Report na Saray Manangiyabawag na Panarian

Napapaapit so Arum ed Dios Lapud Maliket a Bilay na Pamilya

BENENDISIONAN nen Jehova si Jose na baleg a kakabatan tan pakatebek. (Gawa 7:10) Bilang resulta, say aralem a pakatalos nen Jose et “marakep nensaman ed saray mata nen Faraon, tan diad saray mata na amin ya igaganggan to.”​—Genesis 41:37.

Mipadpara met natan, iikdan nen Jehova iray totoo to na aralem a pakatalos tan pakatebek diad panamegley na panaaral day Biblia. (2 Timoteo 3:16, 17) Sayan kakabatan tan pakatebek so mamapawala na maong a bunga lapud pangiyaaplika ed nibase’d Biblia a simbawa. Say maabig a kondukta ra so mabetbet a ‘marakep ed mata na saray mangiimaton ed satan,’ a singa iyilustra na onggendan iran eksperiensia manlapud Zimbabwe.

• Sakey a bii so walaan na kakaabay a Tastasi nen Jehova. Anggaman agto labay iray Tastasi, pandinayewan toy kondukta ra, nagkalalo la’d paraan na bilay da ed abung. Naobserbaan ton alay elet na relasyon na sanasawa kanian matulok iray ananak da. Nagkalautlan naimano ton pinabpabli na asawan laki so asawa to.

Say kaslakan a sisiaen ed pigaran kultura ed Aprika et no say asawan laki et aaroen toy asawa to, say asawan bii so seguradon angusar na madyik pian “paamoen” so masiken to. Kanian inasinggeran na bii so Tasin asawan bii tan inkerew to: “Ipangasim pan ikdan moak met na madyik ya inter mo’d masiken mo ta pian say masiken ko et aroen toak a maong a singa ed panangaro na masiken mo ed sika?” Inyebat na Tasi: “Sige, awiten ko’d sika nabuas na ngarem.”

Diad tinmumbok ya agew, binisita na agin bii so kaabay to ya awit toy “madyik.” Anto iman ey? Saman et say Biblia, kalaktip so publikasyon a Pikakabat a Mangitonton ed Andi-Anggaan a Bilay. Kayari ran kinonsidera so impormasyon ed libron Pikakabat diad teman “Panangipaalagey na Sakey a Pamilya a Mangigagalang ed Dios,” onia so inkuan na agi ed bii: “Saya so ‘madyik’ ya uusaren min sanasawa pian ‘paamoen’ so sakey tan sakey, tan satan so makasengeg no akin a malet so aroan mi.” Nigapo so panangiyaral na Biblia, tan maples so inyaligwas na bii anggad punton insimbolo toy dedikasyon to ed si Jehova diad inkipalseb ed danum.

• Duaran espisyal payunir a niasain ed melag a kongregasyon ya asingger ed bandad amianen-bukig na ketegay Zimbabwe tan Mozambique so agnankabkaabungan ed loob na duaran simba. Akin? Lapud saray totoo so ondadago’d sikara pian ondengel ed ibaga ra. Insalaysay na sakey ed saray payunir no panon iyan agawa: “Nambiahe kami ed saman na 15 kilometro pian mangikondukta na sinimban panangiyaral na Biblia ed sakey ya interesado. Nairapan kami ya onla ed sayan lugar. Kaukolan min bataken so kapitekan, tan kaukolan min baliwen iray maagus ya ilog ya anggad beklew mi. Laktipen na saya so pangagto ed saray kawes tan sapatos mi, a baliwen so ilog, insan kabasil mi et manpales kami lamet.

“Nandinayew a maong iray kaabay na interesado ed seseg mi. Sakey ed saramay akaimano et say lider na lokal a relihyoson organisasyon. Inkuanto ed saray patumbok to: ‘Agyo ta labay so magmaliw a maseseg a singa saramay duaran balolaki a Tastasi nen Jehova?’ Kaimbuasan, dakel ed papatumbok to so linma ed ayaman mi pian amtaen no akin ya ontanlay inkamapeleng mi. Niarum ni, diad tinmumbok a duaran simba et dakerakel so bisita mi ya anggapo la so anggan panaon min manluto!”

Sakey ed saray binmisita ed ayaman na saray payunir ed loob na sayan duay-simba et say lider na relihyon. Isipen pay liket na saray payunir sanen sikatoy impaiyaralan na Biblia!