot a panumbok ed saray ganggan tan prinsipyo to. No nabayuboan moy espiritualidad mo tan napaelet moy relasyon mo ed si Jehova a Dios, naimano met na arum so aligwas mo diad pidedeneng mo ed kapamilyaan, katrabahoan, tan kaparam iran Kristiano. Naobserbaan da met so inkaligen tan inkasimbang mo, say maong a panagdesisyon mo, say abilidad mon mangasikaso ed responsabilidad, tan say inkamapaabebam. Diad ontan et sika so naaro tan narespeto ra tan, nagkalalo ed amin, abobonan ka nen Jehova a Dios, lapud irerekomendam so inkasika ed arum!

[Paimano ed leksab]

[Litrato ed pahina 19]

Makabat ya aamtaen na dakel ya atateng no antoy reputasyon na samay labay ya asawaen na anak da

[Litrato ed pahina 20]

Nirekomenda na sakey ya agin laki so inkasikato ed saray pribilihyo na serbisyo diad pagmaliw a makonsidera ed arum